Pe a Mavae le Tofotofoina o lo Tatou Faatuatua

A o ou laitiiti, sa ofa mai e Frank Talley, o se tagata o le Ekalesia e fesoasoani e avatu lo’u aiga mai Puerto Rico i le Aai o Sate Leki, ina ia mafai ona faamauina i matou i le malumalu, ae sa le’i pine ae alia’e mai faafitauli. Na maʻi se tasi o o’u tuafafine, o Marivid. O le le mautonu, na tatalo ai o’u matua po o le a le mea e fai ma sa lagona pea le uunaiga e fai le malaga. Sa la talitonu afai la te mulimuli ma le faatuatua i uunaiga a le Alii, o le a tausia ma faamanuiaina lo matou aiga—ma sa faapena lava.

E tusa lava po o a faafitauli tatou te fetaiai i le olaga, e mafai ona tatou faatuatua o le a saunia e Iesu Keriso se ala e agai i luma a o tatou savavali i le faatuatua. Ua folafola mai e le Atua o i latou uma o e ola e tusa ma feagaiga ua latou osia ma Ia o le a mauaina, i Lona lava taimi, Ana faamanuiaga folafolaina uma. Sa aoao mai Elder Jeffrey R. Holland, “E vave oo mai nisi faamanuiaga, o nisi e tuai, o nisi e le oo mai vagana le lagi; ae mo i latou e taliaina le talalelei a Iesu Keriso, e oo mai lava¹

Na aoao mai e Moronae faapea “o le faatuatua o mea ia ua faamoemoe i ai ae ua le vaaia; o le mea lea, aua tou te masalosalo ona ua outou le vaaia, aua tou te le maua se molimau seia uma ona tofotofoina o lo outou faatuatua.”²

O le tatou fesili o le, O le a se mea e tatau ona tatou faia ia taulimaina sili ai tofotofoga e oo mai i lo tatou ala?

I lana uluai malelega faalauaitele i le avea ai ma Peresitene o le Ekalesia, na aoao mai ai Peresitene Russell M. Nelson: “I le avea ai ma se Au Peresitene fou, matou te fia amata faatasi ma le taunuuga i le mafaufau. Mo lenei mafuaaga, ua matou talanoa atu ai ia te outou i le asō mai se malumalu. I le taunuuga lea tatou te tauivi uma i ai ina ia faaeeina i le mana i totonu o se maota o le Alii, faamauina o ni aiga, faamaoni i feagaiga e osia i totonu o se malumalu lea e agavaa ai i tatou mo le meaalofa silisili a le Atua—le ola e faavavau. O sauniga o le malumalu ma feagaiga tou te osia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”³

A tatou mulimuli i le siufofoga o le Atua ma Lana ala o feagaiga, o le a Ia faamalosia i tatou i o tatou tofotofoga.

O le malaga a le matou aiga i le malumalu i tausaga ua te’a sa faigata, ae ina ua matou latalata atu i le malumalu i Sate Leki, Iuta, na fai mai lo’u tina, na tumu i le olioli ma le faatuatua, “O le a lelei mea uma; o le a puipuia i tatou e le Alii.” Sa faamauina i matou o se aiga, ma sa toe malosi lo’u tuafafine. Na tupu lenei mea ina ua mavae le tofotofoina o le faatuatua o o’u matua ma i le mulimuli ai i uunaiga a le Alii.

O lenei faataitaiga a o’u matua o loo uunaia ai lava o matou olaga i aso nei. O a la faataitaiga na aoao ai i matou i le mafuaaga o aoaoga faavae o le talalelei ma na fesoasoani ia i matou e malamalama ai i le uiga, faamoemoega, ma faamanuiaga e aumaia e le talalelei. O le malamalama i le mafuaaga o le talalelei a Iesu Keriso e mafai ona fesoasoani ia i tatou e fetaiai ma o tatou luitau ma le faatuatua.

I le iuga, o mea uma e valaaulia ma poloaiina i tatou e le Atua e fai o se faailoaga o Lona alofa mo i tatou ma Lona naunau e tuu mai ia i tatou faamanuiaga ua faapolopoloina mo e faatuatua. E le mafai ona tatou mafaufau o le a aoao e a tatou fanau i latou lava ia fiafia i le talalelei; o le tatou tiutetauave le aoao o i latou. A o tatou fesoasoani e aoao a tatou fanau i le ala e faaaoga ai ma le atamai lo latou faitalia, e mafai ona uunaia i latou e a tatou faataitaiga ina ia faia ni a latou lava filifiliga amiotonu. O le a fesoasoani lo latou ola faamaoni ia latou foi fanau ia iloa le upumoni o le talalelei mo i latou lava.

Alii talavou ma tamaitai talavou, faalogo i le perofeta o aso nei o loo talanoa atu ia te outou. Saili ia iloa upumoni paia ma saili ia malamalama i le talalelei mo outou lava. Na apoapoai mai talu ai nei Peresitene Nelson: O le a le poto e le o ia te oe? … Mulimuli i le faataitaiga a le Perofeta o Iosefa. Saili se nofoaga filemu. … Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo ni tali.”⁴ A o e saili le taitaiga mai lou Tama Faalelagi alofa, faalogo i fautuaga a perofeta soifua ma matau faataitaiga a ni matua amiotonu, e mafai foi ona e avea ma se sootaga malosi o le faatuatua i lou aiga.

“I matua e i ai fanau o e ua o ese mai le ala o feagaiga, ia toe foi lemu atu. Fesoasoani ia i latou ia malamalama i upumoni o le talalelei. Amata nei loa; e le o tuai lava.

O la tatou faataitaiga o le ola amiotonu e mafai ona faia ai se eseesega tele. Na saunoa mai Peresitene Nelson: “I le avea ai ma tagata o le Au Paia o Aso e Gata Ai, ua tatou masani lava i le manatu o le ‘lotu’ o se mea e tupu i totonu o o tatou falesa, ma e lagolagoina e mea o loo tutupu i le aiga. Ua tatou manaomia se fetuunaiga i lenei mamanu. O le taimi lenei mo se Ekalesia e-faatotonugalemu-i-le-aiga, ma lagolagoina e mea o loo tutupu i totonu o faletatalo o a tatou paranesi, uarota, ma siteki.”⁵

Ua aoao mai e tusitusiga paia, “Ia aoao le tama e tusa ma ona ala, aua a oo ina matua e le toe foi ese ai lava.”⁶

Na latou fai mai foi, “Ma o lenei, ona sa i ai i le talai atu o le afioga se uiga malosi e taitai atu ai tagata ia latou faia le mea tonu—ioe, sa i ai sona uiga mamana tele atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faataitaia le mana o le afioga a le Atua.”⁷

E faamatalaina se tala i se fafine sa lē fiafia i le ‘ai lole tele o lana tama. Po o le a le tele o lona faatonuina o ia e tuu, sa faamalie pea lona manao i mea suamalie. I le matuā le fiafia ai, na tonu ai ia te ia e ave lana tama e vaai i se tamalii atamai lea e na te faaaloalogia.

Sa ia alu atu ia te ia ma faapea atu i ai, “Lau susuga, ua tele naua le ‘ai lole o la’u tama. E mafai ona e ta’u atu ia te ia faamolemole e tuu le ‘ai lole?”

Sa faalogo ma le totoa o ia ona faapea atu lea i le tama a le fafine, “Alu i le fale ma toe foi mai i le lua vaiaso.”

Sa ia ave lana tama ma o atu i le fale, ma le le mautonu pe aisea na le fai atu ai i le tama e tuu le ‘ai lole.

I le lua vaiaso mulimuli ane, sa la toe foi atu. Sa tilotilo sa’o atu le alii poto lea i le tamaitiiti ma fai atu, “Sole, ua tatau ona tuu lou ‘ai tele i lole. E lē lelei mo lou soifua maloloina.”

Na lue le ulu o le tamaitiiti ma folafola atu o le a tuu.

Na fesili atu le tina o le tamaitiiti, “Aisea na e le ta’u atu ai lena mea ia te ia i le lua vaiaso talu ai?”

Sa ataata le alii poto. “O le lua vaiaso talu ai, sa ou ‘ai tele foi a’u ia i lole.”

Sa ola lenei tamalii i le amiosa’o lea na ia silafia lelei ai o le a malosi lana fautuaga pe afai o loo ia ola ai i lana lava fautuaga.

O a tatou faatosinaga i a tatou fanau e sili atu ona mamana a o latou vaaia i tatou o savavali ma le faamaoni i luga o le ala o feagaiga. O Iakopo le perofeta o le Tusi a Mamona o se faataitaiga o lea amiotonu. Na tusia e lona atalii o Enosa le aafiaga o aoaoga a lona tama:

“Ua iloa e aʼu, o Enosa, o loʼu tamā o se tagata amiotonu o ia—ona sa ia aoaoina aʼu i lana gagana, ma i le aoaoga ma le apoapoaiga foi a le Alii—ma ia faamanūina lava le suafa o loʼu Atua mo lena mea. …

“… Ma o upu sa ou faalogo soo o tautala i ai loʼu tamā e uiga i le ola e faavavau, ma le olioli o le au paia, sa gotouga ifo i loʼu loto.”⁸

Sa ola tina o autau talavou i le talalelei ma na faatumulia a latou fanau i le talitonuga maumaututu. Na lipoti mai e lo latou taitai:

“Sa aoaoina i latou e o latou tina, e faapea afai latou te le masalosalo, o le a laveaiina i latou e le Atua.

“Ma sa latou faamatala mai ia te au upu a o latou tinā, fai mai: Matou te le masalosalo lava sa mautinoa lena mea e o matou tinā.”⁹

Na faamalosia Enosa ma le autau talavou e le faatuatua a o latou matua, lea na fesoasoani ia i latou e fetaiai ma o latou lava tofotofoga o le faatuatua.

Ua faamanuiaina i tatou i le talalelei toefuataiina a Iesu Keriso i o tatou aso, lea e siitia i tatou pe a tatou lagona le lotovaivai po o le atuatuvale. Ua faamautinoa mai ia i tatou o a tatou taumafaiga o le a fua mai i le taimi a le Alii pe afai tatou te fetaomi atu i luma e ala atu i le tofotofoina o lo tatou faatuatua.

Sa ma faatasi atu ma loʻu toalua talu ai nei, ma le Au Peresitene o le Eria, ma Elder David A. Bednar i le faapaiaga o le Malumalu o Port-au-Prince Haiti. O le ma atalii o Jorge, na matou o faatasi, sa fai mai i lona aafiaga: “E ofoofogia, Papa! O le taimi lava na amata ai e Elder Bednar le tatalo o le faapaiaga, sa mafai ona ou lagonaina le faatumulia o le potu i le mafanafana ma le malamalama. Na faaopoopo e le tatalo le tele o mea i lo’u malamalamaaga e uiga i le faamoemoega o se malumalu. O le maota moni lava o le Alii.”

I le Tusi a Mamona, na aoao mai ai Nifae faapea ao tatou mananao ia iloa le finagalo o le Atua, o le a Ia faamalosia i tatou. Sa ia tusia, “O aʼu, o Nifae, ona sa ou talavou lava … ma sa ia te aʼu foi le naunau tele e fia iloa mealilo a le Atua, o le mea lea, na ou tagi atu ai i le Alii; ma faauta sa asiasi mai o ia ia te aʼu, ma faamalūlūina loʼu loto, o le mea lea na ou talitonu ai i upu uma na tautalaina e loʼu tamā; o le mea lea na ou lē fouvale ai e faasaga ia te ia e pei o oʼu uso.”¹⁰

Uso e ma tuafafine, sei o tatou fesoasoani atu ia tatou fanau ma tagata uma o siomiaina i tatou ina ia mulimuli i le ala o le feagaiga ina ia mafai ai e le Agaga ona aoao atu i latou ma faamaluluina o latou loto ia mananao e mulimuli ia te Ia i o latou olaga atoa.

A o ou mafaufau i le faataitaiga a o’u matua, ua ou iloa ai o lo tatou faatuatua i le Alii o Iesu Keriso o le a faaali mai ia i tatou le ala lea e toefoi atu ai i lo tatou aiga faalelagi. Ou te iloa e oo mai vavega pe a maea ona tofotofoina lo tatou faatuatua.

Ou te molimau atu ai ia Iesu Keriso ma Lana taulaga togiola. Ou te iloa o Ia o lo tatou Faaola ma le Laveai. Na afio mai o Ia ma lo tatou Tama Faalelagi i lena taeao i le tautotogo o le 1820 i le taulealea o Iosefa Samita, le perofeta o le Toefuataiga. O Peresitene Russell M. Nelson o le perofeta o lo tatou vaitaimi. I le suafa o Iesu Keriso, amene.