Ma Se Inge ac Som Nuh Oyac?
Kuht oraclah otwelah ac sulwaclah wo lasr kuht fin motko ke sulwaclah sahyac ac nuhnkuh kac lah ac som nuh oyac.
Wosasuc sifil pac fohlohkihnyuckyak luhn Jisus Kraist ahkkweye kuht in nuhnkuh ke pacl fahsruh uh. Ma inge ahkuhtweyac srihpen moul suhkawihl ac ohiyac na pwacye ke moul se tok uh. El luti nuhnak wo ke ma ke pacl fahsruh uh in kol mukwikwi lasr mihsenge.
Siena liki inge, kuht nuhkwewa etuh ke kuhtuh mwet suc elyah ke pacl se na inge: sislah mani mihsenge, engan kac mihsenge, ac tiac nuhnkuh ke pacl fahsruh uh.
Pacl lasr mihsenge ac pacl fahsruh uh ac fah engan liki na inge kuht fin motko pacl nuhkwewa ke pacl fahsruh uh. Ke kuht oruh otwelah lasr mihsenge, kuht enenuh in siyuck pacl nuhkwewa, “Ma se inge ac som nuh oyac?”
I.
Kuhtuh ma uityucklac uh pa sulwaclah inmahsrlon oruh kuhtuh ma ah kuh in tiac oruh kuhtwena ma. Nga lohng ke sie mwe srihkasrak ke kain in sulwaclah se inge ke sie tuhkweni luhn stek fin acn United States ke yac puhs somlah ah.
Acn se ma sikyak ma inge we ah pa ke sie acn in lutlut na kahto se ke college. Un tuhlihk lutlut fuhsr ekahsr muhta fin mah ah. Mwet sramsram se suc ahkuhtweyac ma sikyak se inge el fahk lah elos muhta liye squirrel kahto soko, yohk, ungung puhlal, sritacl rauni sropon sahk kwekwe soko. Kuhtuh pacl uh el ac oasr infohk uh, kuhtuh pacl uh el ac sahsack nuh lucng ac nuh ten ac raunweack sropon sahk soko ah. Tuhsruhk tuh efuh ma se inge ma liyeyuck inge pwacnlah muhtuhn un tuhlihk lutlut sac?
Oan ahsrosrwelihk kuhi nuh twen siskacn acn sac pa kosro Irish soko. Kosro soko inge pa tuhlihk lutlut inge ngwetwacng liye uh, ac squirrel soko ah pa kosro soko inge ngwetwacng na liye uh. Kais sie pacl ma squirrel soko ah ac wacngihnlac kihtin pacl ke el rauni sahk soko ah, kosro soko ah ac mahsrihk kihluckyak kuhtuhsrihk nuh met na sifil pac oan tiac mukwikwi. Pa inge ma se ma tuhlihk lutlut inge lohacng na nuhkac ah. Elos muhta na mihslac ac tiac mukwikwi, ahtron muhtahlos ngwetwacng na liye ma sikyak inge suc arulacna kahlwem lah meac ac sikyak tok.
Sahflahiyac ah, kosro soko ah fototoyang fal elan ahtuyang sruokyac squirrel soko ah ke inwacluhl. Elos fosrngahlah salah, ac un tuhlihk lutlut inge sac mayang nuh met in ollah squirrel soko ah liki kosro soko ah, tuhsruhk pahtlac lac. Squirrel soko ah misac.
Oacna sie mwet ke u sac kuh in ahksensenye squirrel soko ah ke oacna sie pacl, elos kuh in oruh paholos in mukwikwi kuh salah, tuhsruhk wangihn mwet oruh. ohinge. Elos intei muhkwena ke ma ma ac sikyak inge apkuhran na in sikyak. Wacngihn mwet siyuck, “Ma se inge ac som nuh oyac? Ke ma fihswacsr in palyeiyuck uh sikyak, mwet nuhkwewa silahklahk in kosrwaclah ma ac tuhkuh kac, tuhsruhk pahtlaclac. Tuhng auli muhkwena pa elos kuh in oruh.
Sramsram pwacye soko ingacn oacna puhpuhlyuck se. Ma se inge luhmweyuck nuh ke ma kuht liye ke moul lasr sifacna ac ke moul ac ma sikyak ke ma raunikuhtlac. Ke kuht liye ongaiyac uh orahkwack nuh yurun mwet kuh ma kuht luhngse, kuht kuh in sulwaclah in kahslah kuh mukwilac kuh muhtana mihslac. Wo kuht in siyuck sesr sifacna, “Ma se inge ac som nuh oyac?” Ke mwacta uh pihsrpihsr in sikyak ac yohk elyah, kuht tiac kuh in tiac oruh kuhtwena ma. Kuht enenuh in salah ke puhsra in ahksensen kuh kampare ke inkacnek in kohsrkohsr fal, ke srwackna oasr pacl uh.
Sulwaclah se ma nga ahkuhtweyac inge otwelah inmahsrlon kuhtuh mukwikwi kuh in wacngihn na mukwilac se ma kac. Kwacna sikyak ma inge ke sulwaclah inmahsrlon sie mukwikwi kuh sie pacna mukwikwi sahyac. Ma inge oracni sulwaclah inmahsrlon ma wo kuh koluk, tuhsruhk tuh inkaiyac uh kwacna pa s Wo pac in siyuck ma se inge lah ac som nuh oyac. Kuht oruh sulwaclah pucspucs inmahsrlon ma wo luo, inkaiyen pacl uh lah meac kuht ac oruh ke pacl lasr uh. Wacngihn ma koluk ke sritaclkihnyacn video game kuh text kuh liyeyuck TV kuh sramsram ke cell phone un. Tuhsruhk kais sie sin ma inge oasr ke ma se pahngpahng “molin pacl wo,” kalmac pa kuht fin sislah pacl lasr in oruh sie ma ah, ac wacngihnlac pacl wo lasr in oruh ma se sahyac ah. Nga etuh lah kom kuh in liye lah kuht enenuh na in motkwelah wo ma ma kuht ac lus kac ke pacl ma kuht sislah ke sie mukwikwi, finne ma se ingacn ma wo se.
Kuhtuh pacl somlah ah nga oruh sramsram se pahngpahng Wo, Wo Kuhtuh, kuh Wo Emet. Ke sramsram se ingacn, nga fahk lah ke srihpen na sie ma ac wo tiacna srihpac fal se in oruh. Ma wo ma kuht kuh in oruh uh puhs liki na pacl sukohsohk ma kuht kuh in oraclah ma inge. Kuhtuh pacl uh wo kuhtuh liki na wo, ac ma inge pa ma ma enenuh kuht in lihksreni lohacng nuh kac ke moul lasr uh. Kuht enenuh in sislah kuhtuh ma wo ah tuh kuht in kuh in sulwaclah ma sahyac ma wo kuhtuh liki kuh wo emet ah.1
Ngwetlah pal in liye. Meac ac sikyak ke pacl fahsruh in moul lasr uh ke sulwaclah ma kuht oraclah misenge uh? Esam yohk srihpaciyacn lutlut, lutlut ke wosasuc, ahksasucye wuhlweacng lasr ke kuht ipeis kuhfa luhn Leum, ac som nuh tempuhl.
II.
“Ma se inge ac som nuh oyac?” pa pac yohk srihpac ke sulwaclah lah kuht ac sifacna pakiyac muh kuht fuhkah kuh motko kacsr sifacna fuhkah. Yohk srihpac emet, kais sie sesr pa sie tuhlihk nuhtin God ma kuh in sun moul ma pahtpaht. Kain in ohiyac ma kom pakiyac in ahkuhtweyac lah suc kom an, finne in weacng orekma, kain in mwet oyac, atom kuh ma kom pihsrlac kac, ma inge kwewa ma na nuh ke kihtin pacl, kuh tiacna yohk srihpac nuh ke ip luhn ma wacngihn sahflahiyac. Nimet sulwaclah in sifacna pakiyac kuh motko keim sifacna ke ohiyac ma ahksuhfanye sie ma finsrakkihnyuck ma kom kampare nuh kac.
Tamuhlwel wiyuck, ac tahmtahel wiyuck suc intei kuh riti ma ma nga fahk inge, nga finsrak tuh kom in etuh lah efuh mwet kol lom an usot mwe luti ac kahs in kahsruh ma kuht usot inge. Kuht luhngse kom, ac Pahpah tuhmasr Inkuhsrao ac Wen Nahtuhl, Jisus Kraist, luhngse kom. Plwacn Lalos nuh sesr pa “plwacn wolacna luhn engan” (Alma 42:8). Plwacn se ingacn ac masap ac akwuck ac olweacng Lalos kol kuht nuh ke engan yohk se emet ac kaksak ke moul se inge ac ke moul se fahsruh uh. Ekihn mwet kuhlwacnsap luhn Pahpah ac Wen, kuht luti ac sang kahs in kahsruh oacna ke Elos sapkihn nuh sesr ke Nguhn Muhtahl. Wacngihn ma kuht kena kac sahyacn na in fahk ma pwacye ac in ahkkweye kowos in oruh ma Elos tahkuhnlah nuh ke inkacnwek nuh ke moul ma pahtpaht, suc “pa wo emet ke mwe sang nuhkwewa luhn God” (liye Doctrine and Covenants 14:7).
III.
Pa inge sie pac mwe srihkasrak ke ma moklweyuck ke pacl fahsruh uh ke sulwaclah ma oreklac mihsenge. Ma se inge pa sulwaclah in muhtweng kweok mihsenge in muh oraclah ma finsrakkihnyuck nuh ke pacl fahsruh uh.
Ke sie toeni luhn stek fin acn Cali, Colombia, sie tahmtahel el sruhmuhn lah el ac mukul se elac muh pahyuck se an elos kena in machruhtlac in tempuhl, tuh ke pacl sacn tempuhl se na ma an fototo emet nuh yohrohlos an pa oasr fin acn loesuhlah Peru. Ke lusen pacl loeloes se, elos sefiyac mani lalos an nuh ke molin pas ah. Sahflahiyac elos sroacng nuh ke pas ma ac som nuh Bogota, tuhsruhktuh ke elos sun acn we, elos etwacack lah nohfohn siyah ke pas soko ma ac som nuh Lima, Peru ah, iktoklac. Elos kuh in fohlohk som nuh lohm selos ah ac tiac macruhtlac, kuh macruhtlac na sahyac liki na tempuhl. Wo ohiyac, oasr sie pacna inkacnwek sahyac. Elos kuh in wi pas ah som nuh Lima elos fin insese in muhtana ten ke pas ah ke lusen lwen limekohsr ac fong limekohsr fin pas ah. Elos sulwaclah in oruh ma se inge. El fahk lah upac, finne kuhtuh sin mwet wi pas ah lwelah elos in muhta ke siyah lalos tuh elos in kuh in ahsroelihk twen ke pas ah.
Ma se ma nga fwefwelac kac ke sramsram se lal ah pa kahs se luhn tahmtahel se inge muh el tarilacna lah el ac mukul tuhmwacl ah tuhkuh in som nuh tempuhl ke ohiyac se inge, ke srihpen ma inge ekuhllah ma elos puhlakihn ke wosasuc ac ke ohiyac ma elos puhlakihn ke macruht tempuh uh. Leum El sang mwe sang nuh selos ke kapwack ma tuhkuh ke muhtweng kweok. El akihlen pac lah fuhfahsryucsr lwen limekohsr se lalos nuh tempuhl ah oraclah ma yohk in muhsaheack nguhn lalos yohk liki na fahsr pucspucs nuh ke tempuhl ma elos tiac muhtweng ke kweok.
Ke lusen yac ke na nga tuh lohng fahkwack ke luhlahlfongi se ingacn, nga motko lah ac nuh ac fuhkah eklaciyacn moul lalos elos fin tuh oraclah sie pacna sulwaclah sahyac—in sislah muhtweng kweok ma enenweyuck in macruht tempuhl.
Kuht oruh sulwaclah pucspucs ke moul uh, kuhtuh yohk ac kuhtuh oacna in srihk. Ngwetlah nuh tok, kuht kuh in liye luhpan sielacna yohk ke kuhtuh sin sulwaclah ma kuht oraclah in moul lasr. Kuht oraclah sulwaclah wo likina kuht fin motko ke sulwaclah sahyac ac motko ke acn se ma eltahl som nuh oyac uh. Ke kuht oruh, kuht ukwe mwe luti lal Prestuhn Russell M. Nelson in muhtwacwacack ke sahflahiyacn nuhnak uh.2 Nuh sesr, sahflah pa inkacnek wuhlweacng pacl nuh kwewa ma som ahluhkwelah tempuhl nuh ke moul ma pahtpaht, mwe sang ma yohk emet sin God.
Nga fahkwack kacl Jisus Kraist ac mwe sang ke Iwaclah Lal ac ma pwacye sahyac ke wosasuc ma pahtpaht Lal ke inen Jisus Kraist, amen.