Pe E Te Silafia le Pogai Ua Ou Talitonu Ai o Se Kerisiano ia Keriso?

I se tasi afiafi i le manava ai o galuega, i tausaga ua mavae, sa pu’e ai la’u pasi masani agai i New Jersey mai le Aai o Niu Ioka. Sa iloa mai e le tamaitai sa nofo i o’u autafa le mea sa ou tusia i luga o la’u komepiuta ona fesili mai lea, “E te talitonu ia … Keriso?” Sa ou fai atu, “Ioe, ou te talitonu!” A o ma talanoa, sa ou iloaina ai faatoa siitia mai i le eria mai lona atunuu matagofie o Asia e faigaluega i se vaega e sili ona faatautava i Niu Ioka i tekinolosi o faamatalaga.

Pei ona masani ai, sa ou fesili atu ia te ia, “Pe e te silafia le pogai ua ou talitonu ai o se Kerisiano ia Iesu Keriso?” Sa tali mai foi o ia pei ona masani ai ma valaaulia au e faamatala atu ia te ia. Ae a o amata ona ou tautala atu, sa ou i ai i se tasi o na taimi lea e saputu mai ai le mau mafaufauga i lo’u mafaufau. O le uluai taimi lenei o le a ou faamatalaina ai le “mafuaaga” o le FaaKerisiano i se tasi e matua le masani i ai, ma e maualuga le atamai. Sa le mafai le na ona ou faapea atu, “Ou te mulimuli ia Iesu Keriso ona sa Ia loto e puapuagatia ma maliu mo a’u agasala.” Atonu e ono mafaufau o ia, “Pe na tatau ona maliu Iesu? Pe e le mafai e le Atua ona faamagalo ma faamama i tatou mai a tatou agasala pe a tatou ole atu ia te Ia e fai?”

Mata e faapefea ona e tali atu i ni nai minute? E faapefea ona e faamatala lenei mea i se uo? Tamaiti ma le autalavou: faamolemole e mafai ona tou fesili i tou matua po o se taitai i se taimi mulimuli ane, “Pe aisea na tatau ai ona maliu Iesu?” Ma, uso e ma tuafafine, e i ai se mea e tatau ona ou ta’u atu: e ui i mea uma na ou manatu sa ou iloa e uiga i aoaoga faavae, talafaasolopito, aiaiga faavae, ma isi mea a le Ekalesia, e le’i faigofie ona oo mai le tali i lenei fesili tupito i lo tatou faatuatuaga. I lena aso sa tonu ai ia te a’u e taulai atili atu i mea e sili ona taua i le ola e faavavau.

Ia, sa ou faailoa atu i la’u uo fou¹ e i ai so tatou agaga e faaopoopo i se tino ma o le Atua o le Tama o o tatou agaga.² Sa ou ta’u atu ia te ia sa tatou ola faatasi ma lo tatou Tama Faalelagi ae tatou te lei fananau mai i lenei lalolagi faitino.³ Ona e alofa o Ia ia te ia ma Ana fanau uma, sa Ia faia ai se fuafuaga mo i tatou ia maua se tino i le faatusa o Lona tino faamamaluina,⁴ avea o se vaega o se aiga,⁵ ma toe foi atu i Lona afioaga alofa e olioli ai i le ola e faavavau ma o tatou aiga,⁶ faapei ona Ia faia i Lona aiga.⁷ Ae, sa ou fai atu, o le a tatou fetaiai ma faalavefau autu se lua i lenei lalolagi pa’ū:⁸ (1) o le oti faaletino—o le tuueseeseina o o tatou tino mai o tatou agaga. O le mea moni, sa ia iloa o le a tatou oti uma. Ma le lona (2) o le oti faaleagaga—o lo tatou tuueseeseina mai le Atua ona o a tatou agasala, mea sese, ma faaletonu a’o faavāvāmamaoina e le olaga faitino i tatou mai Lona afioaga paia.⁹ Sa ia iloa foi lenei mea.

Sa ou faailoa atu ia te ia o se aafiaga lea o le tulafono o le faamasinotonu. O lenei tulafono faavavau e moomia ai se faasalaga e faavavau ia totogia mo a tatou agasala uma po o soliga o tulafono po o upumoni a le Atua, pe o le a le mafai lava ona tatou toe foi atu e mau i Lona afioaga paia.¹⁰ O le a le amiotonu, ma o le Atua “e le mafai ona teena le faamasinotonu.”¹¹ Sa malamalama o ia i lenei mea ae sa faigofie ona ia pu’e maia e alofa mutimutivale foi le Atua, e alofa, ma e naunau e aumaia lo tatou ola e faavavau.¹² Sa ou faailoa atu i la’u uo e faapea o le i ai foi se tatou fili e poto leaga, ma mamana—o le faapogai o mea leaga ma pepelo—e tetee ia i tatou.¹³ O le mea lea, o le a manaomia ai se tasi e i ai le mana faaleatua e le iu e faatoilalo ai na tetee ma faalavefau ina ia laveaiina ai i tatou.¹⁴

Ona ou faasoa atu lea ia te ia o le tala lelei—le tala lelei e olioli tele ai … i tagata uma”¹⁵—e faapea “Aua ua alofa mai le Atua i le lalolagi, ua ia auina mai ai Lona Alo pele e toatasi, ina ia le fano se tasi e faatuatua ia te ia, ae ia maua le ola e faavavau.”¹⁶ Sa ou molimau atu i la’u uo, ma ou te molimau atu foi ia te outou, o Iesu Keriso o le Faaola lena, sa tatau ona puapuagatia o Ia, maliu, ma toetu mai—Lana Togiola e le i’u —e togiola ai tagata uma mai le oti faaletino¹⁷ ma aumaia ai le ola faavavau faatasi ma le Atua ma o tatou aiga¹⁸ ia i latou uma o e mulimuli ia te Ia. Ua tautino mai e le Tusi a Mamona, “O lea ua … maua ai e le Atua le manumalo i le oti; ma tuu atu ai le mana i le Alo e faia le puluvaga mo le fanauga a tagata … ; ua faatumuina i le [alofa mutimutivale] ma le agaalofa …; ua motusia e ia fusi o le oti, ma ua ave e ia i ona luga a latou amioletonu ma a latou solitulafono, ina ua ia togiolaina i latou, ma faamalie manaoga o le faamasinotonu.”¹⁹

O laasaga na faaali mai e le Atua e tatau ona tatou laasia e mulimuli ai ia Iesu ma maua le ola e faavavau, ua ta’ua o aoaoga faavae a Keriso. E aofia ai le “faatuatua ia Iesu Keriso ma Lana Togiola, salamo, papatisoga [i Le Ekalesia a Iesu Keriso o le Au Paia o Aso e Gata ai], mauaina o le meaalofa o le Agaga Paia, ma tumau e oo i le iuga.”²⁰ Sa ou faasoa atu nei laasaga i la’u uo, ae o ni nai auala nei na aoao mai talu ai nei e perofeta ma aposetolo i le auala e mafai ai e aoaoga faavae a Keriso ona faamanuiaina fanau uma a le Atua.

Na aoao mai Peresitene Russell M. Nelson: “O le mataupu mama a Keriso e mamana tele. E suia ai le olaga o tagata uma o e malamalama i ai ma saili e faatino i lona olaga.”²¹

Na aoao mai Elder Dieter F. Uchtdorf, “[O le taiala] o le Mo Le Malosi o le Autalavou e toa i le folafolaina atu o le mataupu a Keriso [ma le] valaauliaina o outou le [autalavou] ia faia filifiliga e faavae i le [mataupu].”²²

Na aoao mai Elder Dale G. Renlund, “Matou te valaaulia faifeautalai ia faia mea o loo latou talosagaina tagata latou te aoaoina e fai: … faaaoga le aoaoga faavae a Keriso i o latou olaga [ma] la’a i luga ma tutumau ai i le ala o feagaiga.”²³

O aoaoga faavae a Keriso e faamamanaina ai i latou o loo tauivi pe o lagonaina e le o ni ō le Ekalesia aua e fesoasoani ia i latou, e pei ona ta’ua e Elder D. Todd Christofferson, “e mautinoa: Na maliu Iesu Keriso mo a’u [ma] e alofa ia te au.”²⁴

Matua, afai o tauivi lou atalii/afafine ma se mataupu faavae o le talalelei po o se aoaoga faaperofeta, faamolemole ia tetee atu i soo se ituaiga o tautala leaga²⁵ pe faatautavā i le Ekalesia po o ona taitai. O nei faiga maualalo, faalelalolagi e le talafeagai ma outou ma e mafai ona afaina ai le faamaoni faaumiumi o lou atalii/afafine.²⁶ E talanoa lelei tele e uiga ia te outou, o le a outou puipuia pe faufautua mo lou atalii/afafine pele pe faaali atu ni faailoga o le tutufaatasi ma ia. Ae ua ma iloa ma lo’u toalua, o Jayne mai aafiaga patino, o le aoaoina o la ma tama pele i le pogai matou te manaomia uma ai ma le naunautai ia Iesu Keriso ma le ala e faaaoga ai Lana aoaoga faavae fiafia, o le mea lea o le a faamalosia ai ma faamaloloina o ia. Se’i o tatou liliu atu i latou ia Iesu, o lo latou faufautua moni i le Tama. Na aoao mai le Aposetolo o Ioane faapea “O i latou … e tumau i le mataupu ia Keriso, … ua ia te i latou le Tama ma le Alo.” Ona Ia lapata’ia lea o i tatou ia faaeteete “ne’i alu atu ia te outou se tasi, ae le avatua lenei lava mataupu.”²⁷

Sa ma asiasi talu ai nei ma Jayne i le vao lea na tuu ai i luga e Mose se gata apamemea i luma o le fanauga femoumoua’i a Isaraelu. Na folafola mai le Alii e faamalolo i latou uma o e utia e gata uogo pe afai e tau lava ina vaavaai atu i ai.²⁸ O le tuuina i luga o le mataupu a Keriso i o tatou luma, o loo faia foi e le perofeta a le Alii lena lava mea e tasi, “ina ia faamalolo ai e ia o nuu uma.”²⁹ Po o a lava ū po o tauiviga tatou te feagai i lenei vao o le olaga nei, ia aua nei faapei i tatou o ē semanu e faamaloloina i aso anamua ma i le taimi nei, ae paga lea, “e lei vaavaai atu … ona sa latou le talitonu e mafai ona faamalolo ai i latou.”³⁰ Ua faamautu mai e le Tusi a Mamona: “Faauta, … o le ala lenei; ma ua leai se isi lava ala po o se isi suafa ua tuuina mai i lalo ifo o le lagi e mafai ona faaolaina ai o le tagata i le malo o le Atua. Ma o lenei, faauta, o le mataupu faavae lenei a Keriso.”³¹

O lena afiafi i New Jersey, o le faasoaina atu o le pogai tatou te manaomia ai Iesu Keriso ma Lana mataupu na ou maua ai se tuafafine fou ae mo ia o se tuagane fou. Sa ma lagonaina le molimau toafilemu, faamautinoa a le Agaga Paia. O le mea masani, sa ou valaaulia o ia e aumai faamatalaga e faafesootai ai o ia, ma faaauau ai le talanoaga ma o tatou faifeautalai. Sa fiafia o ia e faia lena mea.

“O le mea lea, se taua ina a tele o le faailoa atu o nei mea i e o nonofo i le lalolagi,” ua tautino mai e le Tusi a Mamona—ia alofa, faasoa ma valaaulia³² a o tatou faapotopotoina Isaraelu i o tatou nuu uma ma aiga—“ina ia latou iloa e leai se tagata e mafai ona mau i le afioaga o le Atua, sei vagana ai ua ala i le mana, ma le alofa mutimutivale, ma le alofa tunoa [ma le mataupu] a le Mesia Paia.”³³ I le suafa o Iesu Keriso, amene.