Ekop uyo Esie

Ndima ndito eka iren ye iban, esit enem mi koro oto ke technology nnyin imikan isobo otokiet inyung ikpono Abasi ke usenubok Sunday emi. Edi edidiong ono nnyin ndifiok nte ke efiak emen gospel Jesus Christ edi ke ererimbot!

Ke mme udua ifang emi ebede mi, ediwak nnyin imikut mme ukpuhore ke uwem nnyin. Mme unyenge-isong, mme ikang, mme oto, mme mkpo-nnam, ye se isangade ye mmo etimere mme edu uwem enyung enam udua, ye nnim nnoidem enana.

Ke ofuri mkpo emi, nnyin imitoro mbufo, inyung ikom mbufo nte emekde ndikpang utong nno iko Abasi ke idiok ini emi ke ndidiana ye nnyin ke general conference emi. Ekim emi asangade ye mfina anam unwana Jesus Christ etim ayama. Kere banga mme eti mkpo emi nnyin owo kiet-kiet ikemede ndinam ke ini mfina ofuri ererimbot emi. Ima ye mbuotidem mbufo ke Andinyanga eyedi ntak ono owo efen ndifiok Edifiak mmen oyoho oyoho gospel Jesus Christ ndi.

Ke isua iba emi ebede mi, Sister Nelson ye ami imisobo ye mme tosin ibat mbufo ke ofuri ererimbot. Nnyin imisobo ye mbufo ke anwa ye ke esit ufok. Ke mme ebiet emi kiet kiet, ami mma nkut nte ke nkedu ke iso mbon emi Abasi ekemekde ndien ke nkekut nte Israel ebohode ke iso mi.

Nnyin idu ke eyo emi “mme ete ete nnyin ekebetde.”¹ Nnyin imenyene mkpo-itie iso ndidi ntiense nno se prophet Nephi okokutde kpot ke nkukut, ete “ke odudu Eyenerong Abasi” eyesuhore edidoro “ke idem mbon ediomo Abasi, emi esuanade eyoho ofuri ererimbot; ndien mmo ekeyoho ye edinen ido ye odudu Abasi ke akwa ubong.”²

Mbufo, ndito eka mi iren ye iban, edi kiet ke otu iren, iban, ye ndito emi Nephi okokutde. Kere banga oro!

Ke misehe ebiet emi mbufo edungde mme se idaha mbufo edide, Obong Jesus Christ edi Andinyanga, mbufo ndien prophet Abasi Joseph Smith edi prophet mbufo . Ema emek enye mbemiso ererimbot otongo ete edi prophet akpatre eyo emi, emi “owo mididipke mkpo ndomo kiet”³ ito mme ikot Abasi. Eriyarare ke aka iso oworo oto Abasi ke ini nkaiso edifiak mmen-ndi emi.

Oworo nso ono mbufo ete ke efiak emem gospel Jesus Christ edi ererimbot?

Oworo ete ke mbufo ye mbon ufok mbufo ekeme ndidu kiet ke nsinsi! Oworo ete ke ntak emi mbufo enade baptism eto owo emi enyenede unen oto Jesus Christ enyung edoride mbufo ubok nte mbon ufok Abasi Esie, mbufo emekeme ndinyene Edisana Spirit ye mbufo ofuri ini. Enye eyeteme onyung ekpeme mbufo. Oworo ete ke mbufo idinanake ndongesit mme odudu Abasi ndinwam mbufo. Oworo ete ke odudu itie oku ekeme ndidiong mbufo nte mbufo enamde mme edinam ye mme ediomo ye Abasi enyung enimde mmo. Mme akpaniko emi edi ata edidiong eno ukpong nnyin, akpan akpan ke ini emi oyobio oyomode mi.

Nwed Mormon ewet abanga edidi ye iduo ikpo idut iba. Mbuk mmo owut nte ememde idem ono mme owo ndifre Abasi, nsin item mme prophet Abasi, nyung nyom odudu, ukpono, ye inem obukidem.⁴ Ke ini ke ini, mme prophet ke edem ema eting “ikpo ye utibe mkpo eno mme owo emi mikinimke ke akpaniko.⁵

Ukpuhore iduhe ye eyo nnyin. Ke ediwak isua, ekop ikpo ye utibe mkpo ke ufok Abasi ke ofuri ererimbot. Edi ediwak owo inimke ke mme akpaniko emi—koro mmo mifiokke ebiet emi mmo enade nte eyom⁶ mme koro mmo ekpangde utong eno mbon emi minyeneke ofuri akpaniko mme koro mmo esin akpaniko ke ntak mkpo ererimbot.

Andidiok ofiok mkpo. Ke ata ediwak isua enye anam eti etie nte idiok ndien idiok etie nte eti.⁷ Mme etop esie esong uyo, edi uko uko , enyung enam inua.

Edi, mme etop eke Ete nnyin ke Heaven enyene ukphuhore. Enye eting iko ke mmem mmem usung, sung sung, ye inwan inwan man anwanga nnyin.⁸

Ke uwut mkpo, ini eke ededi emi Enye emende Ikpong ikpon Eyen Esie owut mme owo ke ererimbot, Enye anam ntre ye iko ifang. Ke Mount of Tranfiguration ye Peter, James, ye John, Abasi odoho ete, “Emi edi edima Eyen mi: ekpang utong eno enye.”⁹ Iko Esie ye mme Nephite ke akani Bountiful ekedi “Sese Edima Eyen mi, emi ami mmade, emi ami ntorode enying mi—ekpang utong eno enye.”¹⁰ Ye Joseph Smith, ke iko emi ekedade eberede eyo emi, Abasi odoho ete, “Emi edi Edima Eyen Mi. Ekpang utong eno Enye!”¹¹

Idaha emi, ndima ndito eka mi iren ye iban, efiok ete ke ini ita emi etingde ebanga mi, mbemiso Ete emen Eyen owut, mbon ekedude do ekedu ke ndik ye unana ifiok.

Mme Apostle ema efehe ndik ke ini mmo ekekutde nte obubit enyong akanare Jesus Christ okuk ke Mount of Transfiguration.

Mme Nephite ema efehe ndik koro mmo ema ekut nsobo ye ekim ke ediwak usen.

Joseph Smith okodu ke ubok odudu ekim mbemiso mme heaven eberede.

Ete nnyin ofiok ete ke ini unana ifiok ye ndik ekanare nnyin ekuk, se idinwamde nnyin ikan edi ndikpang utong nno Eyen Esie.

Koro ke ini nnyin iyomde ndikpang utong—ke akpaniko—nno Eyen Esie, eyenam nnyin ifiok se anade nte inam ke ini eke ededi.

Ata akpa iko ke Doctrine and Covenants edi ekpang utong¹² Oworo “ndikpang-utong nkop man enamt.”¹³ Ndikpang utong oworo “ndikop uyo Enye”—ndi kop se Andinyanga odohode ye ndi nam item Esie. Ke mme iko iba oro— “Ekop uyo Esie”—Abasi ono nnyin usung uforo, inemesit, ye idaresit ke uwem emi. Ana nte nnyin ikop mme iko Jehovah, ikpang utong ino mmo, inyung inam se Enye odohode!

Nte nnyin iyomde ndidi mbet Jesus Christ, udong nnyin ndikop uyo Esie ana edi nkoi-nnam. Oyom nkoi-nnam ye nsinifik ke usen ke usen ndiyoho uwem nnyin ye iko Esie, mme ukpep mkpo Esie, ye mme akpaniko Esie.

Se nnyin ikutde ke social media ikemke. Ye mme billion iko ke online ye ke ererimbot unyam urua emi oyohode ye uyom uyom, idiok uduak andidiok, mmong ke nnyin ikeme ndika man ikpang utong ino Enye?

Nnyin imikeme ndika ke mme nwed Abasi. Mmo ekpep nnyin ebanga Jesus Christ ye gospel Esie, ufon Edifak Esie, ye akamba uduak Ete nnyin kabanga inemesit ye edifak. Ndinyini ke iko Abasi kpukpru usen ofon ye spirit, akpan-akpan ke mme idiok eyo emi. Nte nnyin ikpepde iko Abasi ke usen ke usen, mme iko Christ eyeteme nnyin nte idiyode mme mfina emi nnyin mikikereke ke eyedi.

Nnyin nko imikeme ndikop uyo Esie ke temple. Ufok Jehovah edi ufok ukpep mkpo. Do ke Jehovah ekpep ke usung Esie. Do mme edinam kiet kiet ekpep ebanga Andinyanga. Do ke nnyin ikpep nte ebede ke veil nnyung nneme nneme ye heaven. Do ke nnyin ikpep nte ekpande andidiok nnyung nda odudu nto itie oku nsongo idem nnyin ye mbon emi imade. Ana nte nnyin kiet kiet inyene udong ndika do.

Ke ini emende mme ubiongo eke COVID-19 efep, mbok eyom ususng ndika nyung nnam utom ke temple. Kpukpru ini ebiatde do oyediong mbufo ye mbon ufok mbufo ke mme usung emi mkpo ndomo kiet efen mikemeke. Da ini kere banga se okopde ye se okutde ke ini odude do. Benge Jehovah ete ekpep mbufo nte eberede mme heaven man ediong uwem mbufo ye mbon emi mbufo enamde mkpo eno.

Edieke mukanke uka temple idaha emi, medoho nte yak anam utom family history, ye ndungore eke family history akan akpa. Ami mengwongo nte ke nte abiatde ini ke temple ye ke ndinam utom family history, afo eyekori onyung anam ukeme fo ndikpang utong nno Enye okpon.

Nnyin nko itim ikop uyo Esie ofon ke nte nnyin ikpepde ndifiok odu eke Edisana Spirit. Akananam idighe akpan akpan ndifiok nte Spirit etingde iko ono nnyin akan nte edide idaha. Ke Abasi ita ke kiet, Edisana Spirit edi isung utom. Enye eyeda mme ekikere edi ke esit mbufo emi Ete ye Eyen eyomde ete mbufo enyene. Enye edi Andidong esit. Enye eyeda emem edi ke esit mbufo. Enye etie ntiense abanga akpaniko onyung anam mbufo efiok se idide akpaniko nte mbufo ekpangde utong enyung ekotde iko Abasi.

Ami mefiak mbenge mbufo nte yak enam se idedi emi edinamde mbufo ekori ke spirit man enyene eriyarare eno idem mbufo.

Ndinam ntre eyenwam mbufo ndika iso iso ke uwem mbufo, ye se anade nte enam ke mme ini mfina, ye nte efiokde enyung ebede mme idomo ye mme nkari andidiok.

Ndien, ke akpatre, ikop uyo Esie ke nte inamde mme iko eke mme prophet, okut nkukut, ye mme andiyarare. Mme Apostle Jesus Christ etie ntiense ebanga Enye kpukpru ini. Mmo eda nnyin usung nte nnyin isangade ke okposong usung ke uwem emi idikpade mi.

Nso iditibe ke ini mbufo ekoide ekoi ekop, ekpangde utong, enyung enamde se Andinyanga okodohode ye se Enye odohode idaha emi oto mme prophet Esie? Ami menwongo nte ke eyediong mbufo ye sanga sanga odudu ndikan idomo, ekong, ye mmem idem. Ami menwongo ke mme utibe mkpo eyedu ke ndo mbufo, ufok mbufo, ye ke utom mbufo. Nko ami menwongo nte ke ukeme mbufo ndikop inemesit eyekori kpa ke ini oyobio oyomode ke uwem mbufo.

Akwa mbono eke April 2020 emi edi ini nnyin ndida-nti edinam kiet emi ekekpuhode ererimbot. Nte nnyin ikerede-ibanga usoro isua Ikie-iba eke Akpa Nkukut eke Joseph Smith, First Presidency ye Esop mme Apostle Duopeba ekere se nnyin ikpenam man inehede iti akpan edinam emi.

Idiongo oro okotongo Edifiak-nda oyoho iko Abasi Jesus Christ ndi onyung ada editara edikem uyoho ini edi.

Nnyin idikere mme ikpebot edi-ti nkpo inim. Edi nnyin ikere-ibanga isio-isio eti ye akpan ufon eke Akpa Nkukut oro, nnyin ikop inem ke ndibot nkpo eke midige ke granite mme ke itiat edi ke iko—iko utenge ye edisana etop—ewetde, owo-imingke ke “itiat nwed” edi ediwet ke “obuk okpokoro” eke esit nnyin.¹⁴

Tongo ekesiak Ufok Abasi, eno etop ition kpot, ye akpatre edide “Ufokemana: Etop emi enode Ererimbot,” emi President Gordon B. Hinckley akasiande ke 1995.

Idahaemi nnyin imekere-ibanga akpan ini emi ke mbuk ererimbot ye utom Abasi ke nditang Israel emi ekesuanade mbok mbenge Edidi Jesus Christ Oyoho Ikaba, nnyin, First Presidency ye Esop mme Apostle Duopeba, imeno etop anditiene emi. Ibuot-iko esie edi: “Edifiak-nda Oyoho Iko Abasi Jesus Christ ndi: Etop isua Ikie-iba enode Ererimbot” Edi First Preidency ye Esop mme Apostle Duopeba eke UIfok Abasi Jesus Christ eke Latter-day Saint ewet. Usen ofiong edi April 2020. Mna ibenge-idem ino mfin emi, ami mma mbemiso nkot nwed etop emi ke Sacred Groove, ebiet emi Joseph Smith okokutde Ete ye Eyen.

“Nnyin imeting ete ke Abasi ama ndito Esie ke ofuri idut ke ererimbot. Abasi Ete ama ono nnyin edisana emana, anana-mbiet uwem, ye anana-adanga uwa usio-isop eke Ediama Eyen Esie, Jesus Christ. Oto ke odudu eke Ete, Jesus afiak eset onyung enyene edikan akan mkpa. Enye edi Andinyanga nnyin, Uwutnkpo nnyin, ye Andifak nnyin.

“Isua Ikie-iba emi ekebede, ke ediye usenubok ini-edim ke ke 1820, ekpri Joseph Smith, emi okoyomde ndidiongo ewe ufok Abasi ekpedukde, ama oduk aka ikot-eto kiet emi ekperede ufokidung esie ke edere-edere New York, USA ndibong akam. Enye ama enyene mbume kabanga erinyanga ukpong esie onyung onim ke Abasi eyeda enye usung.

“Ye nsuhore-idem, nnyin iting ete ke ndiboro akam esie, Abasi Ete ye Eyen Esie, Jesus Christ, ema ebiongore eno Joseph enyung etongo ‘ndinam kpukpru nkpo etongo ntak efon ema’ (Acts 3:21) nte ekebemde iso eting ke Bible. Ke nkukut oro, enye ama ofiok ete ke ebe-iso Apostle ema ekekpa, Ufok Abasi eke Obufa Testament ama osop ke isong Joseph edi-di nkpo-utom ke ndifiak nda enye ndi.

“Nnyin isongo ite ke idak ndausung Abasi ye Eyen, ke mme isungutom heaven ema edi man ekpeb Joseph enyung efiak-esiak Ufok Abasi Jesus Christ. John the Baptist emi ekesetde afiak ayak odudu uduok-mmong ke edinyiyin man ekwohode idioknkpo efeb ono. Mme akpa Apostle Duopeba ita—Peter, James, ye John—efiak eyak idaha-mbet ye mme ukpohode unen itie-oku eno. Mbon efen nko ema edi, esinede Elijah, emi akayakde unen ono ndidian ufokemana otokiet ke nsinsi ebuana emi akande mkpa.

“Nnyin ika-iso idi ntiense ke ema eno Joseph Smith eno ye odudu Abasi ndikabare nwed eset kiet: Nwed Mormon—Udiana Testament Jesus Christ efen. Mme ikpa-nwed edisana nwed emi esine mbuk utom ukworo-iko Jesus Christ ke idemesie kotu mbonowo eke Edem Usoputin ke Enye ama Ekeset. Oro ekpeb abanga ntak uwem onyung anam ikpo ukpebnkpo Christ anwanga, emi edide akpan-nkpo ono ntak oro. Nte nsanga nwed Abasi ono Bible, Nwed Mormon osongo ete ke mme owo edi ndito iren ye iban eke edima Ete ke Heaven, ke Enye enyene edisana uduak ono uwem nnyin, ndien ke Eten Esie, Jesus Christ, esiting iko mfin emi ukem nte ekesinamde ke eyo eset.

“Nnyin iting ite ke Ufok Abasi Jesus Christ eke mme Latter-day Saint, emi eketongode ke April 6, 1830, edi Ufok Abasi eke Obufa Testament emi efiakde-eda-edi. Ufok Abasi okongo ke nsana-mma uwem akan itiat-inuk esie, Jesus Christ, ye ke anana-adanga Erisio-isop ye ata Eriset Esie. Inikiet efen Jesus Christ ama afiak okot mme Apostle onyung ono mmo unen itie-oku. Enye okot kpukpru nnyin edi itiene Enye ye Ufok Abasi Esie, man ibo Edisana Spirit, edinam erinyanga, man inyene nsinsi idara.

Isua Ikie-iba ebe idahaemi tongo nte Abasi Ete ye Ediama Eyen Esie, Jesus Christ, eketongo Mfiak-nda-ndi emi. Ediwak owo ke ofuri ererimbot etiene ifiok akwa prophecy emi eketingde.

“Nnyin inemesit iting ite ke Mfiak-nda-ndi emi ekenwongoke ndino ke akaka-iso oto ke nkaiso eriyarare. Isong ididige ukem aba, koro Abasi eye ‘tang kpukpru nkpo odong ke Christ’ (Ephesians 1:10).

“Ke utenge ye ekom, nnyin nte mme Apostle Esie imekot kpukpru owo ete edidiongo—nte nnyin idiongoke—ete ke ema eberede heaven. Nnyin isongo ite ke Abasi ke ananam ndima ndito iren ye iban Esie ediongo uduak Esie. Nnyin itien-se ite ke mbon emi enehede ekot etop Edifiak-nda-ndi emi enyung enam-nkpo ke mbuotidem eyebo edidiong man enyene ntiense eke idem mmo kabanga ifiok-nkpo Abasi esie ye ntak esie ke ndibenge ererimbot nno enwongo Edidi Obong ye Andinyanga nnyin, Jesus Christ Oyoho Ikaba.”¹⁵

Ndima ndito-eka iren ye iban, oro edi etop editi isua Ikie-iba nnyin nno ererimbot kabanga Edifiak-nda iko Abasi Jesus Christ ndi ke uyoho esie. Ekabare enye esin ke usem Duopeba. Mme usem efen eyesop etiene. Eyesop odu ke websit Ufok Abasi, emi edinyenede eke mbufo emi ewetde-wet. Ekot enye ikpong ye mbon ufokemana ye mme ufan mbufo. Ekere akpaniko esie ke esit enyung ekere ebenge ufon emi akpaniko oro edinyenede ke uwem mbufo edieke mbufo enamde mmo, ekpang-utong eno mmo, enyung enam mme mbet ye ediomi emi asangade ye mmo

Ami mmefiok nte ke Joseph Smith edi prophet emi Jehovah ekemekde ete eberede akpatre eyo emi. Oto ke enye ema efiak eda Ufok Abasi Christ edi ke ererimbot. Joseph Smith akada iyip esie osongo iko ntiense esie. Ami mmema nyung mkpono enye!

Abasi odu uwem! Jesus edi Christ! Ema efiak eda Ufok Abasi Esie edi! Enye ye Ete Esie, Ete nnyin ke Heaven, ke ekpeme nnyin. Ami nting iko ntiense emi ke edisana enying Jesus Christ, amen.