E Mafai Ona Ia Faamaloloina A’u!

Ua folafola mai e Moronae e faapea afai tatou faitauina le Tusi a Mamona ona ole atu lea i le Atua ma se loto faamaoni, manatu moni, ma le faatuatua ia Keriso pe moni, o le a faailoa mai e le Atua lona moni e ala i le mana o le Agaga Paia.¹ E faitau miliona tagata ua faaaogaina lenei folafolaga ma maua ai se molimau faamautinoa o le Toefuataiga o le atoaga o le talalelei a Iesu Keriso.

Ua apoapoai mai Moronae ia i tatou, a o tatou faitauina le Tusi a Mamona, “ia manatua le alofa mutimutivale tele o le Alii i le fanauga a tagata, mai i le foafoaga o Atamu e oo mai i [lenei] taimi, … ma [ia] manatunatu loloto i ai i o [tatou] loto.”² O tala ma aoaoga i le Tusi a Mamona ua faamanatu mai ai ia i tatou ma molimau mai ai i le alofa o le Faaola, mutimuti alofa, ma le alofa mutimutivale.

Na maliu lo’u tama ia Aperila 2013. A o ou sauniuni e lauga i lona falelauasiga, sa ou iloaina lo’u faamanuiaina i le iloa ma fiafia i ana mau e fiafia i ai. Sa ia faasoa maia i tauaofiaga faaleaiga, ma sa ia faitauina mai ia te a’u pe a ou manaomia se fautuaga, taitaiga, po o le faamalosia o lo’u faatuatua. Sa ou faalogo o ia faasoa atu i ana lauga ma tofiga. Sa le gata ina ou iloaina na mau, ae o loo ou manatuaina pea lona leo ma lagona faaleagaga sa ou maua a o ia faasoaina mai. O le faasoa mai o mau ma lagona, sa fesoasoani ai lo’u tama ia te a’u e amatalia se faavae mautu o le faatuatua i le Alii o Iesu Keriso.

Sa faapitoa le fiafia o lo’u tama i le tala i le asiasiga a le Faaola i le nuu o Nifae.³ O lea tala paia e uiga i le Alii toetu ma le faaeaina o Iesu Keriso. Sa ia inuina le ipu oona ma puapuagatia i mea uma ina ia tatou le mafatia ai pe afai tatou te salamo.⁴ Sa asiasi o Ia i le lalolagi o agaga ma faatulaga le folafolaina o le talalelei iina.⁵ Na toetu mai o Ia mai le oti, ma sa i ai o Ia ma le Tama ma sa maua ane ai poloaiga e faasoa atu tusitusiga paia ia sa Nifae ia o le a manuia ai tupulaga o le lumanai.⁶ Sa faaeaina o Ia ma maua ai Lona mana ma gafatia uma e faavavau. E mafai ona tatou aoaoina mai auiliiliga uma o Ana aoaoga.

I le 3 Nifae 11, tatou te faitau ai i le ala na afio ifo ai le Faaola mai le lagi e aoao sa Nifaē faapea o Ia o Iesu Keriso, o le na molimau i ai perofeta o le a sau i le lalolagi. Sa Ia tautino atu e faapea o Ia o le Malamalama o le Lalolagi ma sa Ia faamamaluina le Tama i le tauaveina o agasala a le lalolagi. Sa Ia valaaulia tagata e o mai e tuu atu o latou lima i Lona itu ma tagotago i tulaga o fao i Ona lima ma Ona vae. Sa Ia manao ia i latou ia iloa o Ia o le Atua o Isaraelu, o le sa fasiotia mo agasala a le lalolagi. Sa tali atu ma le fiafia tagata, ma o atu ta’itasitasi seia o latou vaaia uma ma lagonaina e moni lava o Ia o lē na tusia e perofeta o le a afio mai.⁷

Sa aoao atu e Iesu sa Nifaē e uiga i le taua o le salamo, e uiga i le avea e pei o se tamaitiiti, ma e uiga i le manaomia ona papatiso e sē tasi ua i ai Lana pule. Ona Ia aoao atu lea o le tele o aoaoga faavae ia o loo tatou aoaoina i lenei tausaga i le Feagaiga Fou.

I le 3 Nifae 17, tatou te faitau ai faapea na ta’u atu e Iesu i tagata, ua oo i le taimi e alu ai o Ia i le Tama ma faaali atu foi Ia lava i ituaiga ua leiloloa o Isaraelu.⁸ A o silasila solo faataamilo ona fofoga i luga o le motu o tagata, sa Ia matauina le maligi o o latou loimata, ma ua latou pulatoa mai ia te Ia e peiseai ua latou mananao e ole mai ia te Ia ia afio pea o Ia faatasi ma i latou mo sina taimi umi teisi atu.⁹

O le tali atu a le Faaola ia sa Nifaē na faamomoiloto ma ‘anoa. Sa Ia fetalai, “Faauta, ua tumu lo’u loto i le agaalofa ia te outou.”¹⁰

Ou te talitonu sa matuai tele atu Lona agaalofa nai lo o se tali atu i loimata o tagata. E foliga mai sa mafai ona Ia silasila atu ia i latou mai fofoga o Lana taulaga togiola. Sa Ia silafia o latou tiga uma, puapuaga, ma tofotofoga. Sa Ia silafia o latou ma’i. Sa Ia silafia o latou mafatiaga ma sa Ia silafia mai Ona mafatiaga ogaoga i Ketesemane ma i Kolokota le ala e fesoasoani ai ia te i latou e tusa ai ma o latou mafatiaga.¹¹

E faapena foi, pe a silasila mai lo tatou Faaola, o Iesu Keriso ia i tatou, Na Te silafia ma malamalama i le tiga ma avega mamafa o a tatou agasala. Na Te silafia mea ua fai ma vaisū ma luitau. Na Te silafia a tatou tauiviga ma vaivaiga o soo se ituaiga—ma e tumu o Ia i le mutimuti alofa mo i tatou.

Na mulimuli atu ai Lana valaaulia faatamalii: “E i ai ea ni isi o ia te outou ua mama’i? Aumai i latou iinei. O i ai nisi ua pipili, pe tauaso, pe setu, pe manua, pe lepela, pe mamae, pe tutuli, pe puapuagatia i soo se mea? Ia aumai i latou iinei ma o le a ou faamaloloina i latou, ona ua ou agaalofa tele ia te outou; ua tumu lo’u loto i le alofa mutimutivale.”¹²

Ma sa o atu le motu o tagata “ma i latou uma o e na puapuagatia i soo se ala; ma sa faamaloloina i latou ina ua aumaia i latou ia te ia.”¹³

I le 1990 sa matou nonofo i se tama’i taulaga o Sale, i Vitoria, Ausetalia. Sa matou fiafia lava ma pisi i le aiga, Lotu, ma tautinoga i galuega. I se Aso Toonai matagofie i le taumafanafana ina ua lata i le Kerisimasi, sa tonu ia i matou e asiasi i ni nai paka ma se matafaga lauiloa. I le mavae ai o lo matou fiafia i se aso matagofie na taaalo ai o se aiga, sa tapena tagata uma i le taavale ma agai loa i le fale. A o ou aveina le taavale, sa faafuasei ona ou tulemoe ma afua ai se faalavelave na ou so’aina ai se taavale. Ina ua mavae sina taimi, sa ou autilo solo i le taavale. O lo’u toalua, o Maxine, sa gau leaga lona vae ma sa tauivi e manava. Sa fati se ponaivi o lona fatafata. Sa matua faate’ia o ma afafine e toatolu ae faafetai sa foliga mai e le i afaina. Sa ou manu’a mitimiti. Ae o lo ma atalii e lima-masina-le-matua, sa le’i migoi.

I le taimi o le lotopopole ma le fememea’i i lena vaaiga o le faalavelave, sa fai mai ma le faanatinati lo ma afafine matua, e 11-tausaga-le-matua o Kate, “Tamā, e tatau ona e faia se faamanuiaga o Jarom.” I le uma ai o nai tauiviga, sa mafai ona matou o ‘ese ma o’u afafine mai le taavale. Sa le mafai ona faamigoi ia Maxine. Sa ou si’i a’e i luga ma le faaeteete ia Jarom; ona, a o ou taoto taliaga i luga o le palapala, sa ou faataoto lemu o ia i luga o lo’u fatafata ma tuu atu ia te ia se faamanuiaga faaleperisitua. E taunuu atu le taavale a le falema’i pe tusa o le 40 minute mulimuli ane, ua malamalama ia Jarom.

O lena po sa ou tuua tagata e toatolu o lo’u aiga i le falema’i ae ou alu ma le lē magagana i le fale i se taxi faatasi ma o’u afafine e toalua. I le po umi atoa, sa ou aioi atu ai i le Tama Faalelagi ina ia toe malolosi lo’u aiga ma i latou na manunu’a o le isi taavale. Ma le alofa mutimutivale, sa tali mai ai a’u tatalo ma tatalo na ofo ina atu faatauanau e le toatele o isi. Sa faamaloloina tagata uma i le mavae ai o se taimi, o se faamanuiaga sili ma le alofa mutimutivale.

Peitai, sa faaauau pea ona ou maua lagona o’oo’o o le ta’usalaina ma le salamo ona o le mafua ia te au o se faalavelave matuiā. Ou te ala a’e i le po ma toe manatua lelei mea matautia na tutupu. Sa ou tauivi mo ni tausaga e faamagalo a’u lava ma ia maua le filemu. Ona oo lea, a o avea ma taitai perisitua, a o ou fesoasoani atu i isi ia salamo ma fesoasoani ia i latou ia lagonaina le mutimuti alofa, alofa mutimutivale, ma le alofa o le Faaola, sa ou iloa ai e mafai ona Ia faamaloloina a’u.

O le mana faamalolo ma le togiola o le Faaola e faaaoga i mea sese faafuasei, faaiuga leaga, luitau, ma tofotofoga o soo se ituaiga—faapea foi ia tatou agasala. Ina ua ou liliu atu ia te Ia, sa suia malie o’u lagona o le ta’usalaina ma le salamo i le filemu ma le mapusaga.

Na aoao mai Peresitene Russell M. Nelson: “Ina ua togiola le Faaola mo tagata uma, sa Ia tatalaina se ala ina ia mafai ai e i latou o ē mulimuli ia te Ia ona maua Lona mana faamalolo, faamalosiau, ma le togiola. O nei faamanuiaga faaleagaga o loo avanoa mo tagata uma o ē saili e faalogo ia te Ia ma mulimuli ia te Ia.”¹⁴

Uso e ma tuafafine, pe o e tauaveina le avega o agasala e lei fo’iaina, mafatia ona o se mea ua loa ona faatiga ai se tasi ia te oe, pe o tauivi e faamagalo oe lava mai se mea sese faafuasei, e mafai ona e maua le mana faamalolo ma le togiola a le Faaola o Iesu Keriso.

Ou te molimau atu o loo soifua o Ia. O Ia o lo tatou Faaola, ma lo tatou Togiola. E alofa o Ia ia i tatou. E mutimuti alofa o Ia mo i tatou, ua faatumulia o Ia i le alofa mutimutivale, ma e mafai ona Ia faamaloloina oe. I le suafa o Iesu Keriso, amene.