Em̧ōj Ke Lukkuun Jeorļo̧k Aō Bwōd?

Jet iiō ko remootļo̧k, Sister Nattress im n̄a kar em̧akūtļo̧k n̄an Idaho, ijo kem kar kapeļļo̧k juon pejnej kāāl. Ekar wōr raan im bon̄ ko raitok ilo opiij eo. Kam̧m̧oolol, kōm kar jokwe jejjo wōt būļak ettoļo̧k jān jikin jerbal. Kajjojo wiik, Shawna im leddik ro jilu nejim—aolep dikļo̧k jān 6 iiō dettaer—rekōn itok n̄an opiij eo im kōm kōn kōraelep ippān doon.

Ilo juon raan ālkin kōraelep eo an baam̧le eo am, ikar kile bwe leddik eo nejim ļalem an iiō, Michelle, ekar likūt juon an baj ennaan n̄an eō, jeje ioon juon Post-it peba im kōdeppe n̄an talboon in opiij eo aō.

Ekar ba, “Baba, keememej in iakwe eō. Iakwe, Michelle.” Menin ekar juon kakeememej eo ekajoor n̄an juon jemen eo em̧m̧an ded kōn men ko me raorōk tata.

Ro jeiū im jatū, Ij kam̧ool bwe Jemedwōj Ilan̄ aolep iien ej keememej kōj im bwe eweppān An iakwe kōj. Kajjitōk eo aō ej en̄in: Jej ke keememej E? Im jej ke iakwe E?

Iiō ko ļo̧k, ikar jerbal āinwōt juon ritōl an Kabun̄ ilo ijo jikū. Juon iaan likao ro nejim, Danny, ekar jejjōt ilo aolep wāween. Ekar pokake, jouj, em̧m̧an, im em̧m̧an būruōn. Bōtaab, ke ekar diwōjļo̧k jān high school, ekar jino kobaļo̧k ippān juon kumi enana. Ekar ebbōk uno ko rekkajoor, eļap tata methamphetamine, im ekar etal ilo iaļ eo enana an an̄ūrlep im kakkure. Ejjab to, paaktok in ekar lukkuun oktak. Epen kar kile e. Oktak eo eļap tata ekar ilo māj ko mejān—meram eo ilo māj ko mejān raar makunļo̧k. Jejjo alen aō kar pukōtļo̧k, bōtaab ejjeļo̧k tōprak. Ekar jab itok limo.

Ekar pen n̄an lale likao em̧anm̧ōn in an en̄taan im mour juon mour me ekar jab n̄an e! Ekar kekemo̧o̧j n̄an elōn̄ men ko.

Innām juon raan, kabwilōn̄lōn̄ eo an ekar ijjino.

Ekar pād ilo juon kweilo̧k in kwojkwoj ijo ļaddik eo jatin ekar kwaļo̧k naan in kam̧ool eo an m̧okta jān an etal n̄an mijen. Ilo iien kweilo̧k eo, Danny ekar en̄jake juon me me ejjan̄in kar en̄jake ilo juon iien aotōk. Ekar en̄jake iakwe eo an Irooj. Āliktata ekar wōr an kōjatdikdik.

Jekdo̧o̧n ta ekar wōr an ikdeelel n̄an oktak, ekar lukkun pen n̄an Danny. An̄ūrlep ko an im bōd eo ej itok ippāntok renan̄in ļapļo̧k jān jon̄an eo emaron̄e.

Ilo baj juon ālkin raelep, ke ikar ļoon m̧o̧o̧re ujoj ko aō, Danny ekar bōjraktok ilo wa eo waan ilo an jab kōjeļļā kake. Ekar lukkuun nana an mour. Ikar kune ļo̧o̧n m̧oor eo waaō, im kōm kar jijet laļļo̧k ippān doon ioon jikinwe eo an porch eo. Innām ekar kwaļo̧k en̄jake ko an buruōn. Ekar lukkuun kōņaan ro̧o̧ltok. Bōtaab, oktakļo̧k jān an̄ūrlep ko an im jekjek in mour ekar kanooj in pen. Koba ippān menin, ekar ajļo̧k, kanooj jook kōn an wōtļo̧k. Ekar kajjitōk, “Imaron̄ ke lukkuun jeorļo̧k aō bōd? Ewōr ke lukkuun juon iaļ n̄an jepļaak?”

Ālkin an kwaļo̧k aolepen buruōn kōn abōņōņō kein, kōm kar riiti Alma jepta 36 ippān doon:

“Aeet, iaar keememej aolep jero̧wiwi ko aō. …

“Aeet, … jon̄an ļōmņak in n̄an itok ilo im̧aan mejān aō Anij eaar kawidbwebweik aō kōn lōļn̄o̧n̄ epen kōmmeļeļeik” (eoon 13–14).

Ālkin eoon kein, Danny ekar ba, “En̄in ej lukkuun wāween aō en̄jake!”

Kōmro kar wōnm̧aanļo̧k wōt:

“Ke iaar āindein widbwebwe kōn en̄taan, ke iaar ikimmaļ kōn ememļo̧kjeņ eo kōn jero̧wiwi ko aō rellōn̄, lo iaar keememej barāinwōt n̄an ron̄ an jema kar kanaan n̄an armej ro kōn itok eo an juon Jisōs Kraist, juon Nejin Anij, n̄an pinmuur kōn jero̧wiwi ko an laļ. …

“Im o, ta m̧ōņōņō eo, im ta meram eo eaiboojoj iaar loe” (eoon 17, 20).

Ke kōm kar riiti eoon kein, kem̧jaaļaļ ekar toor. M̧ōņōņō eo an Alma ekar m̧ōņōņō eo ekar kappukōte!

Kōm kar ekōnono bwe Alma ebwe an kar nana. Ijo ke, ke ekar ukweļo̧k, ekar jab bar reilikļo̧k. Ekar erom̧ juon rikaļoor an Jisōs Kraist eniknik. Ekar erom̧ juon rikanaan! Ekar peļļo̧k mejān Danny. “Juon rikanaan?” ekar ba.

Ikar uwaak, “Aeet, juon rikanaan. Ejjeļo̧k eddo ioom̧!”

Kōm kar ekōnono bwe ke jerawiwi ko an raar jab walōn̄ļo̧k n̄an jon̄an eo an Alma, ejja kallim̧ur eo wōt n̄an kadedeļo̧k im koweeppān jeorļo̧k bōd n̄an aolep—ilo im kōn Pinmuur eo ejjeļo̧k jem̧ļo̧kin an Jisōs Kraist.

Danny ekar kiiō m̧eļeļe. Ekar jeļā ta eo ej aikuj kōm̧m̧ane: ekar aikuj jino iaļ eo an ilo lōke Irooj im jeorļo̧k an make bōd.

Oktak in bōro eo ekajoor an Danny ekar jab juon jide in kabwilōn̄lōn̄. Ilo iien ko, paaktok eo an ekar oktak, im romakļo̧k eo ilo māj ko mejān raar ro̧o̧ltok. Ekar erreo n̄an deļon̄eļo̧k tampeļ! Ekar ro̧o̧ltok!

Ālkin jejjo allōn̄, ikar kajjitōk ippān Danny eļan̄n̄e ekar kōnaan jilkinļo̧k juon abūlkeijen n̄an etal im mijen. Uwaak eo an ekar kailbōk im kōļo̧kjeņad.

Ekar ba, “Ilukkuun kōņaan etal im mijen, bōtaab kwojeļā ia eo ikar pād ie im men ko ikar kōm̧m̧ani! Ikar ļōmņak ikar jab karbōb.”

Ikar uwaak, “Kwomaron̄ jim̧we. Ijo ke ejjeļo̧k men ej kabōjrak kōj jān ad leļo̧k juon kajjitōk. Eļan̄n̄e kojjab maron̄ mijen kōn elōn̄ un ko, men eo eaorōk kwojeļā bwe kwar kwaļo̧k am̧ ikdeleel n̄an jerbal n̄an Irooj.” Māj ko mejān raar kabūrōrō. Ekar ellowetak kōn ļōmņak in. N̄an e menin ekar juon jekjek epen, bōtaab ekar juon iien ekar m̧ōņōņō in bōke.

Jejjo wiik tokālik, jon̄an an bwilōn̄, bar juon kabwilōn̄lōn̄ ekar bar waļo̧k. Danny ekar bōk juon kūr n̄an jerbale juon mijen aolep raan.

Jejjo allōn̄ ko tokālik ālkin an Danny jikrōkļo̧k ilo mijen eo an, ikar bōk juon taļboon kūr. Būreejtōn eo an ekar ba, “Ta in mijenede in ewōjake? Ej juon mijenede eo ekabwilōn̄lōn̄ tata ijjan̄in kar loe!” Būreejtōn eo ekar ioon im jerbal ippān juon Alma eo Edik ilo raan kein.

Ruo iiō tokālik, Danny ekar jepļaaktok kōn nōbar, kar jerbal n̄an Irooj kōn aolepen buruōn, an maron̄, ļōļātāāt, im kajoor.

Ālkin riboot eo an kōn mijen eo an ilo kweilo̧k in kwojkwoj eo, ikar ro̧o̧l n̄an m̧weo, kar ron̄ kaļļaļļaļ ilo kōjam eo im̧aan. Danny ekar jutak ijo kōn mejān kemjaļaaļ. Ekar ba, “Jemaron̄ ke kōnnaan jidik?” Kōm kar diwōjļo̧k n̄an ejja jikinwe eo an porch eo.

Ekar ba, “Būreejtōn, kwoj ke ļōmņak em̧ōj ke lukkuun jeorļo̧k aō bōd?”

Kiiō kemjaļaaļ ko aō rekar koba ippān ko an. Im̧aō ekar jutak juon rikaļoor eniknik an Jisōs Kraist eo ekar leļo̧k aolepen an n̄an katakin im kam̧ool kōn Rilo̧mo̧o̧r. E ekar jutak kōn kajoor n̄an kōmour im kōkajoorļo̧k eo an Pinmuur eo an Rilo̧mo̧o̧r.

Ikar ba, “Danny! kwonan̄in ke kalimjōk juon kūlaaj? Kwonan̄in ke loe mejam̧? Rej obrak kōn meram, im kwoj eromaakļo̧k kōn Jetōb eo an Irooj. Aeet em̧ōj jeorļo̧k am̧ bōd! Kwolukkuun kabwilōn̄lōn̄! Kiiō ta eo kwoj aikuj kōm̧m̧ane ej wōnm̧aanļo̧k wōt kōn mour eo am̧. Jab reilikļo̧k. Reinm̧aanļo̧k kōn tōmak n̄an kain̄i eo tok juon.”

Kabwilōn̄lōn̄ eo an Danny ej wōnm̧anļo̧k wōt rainin. Ekar m̧arre ilo tampeļ im ro̧o̧l n̄an jikuuļ, ijo ekar bōk juon master degree. Ej wōnm̧anļo̧k wōt im jerbal n̄an Irooj kōn nōbar im utiej ilo kūr ko an. Aorōk tata eo, e kar erom̧ ļeo pālele eo ekōpaļpaļ im juon jemen baam̧le etiljek. Ej juon rikaļoor eniknik an Jisōs Kraist.

Būreejtōn Russell M. Nelson ekar katakin, “An jako Pinmuur eo ejjeļo̧k jem̧ļo̧kin [an Rilo̧mo̧o̧r] eo, aolep armej renaaj kar jako indeeo .”¹ Danny ekar jab jako, im barāinwōt kōj n̄an Irooj. Ej jutak ilo kōjām eo im kotak kōj, n̄an kōkajoor kōj, im n̄an jeorļo̧k ad bōd. Iien otemjej E ej keememej n̄an iakwe kōj!

Juon waanjon̄ak ekabwilōn̄lōn̄ kōn iakwe eo an Rilo̧mo̧o̧r n̄an ajri ro nejin Anij kar rekoote ilo Bok in Mormon: “Ke ar m̧ōj an Jisōs kōnono āindein, Eaar bōk mejān ipeļaakin ijo bar juon alen ioon jarlepju eo, im lo raar jan̄, im kar mejōk wōt E āinwōt n̄e raar kajjitōk ippān n̄an pād wōt aetokļo̧k ippāer” (3 Nipai 17:5).

Rilo̧mo̧o̧r ekar joļo̧k aolepān juon raan n̄an jerbal in karejar n̄an armej ro. Ijo ke, ekar ļōn̄ wōt men En kar kōm̧m̧ane—E ekar loļok jiip ko jet An; E ekar etal n̄an ippān Jemen.

Mekarta eddo kein, E kar kile bwe armij ro rekar ikdeelel bwe E en pād aetokļo̧k jidik. Innām, kōn bōro eo eobrak kōn tūriam̧o an Rilo̧mo̧o̧r, juon iaan kabwilōn̄lōn̄ ko reļļap tata ilo bwebwenato in laļ in ekar waļo̧k:

E kar pād wōt.

E ekar kōjeraam̧m̧an er.

E ekar jerbal in karejar n̄an ajri ro juon ilok juon.

E ekar jar kōn er; E ekar jan̄ ippāer.

Im E ekar kōmour er. (Lale 3 Nipai 17.)

An kallim̧ur ej indeeo: E enaaj kōmour kōj.

N̄an ro me rekar jebwābwe jān ial in bujen eo, jouj im jeļā aolep iien ke ej wōr wōt kōjatdikdik, aolep iien ej wōr kōmour, im aolep iien ej wōr iaļ in rool.

Ennaan in kōjatdikdik eo An indeeo ej kein kōmour eo n̄an aolep ro rej jokwe ilo laļ in enana. Rilo̧mo̧o̧r ekar ba: “N̄a iaļ eo, im m̧ool eo, im mour eo” (Jon 14:6).

Ro jeiū im jatū, jen keememej n̄an kappukōt E, n̄an iakwe E, im n̄an keememej E.

Ij kam̧ool bwe Anij emour im bwe E ej iakwe kōj. Ij bar kam̧ool bwe Jisōs Kraist ej Rilo̧mo̧o̧r im Ripinmuur eo an laļ. E ej rikōmour eo ekajoor bōtata. Ij jeļā bwe aō Ripinmuur emour! Ilo etan Jisōs Kraist, amen.