O Le Tala Aupito Silisili o le Eseta Na Faamatalaina

Atonu tou te manatua le faalogo ai i se tusi mai le Au Peresitene Sili o faitauina i la outou uarota po o le paranesi i nai vaiaso ua mavae. O lena tusi o loo faasilasila atu ai o le Aso Sa a sau—le Aso Sa o le Eseta—e tatau ai i uarota uma ma paranesi ona potopoto mo na o le sauniga faamanatuga, ma tuua ai le taimi faaopoopo mo tapua’iga i le fale o ni aiga e faamanatu ai lenei aso malolo e sili ona taua.¹

Sa matua’i alu lo’u mafaufau i le tusi a le Au Peresitene Sili, ma afua ai ona ou tomanatu i le ala sa faamanatu ai e lo matou aiga le Eseta i le aluga o tausaga. O le tele o lo’u mafaufau e uiga i a matou faamanatuga, o le tele foi lea o lo’u manatunatu pe na matou faafitia i matou lava ma le lē manatu i ai, i le uiga moni o lenei aso malolo, ua matua’i totonugalemu ia i latou uma e talitonu ia Iesu Keriso.

O na mafaufauga na tata’i atu ai a’u e manatunatu loloto i le eseesega na matou faamanatuina ai le Kerisimasi pe a faatusatusa i le Eseta. Ia Tesema, matou te tuufaatasia ai le malie o “Logo Tagitagi,” totini Kerisimasi, ma meaalofa e ese ai mai isi mau agamasani ‘anoa—e pei o le tausiga o e manaomia le fesoasoani, usuina o pese Kerisimasi ma viiga e sili ona matou fiafia i ai, faapea ma le susueina o tusitusiga paia ma faitau le tala o le Kerisimasi i le Luka e 2. O tausaga uma lava a o matou faitauina lenei tala pele mai se Tusi Paia tuai telē, e fai e lo matou aiga le mea atonu foi e fai e lo outou aiga—e ufi o matou ulu ma tau’au i solo ma fai o matou ofutalaloa e pei o Iosefa, Maria, ma le toatele o ē na o mai e ifo atu i le pepe o Iesu, ma matou toe faatinoa le tala faapelepele o le Kerisimasi i le soifua mai o le Faaola.

Peitai, o le faamanatuina e lo matou aiga o le Eseta, e fai si ese. Ou te manatu sa faalagolago tele lo matou aiga i le “o i le lotu” e maua mai ai le vaega ‘anoa o le Eseta e totonugalemu ia Keriso; ona matou faapotopoto ai lea o se aiga, e fefaasoaa’i isi agamasani e faatatau i le Eseta. Sa ou fiafia lava e matamata i le ma fanau a’o le taimi nei la o fanau a le fanau o su’e fuamoa o le Eseta ma laga a latou ato o le Eseta.

Ae o le tusi a le Au Peresitene Sili ua avea o se fafagu. E le gata ina sa latou valaaulia i tatou uma ia mautinoa o a tatou faamanatuga o le mea aupito sili ona taua na tupu i lenei lalolagi—le Togiola ma le Toetu o Iesu Keriso—e aofia ai le ava ma le migao ua tatau ai mo le Alii, ae latou te tuuina mai ai foi ia i tatou se taimi faaopoopo ma o tatou aiga ma uo i le Aso Sa o le Eseta e faia ai.

Ata

O Le Faaola toetu

O upu nei a le Perofeta o Iosefa Samita e faaopoopo ai le matalalaga i le taua o mea na li’oli’o ai le Eseta: “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”²

Sa ma talanoaina ma Lesa ni auala e mafai ai ona sili atu mea e fai e lo matou aiga i le vaitau o le Eseta. Atonu o le fesili na o ma fesili ifo ai ia i ma’ua lava o se tasi o fesili e mafai ona tatou mafaufau uma i ai: E faapefea ona tatou faataitaia le aoaoga ma le faamanatuina o le Toetu o Iesu Keriso, le tala o le Eseta, ma le paleni e tasi, le atoaga, ma le ’oa o agamasani faalelotu o le soifua mai o Iesu Keriso, le tala o le Kerisimasi?

E foliga mai o loo tatou taumafai uma. Ua ou matauina se taumafaiga faatupula’ia i le Au Paia o Aso e Gata Ai aga’i atu i se Eseta e sili ona totonugalemu ia Keriso. Lea e aofia ai se aloa’ia sili ma ‘anoa o le Aso Sa o le Lau Pama ma le Aso Faraile e pei ona faatino e nisi o o tatou tausoga Kerisiano. Atonu foi tatou te faata’ita’ia agamasani talafeagai o le Eseta e totonugalemu ia Keriso o loo maua i aganuu ma faiga a atunuu i le lalolagi atoa.

Na fautuaina mai e le sikola o le Feagaiga Fou o N.T. Wright: “E ao ona tatou la’a atu e faamanatu le Eseta i ni auala fatufatu fou: i faatufugaga, tusigā ‘anotala, taaloga a tamaiti, solo, musika, siva, faafiafiaga, logo, konaseti faapitoa. … O lo tatou aso fiafia aupito silisili lea. Pe a aveese le Kerisimasi, o lona uiga i faaupuga faatusi paia, ua aveese mataupu e lua pito i luma o le Mataio ma le Luka, e leai se isi mea. A aveese le Eseta, ma ua leai sa outou Feagaiga Fou; ua leai se FaaKerisiano.”³

E pele ia i tatou le Tusi Paia mo mea uma o loo aoao mai ai i tatou e uiga i le soifua mai, galuega, Faasatauroga, ma le Toetu o Iesu Keriso. E leai ni upu se tolu o faaalia mai ai le faamoemoe sili atu ma le taunuuga e faavavau o tagata soifua uma nai lo na upu na tautala i ai se agelu faalelagi i le taeao o le Eseta i le Tuugamau i le Togalaau: “Ua toetu o Ia.”⁴ Tatou te matua’i faafetai i le mau a le Feagaiga Fou lea o loo faasaosao ai le tala i le Eseta ma le galuega a le Faaola i le Eseta i Iutaia ma Kalilaia.

A o ma faaauau pea ma Lesa ona manatunatu loloto ma saili ni auala e faalautele ai le faamanatuina e lo matou aiga le Eseta ina ia atili faatotonugalemu ia Keriso, sa ma talanoaina pe o le a le ituaiga agamasani o le faitauina o tusitusiga paia e mafai ona ma folasia atu i lo matou aiga—o le mea e tutusa ma le Luka e 2 mo le Eseta, pe a mafai.

Ona oo mai ai lea o lenei faaaliga faalelagi: E le gata i fuaiupu taua e uiga i le Eseta i le Feagaiga Fou, o i tatou o ni Au Paia o Aso e Gata Ai ua faamanuiaina i se meaalofa aupito ofoofogia o le Eseta! O se meaalofa o se molimau tulagaese, se isi molimau o le vavega o le Eseta lea e aofia ai, atonu foi o mau e sili ona maoa’e o le Eseta i lo mau uma FaaKerisiano. O loo ou faatatau i le Tusi a Mamona ma e sili ona patino, i le tala ia Iesu Keriso na faaali atu i ē nonofo i le Lalolagi Fou i Lona mamalu toetu.

Na faamatala e le Perofeta o Iosefa Samita le Tusi a Mamona “o le tusi e aupito sili ona sa’o i lo se isi lava tusi,”⁵ ma e amata i le 3 Nifae 11, o loo faamatala mai ai le tala maoa’e o le asiasiga a Keriso toetu ia sa Nifaē, le galuega a le Faaola i le Eseta. O nei mau o le Eseta o loo molimau mai i le Toetu o le Alii o Iesu Keriso.

I nei mataupu, ua valaauina ai e Keriso aposetolo e toasefululua, aoao atu e pei ona Ia faia i Lana Lauga i luga o le Mauga, ma faasilasila atu ai ua Ia faataunuuina le tulafono a Mose, ma vavalo atu ai e uiga i le faapotopotoina o Isaraelu i aso e gata ai. Ua Ia faamalolo i e mama’i ma tatalo mo tagata i se ala mamalu “e le mafai e se laulaufaiva ona tautala ai, pe mafai foi e se tagata ona tusia, pe mafai foi e loto o tagata ona malamalama i mea e faapea ona tetele ma le ofoofogia naua e pei ona matou vaaia ma faalogoina o fetalaia e Iesu; ma e leai se tagata e mafai ona malamalama i le olioli lea na faatumuina ai o matou loto i le taimi na matou faalogo ia te ia o tatalo atu i le Tamā mo i matou.”⁶

Ata

Ua faaali atu Iesu Keriso ia sa Nifae

O le Eseta lenei, o le a taula’i atu ai lo matou aiga i ulua’i fuaiupu e 17 o le 3 Nifae 11, lea ua outou masani ai. Tou te manatua le motu o tagata sa faapotopoto i le malumalu i le laueleele o Nuumau, o e na faalogo i le siufofoga o le Atua le Tama ma vaai ia Iesu Keriso o afio ifo mai le lagi e tuuina atu le valaaulia aupito i manaia o le Eseta:

“Tutula’i ia ma o mai ia te au, … ia outou tagotago foi i tulaga o fao o i o’u lima ma o’u vae, ina ia outou iloa ai o A’u … o le Atua o Isaraelu, ma sa fasiotia mo agasala a le lalolagi.

“Ua oo … ina o ane le motu o tagata, … taitoatasi … ma vaai i o latou mata ma tago atu i ai o latou lima, … ma latou molimau ai, o ia lava lea. …

“Ma … sa latou alalaga faatasi ai, ua fai mai:

“Osana! Ia faamanuina lava le suafa o le Atua Silisili Ese! Ma sa latou faapauu i lalo i vae o Iesu, ma tapuai atu ia te ia.”⁷

Vaai faalemafaufau: o sa Nifae i le malumalu na pa’i moni lava i lima o le Alii toetu! Ua matou faamoemoe e fai mataupu nei o le 3 Nifae e avea ma a matou agamasani o le Eseta e faapei foi o la matou agamasani i le Luka 2 o le Kerisimasi. O le mea moni, ua faasoa mai e le Tusi a Mamona le tala aupito silisili ua faamatalaina o le Eseta. Aua ne’i avea ma tala aupito sili o le Eseta e lei faamatalaina lava.

Ou te valaaulia outou e vaavaai i le Tusi a Mamona i se malamalama fou ma mafaufau i le molimau maoa’e o loo tuu mai ai i le moni o le Keriso toetu faapea foi le tamaoaiga ma le loloto o le aoaoga faavae a Keriso.

Atonu tatou te fesili, E mafai faapefea ona faamanuiaina o tatou olaga ma i latou e pele ia i tatou i se ala ‘anoa ona o le faitauina o mau o le Tusi a Mamona i le Eseta? E sili atu nai lo se mea e iloa e se tasi. Soo se taimi tatou te faitau ma suesue ai mai le Tusi a Mamona e mafai ona tatou faamoemoe mo ni taunuuga ofoofogia.

Lata mai nei, sa ma faatasi atu ai ma Lesa i le maliu o se uo pele, o se tamaitai faatuatua, ae na vave faamuta lona soifua ona o se gasegase. Sa matou potopoto ma lona aiga ma ni uo mamae, ma fefaasoaa’i manatuaga faamama’i i lenei agaga matagofie sa faa’oaina ai o matou olaga.

A o o’u tutu e fai sina mamao ese mai le pusa maliu, talanoa ai ma isi, sa ou matauina ni teineiti laiti se toalua o vaitausaga o le Peraimeri, o o atu i le pusa maliu ma tutete’e i luga—ma mafai ona tilotilo i totonu—e faaalia lo la faaaloalo faai’u i lo la aunty pele. O le leai o se isi na lata ane i ai, sa sōsō atu ai Lesa ma faatū ifo i o la’ua autafa ma faamafanafana ma aoao atu i la’ua. Sa ia fesili pe o a mai i la’ua ma pe la te iloaina o fea o i ai nei lo la’ua aunty. Sa faamatala ane lo la’ua faanoanoa, ae na fai ane nei afafine pele o le Atua, ma le mautinoa ua faatumulia ai o la’ua mata, ua la iloa ua fiafia nei lo la’ua aunty ma ua mafai ona faatasi o ia ma Iesu.

I le mu’amu’a o o la tausaga, sa la maua le filemu i le ata sili o le fiafia ma, i lo la’ua lava ala faateineiti, na molimau ai i le maoae o le moni ma le faigofie o le matagofie o le Toetu o le Faaola. Sa la iloaina lea mea i o la’ua loto ona o aoaoga ‘anoa a matua alolofa, aiga, ma taitai o le Peraimeri na totoina se fatu o le faatuatua ia Iesu Keriso ma le ola e faavavau. Ua sili atu le popoto nai lo o la’ua tausaga, o le tele o upumoni ua malamalama ai nei teineiti, tatou te maua e ala mai i le savali o le Eseta ma le galuega a le Faaola toetu, ma upu a perofeta e pei ona ta’ua i le Tusi a Mamona.

Ua ou matauina pe a tuuina atu e Peresitene Russell M. Nelson se meaalofa o le Tusi a Mamona i se tasi e le auai i lo tatou faatuatuaga, e aofia ai ta’ita’i o le lalolagi, e masani ona ia susu’e i le 3 Nifae ma faitau atu e uiga i le faaali atu o le Keriso toetu ia sa Nifaē. O le faia o lea mea, o le mea moni o loo tuuina atu e le perofeta soifua se molimau i le Keriso soifua .

E le mafai ona tatou tutu atu o ni molimau ia Iesu Keriso seia vagana ua mafai ona tatou tuu atu se molimau e uiga ia te Ia. O le Tusi a Mamona o se tasi o molimau ia Iesu Keriso aua o ona itulau paia uma, o loo molimau mai ai lea perofeta ma lea perofeta e le gata o le a afio mai Keriso ae na afio mai lava o Ia.

Ua ou uuina i lo’u lima se kopi o le ulua’i lomiga o le Tusi a Mamona. O le faia o lea mea ou te o’otia ai lava i taimi uma . Mo le tele o lo’u olaga faatagata matua, na ou maofa, faagaeetia, ma lōfia i le mea na faia e le taule’ale’a o Iosefa Samita e aumaia ai lenei tusi paia o mau ma faaliliu ma lolomiina. O vavega na tutupu mai ai e lofituina pe a mafaufau i ai.

Ae e le o le pogai lena ou te o’otia ai i lenei tusi. Ae ona o le tusi lenei, e sili atu i lo se isi lava tusi ua lolomiina i lenei lalolagi, o loo tuu mai ai le molimau i le soifua, o galuega, o aoaoga, le Togiola, ma le Toetu o Iesu Keriso. O’u uso e ma tuafafine pele, o le su’esu’e e le aunoa mai lenei tusi e uiga ia Iesu Keriso o le a suia ai lou olaga. O le a faapupula ai ou mata i avanoa fou i lou olaga. O le a faateleina ai lou faamoemoe ma faatumuina ai oe i le alofa mama. O le mea aupito sili o mea uma, o le a fausia ai le malosiaga o lou faatuatua ia Iesu Keriso ma faamanuia ai oe i se malamalama mautu e faapea, e silafia oe e Ia ma Lona Tama, e alolofa ia te oe, ma finagalo ia e toe maua atu lou ala i le aiga, ma se Alapoa.

Uso e ma tuafafine pele, ua oo mai le taimi, na valoia e perofeta anamua, “pe a oo mai le taimi e salalau atu ai le malamalama o se Faaola i atunuu uma, ituaiga, gagana, ma tagata.”⁸ Ua tatou vaaia le faataunuuga o lenei valoaga i o tatou lava mata, e ala atu i le molimau ia Iesu Keriso o loo maua i le Tusi a Mamona.

Ata

O Le Alii o Iesu Keriso

E leai se tusi e sili atu o faaali mai faapea:

• Ona o Iesu Keriso, na suia ai mea uma.

• Ona o Ia, ua sili atu ai ona lelei mea uma.

• Ona o Ia, ua gafataulima ai le olaga—aemaise i taimi o le tiga.

• Ona o Ia, ua mafai ai mea uma.

O Lana asiasiga o se Faaola toetu, na folasia mai e le Atua le Tama, o se savali aupito sili ona mamalu ma manumalo o le Eseta. O le a fesoasoani i tagata o o tatou aiga e maua ai se molimau patino ia Iesu Keriso o lo tatou Faaola ma le Togiola, o lē na talaia noataga o le oti.

Ou te faai’u atu i la’u molimau i le moni a’ia’i o le Tusi a Mamona ma Iesu Keriso o le Alo o le Atua soifua. I le suafa o Iesu Keriso, amene.