Hossana ye Hallelujah—Odu-uwem Jesus Christ edi: Esit Edidemere ye Easter.
Ke ini hossana ye hallelujah emi, ekwo hallelujah—koro Enye eyeda ubong ke nsinsi ye nsinsi!
Ndima ndito-eka iren ye iban: diana hossana ye hallelujah, nnyin imedara odu-uwem Jesus Christ ke ini nka-iso Edidemere ye Easter emi. Ye edisana ima, Andinyanga osongo nnyin idem ete: “Mbufo eyenyene eto ke ami. Mbufo eyekut ukut ke ererimbot: edi esong esit; Ami nkakan ererimbot”1
Esisit isua emi ekebede, nte ami ye Sister Gong ye edima ufokemana kiet, ediye eyen-anwan mmo Ivy, edighe emen ekebe violin esie oworo edi. Enye osio utigha violin oro, obop onyung esin rosin do. Ekem enye afiak esin utigha oro ke ekebe, ebre-esisit, onyung osuhore etie. Nte obufa anditongo edibre violin, enye ama abuana kpukpru se enye odiongo abanga violin. Idahaemi, ke mme akade iso, Ivy edinehede ebre violin.
Ke ini uwem isong emi, kpukpru nnyin idi ekpri Ivy ye violin esie. Nnyin itongo ke ntongo. Diana ukpeb ye nsin-ifik, nnyin ikori inyung inam-ofon. Nte ini akade iso, nti unen-edimek ye ifiok-ukpeb edinwam nnyin ndikabare mbiet Andinyanga nnyin ke nte nnyin inamde utom ye Enye ke inwang-utom Esie2 inyung itiene usung ediomi Esie.
Mme usoro, ke esit edide eke Ikie-iba emi, emen uwutnkpo edidemere owut.3 Ke ndidara nka-iso Mfiak-nda iko Abasi Jesus Christ ndi, nnyin ibenge-idem ino Easter nko. Ke usoro mbiba oro, nnyin imedara ke edifiak Jesus Christ. Enye odu uwem—idige idahaoro kpot, edi idahaemi, idige ino ubakowo kpot, edi ono kpukpru owo. Enye ama edi onyung edi man okok mbon emi esit obungode, anam mbuot-ekong eworo-ufin, anam mme nnan ekut usung, onyung asana mmo emi efikde ayak.4 Nnyin owo kiet-kiet idi oro. Enwongo erifak Esie ada-itie, ibeheke ini-edem nnyin, ndaha nnyin eke idahaemi, mme se nnyin ikerede ibanga ini-iso.
Mkpong edi Ederi Ndak-eyop. Ke eset, ndak-eyop ekesidi idiongo ndiwut idara ke Andinyanga nnyin, ke eke Christ Ediduk Jerusalem ke Ubong Edikan, emi “ediwak owo … ekamade ndak eyop, ndien eworo eka ndisobo ye enye.”5 (Ekeme ndidi mbufo emeyom ndidiongo ntongo edidebi eke Harry Anderson emi okongode ke itie-utom President Russell M. Nelson, ke edem nkpo-itie esie.) Ke nwed Eriyarare, mbon emi eketorode Abasi ye Eyen-erong ekenam ntre “ekesine mfia ofongidem, enyung ekama ndak eyop ke ubok mmo.”6 Diana ye “ewura edine-ido” ye “anyanya ubong,” ema esin ndak eyop akam emi ekediongde Kirtland Temple.7
Nte ededi, idiongo Ederi Ndak-eyop okpon akan mme otuowo ndidara Jesus ye ndak eyop. Ke Ederi Ndak-eyop, Jesus oduk Jerusalem ke usung emi mme andibuot-idem ekefiokde ete ke prophecy oworo-osu. Nte Zechariah8 ye Andwet Psalm eketingde, Obong nnyin awat ke abak-ass oduk Jerusalem ke nte otuowo efiokde esioro-nkpo ete “Hossana ke ata edikong.”9 Hossana oworo “mbok yanga idahaemi.”10 Ekem, nte idahaemi, nnyin idrara, “Ekom enye emi edide keenying Jehovah.”11
Urua kiet emi etienede Ederi Ndakeyop edi Ederi Easter. President Russell M. Nelson ekpeb ete ke Jesus Christ “ekedi ndikpe-ison emi Enye mikamake koro nnyin imekama ison emi nnyin mikemeke ndikpe.”12 Ke akpaniko, oto ke Erisio-isop Christ, kpukpru ndito Abasi “ekeme ndibo erinyanga, oto ke edikop mme item mbet ye edinam Iko Abasi.”13 Ke Easter, nnyin ikwo hallelujah. Hallelujah oworo “ mbufo etoro Obong Jehovah.”14 “Ikwo Hallelujah” ke Handel’s Messiah edi edinem etop Easter kiet ete ke Enye edi “Edidem mme Ndidem ye Obong mme Mbong.”15
Mme ndisana edinam eke Ederi Ndakeyop ye Ederi Easter edi mbuk eke hossana ye hallelujah. Hossana edi ebenge nnyin nno Abasi man anyanga. Hallelujah owut ekom nnyin ono Jehovah ke idorenyin erinyanga ye ubong. Ke hossana ye hallelujah nnyin idifiok odu-uwem Jesus Christ nte adaha Easter ye mfiak-nda-ndi eke ekpere edem usen.
Mfiak-nda-ndi eke Ekpere-edem-usen otongo ye idiongo Abasi—emi Abasi Ete ye Eyen Esie, Jesus Christ, ekenehede ebiongore eno ekpri prophet Joseph Smith. Prophet Joseph eting ete, “Ndi afo emekeme ndiwuk enyin nse heaven ke minit ition, afo eyediongo nkpo awak akan nte afo okpokotde nkpo se ekewetde ebanga nkpo oro.”16 Koro ema efiak ekubore heaven, nnyin idiongo inyung “inim Abasi, Nsinsi Ete, ye Eyen Esie, Jesus Chrsit, ye Edisana Spirit ke akpaniko.”17edisana Mbuot Abasi.
Ke Ederi Easter eke April 3, 1836, ke ntongo ini Mfiak-nda-ndi, odu-uwem Jesus Christ ama obiongore kini ema ekediong Kirtland Temple. Mbonowo emi ekeutde Enye eno iko ntiense ebanga Enye ke nsio-nsio itoro eke ikang ye mmong ete ke: “Enyin esie ekebiet edeme ikang; idet ibuot esie ekedi afia nte ata snow; iso esie ayama akan unwana utin; ndien ke uyo esie ekebiet uyom akwa mmong emi efehede ke usop, kpa uyo Jehovah.”17
Ke ndaha oro, Andinyanga nnyin eting ete, “Ami ndi akpa ye akpatre; ami ndi enye emi odude uwem, ami ndi enye emi ekewotde; ami ndi etie-ubiong mbufo ye Ete.”19 Efen, Isio-isio iko ekom—akpa ye akpatre, odu uwem ye emi ekewotde. Ami ndi Alpha ye Omega, ntongo ye utit,20 Anditongo ye Andinam mbuotidem nnyin ofon ama.21
Ke Jesus Christ edide okure, Moses,Elias, ye Elijah nko ema edi. Oto edisana ndausung, mme ikpo prophet eset emi ema efiak eyak mme ukpohode itie-oku ye unen eno. Ntem, “eyak ukpohode eyo emi esin”22 ke mfiak-nda-ndi Ufok Abasi Esie man ediongofuri ndito Abasi.
Elijah edidi ke Kirtland Temple nko ekesu prophecy Malachi eke Akani Testament ete ke Elijah eyefiak edi “ke akwa ye ndik-ndik usen Jehovah mika-idige kanga.”23 Ke ndinam ntre, edi-di Elijah akasanga kiet, edi idige ke ndaha kiet, ye usoro Passover eke mme Jew emi ido-eset mmo osuk ebetde edifiak-ndi eke Elijah.
Ediwak nti ufokemana mbon Jew enim itie eno Elijah ke okpokoro Passover mmo. Ediwak eyoho cup kiet esim inua man ekot enyung edara enye. Ndien ubakowo,kini ido-eset Passover Seder, eno eyenowong ekeda ke enyin-usung, ke ubakini eberede esisit, man ekut edieke Elijah odu ke anwa ndikot ete oduk ufok.24
Ke prophecy ndisu ye ubak enwongo ofuri nkpo ndifiak-ndi,25 Elijah ama edi nte ekenwongde, ke Easter ye ke ntongo Passover. Enye akada odudu edibop ufokemana ndian ke isong ye heaven edi. Nte Moroni ekepbede Prophet Joseph ete ke, Elijah “eyesin ke esie ndito enwongo emi ekenamde eno mme ete, ndien esit ndito eyewongore ono mme ete mmo. Midige ntre,” Moroni ete, “ke eyebiat ofuri iso isong efep ke edidi [Obong].”26 Spirit Elijah, idiongo Edisana Spirit, ada nnyin ekpere mbon emana nnyin—eke edem, eke idahaemi, ye eke ini-iso—ke ntongo-ubon nnyin, mbuk-eset, ye utom temple.
Eyak nnyin iti esisit se Passover adade ono. Passover eti edikpok ndito Israel nyak ke isua ndutuhore Ikie-inang. Nwed Exodus eting danga mkpok-nyak emi ekedi ke ufen eke ikwot, ndang, nsung, mkpa-ufene, mbufut, nyook, edim-itiat ye ikang, nkuku-nkpoyoriyo,ye akwa ekim ama eketibe. Akpatre ufen okowot ofuri akpa-akpan ke isong Egypt edi idihe ke ufok Israel edieke—edieke ufokidung oro enimde iyip anana-ndo akpa eyen-erong ke enyong enyin-usung mmo.27
Angel mkpa eyesanga ebe mme ufok emi edbide ye idiongo iyip eyenerong.28 Edisanga mbe oro, mme pass over, ada ono Jesus Christ edikan mkpa ke akpatre. Ke akpaniko, iyip erisio-isop eke Eyenerong Abasi ono Eti Ekpemerong nnyin odudu ndibok ikot Esie ke kpukpru ebiet ye ndaha ke uboho otuerong Esie ke ikpehe nkang mbiba.
Nte uwutnkpo, Nwed Mormon owut “odudu ye eriset eke Christ”—29se Easter adade ono—kabanga mfiak-nda-ndi iba.
Akpa, eriset esine edidemere ikpokidem eke “edikem ye edisana ndo-idem nnyin”; “ofuri ndi-do-idem ye nkek-idem,” “ndien idet ibuot ndomokiet idisobke.”30 Enwongo emi ono idorenyin esok mbon emi enanade ndido-idem; mme nnan, mme inan, mbon mbungo; ye mme owo eke eduode anyan-ini udongo, udongo mbe-ibuot, mme eke itie-idem mikemke. Enye okut nnyin. Enye anam udongo nnyin okure.
Udiana enwongo Easter ye Erisio-isop eke Obong nnyin edi, ke nkang spirit ke, “eyedemere kpukpru nkpo enim ke itie mmo.”31 Edidemere eke spirit owut utom ye udong nnyin. Nte uyo ye mmong,32 oro emen “se ifonde,” “se inende,” “se idotde,” ye mbom edil.”33 Emi edi ntak prophet Alma etingde iko emi edidemere akang Edip-ye-iba34 ke nte enye etemede nnyin ete “isanga nte ofonde, ikpe edinen ikpe, inyung ika iso ke ndinam eti kpukpru ini.”35
Koro “Abasi ke idemesie ama osio isop idioknkpo ono ererimbot,”36 Erisio-isop Obong ekeme ikemeke ndidemere se ikodude kpot edi se ididude nko. Sia Enye odiongo ubiak, ukut, udongo, “oruk ofuri idomo nnyin,”37 Enye ekeme, ye mbom, ndinwam nnyin nte ekemede ye unan nnyin.38 Koro Abasi edide “mfon-mma, ye Abasi mbom nko” uduak mbom ekeme “ndikpe ekom-urua utip-ikpe.”39 Nnyin ikabare-esit inyung inam kpukpru se ikemede. Enye akanade ke nsinsi nnyin okuk “ke ubok ima Esie.”40
Mfin emi nnyin idara edidemere ye eriset. Diana ye mbufo, ami medara kabanga nkaiso Edidemere oyoho iko Abasi Jesus Christ. Nte eketongode ke isua Ikie-iba ke ini-edim emi, unwana ye eriyarare aka iso ke ndiworo ndi oto ke odu-uwem prophet ye Ufok Abasi Esie emi ekotde ke enying Esie—Ufok Abasi Jesus Christ eke mme Latter-day Saints—ye ke eriyarare ye ifiok-Abasi oto ke eno Edisana Spirit.
Ye mbufo, kini Easter emi, ami mmetie ntiense mbanga Abasi, Nsinsi Ete nnyin, ye Edima Eyen Esie, odu-uwem Jesus Christ. Ema ewot mme owo ke idiok usung ndien ekem mmo ediset. Edi odu-uwem Jesus Christ ke eti ndaha eriset Esie kpot osuk enyenyene mme idiongo emi ekekongde ke ubok, ukot, ye nkang Esie. Enye kpot ekeme nditing ete, ”Ami mmekap mbufo nsin ke eka ubok mi.”41 Enye kpot ekeme nditing ete: “Ami ndi enye emi ekemenede ke enyong. Ami ndi Jesus emi ekekongde. Ami ndi Eyen Abasi.”42
Ukem nte ekpri Ivy ye violin esie, nnyin isuk idodu ke ubak usung editotongo. Ke akpaniko, “se enyin mikwe, utong minyung ikopke, se minyung idukke owo ke esit ndikere, nkpo ekededi eke Abasi ekebengede onim ono mmo emi emade Enye.”43 Ke mme ini emi, nnyin imekeme ndikpeb awak mbanga mfonido Abasiye edisana ukeme nnyin kabanga ima Abasi man okori ke esit nnyinke nte iyomde Enye inyung inwam kiet eken. Ke mbufa usung ye ebiet, nnyin ikpenamde inyung idikabare idi, udim ke udim, mfonido ke mfonido, nte owo kie-kiet ye ke eboho.
Ndima ndito-eka irenowo ye iban ke ofuri ebiet, nte nnyin isobode inyung ikpeb otokiet, mbuotidem ye nti-ido mbufo oyoho mi ye ekikere iko Abasi ye ekom. Isang iko ntiense iko Abasi mbufo osongo isang iko ntiense ye iko Abasi mi. Mme mfina ye idara mbufo, ima mbufo emi enyenede eno eboho ubon Abasi ye eboho Ndisana-owo, ye ifiok akpaniko eke unwana edidemere emi enyenede anam oyoho edidemere iko Abasi okpon, diana ye odu-uwem Jesus Christ ke ndaha esie. Otokiet nnyin ibuotidem ete “ke ekim ye unwana, Obong, didang ye ami.”44 Ke edidiana-kiet nnyin imofiok, ke ufot mbiomo ye utom-unwam nnyin, nnyin imekeme ndibat ediwak edidiong nnyin.45 Ke edinam ibat mkpri ye ndimem nkpo kpukpru usen, nnyin imekeme ndikut ikpo nkpo emi enmade ke uwem nnyin.46
“Ndien eyedikem ete ke eyetang ndinen owo kotu ofuri idut enim, ndien mmo eyedi Zion, ye nsinsi ikwo idara.”47 Ke ini hossana ye hallelujah emi, ekwo hallelujah—koro Enye eyeda ubong ke nsinsi ye nsinsi. Ekwo hossana, eno Abasi ye Eyenerong! Ke edisana enying Jesus Chrst, amen.