“Eyak Ebop Ufok Emi eno Enying Mi”
(Doctrine ye Covenants 124:40)
Mme ediomi emi ibode ye edinam iko-Abasi eke enamde ke temple edi akpan-nkpo ono edinam esit nnyin asana ye eke akpatre ubong eke ndito iren ye iban Abasi.
Ke Sacred Groove ke isua Ikie-iba emi ekebede, ekpri Joseph Smith ama okut onyung eneme-nneme ye Abasi, Nsinsi Ete, ye Eyen Esie,Jesus Christ. Otode Mmo, Joseph ekpeb abanga ata uduot Mbuot-Abasi ye nkaiso edikabare koro akpan nkukut emi ama owut ekpere edem usen “udeme uyoho ini.“1
Ke mkpere isua ita eken, ke iboro akam esie ke mbubreyo September 21, 1823, “unwana emi akayamade akan uwemeyo” ama oyoho ubet-ufok Joseph.2 Mbiet-owo ama obiongore ke itie nna esie, okot akparawa emi ke enying, onyung odoho ke “imo idi isung-utom emi edongde eto iso Abasi … ndien ke enying esie edi Moroni.”3 Enye ama eteme Joseph abanga ediworo-ndi eke Nwed Mormon.
Ndien ekem Moroni eketing oto nwed Malachi ke Akani Testament, ye esisit ukpuhode ke usem emi etingde ke King James Version ete:
“Sese, ami nyeyak Itie-oku nno fi, ke ubok prophet Elijah, ke akwa ye ndik-ndik usen Jehovah mika-idige kanga. …
Ndien enye eyeto ke esit ndito mme enwongo emi ekenamde eno mme ete mmo, ndien esit ndito eyekabare etiene mme ete mmo. Midige ntre, eyebiat ofuri isong efeb ke edidi esie.”4
Akpan-akpan, item emi Moroni okonode Joseph Smith abanga utom Elijah okotongo utom temple ye family history ke ekpere edem usem ndien ekedi akpan nkpo ke ndifiak-nda ndi “kpukpru nkpo, emi Abasi eketingde abanga enye ke inua ndisana prophet esie toto ke eritongo ererimbot.”5
Ami mbenge unwam Edisana Spirit kente nnyin ikpebde otokiet ibanga mme ediomi,edinamiko-Abasi, ye edidiong emi odude ono nnyin ke mme temple eke Ufok Abasi Jesus Christ eke mme Latter-day Saints.
Edifiak-ndi eke Elijah
Ami ntongo ke ndibup akpan mbume kiet: ntak Elijah edifiak-ndi enyenede ufon?
“Nnyin imekpeb ito eriyarare ekpere edem usen ete ke Elijah akakama odudu edibop-ndian eke Itie-oku Melchizedek”6 ndien “okonyung edi akpatre prophet ndinam oro mbemiso edikem ini Jesus Christ.”7
Prophet Joseph Smith anam-anwanga ete ke, “Spirit, odudu,ye ikoot Elijah edi, man afo enyene odudu ndimum ukpohode … oyoho Itie-oku Melchizedek nkama …; nnyung … mbo … kpukpru mme edinam iko Abasi emi emyenede obio-ubong Abasi, kpa ndikabare esit mme ete nno ndito, ye esit ndito nno mme ete, kpa eke mmo emi edude ke heaven.”8
Edisana odudu edidian emi odot man otodo “se ededi eke afo edibopde ke isong ke eyebop ke heaven, se ededi afo editatde ke isong eyenyung etat ke heaven.”9
Joesph afaik anam-anwanga ete: ”Didie ke Abasi edidi-nyanga emana emi? Enye eyedong prophet Elijah. … Elijah eyeyarare mme ediomi man obop esit mme ete ono ndito, ye esit ndito ono mme ete.”10
Elijah ye Moses ema ebiongore ke Obot Ukpuhode enyung eyak odudu emi ono Peter, James, ye John.11 Elijah nko ama obiongore ye Moses ye Elias ke April 3, 1836, ke Kirtland Temple enyung eyak ukem ukpohode itie-oku oro eno Joseph Smith ye Oliver Cowdery.12
Elijah edifiak-nda odudu edibop ndi ke 1836 ama ekem ke ndibenge ererimbot nim nno edidi Andinyanga Oyoho Ikaba onyung edemere akpan udong ererimbot kabanga ndungore family hisitory.
Ndikpuhore, Ndikabare, ye Ndinam Esie Asana
Ewet iko emi esit ekan akang Tosin kiet ke mme Nwed Abasi nnyin. Ndimem ye ata iko emi esiwut ntotungo ekikere eke owo kiet-kiet. Esit nnyin—ofuri ibat udong, ima, uduak, ekikere, ye ido nnyin—owut owo se nnyin idide onyung ebiere se nnyin idikabare idi. Ndien uduak utom Jehovah edi ndikpuhore, ndikabare,ye ndinam esit asana oto ke mme ediomi Iko-Abasi ye mme edinam itie-oku.
Nnyin ibopke mme ndiduk ndisana temple ikpong man inyene ifiok idem nnyin mme eke ufokemana nnyin. Edi, mme ediomi ekeibode ye edinam iko-Abasi eke enamde ketemple edi akpan-nkpo ono edinam esit nnyin asana ye eke akpatre ubong eke ndito iren ye iban eke Abasi.
Ndiwuk ke esit ndito mme enwongo emi eknamde eno ete—kpa Abraham, Isaac, ye Jacob—ndikabare esit ndito nno eke ete mmo, ndinam ndungore family history,ye ndinam uduok-mmong nno akpa-mkpa ke temple edi utom emi odiongde owo kiet-kiet ke ikpehe nkang mbiba. Nte nnyin inamde edisana utom emi, nnyin imenam mbet ke ndima nnyung nam-nkpo nno Abasi ye mbohidung nnyin.13 Ndien oruk utom nwaidem oro anwam nnyin ndinehede “Mkpang-utong nno Enye!”14 nnyung ntiene Andinyanga.15
Ebo ata mme akpan edisana ediomi ye edinam itie-oku kpot ke temple—ufok Jehovah. Ofuri nkpo se ekpeb ye kpukpru se enam ke temple owut ifiok-nkpo Abasi eke Jesus Christ ye utom Esie ke akwa uduak inemesit eke Ete Heaven.
Otode ke Esit-idem Oworo-anwa
President Ezra Taft Benson emen owut akpan usung emi Andifak anamde ke ndinam “owo okukpa-aba edi enyene nsinsi uwem.”16 Enye ete ke, “Jehovah anam utom oto ke esit-idem oworo anwa. Ererimbot enam utom ke anwa eduk esit-idem. Ererimbot esisio mme owo ke ubuene. Christ osio ubuene ke owo efeb, mmo emen idem mmo esio ke ubuene. Ererimbot enwam mme owo ke ndikpuho nkan-nkuk mmo. Christ okpuho mme owo, emi ndien edikpuhode nkan-nkuk mmo. Ererimbot eyediong edu mme owo, edi Christ ekeme ndikpuho uduot-obot eke ubonowo.”17
Ediomi ye mme edinam itie-oku edi akpan-nkpo ke nkaiso utom edifiak mmana ke spirit ye edikpuhore, mmo edi usung nte Jehovah anamde utom ye nnyin kiet-kiet to ke esit-idem woro-anwa. Mme ediomi emi inehede inim, iti ke ofuri ini, inyung iwet “ye Spirit eke odu-uwem Abasi … ke obuk itiat-nwed esit nnyin”18 ono ntak ye osongo edidiong ke uwem-isong emi ye ke nsinsi. Mme edinam iko--Abasi emi inehede ibo inyung iti ika iso eberede usung heaven emi odudu Abasi ekemede ndifioro nduk uwem nnyin.
Nnyin idihe temple man ididibe ikpong mme ndifep idiok eke ererimbot. Edi, nnyin idi temple man ikan ererimbot idiok. Nte nnyin ikotde isin ke uwem “odudu Abasi”19 ke ndibo edinam itie-oku nnyung nam nnyung nim ndisana ediomi, nnyin imebo edidiong ye osongo emi akande eke idem nnyin20 man ikan idomo ye mfina uwem isong ndien inam inyung ikabare idi nti.
Etop Ufok Emi Eyetara
Ekebop akpa temple eke eyo emi ke Kirtland, Ohio, enyung ediong ke March 27, 1836.
Ke eriyarare emi ekenode Prophet Joseph Smith udua kiet ebede ke ema ekediong temple oro, Jehovah ete,
“Eyak esit ofuri ikot mi edara, emi enyenede, ye ukeme mmo, ebop ufok emi eno enying mi. …
“Ihn esit ata ediwak owo eyenehede adara ke utip ediding emi edidide, diana ye endowment emi isungutom mi ekebode ke ufok emi.
“Ndien etop ufok emi eyetara ekesim esen idut, ndien emi edi ntongo edidiong emi ediduohode ke ibuot ikot mi.”21
Mbok eti ibio-iko emi esit ata ediwak mme owo eyenehede adara ndien etop ufok emi eyetara ekesim esen idut. Emi ekedi akpan ntoti ke April eke 1836, ke ini Ufok Abasi ekenyenede esisit ibat owo ye temple kiet kpot.
Mfin ke isua 2020, nnyin imenyene temple 168 emi edade enam utom. Ema esian mme ke ebobop temple Aba-ye-usukkiet efen ke ubok. Ke ebobop ufok Jehovah ke “isuo inyang-ibom”22 ye ke mme idut ye ebiet emi mikekereke ke akpa ke ekeme edinyene temple.kiet.
Idahaemi ke enam edinam endowment ke usem 88 ndien eyedu ke ediwak usem efen ke nte ebopde temple man ediong uwem ediwak ndito Abasi. Ke isua Efut efen, ibat usem emi edidude se enam edinam temple ekeme nditot ke itie iba.
Isua emi nnyin iyesin-itiat inyung itongo ndibop temple Efureta. Ke ndaha efen, akada isua 150 kendibop akpa temple Efureta, tongo kini ekesiakde Ufok Abasi ke 1830 kesim kini President Spencer W. Kimball okodiongde Tokyo Japan Temple ke isua 1980.
Kere-banga usop-usop utom temple emi etibede kini eyo uwem President Russell M. Nelson. Ini emi President Nelson akamanade ke September 9, 1924, Ufok Abasi ekenyene temple itiokiet emi edade enam utom.
ini emi emekde enye nte Apostle ke April7,1984, ke isua Ata ebede, temple Edip-ye-itiokiet ke ekeda enam utom, editot temple Edip ke ufang isua Ata.
Ini emi enyimede President Nelson nte Presdent Ufok Abasi, temple 159 ke ekeda enam utom, editot ibat temple 133 ke ufang isua 34 emi enye anamde-utom nte owo Eboho Duopeba.
Tongo nte ekedi President Ufok Abasi ke January 14, 2018, President Nelson asiak ibat mbufa temple Edip-ye-efut.
Ediong temple ninety-six percent emi odude ke eyo uwem President Nelson, ediong temple 84 percent tongo nte ekemek enye nte Apostle.
Eyire Nkpo Emi Enehehde Enyene Ufon Ofuri-ini
Nte mbon Ufok Abasi Jehovah emi efiakde-eda-edi, odu nnyin ke mkpaidem ke usop-usop ndaha utom Esie ke ekpere edem usen emi. Ndien ediwak temple ke edidi.
Brigham Young eting prophecy ete, “Man inam utom emi ikure ke ididuhe temple kiet kpot edi ediwak eyedu, ndien ata ediwak irenowo ye iban eyeka mme temple oro enyung enam-utom eno mme owo emi ekedude uwem ke nte Jehovah ediyarare iwut.”23
Nte ifiokde, edisian obufa temple kiet edi ntongo akwa idara ye ntak eke ikpekomde Abasi. Nte ededi, nnyin ikpeyire ke mme ediomi ye edinam iko-Abasi emi ekemede ndikpuho nnyung nsongo ntuak-ibuot nnyin nno Andinyanga inyung idige ke ebiet mme uyai eke ufok oro.
Akpan ubiong emi inyenede mbon Ufok Abasi Jehovah emi ekefiakde-eda edi edi (Akpa) ndi “Kop uyo Esie!”24 nnyung nam esit nnyin okpuho oto ke mme ediomi ye edinam iko-Abasi ndien (Udiana) ndidara nam oyoho edisana ubiong man ino edidiong temple esok ofuri ufokemana ke ikpehe nkang mbiba. Ke ndausung ye unwam Abasi, nnyin ke akpaniko iyenam ndisana ubiong emi ikure.
Edibop Zion
Prophet Joseph Smith eting ete:
“Edibop Zion edi utom emi ebehede ikot Abasi ke ofuri ndaha-isua, edi ibuot-iko emi mme prophet, oku ye ndidem ekekerede ebanga ye inemesit, mmo ese ye idara idorenyin eyom usen oro emi nnyin idude, enyung ekwo ye oyoho ekikere idara heaven enyung eting prophecy ebanga usen nnyin emi, edi mmo ekpa ikwe; … osuho ono nnyin ndikut, mbuana ke esit nnyung nnwam ke ndinam ubong Ekpere edem usen aka iso.”25
“Itie-oku eke heaven eyediana ye eke isong, man anam ikpo uduak oro osu; … utom kiet emi Abasi ye mme angel ekekerede ebanga ye inemesit ke ediwak emana emi ekebede; emi okodongde ukpong mme patriarch ye prophet eset; utom kiet emi enimde ete edibiat odudu ekim, edi-diong ererimbot, ubong Abasi, ye erinyanga-ukpong ofuri ubonowo.”26
Ami nehede nting iko ntiense nte ke Ete ye Eyen ema ebiongore eno Joseph Smith, ndien ke Elijah ama afiak ayak odudu edibop-ndian ono. Mme edisana ediomi ye edinam eke temple ekeme ndisongo nnyin idem onyung anam esit nnyin asana ke nte nnyin “Ikopde uyo Esie!”27 inyung ibo odudu Abasi ke uwem nnyin. Ndien ami ndi ntiense nte ke utom ekpere edem usen emi eyebiat odudu ekim onyung ada erinyanga-ukpong osok ofuri ubonowo. Kabanga mme akpaniko emi ke ami ndara nting iko-ntiense mbanga ke edisana enying Obong Jesus Christ, amen.