Mauaina o le Olioli i le Faasoaina Atu o le Talalelei
E i ai so tatou Tama oi le Lagi alofa, o loo faatalitali mai mo i tatou ia liliu atu ia te Ia ina ia faamanuia i o tatou olaga ma olaga o i latou o siomiaina i tatou.
O se tasi o pese Peraimeri ou te fiafia lava i ai e amata i upu nei:
Ekalesia a Iesu Keriso ua ou auai.
Ua ou iloa ai,
O le Atua,
Ma Lana fuafuaga.
Ou te talitonu ia Iesu, o le Faaola.1
E maeu lea faamatalaga faigofie ma matagofie o upumoni ua tatou talitonu i ai!
I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou iloa po o ai i tatou. Ua tatou iloa “O le Atua o le Tama o o tatou agaga. O i tatou o ... Ana fanau, ma e alofa o Ia ia i tatou. Sa tatou nonofo [faatasi ma Ia i le Lagi] ae tatou te le’i [o mai] i le lalolagi.”
Ua tatou iloa le fuafuaga a le Atua. Sa tatou i ai iina faatasi ma Ia a o Ia fofogaina mai. O le “faamoemoega atoa lava [a lo tatou Tama o i le Lagi]—Lana galuega ma Lona mamalu—ina ia mafai e i tatou taitoatasi ona olioli i Ana faamanuiaga uma. Sa Ia ... saunia se fuafuaga atoatoa e faataunuu ai Lona faamoemoega. Na tatou malamalama ma taliaina lenei fuafuaga ... o le fiafia, ... togiola, ma le ... faaolataga” ae tatou te lei o mai i le lalolagi.
“O Iesu Keriso e totonugalemu i le fuafuaga a le Atua. O Lana Togiola, na faataunuu ai e Iesu Keriso le faamoemoega a Lona Tama ma mafai ai e i tatou taitoatasi ona olioli i se tino ola pea ma le faaeaga. O Satani, po o le tiapolo, o se fili lea i le fuafuaga a le Atua” ma na faapea lava mai le amataga.
“O le faitalia, po o le tomai e filifili ai, o se tasi lea o meaalofa silisili a le Atua i Lana fanau. ... E tatau ona tatou filifili pe mulimuli ia Iesu Keriso pe mulimuli ia Satani.”2
O upumoni faigofie nei e mafai ona tatou faasoa atu i isi.
Se’i o’u faamatala atu se taimi sa faasoa atu ai e lo’u tina upumoni faigofie faapena e ala i le saoloto e faaali lagona i le faia o se talanoaga ma iloaina se avanoa.
I le tele o tausaga ua mavae, sa toe foi ai lo’u tina i Atenitina mo se asiasiga ma lo’u tuagane. Talu ai e le fiafia lo’u tina e lele, sa ia talosagaina ai se tasi o o’u atalii e faia sona faamanuiaga o le toafimalie ma le puipuiga. Na ia lagona le uunaiga ia faamanuia lona tinamatua i se taiala ma se taitaiga faapitoa mai le Agaga Paia e faamalosia ma pa’i atu i loto o le toatele o e ua mananao ia aoao i le talalelei.
I le malaevaalele i Sate Leki, sa feiloai ai lo’u tina ma lo’u tuagane i se teineitiiti e 7 tausaga le matua o loo toe foi i le fale mai se malaga faase’e i le aisa ma lona aiga. Na matauina e ona matua le umi ona ia talanoa i lo’u tina ma lo’u tuagane, sa tonu ai ia faatasi atu ia i latou. Sa la faailoa mai i laua ma le la tama teine o Eduardo ma Maria Susana ma Giada Pol. Sa i ai se fesootaiga masani ma faauo i lenei aiga lelei.
Sa fiafia uma aiga e lua e malaga faatasi i le vaalele e tasi i Buenos Aires, Atenitina. A o faaauau pea le latou talanoaga, sa matauina e lo’u tina latou te lei faalogo lava e uiga i le Ekalesia toefuataiina a Iesu Keriso pe ana le oo i lena taimi.
O se tasi o fesili muamua na fesili ai Susana o le, “E mafai ona e ta’u mai ia te a’u e uiga i lena falemataaga matagofie ma lena faatagata auro o loo i luga?”
Sa faamatala e lo’u tina o le fale matagofie e le o se falemataaga ae o le malumalu o le Alii lea tatou te osia ai feagaiga ma le Atua ina ia mafai ona tatou toe foi atu e mau faatasi ma Ia i se aso. Na ta’u atu e Susana i lo’u tina faapea a o lei alu le latou malaga i Sate Leki sa ia tatalo mo se mea e faamalosia lona agaga.
I le taimi o le faigamalaga, na tuuina atu ai e lo’u tina lana molimau faigofie ae malosi o le talalelei ma valaaulia Susana e saili faifeautalai i lona nuu. Na fesili Susana i lo’u tina, “E faapefea ona ou maua i latou?”
Na tali atu lo’u tina, “E le mafai lava ona e misia i latou; a le o i laua o ni alii talavou se toalua e ofutino papae ma fusiua, po o ni tamaitai talavou e toalua e ofu sakete, ma e fai lava pine i taimi uma o loo faaali mai ai o latou igoa faapea foi ma ‘Le Ekalesia a Iesu Keriso o le Au Paia o Aso e Gata Ai.’”
Na faafesuiai e aiga numera o telefoni ma faamavae i le malaevaalele i Beunos Aires. Na faatele ona tau mai e Susana, lea ua avea ma a’u uo lelei talu mai lena taimi faapea na ia matuai lagona le faanoanoa e tuua lo’u tina i le malaevaalele. Fai mai o ia, “Na susulu lou tina. E le mafai ona ou faamatalaina, ae na i ai se malamalama e uiga ia te ia ou te lei fia tuuaina.”
O le taimi lava na oo ai Susana i lona nuu, na la o ma lana tama teine o, Giada, e faasoa atu lenei aafiaga i le tina o Susana, e nofo i ni nai magaala e mamao ese mai lo latou fale. A o aveina atu le la taavale, na te’i Susana i le vaaia o ni alii talavou se toalua o savavali i le auala o laei e pei ona faamatalaina e lo’u tina. Sa ia faatuina lana taavale i le ogatotonu o le auala, ma fesili atu i nei alii talavou e toalua, “E te lua o mai mai le Ekalesia a Iesu Keriso?”
Sa la fai mai, “Ioe.”
“Faifeautalai?” na ia fesili atu ai.
Na la toe tali mai, “Ioe, o lea lava!”
Ona ia fai atu lea, “Feosofi mai i totonu o la’u taavale; tatou o i le fale e aoao a’u.”
E lua masina mulimuli ane, na papatiso ai Maria Susana. Na papatiso foi lana tama teine o, Giada, ina ua atoa lona iva. O loo matou galulue lava ia Eduardo, matou te alolofa pea i ai e tusa lava po o le a.
Talu mai lena taimi, ua avea Susana ma se tasi o faifeautalai sili ona maoae ua ou feiloai i ai. E pei ia o atalii o Mosaea, e aumaia le toatele o agaga ia Keriso.
I se tasi o ma talanoaga, sa ou fesili ai ia te ia, “O le a lau mealilo [o fai]? O faapefea ona e faasoa atua le talalelei i isi?”
Sa fai mai o ia, “E matuai faigofie lava. O aso uma ae ou te lei tuua lo’u fale, ou te tatalo, ma ole atu i le Tama Faalelagi e taitai atu a’u i se tasi o manaomia le talalelei i lona olaga. O nisi taimi ou te ave ai se Tusi a Mamona e faasoa atu ia i latou po o ni kata fepasiai mai faifeautalai—ma pe a amata ona ou talanoa i se tagata, e na o lou fesili ia i latou pe na latou faalogo e uiga i le Ekalesia.”
Na fai mai foi Susana, “O nisi taimi e na o lo’u ataata lava ao ou faatali mo le nofoaafi. I se tasi aso na tilotilo mai ai se alii ia te a’u ma faapea mai, “O le a le mea e te ataata ai? Na fai si ona faate’ia o a’u.
“Sa ou tali atu, ‘ou te ataata ona o loo ou fiafia!’
“Ona ia fai mai lea, ‘O le a le mea ua e matuai fiafia ai?’
“Sa ou tali atu, ‘o a’u o se tagata o Le Ekalesia a Iesu Keriso o le Au Paia o Aso e Gata Ai, ma o le mea lena e faafiafiaina ai a’u. Na e faalogo i ai?’”
Ina ua ia fai mai leai, sa ia tuuina atu ia te ia se kata fepasiai ma valaaulia o ia e auai i sauniga o le Aso Sa e sosoo ai. O le Aso Sa na sosoo ai, sa ia faafeiloaia o ia i le faitotoa.
Na aoao mai Peresitene Dallin H. Oaks:
“E tolu ni mea e mafai ona fai e tagata uma o le ekalesia e fesoasoani ai e faasoa atu le talalelei. ...
Muamua, e mafai ona tatou tatalo uma mo le manao e fesoasoani atu i lenei vaega taua o le galuega o le faaolataga. ...
Lua, e mafai ona tatou tausia ia poloaiga. … O tagata faamaoni o le ekalesia o le a maua pea le Agaga o le Faaola ... faatasi ma i latou, e taiala i latou a o latou saili atu e auai i le galuega tele o le faasoaina atu o le talalelei toefuataiina a Iesu Keriso.
“Tolu, e mafai ona tatou tatalo mo musumusuga i mea e mafai ona tatou faia … e faasoa atu ai le talalelei i isi … [ma] tatalo faatasi ma se tautinoga e faatino le musumusuga e te mauaina.”3
Uso e, tuagane, tamaiti, ma le autalavou, e mafai ona tatou faapei o la’u uo o Susana ma faasoa atu le talalelei i isi? E mafai ona tatou valaauliaina se uo e le auai i la tatou tapuaiga e o mai faatasi ma i tatou i le lotu i le Aso Sa? Pe atonu e mafai ona tatou faasoa atu se kopi o le Tusi a Mamona i se tagata o le aiga po o se uo? E mafai ona tatou fesoasoani i isi ia maua o latou tuaa i le FamilySearch pe faasoa atu i isi mea na tatou aoaoina i le aluga o le vaiaso a o tatou suesueina le Sau, Mulimuli Mai ia te A’u? E mafai ona tatou faapei atili o lo tatou Faaola, o Iesu Keriso, ma faasoa atu i isi mea o loo aumaia le olioli i o tatou olaga? O le tali i nei fesili uma o le ioe! E mafai ona tatou faia!
I tusitusiga paia tatou te faitau ai e auina atu tagata o le Ekalesia a Iesu Keriso “e galulue i lona tovine mo le faaolataga o agaga o tagata’ (Mataupu Faavae ma Feagaiga 138:56). O lenei galuega o le faaolataga e aofia ai le galuega faafaifeautalai a tagata o le au paia, faatumauina o tagata liliu mai, faatoaagaina o tagata le toaaga, galuega o le malumalu ma talafaasolopito o aiga, ma le aoaoina atu o le talalelei.”4
A’u uo pele, e manaomia i tatou e le Alii ina ia faapotopoto Isaraelu. I le Mataupu Faavae ma Feagaiga, sa Ia fetalai ai, “Pe tou te mafaufau muamua foi po o a tou te fai atu; ae ia teu i o outou mafaufau e lē aunoa afioga o le ola, ma o le a tuu atu ia te outou i lea lava itula le vaega lena o le a fua atu i tagata taitoatasi.”5
Ma le isi, ua Ia folafola mai ia i tatou:
“Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te a’u, e matua tele lava lo oulua olioli faatasi ma ia i le malo o lo’u Tama!
“Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u i le malo o lo’u Tama, e matua tele atu lo oulua olioli pe afai lua te aumai ni agaga e toatele ia te a’u!”6
O le pese Peraimeri na ou amata ai e faaiu i le fuaiupu taua lenei:
Ou te talitonu ia Iesu Keriso, o le Faaola.
O le a ou faamamalu i lona suafa.
O le a ou faia le mea sa’o;
O le a ou mulimuli i lona malamalama.
O Lana upumoni o le a ou folafola atu.7
Ou te molimau atu o nei upu e moni ma e i ai so tatou Tama oi le Lagi alofa, o loo faatalitali mai mo i tatou ia liliu atu ia te Ia ina ia faamanuia i o tatou olaga ma olaga o i latou o siomiaina i tatou. Tau ina ia tatou maua le manao e aumai ai o tatou uso ma tuagane ia Keriso o la’u tatalo lea i lea i le suafa o Iesu Keriso, amene.