M̧adm̧ōd eo Ejjab Em̧m̧an

Āinwōt juon ļaddik jidikdik, iaar ekkatak iakwe oktak ko reļļap ilo tōre in jijen ko an kajjojo iiō ilo southwest Montana, ijo iaar rūttoļo̧k ie. Jijen eo em̧m̧an tata ippa ej an̄ōnean̄—tōreen m̧adm̧ōd. Baam̧le eo am rekar kōjatdikdik im jar bwe allōn̄ in buuļ jerbal ko am renaaj kar jeraam̧m̧an kōn juon iien m̧adm̧ōd. Ro jinō im jem̧a rekar inepata kōn mejatoto, ājmour eo an mennin mour ko im men ko jet me emaron̄ ejjeļo̧k kar aer maron̄ ie.

Ke iaar rūttoļo̧k, em̧ool ekar ļapļo̧k aō jeļā aorōkin amim m̧okaj n̄an jipan̄. Mour eo am eaar pedped ioon tōreen m̧adm̧ōd eo. Jem̧a ekar katakin eō kōn kein jerbal ko kōm kar kōjerbali n̄an m̧adm̧ōd grain. Ikar alooje an kijon̄ kōm̧akūt kein jerbal eo n̄an meļaaj eo, jepanļo̧ke juon jikin grain edik innām etale tulikin mijin eo n̄an lale bwe en ļap grain, ej pād ilo jikin bo̧bo eo im kar jab joļo̧k ippān kūl ko. Ekar āliji jekjek in jejjo alen, ukukōt mijin eo kajjojo iien. Ikar ettōr ippānļo̧k im kanooj etale men ko ippān im kōtōnke ikar jeļā ta eo ikar kōm̧m̧ane.

Ālkin an kar po būruōn kōn okoktak ko n̄an mijin eo, ikar lo jet grain ko repidodo ilo kūl eo ioon bwidej im kar kwaļo̧ki n̄an e kōn juon reitok in kōkkōm̧anm̧ōn. Iban meļo̧kļo̧k ta eo jema ekar ba n̄an n̄a: “Ebwe an em̧m̧an im em̧m̧an tata ta in mijin in emaron̄ kōm̧m̧ane.” Ejjab kanooj kabun̄ bōro kōn kōmeļeļe in an, ikar kejekļo̧kjeņ kōn weppāān ko an m̧adm̧ōd in.

Jidik iien tokālik, ke ekar m̧ōļo mejatoto ilo joteen ko, ikar alooje an taujin swan, geese, im dak ko rej em̧akūt laļļo̧k n̄an meļaaj ko n̄an naajdik er make ilo iaļ eo aer aitok n̄an turōk. Rekar kan̄i bwe in grain ko jān m̧adm̧ōd eo am me ejjab jetjet. Anij ekar koweppāāne. Im ejjeļo̧k juon m̧ōttan emeoeo ekar jako.

Emakijkij an juon kapo ilo laļ in ad im em̧ool jekdo̧o̧n ilo m̧anit in Kabun̄ in n̄an lokjak kōn weppāān. Social media, kōtmene ko rejjab m̧ool, im kōraat-eo ad make emakijkij an ejake en̄jake ko an likjab—bwe jejjab bwe im jejjamin naaj n̄an jidik. Em̧ool jet ebōd aer meļeļe kōn kūr eo an Rilo̧mo̧o̧r n̄an “weeppān.”¹

Keememej bwe kōweeppān ejjab āinwōt weeppān ilo Kraist.² Kōweeppān ej aikuji jon̄ak eo an juon make, epen me ej keidi kōj n̄an ro jet. Menin ej kōm̧m̧an bōd im inepata, im maron̄ kōm̧m̧an ad kōņaan kōmake ak kōttoļok kōj.

Erom̧ weeppān ilo Kraist ej juon men elukkuun in oktak. Ej juon bun̄tōn—tōl jān Jetōb Kwojarjar ilo iakwe—n̄an erom̧ āinwōt Rilo̧mo̧o̧r. Jon̄ak ko rej kōm̧m̧an jān juon Jemed Ilan̄ eo ejouj im ejeļā aolep men im alikkar kar kōmeļeļeik ilo bujen ko kajjitōk ippād n̄an kautieji. Ej kadeeor kōj jān eddo ko an bōd im likjab, aolep iien kōmejajaik wōn kōj ilo mejān Anij, Ilo an būn̄tōn in kotak kōj im iuun m̧aanļo̧k kōj n̄an em̧m̧anļo̧k, em̧ōj jon̄ake kōj kōn wujlepļo̧k eo ad make n̄an Anij me jej kwaļo̧ke ilo kijejeto ko ad n̄an ļoor E ilo tōmak. Ilo ad bōk kūr eo an Rilo̧m̧oor n̄an itok n̄an E, em̧ōkaj ad kile bwe ij jon̄an eo jemaron̄ em̧m̧an tata ebwe im bwe kōn jouj eo an juon Rilo̧mo̧o̧r ej iakwe enaaj kōm̧m̧ani oktak eo ilo wāween ko jejjab maron̄ ļōmņaki.

Jemaron̄ lo an pedped in katak in jerbal ke Rilo̧mo̧o̧r eo ekar naajdik ļalem taujin.

“Im ke Jisōs ej reiḷọk, im lo eḷap jar rej itok n̄an e, e ba n̄an Pilip, Jenaaj wiaik pilawā jān ia, bwe rein ren m̧ōn̄ā? …

“Pilip e uwaak E, Rūbukwi sillin̄ kōn wia pilawā e jab bwe kōn er, bwe jabdewōt iaer en bōk jiddik.

“Juon iaan rū kaḷoran, Andru jaten Saimōn Piter, e ba n̄an E.

“Juon ḷaddik ijin, ḷalem pilawā barli ippān, im ruo ek; a ewi tokjān men kein ippān elōñ armej?”³

Kwonan̄in ke kar ļōmņak ekōjkan an Rilo̧mo̧o̧r kar en̄jake kōn ļaddik in edik, eo me kōn tōmak eo an juon ajri kar leļo̧k ta eo ekar aikuj kar jeļā bwe ekanooj jabwe ilo kadedeļo̧k jerbal eo eļap?

“Im Jisōs ej bōk pilawā ko; im ke eṃōj an jar, Ej ajej n̄an ro rej jijet: im barāinwōt ek ko āinwōt aer kōṇaki.

“Ke re mat, E ba n̄an ro rū kaḷoran, “Koṃwin aini m̧ōttan ko re bwe, bwe ejjeļo̧k iaer en jako.”⁴

Rilo̧mo̧o̧r ekar kōweeppān menin leļo̧k eo ettā.

Jidik iien tokālik ālkin iien in, Jisōs ekar jilkinļok ro Rikaļoran im̧aan n̄an ioon wa eo. Ejjab to raar lo er make ilo juon lan̄ im̧alo ilo lukon bon̄. Raar jino mijak ke raar lo juon annan̄in ekek ej etetalļo̧k n̄an er ilo dān eo.

“Ak e m̧ōkaj an Jisōs kōnono n̄an er im ba, Kom̧win peran; N̄a E; kom̧win jab abwinmake.

“Im Piter e uwaak E im ba, Irooj, eļan̄n̄e Kwe ņe, Kwōn jiron̄ eō bwe in iwōj n̄an Ippam̧ ioon lo̧jet.

“Im ej ba, Kwōn itok. Im ke Piter ej to jān wa eo, ej etal ioon lo̧jet, bwe en ilo̧k n̄an Jisōs.

“A ke ej lo kōto, e mijak; im ej jino an tulo̧k, im e lam̧ōj im ba, …“Irooj, Kwōn lo̧mo̧o̧ren eō.

“Im e m̧ōkaj an Jisōs erļo̧ke pein, im dāpij e im ba n̄an e, O kwe e dik am̧ tōmak, etke kwaar pere?”⁵

Ro jeiū im jatū, emaro̧n̄ in jab jem̧ļo̧k in bwebwenato eo in. Ij tōmak bwe ke Piter im Rilo̧m̧o̧o̧r rekar ro̧o̧lļo̧k n̄an wa eo jibwe pein doon, Piter ekar kanooj ņok im bōlen en̄jake an lukkuun jajeļo̧kjeņ, Rilo̧mo̧o̧r emaron̄ in kar ba juon men āinwōt in: “O, Piter, jab mijak im jab inepata. Eļan̄n̄e kwomaron̄ lo eok make āinwōt Aō lo eok, am̧ pere enaaj kar jakoļok im am̧ tōmak ej ļapļo̧k. Ij iakwe eok, jitōnbōro Piter, kwar to jān wa e. Mennin joortak eo am̧ em̧ōj bōke, im em̧ool jekdo̧o̧n n̄e kwar itweļo̧k, inaaj aolep iien pād n̄an kotak eok jān m̧wilaļ ko, im am̧ joortak naaj koweeppāne.”

Būreejtōn Dieter F. Uchtdorf ekar katakin:

“Ij tōmak bwe Rilo̧mo̧o̧r Jisōs Kraist ekōņaan bwe kwon loe, en̄jake, im jeļā bwe E ej am̧ kajoor. Kōn jipan̄ eo An, ejjeļo̧k jon̄an men ko kwoj maron̄ kadedeikļo̧k. En̄in ej aorōk eo am̧ ejjeļo̧k jon̄an. E ekōņaan bwe kwon kalimjōk eok make ilo jekjek eo Ej kalimjōk eok. Im bwe elukkuun oktak jān wāween eo laļ in ej kalimjōk eok. …

“E ej leļo̧k kajoor n̄an eo ej m̧ōk; im n̄an eo ejjeļo̧k an maron̄, Ej korļo̧k kajoor.”⁶

Jej aikuj keememej bwe jekdo̧o̧n ta joortak eo ad em̧man-tata-bōtaab joweeppān, Rilo̧mo̧o̧r emaron̄ kōm̧man bwe en weeppān. Jekdo̧o̧n jon̄an jabwe in kijejeto ko ad, jej aikuj jab pere kajoor eo an Rilo̧mo̧o̧r. Juon naan jouj eļam waan, ak juon iien jerbal in karejar ekadu im em̧ool, juon katak an Būraimere em̧m̧an kar katakin emaron̄, kōn jipan̄ an Rilo̧mo̧o̧r, ej letok kaenōm̧m̧an, kōmerak bōro ko, im ukōt mour ko indeeo. Apeltak in kijejeto ko ad remaron̄ tōl n̄an kabwilōn̄lōn̄ ko, im ilo iien eo, jemaron̄ bōk koņaad ilo juon iien m̧adm̧ōd eweeppān.

Ekutkut likūt kōj ilo jekjek ko me renaaj kōm̧m̧an ad erļo̧k. Jemaron̄ jab en̄jake ke jemaron̄ kōm̧m̧ane jerbal eo em̧ōj letok. Jemaron̄ kalimjōk ro jej jerbal ippāer ak en̄jake bwe jejjamin naaj aorōk. Ro jeiū im jatū, eļan̄n̄e kwoj en̄jake rōt in, kalimjōk em̧m̧aan im kōrā rekabwilōn̄lōn̄ rej jijet likū ro me ij jerbal n̄an er.

Ij en̄jake likjab in ami.

Mekarta, ikar ekkatak, ke kōweeppān ejjab āinwōt weeppān ilo Kraist, keidi eok n̄an bar jet ejjab āinwōt arin bar juon. N̄e jej keidi kōj make n̄an ro jet, emaron̄ wōr wōt ruo tōprak ko. Jenaaj lo kōj make n̄e ejjab em̧m̧anļo̧k jān ro jet im erom̧ rikajet im kōraate n̄an er, ak jenaaj lo kōj make āinwōt jejjab aorōkļo̧k jān ro jet im jino inepata, kōraate kōj make, im ebbwer. Keidi kōj make n̄an ro jet ejeja an lōn̄ tōprakin, ejjab kōketak, im jet iien ej boktok inepata eļap. Ilo mo̧o̧l, keidi kein remaron̄ boktok kakkure ilo jetōb, bōbrae kōj jān ad bōk jipan̄ ilo jetōb eo jej aikuji. Ilo bar juon wāween, arin ro jet ro me jej kautiej er ro me rej kwaļo̧k paaktok in Kraist ko maron̄ in katakin im kōketak im jipan̄ kōj erom̧ rikaļoor ro rem̧m̧anļo̧k an Jisōs Kraist.

Rilo̧mo̧o̧r ekar letok juon m̧ōņōkjan n̄an ļoore āinwōt An kar arin Jemen. E ekar katakin rikaļoor eo An etan Pilip: “E nan̄in etto Aō pād ippemi, im kwō jaje n̄a ke, Pilip? Eo ear lo n̄a, ear lo Jema; im ekōjkan aṃ ba, kwōn kwaḷọk n̄an kōm Jemam̧?”⁷

Innām Ekar katakin, “E m̧ool, e m̧ool, Ij ba n̄an kom̧, eo ej lōke n̄a, jerbal ko Ij kōm̧anm̧ani, enaaj kōm̧m̧ani barāinwōt.”⁸

Jekdo̧o̧n ewi jon̄an dik in kijejeto ko ad remaron̄ in, eļan̄n̄e jej m̧ool, Rilo̧mo̧o̧r enaaj kōjerbal kōj n̄an kadedeļo̧k jerbal eo An. Eļan̄n̄e jej kōm̧m̧ane ijo em̧m̧an tata jemaron̄e im lōke E n̄an kōm̧m̧ane ijo jelikjab ie, jemaron̄ erom̧ m̧ōttan kabwilōn̄lōn̄ ko me rej jepooļ kōj.

Elder Dale G. Renlund ekar ba,“Kwojjab aikuj in weeppān, bōtaap jej aikuj eok kōnke aolep rekōņaan remaron̄ kōm̧m̧ane juon men.”⁹

Im āinwōt an Būreejtōn Nelson ej katakin kōj, “Irooj ej iakwe kijejeto.”¹⁰

Rilo̧mo̧o̧r eo ej jutak pojak n̄an bōk joortak ko ad rettā im kaweeppāni kōn jouj eo An. Ilo Kraist, ejjeļo̧k m̧adm̧ōd ejjab weeppān. Ej aikuj wōr ad peran n̄an tōmak bwe An jouj ej n̄an kōj bwe E enaaj jipan̄ kōj, lo̧mo̧o̧ren kōj jān m̧wilaļ ko n̄e jej jino m̧ōjņo̧ļo̧k, im koweeppān kijejeto ko ad edik aer weeppān.

Ilo būrabōļ eo an rūkkat eo, Rilo̧mo̧o̧r ej kōmeļeļeik ine ko me rej katōki ilo bwidej eo em̧m̧an. Jet rej kalle bukwi jima, jet jiljinon̄o̧ul, im bar jet jiln̄ūūl. Aolep rej m̧ōttan iien m̧adm̧ōd eo An eweeppān.¹¹

Rikanaan Moronai ekar karuwaineneik aolep, “Aaet, itok n̄an Kraist, im weeppān ilo e, … im kaarmejjete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weeppān ilo Kraist.”¹²

Ro jeiū im jatū, ij kam̧ool kōn Kraist, eo ewōr an kajoor n̄an koweeppān jekdo̧o̧ņ joortak eo ad ettā tata. Kōj jen kōm̧m̧ane ijo em̧m̧an tata ad, boktok ta eo jemaron̄e, im, kōn tōmak, door joortak eo ad ejjab weeppān ilo Neen. Ilo etan E eo ej M̧aajta in iien m̧adm̧ōd eo eweeppān, em̧ool Jisōs Kraist, amen.