Baj Etal Wōt—kōn Tōmak

Elder George A. Smith, juon Rijilōk, ekar bōk kapilōk jān Rikanaan Josep Smith ilo juon iien ekar kanooj in pen: “Ekar jiron̄ eō ijjab aikuj in ebbwer, jekdo̧o̧n ta men ko reppen remaron̄ in jepoooļ eō. Eļan̄n̄e iaar wōtļo̧k ilo ro̧n̄ eo ilo Nova Scotia im aolep Rocky Mountain ko kar kalibubuik eō, ij aikuj jab ebbweer ak niknik wōt, kōjerbal tōmak, im dāpij wōt peran eo em̧m̧an im ij aikuj anjo̧ ioon men ko reppen ilo jem̧ļo̧kin.”¹

Ekōjkan an Rikanaan Josep kar maron̄ ba men eo—n̄an juon eo me ekar en̄taan? Kōnke ekar jeļā ekar m̧ool. Ekar mour kake. Josep ekar ioon men im bar ioon men ko relukkuun in pen ilo mour eo an. Mekarta, ilo an kar kōjerbal tōmak ilo Jisōs Kraist im Pinmuur eo An im baj etal wōt, ekar anjo̧ ioon kapan̄pan̄ ko relukkuun āinwōt pen n̄an anjo̧ ie.²

Rainin ikōņaan bar kōkāāl akweļap eo an Josep n̄an jab kōtļo̧k an kabbweer katubūļak kōj n̄e jej jelm̧ae inepata, en̄jake ko rōkemetak, likjab ko ad make, ak apan̄ ko jet.

Ke ij ba kabbweer, ijjab kōnono kōn elōn̄ļo̧k apan̄ in kōm̧ōjņoļo̧k ko an clinical depression, anxiety disorder ko, ak nan̄inmej ko jet me rej aikuj juon kōm̧adm̧ōd ejenolo̧k.³ Ij kōnono kōn kabbwwer eo me ej m̧ōttan mour me ej itok kōn em̧m̧an ko im nana ko an mour in.

Ij im̧we jān ribun̄bun̄ ro aō me rej ba etal wōt—kōn tōmak—jekdo̧o̧ņ ta.⁴ Ilo Bok in Mormon, jej riit kōn Zoram, eo karejeran Leban. Ke Nipai ekar bōk piliej brass ko, Zoram ekar jelm̧ae kōn kāālet eo n̄an ļoor Nipai im ļōm̧aro jein n̄an āne jem̧aden ak bōlen maron̄ luuji mour eo an.

Juon kāālet epen! Ļōmņak eo m̧oktata an Zoram ekar n̄an ko, bōtaab Nipai ekar dāpij e im kōm̧m̧ane juon kallim̧ur bwe eļan̄n̄e enaaj kar ilo̧k ippāer, enaaj kar anemkwoj im wōr juon jikin ippān baam̧le eo aer. Zoram ekar bōk peran im ilo̧k ippāer.⁵

Zoram ekar en̄taan elōn̄ kaen̄taanan ko ilo mour kāāl eo an, mekarta ekar bun̄ m̧aanļo̧k kōn tōmak. Ejjeļo̧k ad kakkōļe bwe Zoram ekar kwaļo̧k bwe kōņaan bar ro̧o̧l n̄an mour eo an m̧okta ak dāpij en̄jake in dike ņae Anij ak ro jet.⁶ Ekar juon m̧ōttan Nipai em̧ool, juon rikanaan, im e im ineen raar jokwe ilo anemkwoj im jeraam̧m̧an ilo ānen kallim̧ur eo. Ta eo ekar juon mennin kabbōjrak ilo iaļ eo an Zoram ilo jem̧ļo̧kin kar tōlļo̧k n̄an kōjeraam̧m̧an ko rellōn̄, kōnke kōn tiljek im lem̧ōņōņō n̄an baj etal wōt—kōn tōmak.⁷

Kiiō epaak ikar ron̄ juon sister eperan ekar kwaļo̧k ekōjkan an kar niknik ilo iien ko reppen.⁸ Ekar wōr jet an apan̄, im juon Jabōt liin ekar jijet ilo Doulul eo an Kōrā ro, ron̄jake an rūkaki eo me liin ekar ļōmņak ekar mour ilo ejjeļo̧k an apan̄ ilo mour—kanooj oktak jān e make. Liin ekar m̧ōk im ekar ebbweer. Liin ekar en̄jake āinwōt ekar likjab—ak jab uwaan—kōn menin liin ekar jutak im diwōj, ļōmņak n̄an jab bar ro̧o̧lļo̧k n̄an jar. Etetalļo̧k n̄an wa eo waan, liin ekar en̄jake juon im̧we ainjuon: “Ilo̧k n̄an lowaan jikin jar eo im ron̄jake rikōnono eo an kweilo̧k in kwojkwoj eo.” Liin ekar kajjitikin im̧we eo bōtaab ekar bar en̄jake ekajoor, kōn menin liin ekar ilo̧k n̄an kweilo̧k eo.

Ennaan eo ekar lukkuun ta eo liin ekar aikuji. Liin ekar en̄jake Jetōb. Liin ekar jeļā Irooj ekar kōņaan bwe en pād wōt Ippān, n̄an erom̧ An rikaļoor, im n̄an etal n̄an jar, kōn menin liin ekar.

Kwojeļā ke ta eo liin ekar kam̧m̧oolol kake? Bwe liin ekar jab ebbweer. Liin ekar baj etal wōt—kōn tōmak ilo Jisōs Kraist, jekdo̧o̧n n̄e ekar pen n̄an e, im liin im baam̧le eo an raar kanooj jeraam̧m̧an ke liin ekar bun̄ m̧aanļo̧k.

Anij in lan̄ im laļ eo enaaj jipan̄ kōj anjo̧ ioon ebbweer im jabdewōt kabbōjrak ko jej iooni eļan̄n̄e jej reilo̧k n̄an E, ļoor im̧weo ko an Jetōb Kwojarjar,⁹ im baj etal wōt—kōn tōmak.

Kam̧m̧olol, bwe n̄e jej m̧ōjņo̧ ak ban, Irooj emaron̄ kōkajoorļo̧k ad tōmak. Emaron̄ kōlapļo̧k ad maron̄ eļapļo̧k jān ad make. Ikar en̄jake men jab in. Elōn̄ļo̧k jān 20 iiō ko remootļo̧k, ikar jab kōtmene n̄an bōk kūr āinwōt juon Eria Jiljilimjuonn̄oul, im ikar en̄jake lukkuun likjab. Ālkin ijjitōn̄ in kaminene ko aō, ikar tōl ilo kweilo̧k eo eļap an stake eo aō m̧oktata.¹⁰ Stake būreejtōn eo im n̄a kar lukkuun karōk aolep m̧akūtkūt. Jidik ien M̧okta jān kweilo̧k eo, Būreejtōn Boyd K. Packer, Būreejtōn in Ripinej Jenkan eo an Doulul eo an Jon̄oulruo Rijilōk ro ilo tōre eo, ekar ko̧o̧ltok n̄an lale eļan̄n̄e emaron̄ kar itok ippa tok. Ikar ilbōk im, aaet, errā. Ikar kajjitōk ewi an kōņaan n̄an wōnm̧aanļo̧k kiiō ke enaaj tōl. Ekar kwaļo̧k bwe kōmij jab ļoor karōk ko kar kōm̧m̧an im pojak n̄an ļoor Jetōb. Kam̧m̧oolol, ekar wōr aō 10 raan ko n̄an ekkatak, jar, im kōppopo.

Kōn juon laajrak in kweilo̧k epeļļo̧k, kōm kar pād ijo im̧aan 20 minit m̧okta jān an jino kweilo̧k eo an ritōl. Ikar m̧alļo̧k n̄an ippān stake būreejtōn eo im unoojdikdik, “Ej juon stake aiboojoj.”

Būreejtōn Packer ekar jibwe eō ilo mera im ba, “Ejjeļo̧k keroro.”

Ikar kabōjrak aō ekeroro, im ilo kōnono eo an ilo kweilo̧k eo eļap “Kautiej ej Karuaineneik Revelesōn”¹¹ kar itok n̄an ļōmņak eo aō. Ikar lale bwe Būreejtōņ Packer ekar jeje eoon in jipan̄ ko. Jetōb ekar kapen n̄an eō bwe ekar bōk im̧we ko n̄an kweilo̧k eo. En̄jake in ekkatak eo aō ekar ijjino.

Būreejtōn Packer ekar kōnono ilo minit ko 15 im̧aan im kar kōmejajaik aorōk eo an kōm̧m̧an aolep kweilo̧k ko āinwōt tōl jān Jetōb Kwojarjar.¹² Innām ekar ba, “Jenaaj kiiō ron̄ jān Elder Cook.”

Ilo aō jibadōkļo̧k jikin kōnono eo, ikar kajjitōk ewi toon ekōņaan bwe in bōke im eļan̄n̄e ewōr eņ unin kōnono ekōņaan bwe in kōnono kake. Ekar ba, “Bōk 15 minit im wōnm̧aanļo̧k wōt n̄e kwoj en̄jake im̧we.” Ikar bōk enan̄in 14 minit ko im kwaļo̧k aolep men ko raar pād ilo ļōmņak eo aō.

Būreejtōn Packer ekar bar jutak im kōnono bar 15 minit. Ekar kwaļo̧k eoon in:

“Ekkōnono ļōmņak ko Inaaj likūt ilo būruōmiro, im kom̧ ro jamin naaj pok im̧aan armej raņ;

“Bwe naaj lewōj e n̄an kom̧ro … ilo iien eo wōt, ta kom̧ro naaj ba.”¹³

Innām ekar ba, “Jenaaj kiiō ron̄ jān Elder Cook.”

Iaar ilbōk. Ijjan̄in kar ļōmņak bwe naaj kar bar kajjitōk ippā bwe in kōnono ruo alen ilo juon kweilo̧k. Ekar ejjeļo̧k jabdewōt ilo ļōmņak eo aō n̄an ba. Kije ilo jar im pedped ioon Irooj kōn jipan̄, ilo jekjek ko, ikar jeraam̧m̧an kōn juon ļōmņak, juon eoon, im ikar maron̄ kōnono ium̧win bar 15 mint. Ikar jijet laļļo̧k kanooj in m̧ōk.

Būreejtōn Packer kar bar kōnono 15 minit kōn ļoor Jetōb eo im kwaļo̧k katak ko an Paul bwe jen jab kōnono “naan ko mālōtlōt an armej ej katakin, a naan ko Jetōb ej katakin.”¹⁴ Ilo ami maron̄ ļōmņak, ikar tōr jān jon̄an ke ekar im̧we n̄an ba in kōnono alen kein kajilu, “Jenaaj kiiō ron̄ jān Elder Cook.”

Ikar m̧ōk. Emaat men imaron̄ ba. Ikar jeļā ekar iien eo n̄an kōjerbale eļapļo̧k tōmak. Jidik kōn jidik, ikar wōnm̧aanļo̧k n̄an jikin kōnono eo, akweļap n̄an Anij kōn jipan̄. Ke ikar kepaakļo̧k kein kōnono eo, Irooj ekar kanooj kōjeraam̧man eō n̄an bar kwaļo̧k 15 minit ennaan.¹⁵

Āliktata kweilo̧k eo ekar jem̧ļo̧k, bōtaap ekar m̧ōkaj aō kile bwe m̧wen̄an eo an rūtto enaaj kar ijjino ilowaan juon awa. O, jaab! Āinwōt Zoram, ikar kōņaan ko, bōtaab ejja āinwōt Nipai ekar jibwe, ikar jeļā Būreejtōn Packer enaaj kar jibwe eō. Kweilo̧k eo an rūtto ekar kōm̧m̧an ilo ejja jekjek eo wōt. Ikar bar ekōnono jilu alen. Raan eo tok juon ilo m̧wen̄an eo eļap, ikar kōnono juon wōt alen.

Ālkin kweilo̧k eo, Būreejtōn Packer ekar ba ilo iakwe, “Jen bar kōm̧m̧ane juon iien.” Ij iakwe Būreejtōn Boyd K. Packer im kam̧m̧oolol aolep men ikar ekkatak.

Kwojeļā ke ta eo ij kam̧m̧oolol kake? Bwe ikar jab ebbweer—ak m̧akoko. Eļan̄n̄e ikar ron̄jake ikdeelel in kōņaan ko jān kweilo̧k ko, inaaj kar jerwane juon iien em̧m̧an n̄an kōļapļo̧k tōmak eo aō im bōk juon kōjeraam̧m̧an eļap an iakwe im rejtak jān Jemedwōj Ilan̄. Ikar ekkatak kōn An tūriam̧o kake, kajoor in kōmaron̄ eo ekabwilōn̄lōn̄ an Jisōs Kraist im Pinmuur eo An, im kareel eo ekajoor an Jetōb Kwojarjar. Mekarta m̧ōjņo̧ eo aō,¹⁶ ikar ekkatak bwe imaron̄ jerbal, imaron̄ jipan̄ n̄e Irooj ej pād tūru eļan̄n̄e ij baj etal wōt—kōn tōmak.

Kōjekdo̧o̧n dettan eo, kilepen, im jon̄an ļap in apan̄ ko jej jelm̧ai ilo mour in, ewōr ad aolep iien ko n̄e jej en̄jake ad kōņaan bōjrak, etal, ko, ak maron̄ ebbweer. Bōtaab kōjerbal tōmak ilo ad Rilo̧mo̧o̧r, Jisōs Kraist, ej jipan̄ kōj anjo̧ ioon ebbweer jekdo̧o̧n ta kapan̄pan̄ ko jej iooni.

Ejja āinwōt Rilo̧mo̧o̧r eo ekar kadedeļo̧k jerbal eo kar leļo̧k n̄an E n̄an kōm̧m̧ane, ewōr Ippān kajoor eo n̄an jipan̄ kōj kadedeļo̧k jerbal eo kar letok n̄an kōj.¹⁷ Jemaron̄ jeraam̧m̧an n̄an bun̄ m̧aanļo̧k ilo iaļ in bujen eo, jekdo̧o̧n ta ewi jon̄an an pen naaj erom, im āliktata jej bōk mour indeeo.¹⁸

Āinwōt Rikanaan Josep Smith ekar ba, “Jutak dim, kom̧ Rikwojarjar ro an Anij, dāpdep bar jidik, im lan̄ eo an mour enaaj eļļāļo̧k, im kom̧ naaj kōmālpel kōm jān Anij eo me kom̧ij an rijerbal.”¹⁹ Ilo etan Jisōs Kraist, amen.