Mije wōt Jisōs Kraist
Irooj Jisōs Kraist ej uwaak eo n̄an būrabōļōm̧ ko ad, ak jej aikuj kotak mejeed im mije wōt E.
Ekkā an jema jiron̄ eō, “Jab lukkuun mije būrabōļōm̧ ko am̧ me kwojjab maron̄ loe uwaakier.”
Ij kam̧ool bwe Irooj Jisōs Kraist ej uwaakin aolepen būrabōļōm̧ ko ad reppen. Eļaptata, Eaar anjo̧ ioon emān būrabōļōm̧ ko me kajjojo iaad jej iooni im bwe ejjeļo̧k juon iaad emaron̄ uwaake kōn e make:
-
Būrabōļōm̧ eo jinoin ej mej ilo jetōb. Jemaron̄ kajjieon̄ n̄an karum̧wijļo̧k ak kōjekdo̧o̧ne, ak jeban anjo̧ik kōn kōj make. Ijoke, Jisōs Kraist, eaar anjo̧ ioon mej kōn kōj, im āinwōt juon jemļo̧k, jenaaj aolep maron̄ jerkekpeje juon raan.1
-
Būrabōļōm̧ eo kein karuo ekitbuuj en̄taan ko, en̄jake ko reppen, būrom̧ōj, metak, im jab em̧m̧an eo an laļin. Jisōs Kraist eaar anjo̧ ioon aolep men kein. N̄an ro rej kajjieon̄ in ļoor E, juon raan E enaaj “kōṃōrāik dānnin kōmjaaḷaḷ otemjej” im kōm̧m̧an bwe men ko ren bar jim̧we.2 Ilo iien eo, E emaron̄ kōkajoorļo̧k kōj n̄an dipuk apan̄ ko ad kōn lōke, m̧ōņōņō, im aenōm̧m̧an.3
-
Būrabōļōm̧ eo kein kajilu ej mej ilo jetōb ej kwaļo̧k jerawiwi. Jisōs Kraist eaar anjo̧ ioon būrabōļōm̧ in ilo an bōk ioon Make “kaje eo an adwōj aenōm̧m̧an.”4 Kōn wōt en̄taan in pinmuur eo An, jemaron̄ rōlo̧k jān jekjek in jerawiwi ko ad n̄e ewōr ad tōmak ilo Rilo̧mo̧o̧r, m̧oolin ukweļo̧k, būki bujen ko Jemād ej letok n̄an kōj kōn kain̄i ko raorōk āinwōt peptaij, im niknik n̄an jemļo̧kin.6
-
Būrabōļōm̧ eo kein kemān ej ad make, armej ro rejjab wānōk. Jisōs Kraist ej uwaak eo n̄an bar būrabōļōm̧ in. E eban baj wōt jeorlo̧k bōd ko ad im kōm̧m̧an bwe jen bar erreeo. E emaron̄ jerbale “juon oktak ekajoor ilo … būruōm̧, bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt.”6 Jemaron̄ wāppen kōn jouj an Kraist im juon raan erom̧ āinwōt E.7
Ejerata, ekkā ad m̧ad ioon būrabōļōm̧ ko ad make me jej jerwane mije eo n̄an uwaak eo, ad Rilo̧mo̧o̧r, Jisōs Kraist. Elmen ad bōbrae bōd? Ij tōmak uwaak eo epād ilo bujen ko kar kūr kōj n̄an kōm̧m̧ani Ippān im Jemedwōj Ilan̄.
Mije wōt Jisōs Kraist ilo Bujen ko
Bujen ko ad rejipan̄ kōj mije errelo̧k eo ad, kōļmenļo̧kjeņ ko ad, im kōm̧m̧an ko ad ilo Kraist. Ilo ad “eddāp n̄an bujen ko [jaar] kōm̧m̧ani,” emaron̄ pidodo ad kalikkari “men ko an laļ in” me jej aikuj “likūtļo̧k” im “men ko rem̧m̧anļo̧k [laļ in]” jej aikuj niknik kappukoti.8
En̄in men eo armej ro an Ammōn raar kōm̧m̧ane ilo Bok in Mormon. Ke raar ekkatak kōn Jisōs Kraist im jino mije mour ko aer ilo E, raar kile bwe rej aikuj kallibwin kein tariņae ko aer im erom̧ ro rem̧ool im “raar bar jenolo̧k kōn aer kijejeto n̄an Anij.”9
Bujen ej tōlļo̧k kōj n̄an kappukot jabdewōt men eo ej boktok im̧we eo an Jetōb im joļo̧k jabdewōt men ko me rej kakoiki im̧we in—“bwe jejeļā bwe eļan̄n̄e jemaron̄ in erreo n̄an pād im̧aan mejān Jetōb Kwojarjar eo, jemaron̄ barāinwōt erreo n̄an mour im̧aan mejān Jemedwōj Ilan̄ im eo Nejin, Jisōs Kraist.”10 Emaron̄ meļeļein bwe jej aikuj ukōt naan ko ad, im kōjerbal naan ko rejouj. Emaron̄ bar bōk jikin m̧wilin mour in jetōb ko renana kōn m̧wiļ ko me rej kōkajoorļo̧k jemdo̧o̧n eo ad ippān Irooj, āinwōt jar kajjojo raan im riiti jeje ko rekwojarjar, ippād make im ippān baam̧le eo ad.
Būreejtōn Russell M. Nelson eaar ba bwe “kajjojo armej eo ej kōm̧m̧ani bujen ko ilo dānin peptaij im ilo tampeļ ko—im kōjparoki—ekar kōļapļo̧k an maron̄ bōk kajoor eo an Jisōs Kraist. …
“Nōbar eo kōn kōjparok bujen ko ippān Anij ej kajoor in lan̄—kajoor eo ej kōkajoor kōj n̄an jutak ņae apan̄ ko ad, kapo ko, im būrom̧ōj ko.”11
Kōkāāl bujen ko ad ilo iien kwojkwoj eo kajjojo Jabōt ej juon eddo eļap n̄an etale kōj make12 im mije mour ko ad ioon Jisōs Kraist. N̄an bōk m̧ōttan kwojkwoj eo, jej kwaļo̧k bwe jej kōm̧m̧ane “n̄an keememej E iien otemjej”13 Naan eo iien otemjej elukkuun aorōk. Ej kwaļo̧k im̧we eo an Rilo̧mo̧o̧r ilo aolepen m̧ōttan in mour ko ad. Jejjab keememej wōt E ilo m̧ōnjar eo ak ilo jar in jibbon̄ ko ad ak n̄e jej pād ilo jorrāān im n̄e jej aikuj jabdewōt.
Aaet, jet iien jej m̧ad. Jej meļo̧kļo̧k. Jej jerwane ad mije. Ak kōkāāl bujen ko ad ej meļeļein bwe jej kōņaan keememej Rilo̧mo̧o̧r eo iien otemjej, bwe jenaaj kajjieon̄ kōm̧m̧ane ilo aolepen wiik eo, im bwe jenaaj bar wūjlepļo̧k im bar mije bwe E ilo tabōļ in kwojkwoj eo ilo wiik eo tok juon.
Mije wōt Jisōs Kraist ilo M̧ōko Im̧ōd
Ealikkar, mije wōt Jisōs Kraist eaikuj in ļapļo̧k jen baj juon Jabōt, ilo m̧akūtkūt an kabun̄. Ke Būreejtōn Nelson ekar kwaļo̧k kadkadin Itok, Ļoor Eō ilo 2018, ekar ba, “Ej iien n̄an juon jikin-kabun̄jar ilo M̧weo.”14 Eaar ba jej aikuj “ukōt m̧ōko [im̧ōd] n̄an juon jikin kone an tōmak” im “juon jikin ekkatak gospel eo.” Im ekar kwaļo̧k emān kallim̧ur ko raorōk n̄an kōj n̄e jej kōm̧m̧ani.15
Kallim̧ur kein kajuon: “Jabōt ko ami renaaj em̧ool erom̧ juon raan elan̄lōn̄.” Enaaj erom̧ juon raan n̄e jej epakeļo̧k n̄an ad Rilo̧mo̧o̧r. Āinwōt juon jiron̄ em̧m̧an ded jān Peru ekar ba, “Raan eo an Irooj ej raan eo ij bōk uwaak ko jān Irooj.”
Kallim̧ur kein karuo: “Ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo.” En̄in unin, “jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, … bwe ro nejid ren maron̄ jeļā n̄an ia rej maron̄ reiļo̧k n̄an jeorļo̧k jero̧wiwi ko aer.”16
Jej kōm̧m̧ane menin bwe juon raan, n̄e ļaddik eo nejum̧ ej etal im jerbal ak tallōn̄n̄i to̧l ko ak kakkidudu ilo bwilōn̄ wōjke ko, āinwōt kar Inōs, e emaron̄ keememej ta eo kōm kar katakin e kōn Kraist im kōn m̧ōņōņō n̄an mour kōn gospel in. Im wōn ejeļā? Bōlen menin juon raan enaaj en̄jake kwole ilo jetōb bwe en oktaļo̧k n̄an Jisōs Kraist bwe en maron̄ ron̄ ainikien an Irooj ba n̄an e, “jero̧wiwi ko am̧ rejako jān eok, im kwōnaaj jeraam̧m̧an.”17
Kallim̧ur kein kajilu: “Kareel ko an rikapo ilo mour eo am im ilo m̧weo imōmi enaaj rikļo̧k.” Etke? Kōnke toon wōt ad mije wōt Jisōs Kraist, toon wōt an ejjeļo̧k jerawiwi.18 Ilo an m̧oko im̧ōd obrak kōn meram in Kraist, enaaj edikļo̧k im ejjeļo̧k jikin n̄an marok eo an rikapo eo.
Kallim̧ur eo kein kemān: “Oktak ko ilo baam̧le eo ami renaaj em̧m̧an im kajoorļo̧k.” Etke? Kōnke oktak eo me Jisōs Kraist ej bōktok ej “Oktak ekajoorļo̧k.”19 Ej lukkuun ukōt piktokkid, jej erom̧ “armej ro rekāāl.”20 Jej erom̧ jidik kōn jidik āinwōt Rilo̧mo̧o̧r, obrak kōn iakwe eo An erreeo n̄an aolep ro nejin Anij.
Wōn ejjab kōņaan bwe kallim̧ur kein ren kobrak mour ko aer im n̄an baam̧le ko aer? Ta eo jej aikuj kōm̧m̧ane n̄an būki Uwaak eo ej n̄an ukōt m̧ōko im̧ōd n̄an juon jikin kone an tōmak im juon jikin ekkatak gospel eo. Im elmen ad maron̄ kōm̧m̧ane? N̄an mije Jemedwōj Ilan̄ im Jisōs Kraist, kōm̧m̧an bwe Ren io̧lapen mour in baam̧le eo ad, im̧we eo eaorōktata ilo m̧oko im̧ōd.
Imaron̄ ke ba bwe kwon jino kōm̧m̧an bwe naan ko an Kraist, ilo jeje ko rekwojarjar, ren m̧ōttan mour eo am̧ kajjojo raan? Ejjeļo̧k juon jon̄ak ewāppen n̄an ekkatak jeje ko rekwojarjar. Emaron̄ in 5 ak 10 minit kajjojo raan—ak ļapļo̧k n̄e kwomaron̄. Emaron̄ in juon jebta ak jejjo̧ eoon juon raan. Jet baam̧le rekōņaan ekkatak in jibbon̄ m̧okta jen aer etal n̄an jikuuļ ak jerbal. Jet rekōņaan riit ilo bon̄ m̧okta jen kiki. Jet ripālele raar jiron̄ eō ke rej make ekkatak ilo iaļ eo aer ļo̧k n̄an jikin jerbal innām kwaļo̧k en̄jake ko aer n̄an doon ilo jeje bwe naan ko im kōnono ko aer ren ļo̧o̧k.
Itok, Ļoor Eō ej letok elōn̄ elmakwot in m̧akūtkūt ko im kein katak ko me remaron̄ jipan̄ kajjojo armej im baam̧le ko ekkatak pedped in gospel in jān jeje ko rekwojarjar. Pijain Baibōļ ko im pijain Bok in Mormon emaron̄ bar kein jipan̄ ko raorōk n̄an kōm̧m̧an bwe jeje ko rekwojarjar en pidodo lali n̄an baam̧le eo am̧. Jodikdik ro im ajri ro ekkā aer im̧we jen bwebwenato ko ilo jeje ko rekwojarjar. Bwebwenato kein im pedped ko an gospel in rej katakin enaaj pād ippān ajri ro, āinwōt ro m̧ōttaer, n̄e rej aikuj waanjon̄ak ko rem̧m̧an kōn jerbal in jipan̄, erreeo, pokake, kijenmej, meanwōd, revelesōn an juon make, iakwe em̧ool, ettā, im tōmak ilo Jisōs Kraist. Aolep iien, jejjet in am̧ kwojkwoj ioon naan ko an Kraist enaaj jipan̄ ajri ro nejum̧ epakeļo̧k im epake Rilo̧mo̧o̧r. Renaaj jeļā kajjien E jen kar m̧okta.
Irooj Jisōs Kraist ej mour rainin. E emaron̄ pād, ilo mour ko ad kajjojo raan. E ej uwaak eo n̄an būrabōļōm̧ ko ad, ak jej aikuj kotak mejeed im mije wōt E. Irooj eaar ba, “reitok n̄an eō ilo aolep ļōmņak, jab pere, jab mijak.”21 Ilo ad mije E im Jemedwōj Ilan̄, kōm̧m̧an im kōjparok bujen ko Ippāer, im kōm̧m̧an bwe Ren im̧we eo eaorōktata ilo m̧weeo im̧ōd im baam̧le eo, jenaaj erom̧ kain armej ro Būreejtōn Nelson eaar ba: “Armej ro rej maron̄, pojak, im erreeo n̄an bōk Irooj n̄e E enaaj bar ro̧o̧ltok, armej eo ej lan̄lōn̄ ilo anemkwoj eo aer n̄an mour kake kien eo utiej, im ļap Jisōs Kraist.”22 Ilo etan Jisōs Kraist, amen.