O Le Savali, o le Uiga, ma le Motu o Tagata

Uso e ma taufafine, o Sammy Ho Ching lea, e fitu masina le matua, o loo matamata i le konafesi aoao i lona aiga ia Aperila talu ai.

Ata

Sammy Ho Ching o loo matamata i le konafesi

Ina ua latalata i le taimi e lagolago ai Peresitene Russell M. Nelson ma isi Pulega Aoao, sa pisi lava lima o Sammy i le uuina o lana fagu. Sa ia faia la le mea sili na sosoo ai.

Ata

Sammy Ho Ching i le taimi o le lagolagoina [o taitai]

Ua tuu mai e Sammy se uiga fou atoa i le manatu o le palota ma ou vae.

Susu maia i lenei konafesi faaleafatausaga a Le Ekalesia a Iesu Keriso o le Au Paia o Aso e Gata Ai. Ina ia seti le tulaga mo se talanoaga e faatatau i le uiga o nei faatasiga faalua i le tausaga, ou te manao tou te mafaufau i lenei vaaiga mai le tala a Luka i le Feagaiga Fou:¹

“Ua latalata [Iesu] i Ieriko, a ua nofo i le auala le tasi tauaso o faatoga i mea:

“… Ua faalogo o ia i [se] motu o tagata ua savavali ane, ona fesili lea o ia, pe se a lea.

“… Ua latou fai atu ia te ia, o Iesu le Nasareta ua maliu ane.

“Ona alaga mai ai lea o ia, ua faapea mai, Iesu e, le alo o Tavita, ia e alofa mai ia te au.”

O le faate’ia ai i lona lototoa, sa taumafai ai le motu o tagata e faafilemu o ia, ae “ua atili ai ona alaga [o ia],” na faapea mai. O se taunuuga o lona naunautaiga, sa aumai ai o ia ia Iesu, lea sa faafofoga atu i lana aioiga na tumu i le faatuatua mo le toefuataiina o lana vaai ma faamalolo ai o ia.²

E faagaeetia lava a’u i lenei tamai aafiaga manino i taimi uma ou te faitauina ai. E mafai ona tatou lagonaina le mafatia o lea tagata. E toetoe lava a mafai ona tatou lagona atu o alaga o ia mo le gauaiga o le Faaola. Tatou te ‘ata’ata i lona musu e filemu—o le mea moni, o lona naunautaiga ia ki i luga le leotele a o ta’u atu e isi tagata uma ia te ia e kiki i lalo. I lea lava tala, o se tala matagofie o le faatuatua naunautai tele. Ae e pei o mau uma, o le tele o le tatou faitau i ai, o le tele foi lena ona tatou malamalama i ai.

O le manatu e tasi na taia ai a’u talu ai nei lava o le lagona lelei sa i ai i lenei tagata i le i ai o tagata loto ma’ale’ale faaleagaga na siomiaina o ia. O le taua atoa o lenei tala o loo faalagolago i sina vaega toalaiti o alii ma tamaitai lēmailoa o ē, ina ua fesiligia e a latou uo, “O le a le uiga o lenei vāvāō?” sa i ai le vaaiga mamao, pe afai e te mafaia, e faailoa atu Keriso o le mafuaaga mo le vāvāō; o Ia o le Uiga o le Vāvāō. O loo i ai se lesona i lenei tamai talanoaga mo i tatou uma. I mataupu o le faatuatua ma le talitonuga maumaututu, e fesoasoani e tuusa’o atu lau fesili ia i latou o loo i ai tonu se faatuatua ma se talitonuga! “E mafai ea e le tauaso ona taitai le tauaso?” Sa fesili ai Iesu i se tasi taimi. “[Afai o lea] la te le pauu uma lava ea i le utu?”³

O le faamoemoega mo le auai ai i nei konafesi o le faateleina lea o le faatuatua ma le talitonuga maumaututu o tagata uma, ma e ala i le faatasi ma i matou i le asō, o le a e iloa ai o lenei sailiga o se taumafaiga e fefaasoaa’i e tagata uma. Vaavaai solo. O iinei i nei eleele e te vaai ai i le eseese o le toatele o aiga e o mai mai itu uma. E matua fiafia uo ua leva i le toe feiloai ai, o se aufaipese ofoofogia o loo faavevela, ma tagata tetee o loo alalaga mai i a latou lava mataupu masani. O faifeautalai mai se taimi ua leva o loo saili mo a latou soa sa i ai muamua, a o saili ai e faifeautalai faato’a foi mai le misiona ni a latou soa fou (pe afai tou te silafia le uiga o la’u tala!). Ma atapue? Le lagi e, fesoasoani mai! Faatasi ma telefoni i tagata uma, ua suia ai lo tatou faamoemoega mai le “o tagata uma o se faifeautalai” i le “o tagata uma o se pueata.” I le lotolotoi ai o mea uma o lenei vāvāō fiafia, e mafai ona fesili tonu ai se tasi, “O le a le uiga o ia mea uma?”

E pei ona i ai i le tatou tala i le Feagaiga Fou, o i latou ua faamanuiaina i le vaai o le a iloaina, e ui i isi mea uma e mafai ona ofa mai ia i tatou e tu masani o lenei konafesi, ae o le a itiiti pe leai foi se uiga se’i vagana ua tatou maua Iesu i le totonugalemu o ia mea uma. Ina ia pu’e le vaaiga mamao o loo tatou sailia, o le faamalologa ua Ia folafola mai, o le tulaga taua ua tatou iloa o loo i ai iinei, e le tatau ai ona faalavelave le vāvāō ia i tatou—i le olioli e tatau ai—ma tāmau lo tatou taulaiga ia te Ia. O le tatalo a failauga uma, o le faamoemoe o e uma e vivii, o le migao o malo faaaloalogia uma—ua tuuto atu uma i le valaauliaina o le Agaga o Ia o le ana lenei Ekalesia—le Keriso soifua, le Tamai Mamoe a le Atua, le Aloalii o le Filemu.

Ae tatou te le tau i ai i totonu o se maota autu mo konafesi ina ia maua ai o Ia. A faitau e se tamaitiiti le Tusi a Mamona mo le taimi muamua ma matua fiafia i le lototele o Apinati po o le savali a le autau talavou e 2,000, e mafai ona tatou faaopoopo lemu i ai e faapea o Iesu o le taulaiga autu lea i lenei tusi ofoofogia, o loo tu o se faatosinaga mai itulau uma o le tusi ma tuuina mai le sootaga i isi tagata faatupu faatuatua o loo i ai.

E faapena foi, pe a aoao se uo e uiga i lo tatou faatuatuaga, atonu e fai si ona lofituina i nisi o elemene tulagaese ma vaogagana e le masani ai o a tatou faatinoga faalelotu—o tapulaa i meaai, sapalai o le ola-tutoatasi, alasopo a paionia, gafa faaeletonika o aiga, ma le anoanoai o nofoaga autu o siteki lea e ono faamoemoe moni nisi o loo maua ai ni sirloin steak, ona o le tutusa ma le ta’uga o le upu (stake) siteki. O lea la, a o tofo ai a tatou uo fou i le anoanoai o vaaiga ma leo fou, e tatau ona tatou faasino atu ma fesoasoani ia latou malamalama i le uiga ma le faamoemoega o mea uma, i le fatu ola o le talalelei e faavavau—le alofa o Matua Faalelagi, le meaalofa togiola a se Alo paia, le taitaiga mafanafana a le Agaga Paia, le toefuataiga i aso e gata ai o nei upumoni uma ma isi mea e tele.

A alu se tasi i le malumalu paia mo le taimi muamua, atonu e ono faateia o ia i lena aafiaga. O la tatou galuega o le faamautinoa lea o faatusa paia ma sauniga ua faaalia, o laei o sauniga ma aoaoga i ata, ia le faalavelave ae ia faasino atu le tagata i le Faaola, o le ua tatou i ai iina e tapuai i ai. O le malumalu o Lona maota lea, ma e tatau ona avea o Ia ma taulaiga silisili i o tatou mafaufau ma loto—le mamalu o le mataupu faavae a Keriso ua faatumulia ai o tatou tagata atoa e pei ona faatumulia ai sauniga o le malumalu—mai le taimi tatou te faitau ai i faaupuga ua vane i luga o le faitotoa ulufale e oo atu i le taimi mulimuli tatou te faaaluina i totonu o le maota. I le lotolotoi ai o le maofa uma tatou te ofo ai, e ao ona tatou vaai, i luga atu o mea uma, i le uiga o Iesu i totonu o le malumalu.

Mafaufau i le tele na’ua o ta’imuaga lototele ma faasilasilaga fou i le Ekalesia i nei masina ua te’a. Pe a tatou auauna atu i le tasi ma le isi, pe faaleleia lo tatou aafiaga o le Sapati, pe talia se polokalama fou mo tamaiti ma le autalavou, o le a tatou misia le mafuaaga moni mo nei fetuunaiga faafaaaliga pe afai tatou te vaai i na mea o ni elemene tuueseese, e le fesootai nai lo se taumafaiga fesootai faatasi e fesoasoani ia i tatou ia atiae atili mausali i luga o le Papa o lo tatou Olataga.⁴ O le mea moni, e moni o le mea lenei na faamoemoe ai Peresitene Russell M. Nelson i lo tatou faaaogaina o le igoa ua faaalia o le Ekalesia.⁵ Afai o Iesu—Lona suafa, Lana aoaoga faavae, Lana faataitaiga, Lona paia— e mafai ona i ai i le totonugalemu o la tatou tapuaiga, o le a tatou faamalosia le upumoni sili sa aoao mai e Alema: “E tele mea o le a oo mai; [ae] faauta, e i ai se mea e tasi ua sili atu ona taua nai lo ia mea uma— … o le a soifua ma afio mai ai le Togiola i totonu o ona tagata.”⁶

O se manatu faaiu e tasi: O le siosiomaga na i ai Iosefa Samita i le amataga o le seneturi lona 19 sa sasao faaafi ai fefinauaiga a tagata i a latou molimau i le FaaKerisiano.⁷ Ae i le vāvāō na latou faia, sa punitia ma le le iloaina e nei failotu naunautai le Faaola tonu sa sailia ma le naunautai e le taulealea o Iosefa. I le tauivi ai ma le mea sa ia ta’ua o le “pogisa ma le fenumiai,”⁸ sa ia alu atu ai i le filemu o se togavao lea sa ia vaai ma faalogo ai i se molimau sili atu ona mamalu e uiga i le totonugalemu o le Faaola i le talalelei nai lo soo se isi molimau ua tatou ta’ua iinei i lenei taeao. Faatasi ai ma se meaalofa o le vaai sa lei mafaufauina ma lei faamoemoeina, sa vaai ai Iosefa i le faaaliga i lona Tama Faalelagi, le Atua silisiliese o le atulaulau, ma Iesu Keriso, Lona Alo atoatoa e Toatasi na Fanaua. Ona faia lea e le Tama le faataitaiga ua tatou talanoaina i lenei taeao: sa tusi atu o Ia ia Iesu, ma fetalai mai: “O Lo’u Atalii Pele Lenei. Faalogo ia te Ia!”⁹ E leai se faailoaga sili atu o le faasinomaga paia o Iesu, Lona silisiliese i le ata o le faaolataga, ma Lona tulaga i le silafaga a le Atua e mafai ona sili atu nai lo lena tautinoga e iva-upu.

O le vāvāō ma le fenumiaiga? Motu o tagata ma fefinauaiga? E anoanoai na mea uma i lo tatou lalolagi. O le mea moni, o loo finau ai pea ē masalosalo ma ē faatuatua e uiga i lenei faaaliga ma le toetoe o isi mea uma na ou talanoa ai i lenei aso. Ina ne’i e ono tauivi e vaai manino atili ma ia maua le uiga i le lotolotoi o le anoano o manatu, ou te faasino atu oe i lena lava Iesu e tasi ma tuu atu se molimau faaaposetolo e uiga i le aafiaga o Iosefa Samita, na oo mai pe tusa o le 1,800 tausaga i le mavae ai ona toe pupula o le tatou uo tauaso i le Auala anamua i Ieriko. Ou te molimau atu faatasi ma le toalua ia ma le anoanoai o isi i le gasologa o taimi e faapea, e moni lava o le vaaiga ma le leo sili ona faagaeetiaina o le olaga e faapea, o Iesu e le gata ina maliu ane¹⁰ ae e afio mai o Ia ia i tatou, tu i o tatou talaane, ma faia Lona apitaga faatasi ma i tatou.¹¹

Tuafafine ma Uso e, i le vāvāō faifai pea ma le pa’ō o tagipalau o mea faalavefau o o tatou aso, tau ina ia tatou tauivi ia vaai atu ia Keriso i le totonugalemu o o tatou olaga, o lo tatou faatuatua, ma la tatou auaunaga. O iina tonu o loo taoto ai le uiga moni. Ma afai e i ai ni aso e tapulaa ai la tatou vaai, pe faaitiitia ai foi lo tatou talitonuga, pe tofotofoina ma toefaaleleia lo tatou faatuatua—aua e mautinoa lava o le a faapena ona faia—ona tau ina ia tatou alalaga leotetele atu, “Iesu e, le alo o Tavita, ia e alofa mai ia te au.”¹² Ou te folafola atu i le naunautaiga faaaposetolo ma le talitonuga maumaututu faaperofeta o le a Ia faafofogaina oe ma o le a fetalai mai, pe vave pe tuai, “Inā vaai ia ou mata, o lou faatuatua ua e ola ai.”¹³ Susu maia ma tala aao mai i le konafesi aoao. I le suafa o Iesu Keriso, amene.