Kweilo̧k Eo Eļap
Juon Rikanaan Emour n̄an Raan Ko Āliktata
Eprōļ 2023 kweilo̧k eo eļap

Juon Rikanaan Emour n̄an Raan Ko Āliktata

Jān Elder Allen D. Haynie

Jān Jiljilimjuonn̄oul eo

Jemedwōj Ilan̄ eaar kāālet jon̄ak in n̄an kwaļo̧k m̧ool eo n̄an ro Nejin kōn juon rikanaan.

Ke ikar juon ļaddik jidikdik,Ikōn iakwe Jāede kōnke aolep men iaar kōm̧m̧ane ilo raan eo raar āinwōt kalimomo. Bōtaap jekdoon ta eo ikar kōm̧m̧ane, ekar aolep iien itok m̧okta jān men eo aorōk tata an aolep men—alooj pijan m̧ōn̄ka ilo television. Ilo juon baj jibbon̄ōn Jādede, ke ij jutak turin tipi eo im ukoti jānōļ ko, iaar loe bwe pija in m̧ōn̄ka eo ikar kōtmen bwe in kar alooje ikar lo bwe kar bōk jikin jān juon kadiwōjļo̧k imejatoto in kweilo̧k eo eļap an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ke ij kalimjōk television eo im būrom̧ōj bwe ekar ejjeļo̧k m̧ōn̄ka, Iar loe juon em̧m̧aan emouj-koļan bōran ej kōņak juon suit im tie ej jijjōt ilo juon jea em̧m̧an.

Ewōr juon men ekar oktak kake e, innām iaar kajjitōk ippān ļeo jeiū, “Wōn eņ?”

Lein ekar ba, “Ej Būreejtōn David O. Mckay; ej juon rikanaan.”

Ij keememej en̄jake juon men im ilo juon wāween jeļā ke ekar juon rikanaan. Innām, kōnke ikar juon ļaddik eo ej iakwe pijain m̧ōn̄ka, ikar ukōt jenōļ eo. Bōtaab ijjamin meļo̧kļo̧k ta eo ikar en̄jake ilo tōre in revelesōn eo ekadu, jab kōtmene. Ippān juon rikanaan, jet iien emaron̄ bōk wōt jidik iien n̄an jeļā.1

Jeļā kōn revelesōn bwe ewōr juon rikanaan emour ioon laļ in ej ukōt aolep men.2 Ej kōm̧m̧an bwe juon eo ejjab itok limio in ilo arto artak eo kōn n̄āāt eo juon rikanaan ej kōnono āinwōt juon rikanaan ak eļan̄n̄e ej juon eo ej kāālet ewi wōt kanaan in kapilōk eo en ļoore ak joļo̧k.3 Jeļā rōt in ej karuwaineneik juon n̄an lōke kapilōk eo an juon rikanaan emour,4jekdoon n̄e jejjab lukkuun meļeļe.4 Ālkin men otemjej, Jemed Ilan̄ eo eweppān im iakwe ekar kāālet juon jon̄ak kōn kwaļo̧k m̧ool eo n̄an ajri ro Nejin kōn juon rikanaan, juon eo me ejjamin kappukōt juon kūr ekwojarjar im eo me ejjab aikuj ad jipan̄ n̄an an ekkōl kōn jab wānōk ko an make.5 Juon rikanaan ej juon eo Anij ekar make kōpooje, kūr, kajim̧we, im̧we, ko̧bōle, kōkwojarjar, im rejtake.6 En̄in ej etke jejjamin naaj pād ilo kauwōtata ilo jetōb ilo ļoor kapilōk in kanaan eo.

Men̄e jej kōņaan ak jaab, aolepādwōj kar kālete ilo juon jekjek ilo m̧our eo m̧okta n̄an ļotak ilo raan kein āliktata. Ewōr ruo m̧ool ko me rej iaio ippān raan ko āliktata. M̧ooļ eo im̧aan tata ej bwe Kabun̄ eo an Kraist enaaj bar jutak ioon laļ in. M̧ool eo kein karuo ej bwe men ko renaaj lukkuun in pen. Jeje ko rekwojarjar rej kwaļo̧k bwe ilo naaj raan ko āliktata enaaj wōr “juon dekā eļap jilkinļo̧k n̄an ko̧kkure mennin eddek ko an laļ,”7 kaen̄taan,8 “tariņae ko im unoj ko kōn tariņae, im aolepen laļ naaj limotak, … im nana enaaj ļapļo̧k.”9

Ke ikar juon ajri, naan kein kōn raan ko āliktata raar kamijak eō im kōm̧m̧an aō jar bwe Itok eo Kein Karuo en jab itok ilo raan in mour ko aō—kōn jet tōprak imaron̄ kobaitok. Kiiō eoktak aō jar, jekdo̧o̧n n̄e apan̄ ko kar kanaan kaki rem̧ool,10 kōnke n̄e Kraist ej bar ro̧o̧ltok n̄an irooj, aolep mennin kōm̧anm̧an ko renaaj “kababu er ilo ejjeļok uwōta.”11

Jekjek ko kiiō ilo laļ in raar kōm̧m̧an jet lōļn̄o̧n̄. Āinwōt ajri in bujen ro nejin Anij, jejjab aikuj pukōt men kein ak n̄an jeļā ekōjkan ad tar metoik iien kein renana. Jejjab aikuj mijak.12 Katak eo im pedped in katak ko me jej aikuj ļoori n̄an mour ilo jetōb im niknik ilo kanniōk rej loi ilo naan ko an rikanaan eo emour.13 En̄in ej etke Būreejtōn M. Russell Ballard ekar kwaļo̧k bwe “ejjab juon men edik … n̄an wōr juon rikanaan ilubwilijid.”14

Būreejtōn Russell M. Nelson ekar kam̧ool bwe “Jon̄ak eo an Anij kar ejake etto an katakin ajri ro Nejin kōn rikanaan ro ej kam̧ool n̄an kōj bwe E enaaj kōjeraam̧m̧an kajjojo rikanaan im bwe E enaaj kōjeraam̧m̧an ro me rej ron̄jake kapilōk in kanaan eo.”15 Kiiō kii eo in ej n̄an ļoor rikanaan eo emour.16 Ro jeiū im jatū, ejjab āinwōt bok in m̧ōn̄ka ko im wa ko ejeja aer waļo̧k, katak in kanaan ko rejjab aorōkļo̧k kōn dettaer. En̄in ej etke jej jab aikuj pukōt n̄an kōjerbal naan ko an rikanaan ro etto n̄an joļo̧k naan ko an rikanaan ro remour.17

Ij iakwe būrabōļ ko kar kōjerbali jān Jisōs Kraist n̄an katakin pedped in katak ko an gospel eo. Ikōņaan kwaļo̧k juon būrabōļ kōn juon tōre in mour ippāmi kiiō jibbon̄.

Juon raan ikar etal n̄an m̧ōn m̧ōn̄ā eo an Church headquarters n̄an m̧ōn̄ā in raelep. Ālkin aō kar bōk juon tōre in m̧ōn̄ā, ikar deļo̧n̄eļo̧k jikin m̧ōn̄ā eo im kile juon tebōļ me aolepen ro jilu uwaan Būreejtōnji eo Kein Kajuon rekar jijōt ie, ippānļo̧k juon jea ejjeļo̧k kobban. Ļōm̧ņak in likjab ko aō rekar kōm̧m̧an bwe in kōm̧m̧ane juon oktak eo em̧ōkaj n̄an jeer jān tebōļ eo, innām ikar ron̄ ainikien rikanaan eo ad, Būreejtōn Russell M. Nelson, ej ba “Allen, juon e jea ejjeļo̧k kobban ije. Itok im jijōt ippām.” Kōn menin ikar.

Epaakeļo̧k jem̧ļo̧k in kōraelep eo, ikar ron̄ juon ainikien edakojkoj, im ke ikar reilōn̄, ikar lo bwe Būreejtōn Nelson ekar kajutak bat in dān būļajtik eo an innām kōjepdake im bar kōmājmāje.

Innām Būreejtōn Dallin H. Oaks ekar kajjitok kajjitōk eo ikōņaan kar kajjitōk, “Būreejtōn Nelson, etke kwar kōjepdake bato in aibōj eo nim̧ūm̧?”

Ekar uwaak, “kapidodoik n̄an an ro me rej kōm̧adm̧ōd recycle ko kōnke ejjab bōk eļap jikin ilo nien recycle eo.”

Ke ikar kejekļo̧kjeņ kōn uwaak eo, ikar bar ron̄ ejja ainikien eo edakojkoj wōt bar juon alen. Ikar reitok n̄an anbwijmaron̄i, im Būreejtōn Oaks ekar kōjepdak bato in aibōj būļajtik eo nimen ejja āinwōt Būreejtōn Nelson. Innām ikar ron̄ ejja ainikien eo wōt ituanmiin̄ū, im Būreejtōn Henry B. Erying ekar kōjepdak bato in aibōj būļajtik eo nimen, bōtaab ekar kōjerbal juon jekjek eoktak ilo an bato eo kar jitpeļeļ, eo ekar bōk eļap kijejeto jān an bato eo jutak. Ke ij kile menin, Būreejtōn Nelson ekar jouj an kwaļo̧k n̄an e kōļ eo kōn an bato eo jutak epidodoļo̧k kōjepdake bato eo.

Ilo iien eo, ikar m̧alļo̧k n̄an Būreejtōn Oaks ilo ainikien edik im kajjitok, “Kōjepdak bato in aibōj būļajtik eo nim̧ōm̧ ej juon menin aikuj kāāl an recycle an jikin m̧ōn̄ā in ke?

Būreejtōn Oaks ekar uwaak, kōn juon mejān ettōn̄ dikdik, “Ekwe, Allen, kwojiakuj ļoor rikanaan eo.”

Ij lōke bwe Būreejtōn Nelson ekar jab kwaļo̧k jet katak in recycle ilo jikin m̧ōn̄ā eo raan eo. Ak jemaron̄ ekkatak jān uwaak eo eim̧we18 an Būreejtōn Oaks im Būreejtōn Eyring n̄an waanjon̄ak eo an Būreejtōn Nelson im wujlepļo̧k eo an n̄an jipan̄ katakin ro rej bōk kuņaer ilo juon wāween eo em̧m̧anļo̧k.19

Jet iiō remootļo̧k, Elder Neal A. Maxwell eaar kwaļo̧k jet etale ko im kapilōk me raar kanaan im jejjet n̄an tōre in ad:

“Ilo allōn̄ ko im iiō ko m̧aan, iien ko renaaj āinwōt aikuj bwe membōr ro ren kāālet eļan̄n̄e ak jaab ļeo [ak lio] enaaj ļoor Būreejtōnji eo Kein Kajuon. Membōr ro renaaj lo an penļo̧k n̄an kāālet ikōtaan ruo ļōmņak ko. …

“… Jen door juon ļo̧o̧k bwe kāālet ko ren alikkar, kōm̧m̧an bwe ro jet ren kōm̧m̧ane ilo aer bōk kapilōk in kanaan eo . …

“Jisōs ekar ba bwe n̄e wōjke fig eo ej eddek bōlōk, ‘e paak iien summer.’ … Kōn menin kar kakkōl bwe iien summer ej iood, innām jen jab jekpen ņae bwil!”20

Diktak in epepen in ej rūttoļo̧k ilo juon tōre me elōn̄ļo̧k bōlōkōn wōjke fig im ebwil ļo̧k. M̧ool eo ej likūt juon eddo eddoļo̧k ioon diktak in epepen eo kadede, eļap tata n̄e ej itok n̄an ļoor kapilōk in kanaan eo. N̄e ro jinen im jemen rej kōjekdoon kapilōk eo an rikanaan eo emour, rejjab jerwane wōt kōjeram̧m̧an ko kar kailim̧ur kaki n̄an er ak eļapļo̧k an nana katakin ajri ro nejier bwe ta eo rikanaan ej ba ejjab aorōk ak kanaan ko maron̄ boki jān juon jikin eobrak kōn kāālet im jab ļōm̧ņak kōn an kwole jetōb eo.

Elder Richard L. Evans ekar lale: “Jet pāāren rej bwōd ilo aer ļōm̧ņak ke remaron̄ kakije jidik n̄an tōl im kakien … bwe remaron̄ jab lukkuun bok aer iien kōn men ko raorōk ilo an jab jelet baam̧le eo aer ak ilju im jeklaj eo an baam̧le eo. Bōtaab, eļan̄n̄e juon jinen ak jemen en jeļļo̧k jidik jān iaļ eo, ajri ro rej maron̄ eļļāļo̧k jān waanjon̄ak eo an jinen an jemen.”21

Āinwōt juon epepen eo me kar lelok eddo eo ekwojarjar n̄an kōpooj diktak in epepen eo kōn jerbal in kanaan eo an ilo raan ko āliktata,22 me jerbal in ej aikuj kūrm̧ool ilo juon iien eo me ebūltōn̄tōn̄ an rikapo eo kareel,23 jejjab maron̄ erom juon unjen kapokpok kōn aorōk eo an ļoor kapilōk in kanaan eo. Ej lukkun kapilōklōk in me ej ko̧tļo̧k bwe epepen eo ej walōn̄tak n̄an loe “rikōjdat eo ke e [ej] ettoļo̧k wōt; innām [er remaron̄ kōm̧m̧an] pojak” n̄an jutak pen ņae kakure ko an rikōjdat eo.24 Ejereer eo ad eo āinwōt edik, kōjekdoon jidik, ak unoojdikdik in ba ņae in uwaak n̄an kanaan in kapilōklōk remaron̄ kōm̧m̧an ad etetal ilo kauwōtata tōrerein ial in bujen eo; bōtaab n̄e rikōjdat eo ekōļapļo̧k ilo mour ko an epepen eo ej walōn̄tak, m̧akūtkūt kein remaron̄ jelet er n̄an etal jen ial eo. Kain tōprak in ej juon wōņāān an epepen me eļap an ļap.25

Jet iaami kom̧ maron̄ en̄jake ami likjab ilo kijejeto ko ami n̄an ļo̧o̧r kapilōklōk ko an Būreejtōn Russell M. Nelson. N̄e men eo in, ukweļo̧k, bar jino n̄an ļo̧o̧r kapilōklōk eo an rikanaan eo kālet in Anij. Door iturejet menin kōm̧ad eo an ajri im lōke eo Irooj eaar kapiti. Lem̧ōņōņō kōnke bar juon alen “ewōr juon rikanaan ilo Israel.”26

Jekdon eļan̄n̄e kwojjab lukkun jeļā, Ij kam̧ool bwe jemaron̄ jelmae m̧eneen ko an raan ko āliktata im bar eddōkļo̧k ie. Jej armej ro rekwojarjar ilo raan ko āliktata, im raan ko rem̧m̧an kein. Jaar kijooror n̄an itok n̄an laļ in ilo tōre in, bōk lōke eo bwe jeban kōmakeļo̧k kōj n̄e jujel m̧ae maro eo an eļap an rikapo eo im kapokpok eo ioļapļap27 bōtaab ijeļļokin bōk kapilōk eo im tōl eo jān eo me ej make wōt mālim n̄an ba n̄an kōj im aolepān laļ in, “Āindein an Irooj Jeova ba.”28 Ilo āt eo ekwojarjar etan rikanaan eo Anij ekar karūttoļo̧k, Ri Kwojarjar eo in Israel,29 em̧ool Jisōs Kraist, amen.

Kakeememej ko

  1. Būreejtōn Russell M. Nelson ekar karuwaneneik rijikuuļ ro ilo Brigham Young University n̄an ejja en̄jake in revelesōn in: “Kajjitōk ippān Jemam̧ Ilan̄ eļan̄n̄e jej lukkuun rikaloor im rikanaan ro an Irooj. Kajjitōk eļan̄n̄e je kar bōk revelesōn ilo menin im bar men ko jet” (“The Love and Laws of God” [Brigham Young University devotional, Sept. 17, 2019], speeches.byu.edu). Bar lale Neil L. Andersen, “Rikanaan an Anij,” Liaona, Māe 2018, 26–27: “Ewōr ad āinwōt Armej ro Rekwojarjar n̄an bōk an juon make kam̧ool bwe kūr eo an Būreejtōn Nelson ej jān Anij.” Bwebwenato eo kōn oktak eo an Alma ilo ad ron̄jake rikanaan Abinidai ej letok elōn̄ļo̧k kamool ko bwe revelesōn ko me n̄an juon rikanaan ej pād n̄an aolep kōj (lale Mosaia 13:5; 17:2.

  2. “We either have a prophet or we have nothing; and having a prophet, we have everything” (Gordon B. Hinckley, “Kimij Kamolol Yuk,O Anij, Kin Juōn Dri Kanan,” Ensign, Jān. 1974, 122).

  3. “Raar jino jab tōmak ilo jetōb in kanaan im ilo jetōb in revelesōn; im ekajet ko an Anij raar pād im̧aer im jelm̧ae er” (Hilamon 4:23; barāinwōt lale Katak im Bujen Ko 11:25). “Jej al im kar ikutkut ad al, ‘Kemij Kamoolol Eok, O Anij, kōn juon Rikanaan n̄an tōl kem ilo raan kein eliktata.’ Ewōr elōn̄ ro me [rej aikuj] likut juon kōjeļļā im ba: ‘N̄e enkar tōl kōj n̄an ta ko (Teachings of Presidents of the Church: Heber J. Grant [2002], 80).

  4. “Jet iien jej bōk kapilōklōk ko me jejjab m̧eļeļe kake ak āinwōt n̄e rejjab ekkar n̄an kōj, jekdoon ālkin lukkun jar im kōļmenļo̧kjen. Jab joļo̧k kapilōklōk eo, dāpiji ijo epaak. Eļan̄n̄e juon eo kwoj lōke enkar lewaj n̄an kwe ta eo me ejelo̧k aorōkin ak bok kōn kallim̧ur eo bwe ewōr kouļ ie, komaro̧n̄ dāpije ilo peim̧ jidik, kōm̧anm̧an am̧ kōm̧akutkuti. Aolep iien n̄e ikar kōm̧m̧an menin kōn kapilōklōk ko jān rikanaan, ālkin jidik iien jidikdik in kouļ rej jino waļo̧k im iaar kamoolol” (Henry B. Eyring, “Finding Safety in Counsel” (Henry B. Eyring, “Finding Safety in Counsel,” Ensign, May 1997, 26; bar lale 3 Nipai 1:13; Katak im Bujen Ko 1:14).

  5. Lale 2 Nipai 4:17–18. “Jab liaakeļo̧k eō kōnke aō jab wānōk, im jab jema, kōnke an jab wānōk, im jab er ro raar jeje im̧aan e; ak ijello̧kun in leļo̧k kam̧m̧oolol ko n̄an Anij bwe Eaar kōm̧m̧an im kaalikkar n̄an kom̧ jab wānōk ko ami, bwe kom̧in maron̄ jeļā n̄an jeļāļo̧kjeņļo̧k jān kar kōm” (Mormon 9:31).

  6. Lale Katak im Bujen Ko 3:6–8; barāinwōt lale Katak im Bujen Ko 93:47.

  7. Katak im Bujen Ko 29:16.

  8. Lale Katak im Bujen Ko 84:97; bar lale Katak im Bujen Ko 87:6.

  9. Katak im Bujen Ko 45:26, 27.

  10. Lale Katak im Bujen Ko 1:38.

  11. Hoseia 2:18. “Bwe Inaaj kwaļo̧k Eō make jān lan̄ kōn kajoor im aiboojoj eļap, ippān aolepān inelep ko ijo, im jokwe ilo wānōk ippān armej ro ioon laļ juon to̧ujin iiō ko, im rinana reban jutak” (Katak im Bujen Ko 29:11).

  12. Lale 1 Nipai 22:16–17; bar lale Katak im Bujen Ko 59:23.

  13. “Bwe lo, raar kajekdo̧o̧n naan ko an rikanaan ro. Kōn menin, eļan̄n̄e jema en kar jokwe ilo āneen ālkin kar jiron̄ e n̄an ilo̧j jān e, lo, enaaj kar bar mej” (1 Nipai 3:18; bar lale 2 Nipai 26:3; Katak im Bujen Ko 90:5).

  14. M. Russell Ballard, “His Word Ye Shall Receive,” Liaona, July 2001, 65.

  15. Russell M. Nelson, “Kajjitōk, Kappukōt, Kōļļaļaļ,” Liaona, Okt. 2009, 82. “Ejeļo̧k armij enaj m̧ōņōņō ļo̧k ak jān pokake kapilōklōk ko an rikanaan eo emour” (The Teachings of Lorenzo Snow, ed. Clyde J. Williams [1996], 86).

  16. “Kaaikļo̧k mejam̧ n̄an ro rej tōl Kabun̄ in rainin, ak ilju, im kajejjet mour eo am̧ āinwōt er ijelo̧kin n̄an dāpdep wōt ioon ta ko rikaanan ro etto maron̄ kar lo ak ļōm̧ņak ak kar kōnono” (The Teachings of Harold B. Lee [1996], 525).

  17. Būreejtōn Spencer W. Kimball ekar lale juon iien bwe “ro rej kattoon ļōb ko an rikanaan ro remij jino kio ilo ami kad ro rej mour” (The Teachings of Spencer W. Kimball, ed Edward L. Kimball [1982], 462). “Naan ko raorōk tata jemaron̄ ron̄, kejekļo̧kjeņ, im ļoori rej ko kar kwaļo̧k jān rikanaan eo ad emour” (Ronald A. Rasband, “Men ko an Būriō,” Liaona, Okt. 2021, 40).

  18. “N̄e jej ron̄ kapilōlōk an Irooj kwaļo̧ki jān naan ko an Būreejtōn eo an Kabun̄ in, uaak ko ad rej aikuj em̧m̧an im m̧ōkaj” (M. Russell Ballard, “His Word Ye Shall Receive,” Liahona, July 2001, 65).

  19. “Kabun̄ eo an Jisōs Kraist eaar baj tōl wōt jān rikanaan im rijilōk ro remour. Men̄e rej kanniōk im jab weppān, ro rikarejeran Irooj rej im̧we n̄an jipan̄ kōj joļo̧k kapan̄pan̄ ko me rōkauwōtata ilo mour in jetōb im n̄an jipan̄ kōj anjo̧ ilo mour in n̄an raan ko āliktata, eļaptata, mejen kajjid eo ilan̄” (M. Russell Ballard, “Anij Ej pād ilo Jōbwe eo,” Liaona, Okt. 2015, 24).

  20. Neal A. Maxwell, “A More Determined Discipleship,” Ensign, Feb. 1979, 69, 70.

  21. Richard L. Evans, “Foundations of a Happy Home,” in Conference Report, Oct. 1964, 135–36.

  22. Lale Katak im Bujen Ko 123:11; bar lale Robert D. Hales, “Our Duty to God: The Mission of Parents and Leaders to the Rising Generation,” Liahona, May 2010, 95–98.

  23. Lale Katak im Bujen Ko 52:14.

  24. Katak im Bujen Ko 101:54.

  25. Lale Mosaia 26:1–4.

  26. 2 Kiin̄ Ro 5:8.

  27. “Kom̧ naaj eo̧ron̄ aolep naan ko im kien ko an ko enaaj liwōj n̄an kom̧, … bwe jān kōm̧m̧ani men kein … Irooj enaaj kajjeplōklōk kajoor ko an marok jān im̧ami, im kōm̧m̧an bwe lan̄ ko ren wūdiddid n̄an em̧m̧an eo ami, im aiboojoj an etan” (Katak im Bujen Ko 21:4, 6). “Ejeļo̧k armij eo kar ļo̧o̧r katak ko im bōk rōjan̄ ak kapilōklōk ko jān juon eo ej jutak āinwōt ripinej jenkwan Irooj ekar jōbwābwe” (Doctrines of Salvation: Sermons and Writings of Joseph Fielding Smith, ed Bruce R. McConkie [1998], 243).

  28. Ezekiel 3:27. “Bwe naan an kom̧ naaj bōke, āinwōt n̄e jān Lo̧n̄iiū make, ilo aolep kōmmaanwa im tōmak” (Katak im Bujen Ko 21:5).

  29. Lale 1 Nipai 22:20–21; bar lale 3 Nipai 20:23.