Jab Ebbweer jān Iien Em̧m̧an n̄an Kamool kōn Kraist.

Ļalem iiō ko remootļo̧k rainin, jekar kajutak peid n̄an rejtake rikanaan jitōnbōro eo ad, Būreejtōn Russell M. Nelson, āinwōt Būreejtōn eo an Kabun̄ eo an Jisōs Kraist im Armij ro Rekwojarjar ilo Raan Ko Āliktata―rikōnono eo an Irooj n̄an iien in ekabwilōn̄lōn̄ an eddōk im revelesōn. Kōn e, jekar bōk elōn̄ kūr ko im kar kallim̧uri kōj kōn kōjeraam̧m̧an ko raiboojoj eļan̄n̄e jenaaj pedpede mour ko ad ioon ad Rilo̧m̧o̧o̧r, Jisōs Kraist.

Ilo 2011, ke ikar jerbal ippān ļeo ippā āinwōt ritōl ro an mijen ilo Curitiba, Brazil, telephone eo aō ekar riin̄ ilo juon iien kweilo̧k. Ekairir n̄an joļo̧k ainikien, ikar kile bwe call eo ekar jān jema. Ikar kaeir im etal jān kweilo̧k eo im uwaake: “Iakwe, Baba!”

Ilo jab kōtmene, ainikien ekar obrak kōn en̄jake: “Iakwe, Bonnie. Ij aikuj ba n̄an eok juon men. Em̧ōj lo ke ewōr aō nan̄inmij in ALS.”

Etōr jān jon̄an kōļmenļo̧kjeņ eo aō kōn tarpok, “Kōttar! Ta in ALS?”

Baba ekar kōmelele kadede, “Kōļmenļo̧kjen eo aō enaaj emourur wōt ak ānbwini enaaj jidik jidik m̧ōjņo̧ļo̧k.”

Ikar kile bwe menin enaaj kar ļap kilaan ilo mour eo aō ke ikar jino ļo̧n̄tak kōn kapan̄pan̄ ko an ennaan in ekabūrom̧ōjm̧ōj. Bōtaab ilo raan in iban meļo̧kļo̧k e, ekar jantōj eo an āliktata mā ikar loe enij pād wōt būruō. Jema ejitōnbōro ekar ekairir ilo an ba, “Bonnie, lale kwar ebbweer jān iien in em̧m̧an n̄an kam̧ool kōn Kraist.”

Ikar lin̄uri im jar kōn kapilōk eo an Baba. Ekutkut aō kijon̄ kajjitōk ippā make—eļan̄n̄e ij lukkuun jeļā ta m̧eļelein n̄an lale kwar ebbweer jān iien in em̧m̧an n̄an kam̧ool kōn Kriast.

Āinwōt kwe, jet iien ikar jutak ilo Jabōt eo jinoin tata ilo juon allōn̄ im kwaļo̧k kam̧ool eo kō Kraist. Elōn̄ alen ikar kam̧ool kōn m̧ool ko an gospel eo āinwōt m̧ōttan juon katak. Ikar katakin m̧ool eo ilo peran im kean̄ kōn kwojarjar eo an Kraist āinwōt juon mijenede.

Bōtaab ennaan in ekar ļapļo̧k an aorōk n̄an n̄a! Āinwōt n̄e ej ba, “Bonnie, jab kōtļo̧k bwe laļin en anjo̧ ioom! M̧ool wōt n̄an bujen ko am̧ ippān Rilo̧mo̧o̧r. Kappukōt n̄an en̄jake kōjeraam̧m̧an ko An aolep raan, im maron̄ kam̧ool kōn Jetōb Kwojarjar eo kōn kajoor eo An im an pād ilo mour eo am̧!”

Jej mour ilo juon laļ enana, eo ej kapo kōj n̄an kōļapļok ad kalimjōk men ko an laļ in jān ko an jetōb. Ainļo̧k wōt Rinipai ro ilo 3 Nipai 11, jej aikuji Jisōs Kraist. Kwomaron̄ ke pijaikļo̧k kwe make ijo, ilubwilijin armej ro me raar en̄jake eļap tarpok im kakkure? Ewi kar wāween n̄an ron̄ kūr eo make an Irooj:

“Kom̧in jutak im wōnm̧aantak n̄an Ippa, bwe kom̧in maron̄ karum̧ļo̧k peimi ilo katū, im barāinwōt kom̧in maron̄ en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a ij … Anij an Israel im Anij an aolepān laļ im kar m̧ane eō kōn jero̧wiwi ko an laļ.

“Im … jarlepju eo ar wōnm̧aanļo̧k … juon ilo̧k juon … im kar lo kōn mejaer im en̄jake kōn peier, im kar jeļā … im kar kam̧ool n̄an er make.”¹

Rinipai rein rekar kijorjor in wōnm̧anļo̧k n̄an karumļo̧k peier ilo katin im en̄jake jenkwan dila ko ilo Pein im Neen bwe ren maron̄ kam̧ool kōn er make bwe en̄in ekar Kraist eo. Ainļo̧k wōt, ewōr armej ro retiljek jaar ekkatak kake er ilo Kallim̧ur Ekāāl iiō in raar lo̧udin̄din̄ ilo kar kōttar itok eo an Kraist. Innām raar ilo̧k jān meļaaj ko aer, jikin jerbal ko, im tebōļ in kōjota ko im keeņļo̧k E, kobajļo̧k E, im jijet Ippān. Jej ke kijoror n̄an kam̧ool kōn kōj make āinwōt jarlepju ko ilo jeje ko rekwojarjar? Kōjeraam̧m̧an ko jej kappukōti rej ke dikļo̧k jān ko aer?

Ke Kraist ekar loļo̧k Rinipai ro ilo kanniōk ilo tampeļ eo aer, kūr eo An ekar jab n̄an jutak ettoļo̧k im reilo̧k n̄an E, ak n̄an an̄ur E, n̄an en̄jake kōn er make m̧ool eo an Rilo̧mo̧o̧r eo an armej. Ekōjkan an bwe ad epaakeļo̧k n̄an bōk juon kam̧ool an juon make kōn Jisōs Kraist? Menin emaron̄ m̧ōttan ta eo jema ekar kajjieon̄ katakin eō. Men̄e jemaron̄ jab kar itoklimo ilo ejja epaak eo wōt ilo kanniōk āinwōt ro rekar etetal ippān Kraist ilo jerbal eo An ioon laļ, kōn Jetōb Kwojarjar eo jemaron̄ en̄jake kajoor eo An aolep raan! Jon̄an wōt eo jej aikuji!

Jiron̄ ro ipeļaakin laļ in raar katakin eō ekanooj ļap kōn kappukōt Kraist im bōk juon kam̧ool an juon make, kōn E aolep raan. In kwaļo̧k māletlet eo an ruo iaer:

Livvy ekar alooje kweilo̧k eo eļap ilo aolepān mour eo an. Ilo m̧ool, ilo m̧weo im̧ōn ej juon iminene n̄an alooje aolepān m̧wen̄an ko ļalem āinwōt juon baam̧le. Kōn m̧okta, kweilo̧k eo n̄an Livvy ekar meļeļe in jin̄a tak wōt ak jān iien n̄an iien kikiļok ilo ejjeļo̧k meļeļe in. Bōtaab kweilo̧k eo eļap an Oktoba eo ļo̧k ekar oktak. Ekar erom an make.

Ilo tōre in, Livvy ekar jokāālet n̄an juon eo ej niknik ron̄jake. Liin ekar joļok ainikien kein kwaļo̧k ennaan ko ilo talboon eo an im kar je en̄jake ko jān Jetōb. Liin ekar bwilōn̄ ilo an kar en̄jake men ko rein juon Anij ekar kōņaan bwe en ron̄ im kōm̧m̧ani. Jokāālet in ekar kōm̧m̧ane juon oktak ilo mour eo an enan̄in ilo iien eo m̧ōkaj.

Raan ko tokālik ro m̧ōttan rekar karuwaineneiki n̄an alooj juon pija ejekkar. Ekar kejekļo̧kjeņ, “Ikar en̄jake naan ko im jetōb eo an kweilo̧k eo bar ro̧o̧ltok n̄an būruō, im ikar ron̄ aō make jab ron̄jake aer karuwainene.” Liin ekar barāinwōt lōn̄ an peran n̄an kwaļo̧k naan in kam̧ool eo an kōn Rilo̧mo̧o̧r eo ilo ward eo an.

Ālkin iien kein ekar ba, “Men eo ekabwilōn̄lōn̄ ej, ke ikar ron̄ aō make kam̧ool bwe Jisōs ej Kraist eo, ikar en̄jake an Jetōb Kwojarjar kapen bar juon alen n̄an n̄a.”

Livvy ekar jab kōm̧m̧ane jidik kijejeto n̄an jeraam̧m̧an jān kweilo̧k eo ilo wiikān eo; liin ekar wujlepļo̧k, ilo ļōmņak im jetōb, im kar lo Rilo̧mo̧o̧r ijo.

Innām, en̄iin ej Maddy. Ke baam̧le eo an ekar bōjrak aer itok n̄an jar, Maddy ekar pok im kar jab jeļā en ta. Ekar kile bwe juon men eļap an aorōk ekar jako. Innām ilo 13 iiō drettan, Maddy ekar jino etal n̄an jar make iaan. Men̄e jet iien makeļo̧k ekar pen im nana, liin ekar jeļā emaron̄ lo Rilo̧mo̧o̧r ilo m̧ōn jar eo im liin ekar kōņaan pād ijo Ekar pād ie. Liin ekar ba, “Ilo jikin jar jetōb eo aō ekar āinwōt pād ilo m̧weo.”

Maddy ekar dāpij wōt m̧ool eo bwe baam̧le eo an raar liāp ippān doon n̄an indeeo. Liin ekar bōk ippān ļaddik ro jatin ippānļo̧k n̄an jar im ekkatak jeje ko rekwojarjar ippāer ilo m̧weo. Āliktata jinen ekar jino kobaļo̧k ippāer. Maddy ekar ba n̄an jinen kōn ikdeelel eo an n̄an jerbale juon mijen im kar kajjitōk eļan̄n̄e jinen emaron̄ pojak n̄an etal n̄an tampeļ ippāņ.

Rainin Maddy ej pād ilo MTC eo. Liin ej jerbal. Liin ej rikam̧ool kōn Kraist. Waanjon̄ak eo an ekar jipan̄ tōl jim̧or ilo ro̧o̧ltok eo an ro jinen im jemen n̄an tampeļ eo im ro̧o̧l n̄an Kraist.

Āinwōt Livvy im Maddy, ilo ad kappukōt Kraist, Jetōb enaaj kam̧ool kōn E ilo elōn̄ jekjek ko rooktak. Rikam̧ool rein an Jetōb eo rej waļo̧k ilo ad jitlo̧k, jar, kōttar, im bun̄ m̧aanļo̧k wōt. Epaak eo ad n̄an Kraist ej eddōkļo̧k kōn emakijkij kabun̄jar ilo tampeļ, ukweļo̧k raan otemjej, ekkatak jeje ko rekwojarjar, pād ilo jar im jemeneri, kejekļo̧kjeņ kōn kōjeraam̧m̧an ko an petriak eo ad, eddo n̄an bōk kain̄i ko, im kautiej bujen ko rekwojarjar. Aolepān men kein rej karuwaineneiktok Jetōb eo n̄an kōmeramļo̧k ļōmņak ko ad, im rej bōktok dam̧oļo̧k in aenōm̧m̧an im kōjparok. Bōtaab jej ke kautieji āinwōt iien ko rem̧m̧an rekwojarjar n̄an kam̧ool kōn Kraist?

Em̧ōj aō pād ilo tamepļ elōn̄ alen, bōtaab n̄e ij kabun̄jar ilo m̧weo im̧ōn Irooj, ej ukōt eō. Jet iien n̄e ij jitlo̧k, ij lo eō make kwōle, bōtaab ilo iien ko jet, ij kwojkwoj ioon Jetōb eo kōn un. Jet iien ij kijor jar in ālij im iminene, bōtaab ikar barāinwōt itok ikideelel n̄an bōk kapilōk jān Irooj ilo jar

Ewōr kajoor ilo kōm̧mani iminene ko rekwojarjar jab āinwōt juon laajrak im eļapļo̧k an juon kam̧ool. Bun̄tōn eo enaaj jidik kōn jidik bōtaab eddōkļo̧k aolep raan kōn, niknik bōk koņaan im en̄jake ko ewōr tokjāer ippān Kraist. Ilo ad ikutkut jerbal ioon katak ko An, jej bōk juon naan in kam̧ool kōn E; jej kalōk juon jemjerā Ippān im Jemedwōj Ilan̄. Jej jino eromļo̧k āinwōt Er.

Rikapo eo ej ejake eļap ainikien ko me remaron̄ in pen n̄an ron̄ ainikien Irooj. Laļ in ad, apan̄ ko ad, jekjek ko ad rejjamin naaj ikōn̄ļo̧k, bōtaab jemaron̄ im aikuj kwōle im maro ālkin men ko an Kraist n̄an “ron̄jake E” kōn alikkar.² Jekōņaan ejaaki iminene ko an mour in rikaļoor im naan in kam̧ool me renaaj bōktok n̄an pedpede lōke eo ad ioon ad Rilo̧mo̧o̧r kajjojo raan.

Jema ekar jako elōn̄ļo̧k jān 11 iiō ko kiiō, bōtaab naan ko an rej mour ilo n̄a. “Bonnie, jab ebbweer jān iien em̧m̧an n̄an kamool kōn Kraist.” Ij karuwainene eok n̄an kobatok ippā ilo bōk karuwainene in an. Kappukōt Kraist aolep jikin―Ij kallim̧ur E pād ijo!³ Mool in lan̄lōn̄ ej pedped ioon kōnaan eo ad n̄an itok epaake Kraist im kamool kōn kōj make.

Jej jeļā bwe ilo raan ko eliktata, bukwe otemjej naaj bukwelōlō, im aolep lo naaj kwaļo̧k” bwe Jisōs ej Kraist eo.⁴ Ij jar bwe kam̧ool in enaaj erom juon en̄jake ejjab oktak im ej make waļo̧k n̄an kōj kiiō—bwe jenaaj bōk aolep iien em̧m̧an n̄an lan̄lōn̄ ilo kam̧ool: Jisōs Kraist emour!

O, ewi jon̄an aō iakwe E. Ewi jon̄an ad kam̧m̧oolol kōn Pinmuur eo An ejeļo̧k jemļo̧kin, eo ekar “kōm̧m̧an bwe mour indeeo en kōm̧m̧an im mour wabanban in ej m̧ool n̄an [kōj] aolep.”⁵ Ij kamool em̧m̧an eo an ad Rilo̧mo̧o̧r im aiboojoj eļap ilo Etan ekwojarjar, em̧ool Jisōs Kraist, amen.