O Soo o le Alii o le Filemu

I le faataunuuina o le valoaga na tuuina atu ia Sakaria,¹ na ulufale manumalo atu Iesu i le aai paia i luga o se asini, lea sa talitonuina i tusitusiga o se “faatusa anamua o le aigatupu Iutaia,”² ae moni lava e fetaui lelei ma le Tupu o tupu ma le Alii o le Filemu.³ Sa sisosiomia o Ia e se motu o so’o sagisagi fiafia, o ē na fola o latou ofu, o lau pama, ma isi lau i luga o le ala sa afio atu ai Iesu. Sa latou vivii i le Atua, ma alalaga, “Ia manuia le Tupu o loo afio mai i le suafa o le Alii: o le manuia i le lagi, o le viiga foi i mea aupito a luga.”⁴ Ma sa toe alalaga foi, “Osana i le Alo o Tavitia: Ia manuia le o maliu mai i le suafa o Ieova; Osana i mea aupito a luga.”⁵ O lenei mea maoae, lea tatou te faamanatuina i lea aso ua lauiloa o le Aso Sa o le Lau Pama, o se tamua fiafia lea i mea ogaoga o le a tutupu i lena vaiaso matautia na taualuga i ai le taulaga lē manatu faapito a le Faaola ma le vavega ofoofogia o le tuugamau avanoa.

I le avea ai ma Ona soo, o i tatou o Lona nuu filifilia, ua valaauina e folafola atu Ona uiga paia,⁶ o ē faalauiloaina le filemu ua matua’i ofoina atu ma le agalelei e ala atu ia te Ia ma Lana taulaga togiola. O lea filemu o se meaalofa ua folafola mai ia i latou uma o ē liliu atu o latou loto i le Faaola ma ola amiotonu, o lena foi filemu e aumaia ai ia i tatou le malosiaga e olioli ai i le olaga nei ma mafai ai ona tatou onosa’ia tofotofoga tiga o la tatou faigamalaga.

I le 1847, na tuuina mai ai e le Alii ni faatonuga patino i le Au Paia paionia o ē sa moomia le filemu e tumau ai le toafimalie ma le lotogatasi a o latou feagai ma faigata e lei faamoemoeina i la latou faigamalaga i sisifō. Faatasi ai ma isi mea, sa faatonuina ai e le Faaola le Au Paia e “tuu le fefinauaʼi ma le tasi; tuu le tautala leaga o le tasi i le isi.”⁷ Ua faamautu mai e tusitusiga paia e faapea o i latou o e faia galuega o le amiotonu ma taumafai malosi e savavali i le agamalu o le Agaga o le Alii, ua folafola atu i ai le filemu latou te manaomia e ola ai i aso o le vavaō lea o loo tatou ola ai nei.⁸

I le avea ai o ni soo o le Alii o le Filemu, ua faatonuina i tatou e ola ma ni “loto ua fili faatasi ma le lotogatasi ma le alofa o le tasi i le isi.”⁹ Na ta’ua talu ai nei e lo tatou perofeta pele, o Peresitene Russell M. Nelson, “O le fefinaua’i e solia ai mea uma o loo tu atu ai le Faaola ma aoao atu.”¹⁰ O loo augani mai lo tatou perofeta ia tatou faia mea uma tatou te mafaia e faamuta ai fetaua’iga o loo sasao i le taimi nei i o tatou loto ma i o tatou olaga.”¹¹

Se’i o tatou mafaufau i nei mataupu faavae i le vaaiga o le alofa mamā o Keriso mo i tatou ma i le avea ai o i tatou ma Ona soo, ia saili ia maua lena alofa mo le tasi ma le isi. Ua faamanino mai e tusitusiga paia lenei ituaiga o alofa o le alofa mamā lea.¹² Pe a tatou mafaufau i le alofa mamā, e masani ona liliu atu o tatou mafaufau i faatinoga matamau ma foai e fesoasoani ai i mafatiaga o i latou o loo feagai ma faigata faaletino, o ‘oa, po o faigata faalelagona. Ae tusa lava, o le alofa mamā e le na ona faatatau i se mea tatou te foai atu i se tasi, ae o se uiga faaleatua o le Faaola ma e mafai ona avea o se itutino o ō tatou uiga. E le o se mea e ofo ai faapea sa fatonuina i tatou e le Faaola e faaoofu i tatou lava i le “fusi o le alofa mama, … o le fusi lea o le atoatoa ma le filemu.”¹³ A aunoa ma le alofa mamā, o i tatou o mea noa¹⁴ ma e le mafai foi ona tatou mautofi i le nofoaga ua saunia e le Alii mo i tatou i maota o lo tatou Tama Faalelagi.¹⁵

Na faaa’oa’o atoatoa mai e Iesu le uiga o le mauaina o lenei fusi o le atoatoaga ma le filemu, aemaise pe a tatou feagai ma mea tigā matuitui na tamua mai i Lona faamaturoina. Mafaufau mo sina minute i le mea atonu na lagonaina e Iesu a o Ia mulumuluina ma le lotomaualalo vae o Ona soo, ma le silafia lelei o se tasi o i latou o le a faalataina o Ia i lena lava po.¹⁶ Po o le, i nai itula mulimuli ane, ina ua faamaloloina ma le alofa e Iesu le taliga o se tasi o tagata sa o atu faatasi ma Iuta, Lona faalata, e pu’e faapagota o Ia.¹⁷ Po o le taimi na tu ai le Faaola i luma o Pilato, ma tuu’aia sese e faitaulaga sili ma toeaina, ae leai se upu na ia tautala ai e faasaga i tu’ua’iga faasaga ia te Ia, ma sa Ia tuua ai le kovana Roma ma le maofa.¹⁸

E ala i nei mea matautia e tolu, ma e ui ina mamafatu le faanoanoa ma le atuatuvale, ae na aoao mai i tatou e le Faaola e ala i Ana faataitaiga e faapea “e onosai le alofa, e agamalu; … e le losilosi vale; … e le mitamita vale, e le faafefeteina, e le amio mataga, e le sailia e ia ana lava mea, e le faaitaitagofie, [ma] e le tuuina atu i nisi le leaga.”¹⁹

O le isi itu taua e faamamafa, ma o se tasi e faatatau tonu i lo tatou avea ai ma soo ma le ala tatou te faalauiloa ai le filemu o le Faaola, o le faiga lea tatou te taulimaina ai le tasi ma le isi. I le taimi o lana galuega i le lalolagi, sa taulai atu aoaoga a le Faaola—e le gata ai, ae sa faapatino—i uiga mamā o le alofa, alofa mamā, onosai, lotomaualalo, ma le mutimuti alofa—o uiga faaleatua faavae ia i latou o e mananao ia latalata atili ia te Ia ma faalauiloa Lona filemu. O na uiga faaleatua o meaalofa mai le Atua, ma a tatou taumafai malosi e atina’e, o le a amata ona tatou vaai atu ma le loto malamalama atili, nofouta, faaaloalo, ma le onosai i eseesega ma vaivaiga o ō tatou tuaoi. O se tasi o faailoga iloga faapea ua tatou latalata atili i le Faaola ma avea atili e faapei o Ia o le ala alofa, onosai, ma le agalelei tatou te taulima ai o tatou uso a tagata, po o a lava tulaga o i ai.

E tele ina tatou vaai atu i tagata e faia faamatalaga le lelei pe taufaaleaga foi e uiga i uiga vaaia, o vaivaiga, ma manatu o isi, aemaise lava pe a eseese na uiga pe feteena’i foi ma ala latou te amio a’i ma mafaufau i ai. E masani tele ona vaaia nei tagata o fepasia’i na ituaiga o faamatalaga i isi, o ē foi e toe faia mea sa latou faalogo ai e aunoa ma le iloa moni o tulaga uma o siosiomia ai sea tulaga. O le mea e leaga ai, e faamalosiauina e faasalalauga faaagafesootai lea ituaiga o amioga i le igoa o mea moni ma le manino e faatatau i ai. E aunoa ma le faatuaoia, o talatalanoaga faatekinolosi e tele ina tata’i atu ai tagata i osofaiga faaletagata ma feeseeseaiga ogaoga, e mafua ai le le fiafia, o loto e faamanu’alia, ma salalau ai le musaesae o le feitaga’i.

Na valoia e Nifae e faapea i aso e gata ai, o le a matamataita ai le fili ma faaoso tagata ia feitai i le mea e lelei.²⁰ Ua aoao mai e tusitusiga paia e faapea “o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua.”²¹ I se isi faaupuga, “o le mea ua leaga e mai le tiapolo; ona o le tiapolo o se fili i le Atua, ma ua faasagatau pea ia te ia, ma ua valaau ma faatosina tagata i le agasala, ma ia latou faia pea le mea leaga.”²²

Pe a mafaufau i le aoaoga faaperofeta, e le o se mea e ofo ai o se tasi o togafiti a le fili o le faagaepuina lea o le feitaga’i ma le inoino i loto o fanau a le Atua. E olioli le fili pe a vaai atu i tagata o faitioina, faatauemu, ma taufaaleaga ai le tasi i le isi. O lea amioga e mafai ona faatama’ia ai uiga o se tagata, uiga ta’ulelei, ma le vaai maualuga i le tagata lava ia, aemaise pe a faamasinoina le tagata ma le lē tonu. E taua le faalauiloa faapea a tatou faatagaina lenei ituaiga o uiga faaalia i o tatou olaga, ua tatou faia se avanoa i o tatou loto mo le fili e toto i totonu o i tatou le fatu o maseiga, ma taumafai ai ia tatou pauu atu i lana mailei matamataita.

A tatou lē faaeteete i o tatou mafaufauga, upu, ma faatinoga, tatou te tini taunuu i le lavelavea i togafiti poto a le fili, e faatauma’oia ai a tatou sootaga ma tagata o vagaia i tatou ma ē pele ia i tatou.

Uso e ma tuafafine, i le avea ai o ni tagata tulaga ese o le Alii ma ē faalauiloaina Lona filemu, e lē mafai ona tatou faatagaina nei togafiti a le tiapolo e ofi mai i o tatou loto. E le mafai ona tatou tauamoina sea ituaiga o avega matautia e faatauma’oia ai lagona, sootaga, e oo lava i ola. O le tala lelei o le tala fiafia lea e olioli tele ai.

O le mea moni, e leai se tasi o i tatou e atoatoa, ma e moni, e i ai taimi pe a faaseseina i tatou i lenei ituaiga o amio. I Lona alofa atoatoa ma le silafia lelei o mea tatou te lolo i ai faaletagata soifua, e ta’u mai i taimi uma le Faaola e lapata’ia i tatou i na ituaiga o mea mata’utia. Sa Ia aoao mai i tatou, “Aua o le faamasinoga tou te faamasinoina atu ai, e faamasinoina ai outou; o le fua foi tou te fuaina atu ai, e toe fuaina mai ai ia te outou.”²³

O’u uso e ma tuafafine pele, a o tatou taumafai malosi e atia’e uiga faaleatua e faapei o le Faaola, e mafai ona avea i tatou ma meafaigaluega o Lona filemu i le lalolagi e tusa ai ma le mamanu sa atia’e e Ia lava. Ou te valaaulia outou e mafaufau i auala e mafai ai ona suia i tatou lava e avea ma tagata ua siitia ma lagolagoina, o tagata ua i ai se malamalama ma le loto faamagalo, tagata o e vaavaai mo le mea silisili i isi, e manatua e le aunoa e faapea “afai e i ai se mea e mamā, matagofie, pe logoleleia pe ta’uleleia, [tatou] te saili atu i nei mea.”²⁴

Ou te folafola atu ia te outou a o tatou tulimata’i ma atia’e nei uiga faaleatua, o le a atili ona tatou faaaloalo ma nofouta i manaoga o ō tatou uso a tagata²⁵ ma o le a maua ai le olioli, filemu, ma le tuputupua’e faaleagaga.²⁶ E le masalomia, o le a silafia e le Alii a tatou taumafaiga ma tuuina mai ia i tatou o meaalofa ina ia atili ai ona malamalama ma onosai i eseesega o le tasi ma le isi, o vaivaiga, ma lē atoatoa. E le gata i lea, o le a sili atu ona mafai ona tatou tetee atu i uunaiga ia ita pe faatiga ia i latou o e faatiga mai ia i tatou. O lo tatou manao ia faamagalo, faapei ona faia e le Faaola, i latou o ē soona faia i tatou pe tautala leaga ia i tatou, o le a faateleina moni lava ma o le a avea ai o se vaega o o tatou uiga.

Talosia ia i le asō, i lenei Aso Sa o le Lau Pama, ia tatou faalautele atu o tatou ofutalaloa o le alofa ma lau pama o le alofa mamā, e savavali ai i tulaga aao o le Alii o le Filemu a o tatou sauniuni e faamanatu le Aso Sa a sau, le vavega o le tuugamau avanoa. I le avea ai o ni uso ma tuafafine ia Keriso, ia tatou folafola atu ma le fiafia le, “Osana i le Alo o Tavitia: Ia manuia le o maliu mai i le suafa o Ieova; Osana i mea aupito a luga.”²⁷

Ou te molimau atu o Iesu Keriso o loo soifua ma o Lona alofa atoatoa, na faaalia e ala i Lana taulaga togiola, ua tuuina atu ia i latou uma o ē mananao e savavali faatasi ma Ia, ma olioli ai i Lona filemu i lenei lalolagi ma i le lalolagi a sau. Ou te faia ai nei mea i le suafa paia o le Faaola ma le Togiola, o Iesu Keriso, amene.