Ndiberede Heaven nyom Unwam
Yak nnyin ida mbuotidem emi nnyin inyenede ke Obong Jesus Christ isin ke utom!
Sese nte emi ekedide isio-isio ye inem ikpehe! Esosongo, ndima Ludy ye Enzo. Mbufo emenehede eda-eno nti nkaiferi iban ye mkparawa iren eke Ufok Abasi.
Ndima ndito-eka mi iren ye iban, nnyin imekop ediwak mfin kabanga Edifiak-nda Ufok Abasi ndi—ata Ufok Abasi emi Andinyanga nnyin, Jesus Christ, akasiakde kini ukworo-iko Esie ke isong. Edifiak-nda-ndi emi okotongo ke isua Ikie-iba emi ekebede ke ini edim emi kini Abasi Ete ye Eyen Esie, Jesus Christ, ekebiongore eno ekpri Joseph Smith.
Ke isua Duop ebede tongo nte akwa nkukut emi eketibe, ema ekot Prophet Joseph Smith ye owo ition efen nte mme anditongo mfiak-nda-ndi Ufok Abasi Christ.
Tongo ke ekpri eboho oro ke April 6, 1830, ediworo akwa nka ke ererimbot emi akande mbonowo million Efurekiet. Enehede efiok nti nkpo se Ufok Abasi emi enam ke ofuri ererimbot ke ndisuhore ufen ubonowo nyung nno ubonowo unwam. Edi akpan ntak esie edi ndinwam irenowo, iban, ye ufokemana man etiene Obong Jesus Christ, enim mbet Esie, enyung edot ndibo mkpon-nkan kotu edidiong—eke uwem nsinsi ye Abasi ye mbon ima mmo.1
Nte nnyin itide edinam oro emi okotongode ke 1820, edi akpan-nkpo nditi ete kini nnyin ikponode Joseph Smith nte prophet Abasi, kemi idihe Ufok Abasi Joseph Smith, nko idihe Ufok Abasi Mormon. Emi edi Ufok Abasi Jesus Christ. Enye ekenehede owuk nte edikotde Ufok Abasi Esie ete: “Ntem ke edikot enying Ufok Abasi Mi ke ukpere edem ini emi, kpa Ufok Abasi Jesus Christ Mme Ndisana Owo ke Ukpere Edem Usen.”2
Ami mmeting akpa mbanga akpan ndaha edinehede ke usung nte nnyin ikpekotde enying Ufok Abasi emi.3 Tongo kini oro, enam ediwak ke ndinehede ndudue emi. Ami mmenem esit ye President M. Russell Ballard ye ofuri Eboho Apostle Duopeba, emi enamde ofon ke nditongo ukeme emi ye mbon eken emi enamde ntongo nkpo efeneke ami ndisiande ke mbubreyo emi.
Mme adausung ye itie-utom ke Ufok Abasi, ebuana nkok efen, ye ata-ediwak mbon Ufok Abasi—ye mbon efen—ekot nenn-nnen enying Ufok Abasi idahaemi. Efiak-enam ndausung ke ido edinam ndaha eke Ufok Abasi. Ata website eke Ufok Abasi idahaemi edi ChurchofJesusChrist.org. Efiak enam nde eke email, enying idiongo, ye usung social media ofon. Idahaemi edima nkaikwo edi-di “Nkaikwo Tabernacle ke Temple Square.”
Nnyin imenam nworo-nda ukeme emi koro knini nnyin isiode enying Obong ifep ke enying Ufok Abasi Esie, nnyin imesio Enye ifep nte akpan ndausung eke ntuak-ibuot ye eke uwem nnyin Ini emi nnyin idade enying Andinyanga idori ke idem nnyin ke itie uduok-mmong, nnyin imenyime ndidi ntiense, ke ekikere ye edinam nnyin ete, ke Jesus edi Christ.4
Ke akpa, ami nkonwongo nte edieke nnyin “idinamde ukeme nnyin ndi-kot nnen-nnen enying Ufok Abasi Obong,” Enye eye “nwanga odudu ye edidiong Esie odori ke ibuot mbon Latter-day Saint, oruk eke nnyin mikutke akpa.”5 Ami mmefiak nsongo enwongo oro mfin.
Man anwam nnyin nditi Enye nyung ndiongo Ufok Abasi Jesus Christ eke mme Latter-day Saint nte Ufok Abasi Obong, enem nnyin ndiwut idiongo kiet emi ediwutde akpan itie Jesus Christ ke Ufok Abasi Esie.
Idiongo emi ewet enying Ufok Abasi esin ke esit itiat-inuk. Jesus Christ edi akan itiat-inuk.6
Ke esit idiongo emi edi nda-nno edibot marble Christuseke Thorvaldsen. Oro owut andiset, odu-uwem Obong anyande ubok man obo kpukpru owo emi editienede Enye.
Nte idiongo, Jesus Christ ada ke idak arch kiet. Arch emi eti nnyin abanga ediset Andinyanga oworode ke udi ke oyohousen ita tongo nte Ekekong Enye ewot ke cross.
Akpana ediwak owo efiok idiongo emi, koro nnyin imeti mfiak-nda-ndi iko Abasi ye odu-uwem, Christ emi ekesetde.
Idahaemi eyeda idiongo emi nte nkpo idiongo eke nwed, mbuk-nkpo-ntibe, ye edinam eke Ufok Abasi.7 Oro eyeti ofuri owo ete ke emi edi Ufok Abasi Andinyanga ndien ke ofuri se nnyin inam nte mbon Ufok Abasi Esie okongo ke Jesus Christ ye iko Abasi Esie.
Idahemi, ndima ndito-eka mi iren ye iban, mkpong edi Ederi Ndak-eyop,nte Elder Gong ekenehede ekpeb. Ekem nnyin iduk asanga-asanga udua emi osimde utit Easter. Nte mme anditiene Jesus Christ, ndidu ke ini emi udongo COVID-19 esinde ndutime ke ererimbot, yak nnyin ikuting ibanga Christ mme ndikworo Christ mme ndida idiongo Christ nwut kpot.
Yak nnyin ida mbuotidem nnyin ke Obong Jesus Christ isin ke utom!
Nte mbufo efiokde, mbon Ufok Abasi esinam mbet utre-udia usen kiet ke ofiong.
Ukpebnkpo utre-udia okotongo ke eset. Mme oworo-etop owo ke Bible esinam oro totongo kini eset. Moses, David, Ezra, Nehemiah, Esther, Isaiah, Daniel, Joel, ye ediwak eken esiter-udia enyung ekworo ebanga utre-udia.8 Ke nwed Isaiah, Jehovah ete: “Nte idige emi edi utre-udia eke ndimekde enye : eritat uruk idiok ido, erikpohore ubop-nkpo okpono,nnyung nsa-na mmo eke owo efikde nnyak?”9
Apostle Paul eketeme ikot Abasi ke Corinth ete “esin idem mmo ke utre-udia ye akam.”10 Andinyanga ke Idemesie eting ete ke ubak nkpo idi “tibeke ke ebeke ke akam ye utre-udia.”11
Ibighike ami nting ke ndise social media nte “nte abia-ibok ye asiak-owo idem mbakara, ke ami mmenyene ukpono nno mme nta-ifiok ibok mbakara, mbon-mbufiok mbakara, ye mbon efen emi enamde okposong utom man etre COVID-19 ke nditara.”12
Idahaemi, nte President eke Ufok Abasi Jesus Christ eke mme Lattaer-day Saint ye nte Apostle Jesus Christ, ami mmediongo ke Abasi “enyene ofuri odudu, ofuri ifiok, ye ofuri mbufiok; enye ofiok ofuri nkpo, ndien enye edi Owo mbom, ekesim erinyanga, nno mbon emi ekabare-esit enyung enim esie ke akpaniko.”13
Ntem, kini akwa idomo, ke nte udongo atarade ke kpukpru ndaha, ata akpan nkpo ke nnyin ndinam edi ndikot Ete nnyin ke Heaven ye Eyen Esie—Akwa Andikok—ete ewut utibe odudu Mmo man ediong mme owo ke isong.
Ke etop video mi, ami mma nkot kpukpru owo nte etie utre-udia ke Sunday, March 29, 2020. Ediwak mbufo emekut video oro enyung ebuana kre utre-udia oro. Ekeme ndi-di ubakowo ikenamke. Nnyin isuk iyoyom unwam ito heaven idahaemi.
Ntre ke okoneyo emi, ndima ndito-eka iren ye iban, ke spirit ndito-iren Mosiah, emi ekeyakde idem mmo eno okposong utre-udia ye akam,14 ye nte ubak nkpo eke akwa mbono April 2020 nnyin, ami mmedot utre-udia efen nno ofuri ererimbot. Eke mbon emi nsong-idem mmo enyimede, yak nnyin itre-udia, ibong-akam, inyung idian mbuotidem nnyin ini-kiet efen. Yak nnyin ke akamikpe-ubok iyom unwam ke akwa udongo eke odukde ererimbot mi.
Ami mmekot kpukpru owo, ye eke midige mbon edu-ukpono nnyin, nte etre-udia enyung ebong-akam ke Good Friday, April 10, man idiok-udongo emi osuhore, mme ono-unwam enyene ukpeme, mbubehe-okuk enyene osongo, ndien uwem afiak ofon.
Didie ke nnyin ikpenam utre-udia? Nditre udia akang mbiba mme ke ufang hour Edip-ye-inang eyekem. Edi mbufo eyebiere se idi-di nte nwaidem ino mbufo, ke nte mbufo etide akwa nwaidem emi Andinyanga akanamde ono mbufo Yak nnyin idiana-kiet ke ndikpe-ubok nyom ukok ke ofuri ererimbot.
Good Friday edi-di ata eti usen ke ndinyene Ete Heaven nnyin ye Eyen Esie ke ndikop mkpe-ubok nnyin!
Ndima ndito-eka iren ye iban, ami mmewut ata ima mi nno mbufo,diana ye iko ntiense mi kabanga edisana utom emi nnyin inamde. Emi edi Ufɔk Abasi Jesus Christ eke mme Latter-day Saint. Enye ada ke ibuot onyung ada-usung ke kpukpru se nnyin inamde. Ami mmediongo ke Enye eyeno iboro ke mbpe-ubok ikot Esie Ami nting iko ntiense emi ke edisana enying Jesus Christ, amen.