O Lau Malaga Sili

O se tala fatu faapelepele a tamaiti sa tusia i le tele o tausaga ua te’a e amata i le fuaiupu: “I totonu o se lua i le eleele o loo nofo ai se hobbit.”¹

O le tala ia Bilbo Baggins e faatatau i se hobbit sili ona masani ma faatauvaa o le na tuu atu i ai se avanoa sili ona ofoofogia—o le avanoa matagofie i se malaga ma le folafolaga o se taui maoae.

O le faafitauli la, o le tele o hobbit e mitamita ia i latou lava, e le fia mananao e o i ni malaga. O o latou olaga e faatatau atoa i le toafimalie. Latou te fiafia lava e tausasami i meaai e ono i le aso pe a latou mafai ona latou maua, ma faaalu o latou aso i a latou togalaau, faamatala atu tala i tagata asiasi, pepese, tātā mea fai musika, ma olioli i nai fiafiaga laiti o le olaga.

Peitai, ina ua tuu atu ia Bilbo le vaaiga o se malaga sili, o se mea na faafuasei ona matua fiafia i ai lona loto. Na ia malamalama mai le amataga o le a luitauina le malaga. E lamatia foi. E i ai foi se avanoa e ono le toefoi mai ai.

Ae, o le valaau i le malaga ua oo atu i le taele o lona loto. Ma o lea la, o lenei hobbit faatauvaa ua tuua nei le toafimalie ma alu atu i luga o le ala i se malaga sili o le a avatua o ia i ala uma “iina ma toe foi mai.”²

Masalo o se tasi o mafuaaga e faaosofia ai e lenei tala ia lagona i le toatele o i tatou ona o le tatou tala foi.

I se taimi ua leva lava, ae tatou te le’i fananau mai, i se vaitau ua galo ona o le leva ma ua natia mai le manatuaina, sa valaaulia ai foi i tatou e ō i se malaga. Na tuuina mai e le Atua, lo tatou Tama Faalelagi. O le taliaina o lenei malaga o lona uiga o le a tuua ai le toafimalie ma le saogalemu o Lona afioaga tonu. O lona uiga o le ō mai i le lalolagi mo se malaga e tumu i lamatiaga ma tofotofoga e lē mailoa.

Sa tatou iloa o le a le faigofie.

Ae sa tatou iloa foi o le a tatou maua ni ‘oa taua, e aofia ai se tino faitino ma tofo i fiafiaga ma faanoanoaga matuitui o le olaga faaletino. O le a tatou aoao e taumafai, ia saili, ma ia tauivi. O le a tatou iloaina upumoni e uiga i le Atua ma i tatou lava ia.

Ioe, na tatou iloa lava o le a tatou faia le tele o measese i luga o le ala. Ae sa tatou maua foi se folafolaga: ona o le taulaga maoae a Iesu Keriso, e mafai ai ona faamamaina i tatou mai a tatou solitulafono, faaleleia ma faapaiaina o tatou agaga, ma, i se aso, o le a toetutu ma toefaatasi ma i latou tatou te alolofa i ai.

Na tatou aoao i le tele o le alofa o le Atua ia i tatou. Na Ia aumaia ia i tatou le ola ma e finagalo o Ia ia tatou manuia. O le mea lea, na Ia saunia ai se Faaola mo i tatou. “E ui i lea,” sa fetalai mai lo tatou Tama Faalelagi, “e mafai ona e filifili mo oe lava, ona ua tuuina atu ia te oe.”³

Masalo e i ai ni vaega o le malaga faaletino na popole i ai ma faamata’uina ai fanau a le Atua, ona e talu ai o se vaega toatele o o tatou uso ma tuafafine faaleagaga na filifili e tetee i ai.⁴

E ala i le meaalofa ma le mana o le faitalia, na tatou filifili ai o le gafatia o mea e mafai ona tatou aoaoina ma avea ai e faavavau sa sili atu lea i lo lamatiaga.⁵

Ma o le faalagolago la i folafolaga ma le mana o le Atua ma Lona Alo Pele, na tatou talia ai le lu’i.

Na ou talia.

Ma e faapena foi outou.

Sa tatou malilie e tuua le saogalemu o lo tatou esetete muamua ma auai i le tatou lava malaga sili o le o “iina ma toefoi mai.”

Ae, o loo i ai i le olaga faaletino se ala o le faalavelave ia i tatou, a ea? Ua foliga mai ua galo ia i tatou la tatou malaga sili, ua sili le toafimalie ma le mafanafana i lo le tuputupu ae ma le alualu i luma.

Ae, o loo i ai pea se mea lemafaafitia, i le taele o o tatou loto, o loo matelaina mo se faamoemoega maualuga atu ma mamalu atu. O lenei matelaina o le tasi lea mafuaaga ua tosina atu ai tagata i le talalelei ma le Ekalesia a Iesu Keriso. O le talalelei toefuataiina, i se lagona, o se faafouga o le valaau i le malaga lea sa tatou taliaina i se taimi ua leva lava. O loo valaaulia i tatou e le Faaola, i aso taitasi, e tuuese ou toafimalie ma saogalemu ae auai ma Ia i le malaga o le avea ma soo.

E tele pi’oga oi lenei auala. O loo i ai mauga, o vanu, ma auala ‘alo. Atonu o loo i ai foi ni apogaleveleve faafaatusa, o tamai manu, po o se tarako se tasi pe lua foi. Ae a e tumau i luga o le ala ma faalagolago i le Atua, o le a i’u ina e maua le ala i lou taunuuga mamalu ma toefoi atu ai i lou aiga faalelagi.

E faapefea la ona e amata?

E faigofie lava.

Muamua, e manaomia ona e filifili e ua’i atu lou loto i le Atua. Tauivi i aso taitasi ia maua o Ia. Aoao e alofa ia te Ia. Ona tuu lea o lena alofa e musuia oe ia aoao, malamalama, ma mulimuli i Ana aoaoga ma aoao ina ia tausi poloaiga a le Atua. O le talalelei toefuataiina a Iesu Keriso ua foai mai ia i tatou i se ala manino ma faigofie e mafai ona malamalama i ai se tamaitiiti. Ae, ua i ai foi i le talalelei a Iesu Keriso tali i fesili aupito sili ona lavelave i le olaga ma o loo i ai se loloto naua ma le lavelave lea e oo lava i se suesuega o le olaga atoa ma mafaufauga loloto, e seāseā mafai ona tatou malamalama i ai e oo lava i sina vega sili ona laitiiti.

Afai e te faatuai i lenei malaga ona e te masalosalo i ou tomai, manatua o le avea ma soo e le o le fai o mea ia atoatoa; ae o le faia o mea ma le loto i ai. O au filifiliga e faaalia ai le tagata moni e i ai oe, e sili atu lava i lo ou tomai.⁶

E tusa pe e te toilalo, e mafai lava ona e filifili e aua ne’i lolo atu i uunaiga malolosi pe faavaivai, ae ia iloa lou lototele, fetaomi i luma, ma tulai ae. O le suega sili lena o le malaga.

E silafia e le Atua e te le atoatoa, o le a i ai taimi e te toilalo ai. E le itiiti lava le alofa o le Atua ia te oe pe a e tauivi nai lo lou manumalo.

E pei o se matua alofa, pau le mea e finagalo i ai o Ia o lou taumafai pea ma le loto i ai. O le avea ma soo e pei lava o le aoao e ta le piano. Masalo na o le pau le mea e mafai ona e faia muamua o le ta o se musika e faalētaatele o le “Chopsticks” i tamailima e lua. Ae a faaauau pea ona e aoao, o fati faigofie o le a i ai se aso e faatafaese ai ae ta pese faigata pei o sonata, rhapsody, ma concerto e ta faatasi ma aufaili.

Ia, o lena aso atonu e le oo mai i lenei olaga, ae o le a oo mai lava. Na o le pau le mea o loo finagalo ai le Atua ia e tauivi pea ma le loto i ai.

O loo i ai se mea mata’ina, toetoe lava feteenai, e uiga i lenei ala ua e filifilia: na o le pau le ala mo oe e te alualu ai i luma i lau malaga i le talalelei o le fesoasoani lea i isi ia agai foi i luma.

O le fesoasoani i isi o le ala lea o le avea ma soo. O le faatuatua, faamoemoe, alofa, agaalofa, ma auaunaga e faaleleia ai i tatou o ni soo.

E ala i au taumafaiga e fesoasoani i ē matitiva ma lē tagolima, e aapa atu ai ia i latou ua mafatia, e faamamāina lou oe lava tagata ma faamalosia, e faalauteleina lou agaga, ma lagonaina se faatuatua atili.

Ae o lenei alofa e le mafai ona oo mai faatasi ma ni faamoemoega o le toe totogiina. E le mafai ona avea ma ituaiga o auaunaga e faamoemoe ia faailoa, faamemelo i ai, pe faaituau.

O soo moni o Iesu Keriso e alolofa i le Atua ma Ana fanau e aunoa ma le faamoemoe i se mea e taui mai ai. Tatou te alolofa ia i latou e faaitaina i tatou, o e e le fiafia ia i tatou. E oo lava ia i latou e faifai mai, saua mai, ma saili e faatiga ia i tatou.

Pe a outou faatumuina o outou loto i le alofa le pona o Keriso, e te le tuua lava se avanoa mo le ita, faamasino atu, ma le faamaasiasi o isi. E te tausia poloaiga a le Atua ona e te alofa ia te Ia. I le faagasologa, e faasolosolo lemu lava ona e avea e pei o Keriso i ou mafaufauga ma amioga.⁷ O le a la se malaga e ono sili atu i lo lenei?

O le mea lona tolu tatou te taumafai ia atamamai ai i lenei malaga o le ave lea i o tatou luga o le suafa o Iesu Keriso ma aua ne’i mā i le avea ai ma tagata o le Ekalesia a Iesu Keriso.

Tatou te le nanaina lo tatou faatuatua.

Tatou te le tanuina.

I se eseesega, tatou te talanoa i isi e uiga i la tatou malaga i ni auala masani ma taliaina. O mea na a uo e fai—latou te talanoa i mea e taua ia i latou. O mea e pele i o latou loto ma faia ai se eseesega ia i latou.

O mea na e te faia. E te faamatala atu au tala ma aafiaga o se tagata o Le Ekalesia a Iesu Keriso o le Au Paia o Aso e Gata Ai.

O nisi taimi o au tala e fe’ātai ai tagata. O nisi taimi e fetagisi ai i latou. O nisi taimi o le a fesoasoani i tagata ia faaauau pea i le onosai, fetuutuunai, ma le lototele e feagai ai ma se isi itula, se isi aso, ma o mai ia latalata teisi atu i le Atua.

Faasoa atu ou aafiaga faafesagai ma se tagata, i luga o ala o faasalalauga faaagafesootai, i ni vaega, i soo se mea.

O se tasi o mea mulimuli sa ta’u atu e Iesu i Ona soo e ao ona latou o atu i le lalolagi atoa ma faasoa atu le tala o le Keriso toetu.⁸ O le asō ua tatou taliaina ai ma le olioli lena poloaiga sili.

E ma’eu lea savali mamalu e ao ona tatou faasoa atua: ona o Iesu Keriso, ua mafai ai e alii uma, tamaitai, ma tamaiti ona toefoi atu i le aiga ma le saogalemu i lo latou aiga faalelagi ma, o iina, e nonofo ai i le mamalu ma le amiotonu!

O loo tele lava isi tala lelei e faasoa atu.

Ua faaali mai le Atua i le tagata i o tatou aso! O loo i ai so tatou perofeta soifua.

Se’i o’u faamanatu atu ia te outou e le manaomia e le Atua ona e “faatau” atua le talalelei toefuataiina po o le Ekalesia a Iesu Keriso.

Ua na ona faamoemoe mai o Ia e aua ne’i e natiaina i lalo o le mea e fua ai saito.

Ma afai e filifili tagata o le Ekalesia e le mo latou, o le latou faaiuga lena.

E le faapea ai ua e toilalo. E faaauau pea ona e taulimaina i latou ma le agalelei. E le faapea e te le toe valaauliaina la i latou.

O le eseesega i le va o fesootaiga faasamasamanoa faaagafesootai ma le avea ma soo agaalofa ma lototele o le—valaaulia!

Tatou te alolofa ma faaaloalo i fanau uma a le Atua, e tusa lava po o a o latou tulaga i le olaga, e tusa lava po o a o latou ituaiga po o tapuaiga, e tusa foi po o a a latou faaiuga i le olaga.

Mo le tatou vaega, o le a tatou faapea atu, “O mai ina matamata! Saili mo oe lava ia pe faapefea e le savali i le ala o le avea ma soo ona tauia ma siitiaina.

Tatou te valaaulia tagata ia “o mai ma fesoasoani, a o tatou taumafai ia avea le lalolagi ma se nofoaga lelei atu.”

Ma e tatou te faapea atu, “O mai ma nofomau! O i matou o ou uso ma tuafafine. Matou te le atoatoa. Matou te faalagolago i le Atua ma saili e tausi Ana poloaiga.

Auai ma i matou, ma o le a e faia i matou ia lelei atili. Ma, i le faagasologa, o le a e lelei atili foi. Tatou faia faatasi ia lenei faigamalaga.”

Ina ua lagona e le tatou uo o Bilbo Baggins le gaepu o le valaau i le malaga i lona loto, sa ia filifili e fai sana malologa lelei i le po, olioli i se mālū taeao manaia, ma o le mea muamua i le taeao o le amata loa o le malaga.

Ina ua ala i luga Bilbo, sa ia matauina lona fale ua gasu, ma sa toetoe lava a faalavelave ia te ia i lana fuafuaga mamalu.

Ae sa sau lana uo o Gandalf ma fesili i ai, “O afea ea e te sau ai?”⁹ Ina ia oo atu i ana uo, sa ao ia Bilbo ona filifili mo ia lava po o le a le mea e fai.

Ma o lea la, sa faataalise atu ai le hobbit masani tele ma faatauvaa i fafo o lona faitotoa i luma i le ala o le malaga, ma sa matua vave lava lea na galo ai ia te ia lana pulou, tootoo savali, ma le solosolo. Sa ia tuua foi lana malu taeao lona lua e le’i mae’a ona taumafa.

Atonu o loo i ai foi se lesona ii mo i tatou.

Afai tatou te lagonaina ni uunaiga e auai i le malaga sili o le ola ma faasoa atu mea ua saunia e lo tatou Tama Faalelagi alofa mo i tatou i se taimi ua leva lava, ou te faamautinoa atu, o le asō o le aso lea e mulimuli ai i le Alo o le Atua ma lo tatou Faaola i luga o Lona ala o auaunaga ma le avea ma soo.

Tatou te ono faatali i le olaga atoa mo lena taimi pe a taoto mea uma ma le atoatoa. Ae o le taimi lenei e tuuto atoa atu ai i le sailia o le Atua, auauna atu i isi, ma faasoa atu o tatou aafiaga i isi.

E tuu lou pulou, tootoo savali, solosolo, ma se fale gasu.¹⁰

Ia i tatou o loo savavali i lena ala, ia lototetele, agaalofa, maua le talitonuga, ma faaauau pea!

Ia i latou ua tuua le ala, faamolemole toe foi mai, toe auai ma i matou, ma faia i matou ia malolosi atili.

Ma, ia i latou e le’i amataina lava, aisea e tuai ai? Afai e te fia tofo i mea ofoofogia o lenei malaga faaleagaga sili, laa atu loa i lau lava ia malaga sili! Talanoa ma faifeautalai. Talanoa ma au uo o le Au Paia o Aso e Gata Ai. Talanoa ma i latou e uiga i lenei galuega ofoofogia ma le mea e ofo ai.¹¹

Ua oo i le taimi e amata ai!

Afai e te lagonaina ua ono i ai i lou olaga se uiga sili atu, se faamoemoega maualuga atu, ni sootaga malolosi atu faaleaiga, ma se fesootaiga latalata atu ma le Atua; faamolemole, sau ma auai faatasi ma i matou.

Afai o e saili i se nuu o tagata o loo galulue ia avea i latou lava ma ni tagata silisili, fesoasoani ia i latou o ē mafatia, ma faia lenei lalolagi o se nofoaga sili atu, sau ma auai faatasi ma i matou!

Sau ma vaai po o le a le uiga atoa o lenei malaga maoae, ofoofogia ma faafiafiaina.

I luga o le ala o le a e iloaina ai oe lava ia.

O le a e iloaina le uiga.

O le a iloaina le Atua.

O le a e iloaina le malaga aupito sili ona faafiafiaina ma mamalu o lou olaga.

O nei mea ou te molimau atu ai i le suafa o lo tatou Togiola ma le Faaola, o Iesu Keriso, amene.