Kweilo̧k Eo Eļap
Kwojeļā Etke N̄a Āinwōt juon Rikūrijtin Ij Tōmak ilo Kraist?
Eprōļ 2023 kweilo̧k eo eļap

Kwojeļā Etke N̄a Āinwōt juon Rikūrijtin Ij Tōmak ilo Kraist?

Jān Elder Ahmad S. Corbitt

Jān Jiljilimjuonn̄oul eo

Jisōs Kraist ekar aikuj en̄taan, mej, im bar jerkak n̄an lo̧mo̧o̧ren aolep armej jān mej ilo kanniōk im n̄an letok mour indeeo ippān Anij.

Juon jota ālkin jerbal, iiō ko ļo̧k, ikar iuweļo̧k ilo baj eo ekkā aō bōke n̄an New Jersey jān New York City. Kōrā eo ikar jijet turin ekar kile ta eo ikar je ilo kamputōr eo aō im kar kajjitōk, “Kwoj tōmak ilo … Kraist?” Ikar ba, “Aaet, N̄aij!” Ke kōm kar kōnono, ikar jeļā bwe liin ej kab em̧m̧akūt tok n̄an eria eo jān laļ in Asia kaņ jikin eaiboojoj n̄an jerbal ilo juon information technology sector ebun̄bun̄.

An make waļo̧k, ikar kajjitōk ippān, “Kwojeļā etke n̄a āinwōt juon Rikūrijtin ij tōmak ilo Jisōs Kraist?” Liin ekar barāinwōt uwaak im kajjitōk ippa bwe in ba n̄an e. Ak ke ikar tōn kōnono, ikar bōk juon iaan iien ko me elōn̄ ļōmņak ko raar kobrak ļōmņak eo aō. Ej kab kar juon kōttan in kar kōmeļeļeik “etke” Rikūrijtin n̄an juon eo elukkuun jaje kake im eļap an māletlet. Ikar jab maron̄ ba, “Ij ļoor Jisōs Kraist kōnke E ekar m̧ōņōņō in en̄taan im mej kōn jerawiwi ko aō.” Liin emaron̄ kar ļōmņak, “Jisōs ekar ke aikuj in mej? Anij emaron̄ in ke kar jeorļo̧k im karreoik kōj jān jerawiwi ko ad eļan̄n̄e jaar kajjitōk Ippān n̄an kōm̧m̧ane?”

Ekōjkan am̧ kar uwaak ilo jejjo minit ko? Ekōjkan am̧ naaj kar kōmeļeļeik menin n̄an juon m̧ōttam̧? Ajri ro im jodikdik ro: kom̧ maron̄ ke kajjitōk ippān ro jinemi im jememi ak juon ritōl tokālik, “Etke Jisōs ekar aikuj mej?” Im ro jeiū im jatū, ewōr juon men ikōņaan kwaļo̧k: jekdo̧o̧ņ aolep men ikar ļōmņak ikar jeļā kōn katak ko an Kabun̄ in, bwebwenato ko, kakien, im ko jet, uwaak eo n̄an kajjitōk in eļap n̄an tōmak rekar jab pidodo aer itok. Ilo raan eo ikar kāālet n̄an kalimjōk eļap wōt ilo ta eo eaorōk tata n̄an mour indeeo.

Ekwe, ikar kōjeļļāik eo m̧ōtta ekāāl1 bwe ewōr juon ad jetōb kobaļo̧k ippān juon ānbwin im bwe Anij ej Jemen jetōb ko ad.2 Ikar jiron̄e ke jaar mour ippān Jemedwōj Ilan̄ m̧okta jān ad ļotak n̄an laļ in, mour in wabanban in.3 Kōnke E ej iakwe e im aolep ajri ro Nejin, E ekar kōm̧m̧ane juon karōk n̄an kōj n̄an bōk juon ānbwin ilo nemāme in ānbwin aiboojoj eo An,4 n̄an m̧ōttan juon baam̧le,5 im bar ro̧o̧l n̄an im̧aan Mejān n̄an lan̄lōn̄ ilo mour indeeo ippān baam̧le ko ad6 āinwōt E ippān baam̧le eo An.7 Bōtaab, ikar ba, jenaaj kar jelm̧ae ruo kabbōjrak ko reļļap ilo laļ in kapo me ekar menin aikuj:8 (1) mej ilo kanniōk—jepelļo̧k eo an ānbwin ko ad jān jetōb ko ad. Aaet, liin ekar jeļā jenaaj aolep mej. Im (2) mej ilo jetōb—jepelļo̧k eo ad jān Anij kōn jerawiwi ko ad, bōd ko, im irļo̧k ko āinwōt an wabanban kōttoļo̧k kōj jān im̧aan Mejān ekwojarjar.9 Liin ekar ekkeijel ilo menin barāinwōt.

Ikar kōjeļļāik liin bwe menin ekar juon tōprak jān kien jim̧we eo. Kien in indeeo ej aikuj bwe kaje indeeo en kōļļā wōņāān aolep jerawiwi ko ad, ak kakure ko an kien ko an Anij ak m̧ool, ak jejjamin maron̄ bar ro̧o̧l n̄an mour im̧aan Mejān ekwojarjar.10 Enaaj kar kalijōkļo̧k, im Anij “e jamin kaarmejjete jim̧we.”11 Liin ekar meļeļe menin bōtaab ba bwe Anij ej barāinwōt tūriam̧o kake, iakwe, im kijooror n̄an kakūrm̧ool mour indeeo eo ad.12 Ikar kōjeļļāik eo m̧ōtta bwe enaaj bar wōr juon ad rikapo eo ejeļā m̧oņ, kajoor—unjen nana im riab—jum̧ae kōj.13 Kōn menin, juon eo kōn kajoor in anij ejjeļo̧k jem̧ļo̧kin n̄an anjo̧ ioon aolep kain jum̧ae im kabbōjrak ko naaj aikuj kar lo̧mo̧o̧ren kōj.14

Innām ikar kwaļo̧k ippān naan eo em̧m̧an— “naan ko rem̧m̧an, naan in lan̄lōn̄ eļap … armej otemjeļo̧k”15—bwe “kōn an Anij yokwe laļ, ear letok juon wōt Nejin ekar keotak, bwe jabdewōt eo ej lōke e en jab jako a en mour indeeo.”16 Ikar kam̧ool n̄an eo m̧ōtta, im ij kam̧ool n̄an kom̧, bwe Jisōs Kraist ej Rilo̧mo̧o̧r eo, bwe E ekar en̄taan, mej, im bar jerkak—An Pinmuur ejjeļo̧k jem̧ļo̧kin—n̄an lo̧mo̧o̧ren aolep armej jān mej in kanniōk17 im leļo̧k mour indeeo ippān Anij im baam̧le ko ad18 n̄an aolep ro renaaj ļoor E. Bok in Mormon ej kwaļo̧k, “Im āindein Anij … bōk anjo̧ ioon mej; leļo̧k n̄an Nejin kajoor n̄an kōm̧m̧an jojomar n̄an ro nejin armej … ; obrak kōn [tūriam̧o kake im] jouj … ; rupe to ko an mej, im bōk ioon make nana ko im jero̧wiwi ko aer, im eaar lo̧mo̧o̧ren er, im kabun̄-būruōn akweļap ko an jim̧we.”19

Bun̄tōn ko Anij ekar kwaļo̧ki jej aikuj būki n̄an ļoor Jisōs im bōk mour indeeo rej ņa etaer katak an Kraist. Rej koba “tōmak ilo Jisōs Kraist im Pinmuur eo An, ukweļo̧k, peptaij [n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata], bōk menin letok eo an Jetōb Kwojarjar, im niknik n̄an jem̧ļo̧kin.”20 Ikar kwaļo̧k bun̄tōn kein ippān eo m̧ōtta, bōtaab erkein jet iaan wāween ko me rikanaan ro im rijilōk ro ejjab to raar katakin kōj kōn ekōjkan an katak an Kraist maron̄ kōjeraam̧m̧an aolep ajri ro nejin Anij.

Būreejtōn Russell M. Nelson ekar kōmeļeļeik: “Katak eo erreo an Kraist ekajoor. Ej ukōt mour an aolep ro rej meļeļe im kappukot n̄an kōjerbale ilo mour eo an.”21

Elder Dieter F. Uchtdorf ekar katakin, “N̄an Kōkajoorļo̧k Jodikdik ro [unin tōl eo] ej kajoor n̄an kwaļo̧k katak eo kōn … Kraist [im] karuwaineneik eok [jodikdik ro] n̄an kōm̧m̧ani jokāālet ko pedped [ioon].”22

Elder Dale G. Renlund ekar katakin, “Jej karuwaineneik mijinede ro n̄an kōm̧m̧ane ta eo rej kajjitōkin ro rej katakin n̄an: … mour kōn katak eo an Kraist ilo mour ko aer [im] pād im pād wōt ilo iaļan bujen eo.”23

Katak an Kraist ej kōmaron̄ ro me rej ļo̧n̄tak ak en̄jake rejjab uwaan Kabun̄ in kōnke ej jipan̄ er, āinwōt an Elder D. Todd Christofferson kar kwaļo̧k, “kam̧ool bwe: Jisōs Kraist ekar mej kōn eō … [im] iakwe eō.”24

Pāāren ro, eļan̄n̄e ajri eo nejūm ej ļon̄tak kōn juon pedped in katak an gospel eo ak katak in kanaan, jouj bōjrak jān jabdewōt kain kōnono nana25 ak kōnono lāj ņae Kabun̄ in ak ritōl ro an. Ļamļam kein rejaorōk, wujwaan rej kauwōtata n̄an tiljek eo aitok kitien an ajri eo nejim.26 Ekanooj jetjet an kōnono kōn kom̧ro jon̄an kom̧ro naaj kōjparok ak jojomar kōn ajri eo nejimiro aorōk ak kwalo̧k kakōļļe ko kōn bōro kuk eo ippān. Ak lio pāleeō, Jayne im n̄a jeļā jān jeļā eo am̧ro make bwe katakin ajri eo nejūm jitōnbōro ej etke jej aolep lukkuun aikuj Jisōs Kraist im ekōjkan ad kōjerbal katak eo An ilo lan̄lōn̄ ej ta eo enaaj kōkajoorļo̧k im kemour e. Jen ukōtļo̧k er n̄an Jisōs, eo ej aer rijojomar m̧ool ippān Jemen. Rijilōk Jon ekar katakin, “Jabdewōt … pād wōt ilo katak an Kraist … Jemed im Nejin rej ippān” Innām Ej kakkōl kōj n̄an ekkōl “eļan̄n̄e jabdewōt armej ej iwōj n̄an kom̧, im jab bōkwōj katak in.”27

Raan ko ļo̧k Jayne im n̄a kar loļo̧k āne jem̧aden eo ijo Moses ekar kotak juon jedpenit in brass im̧aan ajri jōbwābwe ro nejin Israel. Irooj ekar kallim̧ur n̄an kemour aolep ro me kar kij er jān jineek baijin ko eļan̄n̄e renaaj kar reilōn̄ļo̧k n̄an e.28 Ilo kautiej katak an Kraist im̧aad, rikanaan eo an Irooj ej kōm̧m̧ane ejja in wōt, “bwe en aikuj kōmour laļ ko.”29 Jekdo̧o̧n ta kijkij ko ak baijin eo ak ļon̄tak ko jej iooni ilo āne jem̧aden in mour wabanban in, jen jab āinwōt ro me, ilo etto im kiiō, maron̄ kar bōk kōmour bōtaab, būrom̧ōj, “kar jab reilo̧k … kōnke raar jab tōmak bwe enaaj kar kemour er.”30 Bok in Mormon ej kean̄: “Lo, … iaļ eo in; im ejjeļo̧k bar juon iaļ ak āt letok ium̧win lan̄ bwe armej ren maron̄ mour ilo aelōn̄ in Anij. Im kiiō, lo, en̄in ej katak an Kraist.”31

Ilo joteen jab eo ilo New Jersey, kwaļo̧k etke jej aikuji Jisōs Kraist im katak eo An kar letok n̄an eō juon jeiū im juon jatū kāāl. Kōm kar en̄jake aenōm̧m̧an, kam̧ool in kapen an Jetōb Kwojarjar. Aaet, ikar karuwaineneik liin n̄an letok meļeļe ko n̄an kepaake im wōnm̧aanļo̧k in bwebwenato ippān mijenede ro ad. Liin ekar m̧ōņōņō in kōm̧m̧ane.

“Kōn menin, ewi jon̄an aorōkin n̄an kōm̧m̧an bwe ro ilaļ in ren jeļā men kein ” Bok in Mormon ej kean̄—n̄an iakwe, kwaļo̧k, im karuwainene32 ilo ad aintok Israel ilo aolep jukjuk in pād ko ad im baam̧le ko—“bwe ren jeļā ke ejjeļo̧k kanniōk emaron̄ pād im̧aan mejān Anij, eļan̄n̄e jaab kōn tōllo̧ke, im tūriam̧okake, im jouj [im katak] an Messaia Ekwōjarjar.”33 Ilo etan Jisōs Kraist, amen.

Kakeememej ko

  1. Ikar kāālet n̄an jab kwaļo̧k ilobwilej etan eo m̧ōtta ak n̄an kōjerbal juon riab in āt.

  2. Lale Rom 8:15–17; Hibru 12:9; Katak im Bujen Ko 88:15.

  3. Lale Jeremaia 1:4–5; Katak im Bujen Ko 138:55–56; Ebream 3:22–23, 26; Unin Tōl eo n̄an Jeje Ko Rekwōjajar, “Mour eo M̧okta,” scriptures.ChurchofJesusChrist.org; “Lesson 2: The Plan of Salvation,” Preach My Gospel: A Guide to Missionary Service (2019), 48.

  4. Lale “Lesson 2: The Plan of Salvation,” Preach My Gospel, 48.

  5. Karōk eo eweeppān an Jemen—kar ņa etan karōk in m̧ōņōņō eo eļap, karōk in lo̧mo̧o̧r, im karōk in pinmuur, ibwilijin āt ko jet—ekar jutak bwe aolep ren itok n̄an mour wabanban in āindein emenin n̄an juon baam̧le, im aolep rej m̧ōttan juon baam̧le. Aaet, ejjab aolep jekjek ko an baam̧le rej jetjet ak ekkar n̄an visōn eo an Jemed eo ej iakwe n̄an aolep ajri ro Nejin, im jet jekjek rekabūrom̧ōjm̧ōj. Ijo ke, ilo ad mour kōn katak an Kraist, Jisōs Kraist ej jipan̄ kōj bōk aolep kōjeraam̧m̧an ko ewōr an Jemed n̄an ajri ro Nejin kōn karōk etūriam̧o im dipio An. Lale barāinwōt endnote 6.

  6. Juon iaan kallim̧ur ko reļlap tata Anij ekar kōm̧m̧an n̄an ajri ro Nejin ej barāinwōt menin letok eo eļap tata iaan menin letok ko: mour ijo eutiejtata, ak mour indeeo, eo ej n̄an mour indeeo “ilo im̧aan mejān Anij im n̄an wōnm̧aanļo̧k āinwōt baam̧le ko” (Gospel Topics, “Eternal Life,” topics.ChurchofJesusChrist.org; bar lale Katak im Bujen Ko Covenants 14:7). “Baam̧le ko” ekoba ļeo pālele, lio pālele, im ajri ro, barāinwōt ro nukud remour im remej me rej bōk im mour kōn katak an Kraist. Ro uwaan baam̧le eo raar mej kadede ilo laļ eo an jetōb me raar jab maron̄ kaorōk katak an Kraist ilo mour in maron̄ kōm̧m̧ane āindein ilo laļ eo an jetōb ilo an kain̄i ko āinwōt peptaij, bōk menin letok eo an Jetōb Kwojarjar, im ro jet me rej jipan̄ kōj “niknik n̄an jem̧ļo̧kin” rej kōm̧m̧ani ilo wāween eo en̄jake jān ro nukud remour ilo tampeļ ko ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ilo kakobaba, kallim̧ur eo an mour indeeo ejjab baj n̄an ro me raar m̧are ilo mour in. Būreejtōn M. Russell Ballard ekar katakin, “Jeje ko rekwojarjar im rikanan ro raan- kein rej kalikkar bwe aolep ro rej tōmak ilo kōjparok bujen ko an gospel renaaj wōr aer iien em̧m̧an n̄an mour ijo eutiejtata” (“Kōjatdikdik ilo Kraist,” Liahona, Māe 2021, 55; kōmejaja kar kobaiktok). Kōnono jān kōnono ko an Būreejtōn Russell M. Nelson im Būreejtōn Dallin H. Oaks, Būreejtōn Ballard ekar wōnm̧aanļo̧k wōt, “iien eo ejejjet im jekjek eo me aolep kōjeram̧m̧an ko an mour eo eutiejtata naaj litok, alikkar ak waļo̧k, ak rej lukkuun m̧ool” (“Kōjatdikdik ilo Christ,” 55;,”; kōmejaja kar kobaitok.). Būreejtōn Nelson eaar katakin: “Ilo wāween ko an Irooj make im iien ko An, ejjeļo̧k kōjeraam̧m̧an naj dāpiji jān Rikwojarjar ro An retiljek. Irooj enaj ekajet im letok jenōkjej n̄an kajojo ekkar n̄an ikdelel in buruōer im kōm̧m̧an ak jerbal ko aer” (“Celestial Marriage,” Liahona, Nov. 2008, 94). Im Būreejtōn Oaks ekar kōmeļeļeik, “Elōn̄ wōt iaan jorrāān ko raorōk an mour in naaj kajim̧wi ilo Millennium, eo ej iien eo n̄an kakūrm̧ool aolep men ko rejapikpik ilo karōk in m̧ōņōņō eo eļap n̄an aolep ajri ro rōrreo nejin Jemed” (“The Great Plan of Happiness,” Ensign, Nov. 1993, 75). Lale barāinwōt endnote 6.

  7. Lale Unin Tōl eo n̄an Jeje Ko Rekwōjarjar, “Karōk in Lo̧mo̧o̧ren,” scriptures.ChurchofJesusChrist.org; lale barāinwōt Gospel Topics, “Plan of Salvation,” topics.ChurchofJesusChrist.org; “Lesson 2: The Plan of Salvation,” Preach My Gospel, 48–50, 53.

  8. Lale “Lesson 2: The Plan of Salvation,” Preach My Gospel, 49.

  9. Lale “Lesson 2: The Plan of Salvation,” Preach My Gospel, 47–50.

  10. Lale “Lesson 2: The Plan of Salvation,” Preach My Gospel, 47–50.

  11. Mosaia 15:27. Eoon in jipan̄ ko n̄an jim̧we indeeo ak jim̧we an Anij epād ilo jeje ko rekwojarjar, bōtaab lale eļap tata Alma 41:2–8 im Alma 42.

  12. Lale Alma 42:14–24; Moses 1:39.

  13. Lale “Katak 2: Karōk in Lo̧mo̧o̧r,” Preach My Gospel, 47–50.

  14. Lale Alma 34:10, 9–13; lale barāinwōt Mosaia 13:28, 34–35; 15:1–9; Alma 42:15.

  15. Luk 2:10.

  16. Jon 3:16.

  17. Lale Hilamōn 14:15–17; Mormon 9:12–14.

  18. Lale endnotes 5 and 6.

  19. Mosaia 15:8–9.

  20. “What Is My Purpose as a Missionary?,” Preach My Gospel, 1; see also “Katak 3: The Gospel of Jesus Christ,” Preach My Gospel, 63.

  21. Russell M. Nelson, “Mool Erreo, Katak Erreo, im Revelesōn Erreo,” Liaona, Nob. 2021, 6; eoon eo eaorōk kar kobaiktok.

  22. Dieter F. Uchtdorf, “Jisōs Kraist Ej Kajoor n̄an Jodikdik ro,” Liaona, Nob. 2022, 11; bar lale N̄an Kōkajoorļo̧k Jodikdik ro: Juon Tōl eo Ekāāl n̄an Kōm̧m̧ani Kāālet ko (2022), 4.

  23. Dale G. Renlund, “Lifelong Conversion of Missionaries” (address given at the mission leadership seminar, June 25, 2021), 1, Church History Library, Salt Lake City.

  24. D. Todd Christofferson, “The Doctrine of Belonging, Liaona, Nob. 2022; 56; lale barāinwōt D. Todd Christofferson, “Lan̄lōn̄ an Armej ro Rekwojarjar,” Liaona, Nob. 2019, 15–18.

  25. Lale Jemes 4:11; Katak im Bujen Ko 20:54; Unin Tōl eo n̄an Jeje Ko Rekwōjarjar, “Kōnono Ettoon,” scriptures.ChurchofJesusChrist.org.

  26. Lale Ahmad S. Corbitt, “Activism vs. Discipleship: Protecting the Valiant” (address given at the chaplains’ seminar, Oct. 2022), cdn.vox-cdn.com/uploads/chorus_asset/file/24159863/Brother_Corbitt_Chaplain_seminar.pdf; video: media2.ldscdn.org/assets/general-authority-features/2022-chaplain-training-seminar/2022-10-1000-activism-vs-discipleship-1080p-eng.mp4.

  27. 2 Jon 1:9–10.

  28. Lale Bōnbōn 21:5–9.

  29. 2 Nipai 25:20.

  30. Alma 33:20.

  31. 2 Nipai 31:21.

  32. Lale “2021 Broadcast: Principles of Love, Share, and Invite,” broadcasts.ChurchofJesusChrist.org; see also Gary E. Stevenson, “Love, Share, Invite,” Liahona, May 2022, 84–87.

  33. 2 Nipai 2:8.