Nte Itie-oku Odiongde mme Iwaad
Otode ke itie oku, ekeme ndidibede nnyin. Itie oku emen unwana edi ke ererimbot nnyin.
Ami mekop inem ndidu mi. Kini nkefiokde ke akpa ini ke nyenyene ifet nditing iko nno mbufo mfin, ami mma nehede nkop inem edi ke ukem ini oro ye oyoho nsuhore idem. Ami mebiat ediwak ini ndikere mbanga se nkemede ndibuana, Ami mmenyene idorenyin ke spirit eyeting ono mbufo nenen oto ke iko mi.
Ke Nwed Mormon, Lehi ono ndito esie kiet kiet edidiong mbemiso enye akpa emi anwamde mmo ndikut ukeme mmo ye nsinsi odudu mmo. Ami nsip nkan kotu ndito itiaita, ndien ke isua emi ebede Ami nkedi nkukure eyen emi odude ke ufok ke akpa ini. Ke minyeneke ndito-eka mi ekperede nyung nnyeneke owo ndineme-nneme kpukpru ini ekedi okposong ono mi. Ama odu ediwak okoneyo emi nkekopde ikpong etieti. Ami menem esit mbanga ete ye eka mmi, emi ekedomode ukeme mmo ke ndinwam mmi. Uwutnkpo kiet ekedi kini ete mmi okonode mmi edidiong itie oku eke ndongesit kini idomo kiet. Kini ediongde enye ekure, nkpo ikekpuhoke ke usop, edi Ami mma nkeme ndikop emem ye ima otode Ete Ke Heaven ye otode ete mi. Mma mbo edidiong ndinyene ete emi adade ke eti ndaha emi ekemede ndino edidiong itie oku kini ekededi nyomde mmo nko emi awamde mmi ndikut ukeme mmi ye nsinsi odudu, kpa nte Lehi akanamde kini enye okodiongde ndito esie.
Ke-musehe mme ndaha fo, afo amekeme ndiyene unen ke mme edidiong itie oku. Otode mbon ufokemana, ufan, mme ono unwam ndito-ete, mme ada ibuot ke itie oku, ye Ete eke Heaven emi mikemeke ndibianga fi, afo emekeme ndibo mme edidiong eke itie-oku. Elder Neil L. Andersen okodoho: “Mme edidiong eke itie oku enehede okpon akan enye emi obupde ete ono eno. … Nte nnyin isangade ofon, mme ndutim eke itie oku anam uwem nnyin okori.”1
Kukop eyighe ndibup edidiong kini afo oyomde esisit edikpeme. Edi ke mme okposong ini ke nnyin isiyom Spirit ite eneghede ekpeme nnyin. Iduhe enye emi ofonde ama, ndien nnyin kpukpru imesikop nsongo mkpo. Ndusuk nnyin imisinyene oyomonsia, ekaha, idiok-udong, mme ekikere ke nnyin inamke ofon. Edidiong itie oku ekeme ndinwam nnyin ibe mme mfina emi ndien ibo emem nte nnyin ibede iduk ke ini iso. Menim nte ke nnyin imidomo ndidu yak ofon ke ndibo mme edidiong emi.
Usung efen itie oku odiongde nnyin oto ke mme edidiong eke patriarch. Ami mma mkpep ndifiak nkese edidiong eke patriarch mi ini kiet ekededi mikopke inem mme nkopde ikpong. Edidiong awam mi ndikut odudu mi ye asanga asanga uduak emi Abasi enyenede ono mi. Enye odong mi esit onyung awam mi ndikut nkan ke usung eke ererimbot. Enye eti mi abanga mme eno mi ye mme edidiong eke ami ndibode edieke ndude uwem emi odotde. Enye nko anwam mmi nditi mbanga nyung nkop emem nte ke Abasi eyeno mme iboro onyung eberede usung ono mi ke nnen-nnen ini kini nehede nyom enye.
Mme edidiong eke patriarch anwam ndibenge nnyin idem kabanga ndiyong nkedu ye Ete eke Heaven. Ami mediongo ke edidiong eke patriarch oto Abasi ndien ekeme ndiwam nnyin ikpuhore mmem idem nnyin isin ke ukeme. Emi idige mme etop eketode mbia-idiong; mme edidiong emi eting se anade nnyin ikop ono nnyin. Mmo etie nte Liahona ono nnyin kiet kiet. Kini nnyin inimde Abasi ke akpa ndien inyene mbuotidem ke Enye, Enye eyeda nnyin ebe ke erisat isong nnyin.
Kpa nte Abasi okodiongde Joseph Smith ye itie-oku man edidiong iko Abasi ekeme ndifiak ndi, nnyin imekeme ndibo mme edidiong eke iko Abasi ke uwem nnyin nto ke itie oku. Udua kiet kiet eno nnyin ufang ye unen ndidia udia-Obong. Otode ke ndutim itie oku emi, nnyin imekeme ndinyene Spirit ndidu ye nnyin ke kpukpru ndaha, emi ekemede ndiyet nnyung nam isana. Edieke mbufo eyomde ndisio idiok-ido mfeb ke uwem mbufo, eyom eti adausung emi ekemede ndinwam fi eduk ke edinen usung. Mme adausung fo ekeme ndinwam fi ndikut oyoho odudu eke Erisio isop Jesus Christ.
Ke itie oku, nnyin nko imekeme ndibo mme edidiong eke ndutim temple. Tongo nte nkekeme ndiduk ke temple, Ami me nam enye nte ubono nkpo ye akpan akpan ndika kini kini. Ke ndida ini nyung nam nwaidem edi akpan ke ndisik mkpere Ete mi eke Heaven ke edisana ufok Esie, ami mebo edidiong ye ndibo eriyarare ye ntuuk emi enehede anwam mi ke ofuri uwem mi.
Otode ke itie oku, ekeme ndidibede nnyin. Itie oku emen unwana edi ke ererimbot nnyin. Elder Robert D. Hales okodoho: “Kesioho odudu itie oku efep, ‘ofuri ererimbot ekpedi ntak-ntak’ (se D&C 2:1–3). Unwana ikpeduhe, idorenyin iduhe—ekim kpot.”2
Abasi kadara ke nnyin. Enye oyom nnyin ifiak inyong itiene Enye. Enye ofiok nnyin kiet-kiet. Enye ofiok fi. Enye amama nnyin. Enye kpukpru ini ofiok abanga nnyin oyung odiong nnyin kini ikerede ke nnyin idotke. Enye ofiok se nnyin iyomde ye ini iyomde enye.
“Bup, ndien eyeno mbufo; yom, ndien eyekut; kong, ndien eyeberede eno mbufo:
“Kpukpru owo emi ebupde ebo; ndien enye emi oyomde okut; ndien enye emi okongde eyeberede” (Matthew 7:7–8).
Ekpedi afo unyeneke iko ntiense kanga kabanga itie oku, ami ndoho fi nte obong akam onyung obup ke ndifiok ke idem fo kabanga odudu esie, ndien koot Nwed Abasi man okop iko Abasi. Ami mediongo ke edieke nnyin inamde ukeme ndinyene odudu itie oku Abasi ke uwem nnyin, eyediong nnyin. Ke enying Jesus Chrst, amen.