Kahs in Kaliyac

Tamuhlwel ac tahmtahel sacohk wiyuck, ke kuht kaliyac toeni yohk srihpac se inge, kuht tarilacna nuh sin Leum ke mokleyuck ac karihngihnyuck Lal. Mwe sramsram uh luti ac ahkkweye kuht.

Sifac an tiacna pakpucki nuh sin mwet sramsram. Elos kais sie pruhe nuh ke fwackyuck nuh selos kais sie in ahkolah sramsram lalos an. Nuh sik, arulacna wo ohiyac lah mwe sramsram ingacn falyang na nuh sin sie sin sie. Ke kom lutlutkihn, suk in etwaclah ma Leum El srihke in luti kom sin mwet kuhlwacnsap Lal.

On uh wolacna. Kuht tarilacna yohk nuh sin mwet on puhs suc akacsruhi ke suhmaht lalos in use Nguhn luhn Leum nuh ke kais sie toeni uh. Ac El ahkinsewowoye pruhe ac mwet wi ke kais sie toeni an. Pwacye, toeni sifilpac na pacl in kuhfa in mongo yohk in nguhn nuh sesr nuhkwewa.

Kuht finsrak ac pruhe lah lohm sin kais sie mempucr fah eklac nuh ke lohm muhtahl in luhlahlfongi, acn se ma Nguhn luhn Leum kuh in muhta we. Finne fohs raunikuhtlac, lohm sin mwet se kuh in eklac oacna sie acn wolacna, ma lutlut, pruhe, ac luhlahlfongi kuh in kapsreni ke luhngse. Kuht kuh in ekihn na pwacye in sie mwet tuhma lutlut luhn Leum, tuyak ac sramsram Kacl ke oacna sie acn kuht oasr we.

Srihpac luhn God enenuh in pa srihpac lasr. El kena tuhlihk Nahtuhl in sulaclah in fohlohk nuh Yohrohl, ahkolah, fal, eis mwe sang muhtahl, siliyucki, ac oaru nuh ke wuhlweacng ma oreklac ke tempuhl muhtahl.

Ingena oasr tempuhl 162 ma kihsaclah. Tempuhl mahtuh emet uh tulac in mwe ahkacsmakihn nuh ke luhlahlfongi ac mwe intei kacn mwet pioneer lasr. Kais sie tempuhl ma muhsahiyuckyak selos sikyak ke kihsackuhnlah ac kampare yohk lalos. Kais sie tulac oacna sie yot sacohk wolacna ke kuhtanglah yohk luhn mwet pioneer.

Ma kunacsr pa sie kunohkohn muhtahl in karihngihn ma inge. Ohinge, tempuhl luhn mwet pioneer ac fah sulpac eis pacl in ahksasucye ac ahkwoye ac, ke kuhtuh selos, ahksasuc yohk. Srihke ac fah orek in karuhnguhnwacng ma mahtuh luhn kais sie tempuhl fin kuh, karuhnguhnwacng kahto sacohk ac orekma wolacna ke kihl kuh muhsah luhn fihl mahtuh somlah an.

Mwe ke St. George Utah Tempuhl tuhfahna sruhmuhnyuck. Plwacn in ahksasucye Salt Lake Tempuhl, Tempuhl Square, ac plaza sisken Ohfohs Luhlahp luhn Alu uh fah sulkackihnyuck ke Fracte, Eprel 19, 2019.

Tempuhl fin acn Manti ac Logan fah ahksasucye pac ke yac ekahsr fahsruh uh. Ke plwacn ingacn ac ahkoeyucklac, ac fah ahkkahlwemyeyuck pac.

Orekma se inge e fah enenuh kais sie tempuhl an in kauli ke lusen pacl se. Mempucr ke alu uh fah fahfahlacna in engankihn ac kuhlwacnsap ke kuhtuh tempuhl sahyac ma an fototo nuh we. Ke kais sie sin orekma inge ahksahfyeyucklac, kais sie tempuhl mahtuh uh e fah sulpac kihsaciyucklac.

Tamuhlwel ac tahmtahel, kuht puhla lah tempuhl uh pa lohm muhtahl oemet ke Alu uh. Ke kuht sulkackihn plwacn in muhsaheack tempuhl sasuc se, pa inge sie ip luhn sramsram mahtuh muhtahl lasr. Ingena, nuhnakmuhnahs porongo in wo ac ke mihs. Nga fin sulkackihn tempuhl se fin acn se ma yohk srihpac nuh sum, nga suli kom in kuhi nuh ten ac mislac pruhe ke inse kuloh pwacye lom. Kuht tiac kena ke kahs yohk puhsra in eislah liki pacl muhtahliyacn toeni se inge ac ke tempuhl muhtahl luhn Leum.

Mihsenge kuht engan in sulkackihn plwacn in muhsaheack kuhtuh pac tempuhl sasuc ah, in muhsahyak ke acn inge:

Pago Pago, American Samoa; Okinawa City, Okinawa; Neiafu, Tonga; Tooele Valley, Utah; Moses Lake, Washington; San Pedro Sula, Honduras; Antofagasta, Chile; Budapest, Hungary.

Kuloh, tamuhlwel ac tahmtahel sacohk wiyuck.

Ke kuht sramsram ke tempuhl mahtuh ac sasuc lasr, lwelah kuht kais sie in ahkkahlwemye ke mukwikwi lasr lah kuht mwet tuhma lutlut pwacye luhn Leum Jisus Kraist. Lwelah kuht in ahksasucye moul lasr ke luhlahlfongi lasr in El. Lwelah kuht in eis kuh luhn Iwaclah Lal ke auliyak lasr ke kais sie lwen. Ac lwelah kuht in kihsac ac sifilpac kihsacelah moul lasr in kuhlwacnsuhpuh God ac tuhlihk Nahtuhl—ke kewana lacfahl ke acn lihsrlihsr uh.

Nga fihliyac luhngse ac mwe insewowo luhk yuruwos, ahkkweye kowos lah fwackyuck uh fahfahlacna inge ke, Alu luhn Leum. El fah fahfahlacna ne ke na srihpac luhn God e fah oreklac, ac Jehovah Kuhlacna Elac fah fahk orekma se inge tari.¹

Nga ahkinsewowoye kom ac fahkwack luhlahlfongi luhk lah God El moul! Jisus pa Kraist. Pa inge Alu Lal. Kuht pa mwet Lal. Ke ine muhtahl luhn Jisus Kraist, amen.