O Le Galuega o Malumalu ma Talafaasolopito o Aiga—o le Galuega e Tasi ma e Tutusa Lava

O lena aafiaga ua mafai ai ona ou talisapaia lelei ai le ala, i le mavae ai o le tolu tausaga o le galue malosi ma osigataulaga maoae, na iu ai ina faamaeaina e le Au Paia i Katelani, Ohaio la latou malumalu matagofie i le tautotogo o le 1836—o le [malumalu] muamua i lenei tisipenisione. Ia Mati o le tausaga lava lena, e silia ma le afe tagata na faapotopoto i le malumalu ma i ona faitotoa mo le sauniga o le faapaiaga. Sa tulai le Perofeta o Iosefa Samita e fofogaina le tatalo o le faapaiaga, lea sa ia maua e ala i le faaaliga (tagai Mataupu Faavae ma Feagaiga 109). I le [tatalo] sa ia faamatalaina ai le tele o faamanuiaga ofoofogia ua tuuina ifo i luga o i latou o e ulu atu ma le agavaa i malumalu o le Alii. Ona lagiina lea e le aufaipese le viiga “O Le Agaga o le Atua,” ma sa tutulai le aofia ma tuuina atu le Alaga o le Osana “faatasi ai ma le [malosi tele na] foliga e … sii a’e ai le taualuga mai le fale” (Aoaoga a Peresitene o le Ekalesia: Iosefa Samita [2007], 307).

E tasi le vaiaso mulimuli ane, na faamatalaina ai e le Perofeta le faaali mai o le Alii i totonu o le malumalu, o le sa fetalai mai:

“Aua faauta, ua ou talia lenei fale, o lo’u igoa foi o le a iinei; ma o le a ou faaali a’u lava i lo’u nuu i le alofa mutimutivale i lenei fale. …

“Ma o le a salalau atu le ta’uta’ua o lenei fale i atunuu ese; ma o le amataga lenei o le faamanuiaga o le a sasaa mai i luga o lo’u nuu” (Mataupu Faavae ma Feagaiga 110:7, 10).

Ina ua mavae o lea ma isi faaaliga, sa faaali mai Elia le perofeta, o lē na aveina i le lagi e aunoa ma le tofo i le oti, i luma o le Perofeta o Iosefa Samita ma Oliva Kaotui ma saunoa mai:

“Faauta, ua oo atoa mai le taimi, lea na fetalaia e le fofoga o Malaki—na molimau mai e tatau ona auina mai o ia [Elia] [le perofeta], ae lei oo mai le aso tele ma le mataʼutia o le Alii—

“E liliu loto o tamā i fanau ma fanau i tamā, ne’i taia le lalolagi atoa i se fetuu—

“O lea, ua tuu atu i oulua lima ki o lenei tisipenisione; ma o lenei mea o le a mafai ona outou iloa ai ua lata mai lava le aso tele ma le matautia o le Alii, ua i faitotoa lava” (Mataupu Faavae ma Feagaiga 110:14–16).

Ina ua uma ona toefuatai mai e le Alii ia ki o faamauga ia Iosefa Samita, sa amatalia loa le galuega o le faaolataga i itu uma o le veli i lo tatou tisipenisione (tagai 1 Korinito 15:22, 29; Mataupu Faavae ma Feagaiga 128:8–18).

Na aoao mai Peresitene Boyd K. Packer e faapea “o lenei mea taua na tupu sa lei faalogo i ai le lalolagi, ae o le a aafia ai le faasinomaga o tagata uma o e na ola po o le a ola. Sa amata ona tutupu malie ae ia mea. Ua avea le Ekalesia ma se ekalesia fau malumalu.

“I le lalolagi, ua faapea ona aliae ai ii ma o, i se auala sa lei fuafuaina, o tagata ma ni faalapotopotoga ma nuu ua fiafia i le sailiga o gafa. Ua tupu lenei mea atoa talu ona faaali mai Elia i totonu o le Malumalu o Katelani” (The Holy Temple [1980], 141).

“Mai lava i lena aso, 3 Aperila, 1836, na amata ai ona liliu atu loto o fanau i o latou tama. O le mea na sosoo ai, sa le toe faia ma le le mautinoa ia sauniga, ae sa tumau. Sa i ai le mana o faamauga faatasi ma i matou. E leai se faatagaga e sili atu i lona taua. O lena mana e aumaia ai le faamaoniga o le moni ma le tumau e faavavau o sauniga uma e faia i le pule e tatau ai mo e o soifua ma e ua maliliu” (Preparing to Enter the Holy Temple [2002], 28).

Uso e ma tuafafine pele, o le fausiaina ma le faaaogaina tatau o malumalu ua o se faailoga i soo se tisipenisione o le moni o le Ekalesia a Iesu Keriso. Ina ua uma le faapaiaga o le Malumalu o Sate Leki i le 1893, sa uunaia e Peresitene Uilifoti Uitilafi tagata o le Ekalesia ina ia saili faamaumaga o o latou augatuaa ma ia faamaumau i o latou gafa e ala i le o i tua i le mamao e mafai ai ina ia aumai igoa i le malumalu ma faia sauniga o le faaolataga ma le faaeaga (tagai i le Aoaoga a Peresitene o le EKalesia: Wilford Woodruff [2004], 174).

E tasi le tausaga mulimuli ane (1894), o lea lava Peresitene Uitilafi na vaaia le fatuina o le Sosaiete o Gafa a Iuta. O le selau o tausaga mulimuli ane, i le 1994, na saunoa ai Elder Russell M. Nelson, a o avea ma sui o le Korama a Aposetolo e Toasefululua, “O mea na tutupu i lena tausaga logologoa ua faavaeina ai suesuega o talafaasolopito o aiga ma auaunaga i le malumalu o se galuega e tasi i le Ekalesia” (“The Spirit of Elijah,” Ensign, Nov. 1994, 85).

Uso e ma tuafafine pele, ua uunaia i tatou e le Alii o ni tagata o Lana Ekalesia e faasao o tatou lava talafaasolopito o aiga, ia aoao mai o tatou augatuaa, ma ia faia fuafuaga talafeagai mo i latou ia maua sauniga o le talalelei i totonu o malumalu e fesoasoani ia latou alualu ai i luma agai i le ala o feagaiga, lea o le a faamanuia ai i latou i se aiga e faavavau. O se taulaiga totonugalemu lea o le fuafuaga a lo tatou Tama Faalelagi: o le faatasia o aiga mo lenei olaga ma mo le faavavau.

O outou e le o lagona le gafatia e faia lenei galuega, e tatau ona outou silafia e le o tuua na o outou. E mafai ona tatou liliu uma atu i meafaigaluega ua saunia e le Ekalesia ma o loo maua i nofoaga autu o le FamilySearch, lea sa masani ona tatou taʼua o nofoaga autu o talafaasolopito o aiga. O nei nofoaga Autu o le FamilySearch ua mamanuina ina ia mafai e toetoe lava o tagata uma, faatasi ai ma sina fesoasoani, ona suʼe faamatalaga o o latou augatuaa ma faatulaga lelei ina ia mafai ona latou aveina atu i le maota o le Alii. Faamolemole e faafesootai faufautua o talafaasolopito o aiga i la outou uarota po o le paranesi, o e o le a taialaina oe i laasaga uma o le ala.

A o tatou mulimuli i le taitaiga a perofeta ma aoao auala e fai ai o tatou talafaasolopito o aiga ma faia sauniga o le malumalu mo o tatou augatuaa, o le a tatou maua le olioli sili seia oo ina tatou le toe mananao e taofi le faiga. O le a faalolovaia e le Agaga o tatou loto, fagua o tatou tomai ma taleni e faia, ma taiala i tatou a o tatou saili mo igoa o o tatou augatuaa. Ae ia tatou manatua o talafaasolopito o aiga e sili atu nai lo le na o le vaavaai mo igoa, aso ma nofoaga. O le faatasia lea o aiga ma le lagonaina o le olioli lea e oo mai i le faasafua atu ia i latou o sauniga o le talalelei.

Ou te fiafia lava i aoaoga musuia a lo tatou perofeta peleina o, Peresitene Russell M. Nelson o le na saunoa ma: “O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo a’oa’oina i totonu o le malumalu, e ala i a’oa’oga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a o tatou tausia a tatou feagaiga, Na te faaee mai ia i tatou Lona mana faamalolo ma faamalosiau” (“O Le Malumalu ma Lou Faavae Faaleagaga,” Liahona, Nov. 2021, 93–94).

E moni lava, o le galuega o malumalu ma talafaasolopito o aiga o le galuega e tasi ma e tutusa lava i le Ekalesia.

Ou te molimau atu i nei upumoni. Ua ou iloa o le Ekalesia lenei a le Alii o Iesu Keriso, lo tatou Faaola ma le Togiola, o lē tatou te manatua ma faaaloalo loloto i ai i lenei taimi o le Eseta. Ua ou iloa e alofa o Ia ia i tatou, ma a tatou tausia a tatou feagaiga ma tuu atu lo tatou talitonuga atoa ia te Ia, Na te faaeeina i tatou i Lona mana faamalolo ma faamalosiau. I le suafa o Iesu Keriso, amene.