Pe Ua Faamagaloina Moni Ea A’u?

I ni nai tausaga ua mavae, sa ma siitia atu ai ma Sister Nattress i Idaho, lea na ma tatalaina ai se pisinisi fou. Sa i ai ao ma po uumi i le ofisa. O le mea e faafetai ai, sa le mamao ese atu mai le galuega le mea sa ma nonofo ai. O vaiaso taitasi, e o mai ai Shawna ma le ma fanau teine e toatolu—e i lalo ifo uma o le ono tausaga—i le ofisa e aai faatasi i le taumafataga o le aoauli.

I lena aso ina ua maea le taumafataga a lo matou aiga, sa ou matauina ai sa tuua e le ma tama teine e lima tausaga, o Michelle, se savali patino mo a’u, na tusia i luga o se tama’i Fasipepa ma faapipii i la’u telefoni o le ofisa.

Na faitauina faapea, “Tama, manatua ia alofa ia te au. Alofa, Michelle.” Sa o se faamanatu mamana lenei i se tamā talavou e uiga i mea na e sili ona taua.

Uso e ma tuafafine, ou te molimau atu e manatua pea e lo tatou Tama Faalelagi i tatou ma e atoatoa Lona alofa ia i tatou. O la’u fesili lenei: O tatou manatua o Ia? Ma pe tatou te alolofa ia te Ia?

I tausaga ua mavae, sa ou auauna atu ai o se taitai o le Ekalesia i le lotoifale. O se tasi o a matou alii talavou, o Danny, sa tulaga ese i soo se itu. Sa usiusitai o ia, agalelei, lelei, ma sa i ai se loto maoae. Peitai, ina ua faauu o ia mai le aoga maualuga, sa amata ona fegalegaleai ma se vaega vaogatā. Sa aafia o ia i fualaau faasaina, aemaise lava le [P] methamphetamine, ma faaifoifo atu i le auala maseesee o vaisu ma le faatafunaga. E lei umi, ae suia atoa ona foliga vaaia. Sa faigata ona iloa o ia. O le suiga sili ona taua sa i ona mata—sa faiifo le susulu i ona foliga. Sa tele ni taimi sa ou aapa atu ai ia te ia, ae sa le’i manuia. Sa le’i toe fiafia mai.

Sa faigata le vaai atu i lenei alii talavou mataina o puapuagatia ma ola i se olaga sa le masani ai! Sa tele naua mea sa mafai ona ia gafatiaina.

Ona oo lea i se tasi aso, na amata ai lana vavega.

Sa auai o ia i se sauniga faamanatuga lea sa faasoa atu ai e lona uso laitiiti lana molimau a o lei malaga ese atu mo se misiona. I le taimi o le sauniga, sa lagona ai e Danny se mea ua umi se taimi na te lei toe lagonaina. Sa ia lagonaina le alofa o le Alii. Na iu lava ina i ai lona faamoemoe.

E ui ina sa i ai lona manao e suia, ae sa faigata ia Danny. O ana vaisu ma le ta’usalaina lea sa i ai faatasi sa toetoe lava a sili atu nai lo le mea sa mafai ona ia tauaveina.

I se tasi aoauli faapitoa, a o o’u moaina le matou vao, sa oo mai Danny i lana taavale e aunoa ma se ta’uina mai. Sa matuai tauivi lava o ia. Sa ou tapēina le moavao, ma sa ma saofafai i lalo faatasi i le paolo o le poletito i luma. O iina na ia faasoa mai ai lagona o lona loto. Sa manao moni lava o ia e foi mai. Peitai, o le liliuese mai ana vaisu ma lona olaga sa matuai faigata lava. E le gata i lea, sa ia lagonaina le tausalaina tele, ma le maasiasi tele i le pau mamao ese. Sa ia fesili mai, “E mafai moni ea ona faamagaloina au? E i ai moni ea se auala e toe foi atu ai?”

Ina ua uma ona ia sasaa mai lona loto i nei atugaluga, sa ma faituina faatasi le Alema mataupu 36 :

“Ioe, sa ou manatua au agasala ma amioletonu uma. …

“Ioe, … o le mafaufau ifo i lou alu atu i luma o lou Atua sa matua falo tigaina ai lou agaga i le mata’u tele” (fuaiupu 13-14).

Ina ua uma na fuaiupu, sa fai mai Danny, “O o’u lagona tonu lava ia!”

Sa ma faaauau:

“A’o lagā a’u i le atuatuvale i le manatuaina o a’u agasala e tele, faauta, sa ou manatuaina foi lo’u faalogo i lo’u tama o vavalo atu i tagata e uiga i le afio mai o se tasi o Iesu Keriso, o le Atalii o le Atua, e togiola agasala a le lalolagi. …

“Ma ʼoi, le olioli e, ma le malamalama ofoofogia tele na ou vaaia” (fuaiupu 17, 20).

A o ma faitauina nei fuaitau, sa amata ona tafe ifo loimata. O le olioli o Alema o le olioli lea sa ia sailia!

Sa ma talanoaina o Alema sa matua amioleaga lava. Peitai, o le taimi lava na salamo ai o ia, na te lei toe tepa lava i tua. Na avea o ia ma soo faamaoni o Iesu Keriso. Sa avea o ia ma perofeta. Na faaatoatoa le pupula a Danny. “Se perofeta?” sa ia fai mai ai.

Sa na ona ou tali atu, “Ioe, se perofeta. E leai se faamalosia o oe!”

Sa ma talanoaina e ui e lei oo ana agasala i le tulaga o Alema, ae o le folafolaga lava lea e tasi o le faamagaloga atoatoa ma le atoatoa e faia i tagata uma—e ala i le Togiola le iu a Iesu Keriso.

Ua malamalama nei Danny. Ua ia iloa le mea e tatau ona ia faia: sa manaomia ona amataina lana malaga e ala i le faalagolago i le Alii ma faamagalo ia te ia lava!

O le suiga tele o le loto o Danny sa o se matuai vavega lava. I le aluga o taimi, sa suia ona foliga, ma sa toe foi mai le susulu o ona foliga. Sa oo ina agavaa o ia mo le malumalu! Sa toe foi mai lava o ia!

Ina ua mavae ni nai masina, sa ou fesili atu ia Danny pe manao e auina atu se talosaga e auauna atu i se misiona talai. O lana tali o se tasi o mea na faateia ma maofa ai.

Sa ia fai mai, “Oka so’u fia auauna atu i se misiona, ae ua e iloa le mea sa ou i ai ma mea sa ou faia! Sa ou faapea ua ou le agavaa.”

Sa ou tali atu, “Atonu e sa’o oe. Peitai, e leai se mea o taofia i ta’ua mai le faia o se talosaga. Afai e faamatuuina mai ai oe, o le mea sili o le a e iloa na e faaalia se manao faamaoni e auauna atu i le Alii.” Sa fiafia o ia. Sa matuai fiafia o ia i lenei manatu. Ia te ia o se mea sa le’i mautinoa lea, ae o se avanoa sa ia naunau e fai.

I ni nai vaiaso mulimuli ane, ma i lona ofo tele, sa tupu ai se isi vavega. Na maua e Danny se valaauga e auauna atu i se misiona talai.

I ni nai masina talu ona taunuu Danny i le galuega faamisiona, sa ou maua ai se valaau i le telefoni. Sa na ona faapea mai o lona peresitene, “O le a le mea ua faapea ai lenei alii talavou? O ia o se faifeautalai sili ona maoae ua ou vaai i ai!” Tou te silafia, sa maua e lenei peresitene se Alema le Itiiti i ona po nei.

I le lua tausaga mulimuli ane, na toe foi mai ai Danny i le fale ma le mamalu, na auauna atu ai i le Alii ma lona loto atoa, manatu, mafaufau, ma le malosi atoa.

Ina ua maea lana lipoti faafaifeautalai i le sauniga faamanatuga, sa ou toe foi i le fale, ae ou faalogoina se tu’itu’i i le faitotoa pito i luma. Sa tu ai iina Danny ma loimata i ona mata. Sa ia fai mai, “E mafai ona ta talanoa mo se minute?” Sa ma o i fafo i le faasitepu lava lea o le poletito.

Sa ia fai mai, “Peresitene, e te manatu ua faamagaloina moni lava a’u?”

O lenei la ua maligi foi o’u loimata. Sa tu i o’u luma se soo tuuto o Iesu Keriso o lē sa tuuina atu ana mea uma i le aoao atu ma molimau atu e uiga i le Faaola. O ia o le faatusa o le mana faamalolo ma le faamalosiau o le Togiola a le Faaola.

Sa ou fai atu, Danny! Na e tilotilo i le faaata? Na e vaai i ou mata? Ua faatumulia i le susulu, ma o loo e faasusulu maia ai i le Agaga o le Alii. Ioe ua faamagaloina oe! Ese lou lelei! O le mea la e tatau ona e faia nei o le agai i luma i lou olaga. Aua le toe tepa i tua! Tulimatai atu i luma ma le faatuatua i le isi sauniga.”

O loo faaauau pea le vavega a Danny i le asō. Sa faaipoipo o ia i le malumalu ma toe foi i le aoga, lea na ia maua ai se faailoga o le matuaofaiva. O loo faaauau pea ona ia auauna atu i le Alii ma le mamalu ma le malualii i ona valaauga. O le mea e sili ona taua, ua avea o ia ma se tane maoae ma se tamā faamaoni. O ia o se soo tuuto o Iesu Keriso.

Na aoao Peresitene Russell M. Nelson, “A aunoa ma le Togiola e le iu a le [Faaola], o le a le se ese tagata uma ma le mafai ona toe maua mai.”¹ Sa lei leiloa Danny, ma e faapena foi ia i tatou i le Alii. O loo tu o Ia i le faitotoa e sii a’e i tatou, e faamalosia i tatou, ma faamagalo i tatou. Na te manatua pea e alofa ia i tatou!

O se faaaliga ofoofogia o le alofa o le Faaola mo fanau a le Atua o loo tusia i le Tusi a Mamona: “Ina ua uma ona fetalai atu faapea o Iesu, sa toe silasila solo faataamilo ona fofoga i luga o le motu o tagata, ma silasila atu ua maligi o latou loimata, ma ua latou pulatoa mai ia te ia e peiseai ua latou mananao e ole mai ia te ia ia afio pea o ia faatasi ma i latou mo sina taimi umi teisi atu” (3 Nifae 17:5).

Na uma ona faaalu e le Faaola se aso atoa e auauna atu ai i tagata. Peitai, e tele atu mea e tatau ona Ia faia— sa tatau ona Ia asiasi atu i isi Ana mamoe; Sa tatau ona alu o Ia i Lona Tama.

E ui lava i nei matafaioi, sa Ia iloatino sa mananao tagata ina ia Ona nofo umi teisi atu. Ma, faatasi ai ma le loto o le Faaola ua tumu i le agaalofa, na tupu ai se tasi o vavega silisili i le talafaasolopito o le lalolagi:

Sa nofo o Ia.

Sa Ia faamanuia ia i latou.

Sa ia auauna atu i a latou fanau taitoatasi.

Sa Ia tatalo mo i latou; sa tutulu o Ia faatasi ma i latou.

Ma sa Ia faamaloloina i latou. (Tagai 3 Nifae 17.)

O Lana folafolaga e faavavau: O le a Ia faamaloloina i tatou.

Ia i latou o e ua se ese mai le ala o feagaiga, faamolemole ia iloa o loo i ai pea le faamoemoe, o loo i ai pea le faamalologa, ma e i ai lava i taimi uma se auala e toe foi mai ai.

O Lana savali e faavavau o le faamoemoe o le pulupasama faamalolo mo i latou uma o e ola i se lalolagi faigata. Sa fetalai le Faaola, “O a’u nei le ala, ma le upu moni, ma le ola” (Ioane 14:6).

Uso e ma tuafafine, sei o tatou manatua e saili atu ia te Ia, ia alofa ia te Ia, ma ia manatua pea o Ia.

Ou te molimau atu o loo soifua le Atua ma e alofa o Ia ia i tatou. Ou te molimau atu foi o Iesu Keriso o le Faaola ma le Togiola o le lalolagi. O Ia o le fomai sili. Ou te iloa o loo soifua lo’u Faaola! I le suafa o Iesu Keriso, amene.