Ia Faatuatua, Ae Le o Le Lē Faatuatua

Ou te mautinoa e toatele outou e i ai ni aafiaga faapea. Ua faamanuiaina i tatou e tekinolosi faaonapo nei i le tele o auala. E mafai ona latou faafesootaia i tatou i uo ma aiga, ma faamatalaga, ma talafou e uiga i mea o tutupu i le taimi nei i le lalolagi atoa. Ae, e mafai foi ona aveesea e ia mea i tatou mai fesootaiga sili ona taua: lo tatou fesootaiga ma le lagi.

Ou te toe ta’ua le saunoaga a lo tatou perofeta, o Peresitene Russel M. Nelson: “Ua tatou ola i se lalolagi ua matua faigata ma faateteleina le fefinauai. O le maua pea o ala faasalalau faaagafesootai ma se taamilosaga 24 itula o talafou ua lofituina ai i tatou i savali e le muta. Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga.”

Na faaauau pea Peresitene Nelson i le lapatai mai faapea, “i aso a sau, o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”¹

I tausaga ua mavae, na faamatala ai e Peresitene Boyd K. Packer e uiga i se lafu ‘oti lea, ona o le matua tetele o le kiona, na saisaitia ai i fafo atu o apitaga masani ma feagai ai ma le fiaaai. I se taumafaiga a nisi o tagata lelei e faasao ia ‘oti, na faasalalau ai ni uta o vaomago faataamilo i lea nofoaga—e le o le mea lea e masani ona aai ai ‘oti, ae sa latou faamoemoe o le a faasaoina ai ‘oti i le taumalulu. O le mea e faanoanoa ai, na maua mulimuli ane le tele o ‘oti ua mamate. Sa latou ‘aina le vaomago, ae sa lei fafagaina ai i latou, sa latou matelaina ma mamate ma o latou manava tutumu.²

O le tele o savali o loo lofituina ai i tatou i le vaitau o faamatalaga o se tulaga talitutusa faaleagaga i le fafagaina o ‘oti i vaomago—e mafai ona tatou aai i le aso atoa, ae e le o fafagaina ai i tatou.

O fea tatou te maua ai le fafagaina moni faaleagaga? O le tele lava, e le o le lauiloa i luga o ala o faasalalauga faaagafesootai. Tatou te mauaina pe a tatou “fetaomi atu i luma” i luga o le ala o feagaiga, “ma piimau pea i le ai uamea,” ma aai i le fua o le laau o le ola.³ O lona uiga e tatau ona tatou faaalu moni se taimi i aso taitasi e motusia ai mai le lalolagi ae fesootai atu i le lagi.

I lana miti, na vaai ai Liae i tagata o e na ‘aai i le fua ona latou lafoai lea ona o le faatosinaga a le fale tele ma le ateatea, o le faamaualuga o le lalolagi.⁴ E mafai ona tausi ae tagata talavou i totonu o se aiga a le Au Paia o Aso e Gata Ai, auai i sauniga ma vasega sa’o uma o le Ekalesia, e oo lava i le auai i sauniga i le malumalu, ona savavali ese lea ma o atu “i ala faasaina ma leiloloa [ai].”⁵ Aisea e tupu ai lea mea? I le tele o tulaga e mafua ona, atonu sa na ona latou faia o ni faatinoga faaleagaga i fafo, ae sa le’i liua moni lava totonu o o latou loto. Sa latou aai ae sa lei fafagaina i latou.

Ata

Gaoioiga a le autalavou

I se faatusatusaga, ua ou feiloai i le toatele o outou talavou o le Au Paia o Aso e Gata Ai o e atamamai, malolosi, ma faamaoni. Ua outou iloa o outou o atalii ma afafine o le Atua ma e i ai Sana galuega mo oe e fai. Tou te alolofa atu i le Atua ma o outou “loto atoa, mafaufau atoa, manatu atoa, ma le malosi atoa.”⁶ Tou te tausia a outou feagaiga ma auauna atu i isi, e amata atu i le aiga. Tou te faatinoina le faatuatua, salamo, ma faaleleia i aso taitasi, ma aumaia ai e lenei mea ia te outou le olioli tumau. O loo outou sauniuni mo faamanuiaga o le malumalu ma isi avanoa o le a outou mauaina o ni soo moni o le Faaola. Ma o loo outou fesoasoani e saunia le lalolagi mo le Toe Afio Mai Faalua, valaaulia isi ia o mai ia Keriso ma maua faamanuiaga o Lana Togiola. O loo outou fesootai ma le lagi.

Ata

Malaga a le autalavou i le malumalu

Ioe, tou te fetaiai ma luitau. Ae e faapena foi augatupulaga uma. O aso nei o tatou, ma e manaomia ona tatou faatuatua, ae le o le le faatuatua. Ou te molimau atu ua silafia e le Alii o tatou luitau, ma e ala mai i le taitaiga a Peresitene Nelson, o loo Ia saunia ai i tatou e fetaiai ma [na luitau]. Ou te talitonu o le valaau talu ai nei a le perofeta mo se ekalesia e faatotonugalemu-i-le-aiga, ma lagolagoina e mea tatou te faia i totonu o o tatou falelotu,⁷ ua mamanuina e fesoasoani ia i tatou ia faasaoina le ola—e oo lava i le tupuolaola—i nei aso o le matelaina faaleagaga.

O le a le uiga o le avea ma se ekalesia e faatotonugalemu-i-le-aiga? E mafai ona eseese foliga o aiga i le salafa o le lalolagi. Atonu e te sau mai se aiga lea na auai i le Ekalesia mo le tele o augatupulaga. Pe ua na o oe foi le tagata o le Ekalesia i lou aiga. Atonu ua e faaipoipo pe nofofua, i ai pe leai foi se fanau i le fale.

E ui lava i o outou tulaga, e mafai lava ona e faia lou aiga ma nofoaga autu o le aoaoina ma le ola ai i le talalelei. O lona uiga o le tauaveina o le tiutetauave patino mo lou liua ma le tuputupu ae faaleagaga. O lona uiga o le mulimuli i le fautuaga a Peresitene Nelson “ina ia [toe faafou lou] fale i se malutaga o le faatuatua.”⁸

O le a taumafai le fili e faatosina ia te oe e faapea e le manaomia le fafagaina faaleagaga, po o le taufaasese atili, faapea e mafai ona faatali. O ia o le sifi o mea faalavefau ma le pogai o le faatuutuu. O le a Ia aumaia ni mea i lou taulaiga ia e foliga e faananati ae, o le mea moni, e le taua. Na te faia oe ina ia matua “pupu [lou loto] i mea e tele” ma lē amanaia ai le “mea e tasi e ao ina ia maua.”⁹

E maeu lou faafetai mo o’u “matua lelei,”¹⁰ o e na tausia lo la aiga i se fale o i ai i taimi uma le fafagaina faaleagaga, mafutaga alofa, ma gaoioiga faafiafia anoa. O aoaoga na la tuuina mai i lo’u talavou na matua lelei lava mo a’u. Matua, faamolemole ia atiae ni sootaga malolosi ma lau fanau. Latou te manaomia le tele o lou taimi, ae le o le itiiti.

A o e faia, o loo i ai iina le Ekalesia e lagolagoina oe. O o tatou aafiaga i le ekalesia e mafai ona faamalosia ai le fafagaina faaleagaga lea e faia i le fale. I lenei la tausaga, ua tatou vaaia ai lenei ituaiga lagolago a le Ekalesia i le Aoga Sa ma le Peraimeri. O le a tatou vaai atili ai foi i sauniga a le Perisitua Arona ma Tamaitai Talavou. E amata atu ia Ianuari nei, o le a fetuunai teisi le mataupu aoaoina mo nei sauniga. O le a taulai atu pea i autu o le talalelei, ae o na autu o le a ogatusa ma le Sau, Mulimuli Mai ia te A’u—Mo Tagata Taitoatasi ma Aiga. O se suiga laitiiti lenei, ae e mafai ona faia ai se aafiaga tele i le fafagaina faaleagaga o le autalavou.

O a nisi ituaiga o lagolago o loo tuuina atu e le Ekalesia? I le lotu tatou te aai ai i le faamanatuga, lea e fesoasoani ia i tatou e toe faamautu a tatou tautinoga i le Faaola i vaiaso taitasi. Ma i le lotu tatou te potopoto faatasi ai ma isi tagata talitonu o e ua osia na lava feagaiga. O sootaga alofa ua tatou atiae ma isi soo o Iesu Keriso e mafai ona avea ma lagolago mamana i lo tatou avea ai ma soo e faatotonugalemu-i-le-aiga.

Ina ua 14 ou tausaga, na siitia atu lo’u aiga i se nuu fou. Ia, atonu e le foliga o se faalavelave matautia lenei ia te outou, ae i lo’u mafaufau i lena taimi, sa matuai faigata lava. O lona uiga o le siosiomia ai e tagata ou te le iloaina. O lona uiga o le a auai isi alii talavou uma o la’u uarota i se aoga e ese mai ia te a’u. Ma i lo’u mafaufau e 14 tausaga, sa ou manatu ai, “E faapefea ona faia e o’u matua lenei mea ia te a’u?” Na ou lagona le pei ua faaleagaina lo’u olaga.

Peitai, e ala atu i a matou gaoioiga a Alii Talavou, sa mafai ai ona ou fausia ni mafutaga ma isi tagata o la’u korama, ma sa avea i latou ma a’u uo. E le gata i lea, na amata ona i ai se faamemelo faapitoa a uso o le au epikopo ma faufautua o le Perisitua Arona i lo’u olaga. Sa latou auai i a’u taaloga afeleti. Sa latou tusi mai ia te a’u ni tusi faalototele lea na ou teuina e oo mai i lenei aso. Sa faaauau pea ona latou fesootai mai ia te a’u ina ua ou alu i le kolisi ma ou tuua ai mo se misiona. O se tasi o i latou sa i ai foi i le malaevaalele ina ua ou foi mai i le fale. O le a ou faafetai pea e faavavau mo nei uso lelei ma lo sootaga o le alofa ma faamoemoega maualuluga. Sa latou faasino atu a’u i le lagi, ma sa avea le olaga ma mea susulu, fiafia, ma olioli.

E faapefea e i tatou, o ni matua ma taitai, ona fesoasoani i le autalavou ia iloa e le o tuua na o i latou a o latou savalia ai le ala o feagaiga? E faaopoopo atu i le fausia o sootaga patino, tatou te valaaulia i latou i faatasiga toatele ma toalaiti—mai konafesi a le Mo le Malosi o le Autalavou ma tolauapiga a le autalavou i gaoioiga faalevaiaso a le korama po o vasega. Aua lava ne’i manatu faatauvaa i le malosi lea e sau mai le potopoto faatasi ma isi o loo taumafai foi ina ia malolosi. Epikopo ma isi taitai, faamolemole ia taulai atu i le fafagaina o tamaiti ma le autalavou i a outou uarota. Latou te manaomia le tele o lou taimi, ae le ititii.

Pe o oe o se taitai, se tuaoi, se uso o le korama, pe na o se uso-a-tagata o le Au Paia, afai e te maua le avanoa e pa’i atu ai i le olaga o se tagata talavou, ia fesoasoani atu ia te ia ia fesootai ma le lagi. Atonu o lau faatosinaga o le “lagolago [tonu lava lea] a le Ekalesia” o loo manaomia e le tagata talavou.

Uso e ma tuafafine, ou te molimau atu o loo afio Iesu i le ulu o lenei Ekalesia. O loo Ia musuiaina o tatou taitai ma taialaiina i tatou i le fafagaina faaleagaga tatou te manaomia ia faasaoina ai le ola ma tupuolaola ai i aso e gata ai. O le a fesoasoani lena fafagaina faaleagaga ia i tatou ina ia faatuatua ae le o le lē faatuatua. I le suafa o Iesu Keriso, amene.