Rikaļoor ro an Kiin̄ in Aenōm̧m̧an eo

N̄an kakūrm̧ool kanaan eo leļo̧k n̄an Zekaraia,¹ Jisōs eaar deļo̧n̄eļo̧k jikin eo kwojarjar im uwe ioon juon donkey, eo watōke ilo juon naan “kōkaļļe in irooj in Riju ro etto,”² im em̧ool n̄an Kiin̄ an kiin̄ ro im Kiin̄ in Aenōm̧m̧an.³ Kar jepooļ kōn juon jarlepju in armej ro ro raar elloke nuknuk ko aer, kimej in ni ko, im wut ko jet ilo iaļ eo ijo Jisōs ej ilo̧k ie ļo̧k. Raar nebar Anij, kōn juon ainikien eļaaj, “E m̧ōņōņō Kiin̄ eo Ej itok ilo etan Irooj: aenōm̧m̧an ilo lan̄, im aiboojoj ilo jo utiejtata.”⁴ Bar juon alen, “Hosana n̄an nejid Devid: E m̧ōņōņō Eo ej itok ilo etan Irooj; Hosana ilo utiejtata.”⁵ Iien in ejej uwaan, jej keememej ilo rainin āinwōt jeļā kake ej Palm Sunday, ekar juon iien elem̧ōņōņō n̄an keememej iien eo ekar bōk jikin ilo wiik in en̄taan eo an Rilo̧mo̧o̧r make im kabwilōn̄ļōn̄ eo kōn lōb eo ejjeļo̧k kobban.

Āinwōt rikaļoor ro An, jej armej ro An, kar kūr n̄an kwaļo̧k kwojarjar eo An,⁶ lōn̄aj aenōm̧m̧an eo kar lukkuun letok jān E kōn en̄taan in pinmuur eo An. Aenōm̧m̧an in ej juon kallim̧ur kar letok n̄an aolep ro rej ukōt būruweer n̄an Rilo̧mo̧o̧r im mour jim̧we; kain aenōm̧m̧an in ej letok n̄an kōj kajoor n̄an m̧ōņōņōik mour in im kōmaron̄ kōj n̄an dipuk en̄taan ko ilo iaļ in ad.

Ilo 1847, Irooj eaar leļo̧k kōmeļeļe ko raorōk n̄an bainieer ro Rekwojarjar, ro raar aikuj aenōm̧m̧an n̄an pād wōt im juon wōt ilo aer ioon apan̄ ko jab jeļā kaki ilo iaļ eo aer. Ilubwiljin men ko jet, Irooj eaar katakin ro Rekwojarjar n̄an “bōjrak jān aeer aitwerōk ippān doon; bōjrak jān aeer ekkōnono nana ņae doon.”⁷ Jeje ko rekwojarjar rej kapene bwe ro rej kōm̧m̧an jerbal jim̧we im kajjieon̄ etetal ilo Jetōbin ettā an Irooj rej ro kar kallim̧ur kōn aenōm̧m̧an eo rej aikuji n̄an mour kake ilo raan kein jej mour ie.⁸

Āinwōt rikaļoor ro an Kiin̄ in Aenōm̧m̧an eo, kar katakin kōj n̄an mour “bwe burueer ren kuk ippān doon ilo bōrokuk im ilo iakwe n̄an doon.”⁹ Rikanaan eo ad ejitenbōro, Būreejtōn Russell M. Nelson, ekar ba jet iien remootļo̧k, “iakweleel ej kakkure men otemjej Rilo̧mo̧o̧r eo ekar jutak kake im katakin.”¹⁰ Rikanaan eo ad eaar ba bwe jen kōm̧m̧ane jon̄an eo wōt jemaron̄e n̄an kabōjrak poktak ko ad make me rej pād wōt ilo būruwōd im ilo mour ko ad.”¹¹

Jen ļōmņaki pedped kein n̄an kalimjōk iakwe eo erreeo an Kraist n̄an kōj bwe jen, āinwōt rikaļoor ro An, ro rej kappukot n̄an jipan̄ doon. Jeje ko rekwojarjar rej kalikkar kain iakwe in āinwōt iakwe em̧ool.¹² N̄e jej ļōmņak kōn iakwe em̧ool, kōļmenļo̧kjeņ ko ad ekkā aer oktakļo̧k n̄an menin joortak ko im menin jipan̄ ko n̄an ļōn̄aj ro rej en̄jake en̄taan ilo ānbwin, m̧weiuk, ak apan̄ ko ilo en̄jake. Ejja wōt, iakwe em̧ool ejjab iokļo̧k men ko jej jipan̄ ro jet, ak ej juon m̧wiļ an Rilo̧mo̧o̧r im maron̄ jino m̧ōttan m̧willid. Ejjab menin bwilōn̄ ke Irooj eaar kakien kōj n̄an ņa balleid make kōn korak in iakwe em̧ool, “eo ej korak an wānōk im aenōm̧m̧an.”¹³ N̄e ejjeļo̧k iakwe em̧ool, ejelok tokjed,¹⁴ im jeban jolete jikid ippān Irooj eo ekar kepooje n̄an kōj ilo m̧weeo im̧ōn Jemedwōj Ilan̄.¹⁵

Waanjon̄ak eo em̧m̧an an Jisōs ej meļeļein wāppen eo ad make im aenōm̧m̧an, eļaptata n̄e jej ioon men ko reppen me kwaļo̧k kōn mej eo An. Ļōmņak jidik kōn ta eo Jisōs eaar en̄jake ke Eaar ettā im kwaļ neen rijilōk ro An, ilo an jeļā bwe juon iaer enaaj kaarmejete E ilo bon̄on eo.¹⁶ Ak ke Jisōs, ilo awa ko ālik, eaar tiriam̧o im kar kōmour lo̧jiln̄in juon iaan em̧m̧aan ro me raar itok ippān Judas, eo eaar liakelok E, n̄an kalbuuji E.¹⁷ Ak ilo iien eo Rilo̧mo̧o̧r, ej jutak im̧aan Pailat, kar jab jejjet an pris ro routiej im elder ro na ruwōn, im ejjeļo̧k jabdewōt naan en ar ba kōn an bōd aeer lo notaan, im ekkar kōmmaan an rikien eo an Rom bwilōñ.¹⁸

Jen men kein jilu rekabūrom̧ōjm̧ōj rekar waļo̧k, Rilo̧mo̧o̧r, kar kōjekdo̧o̧n eddodo in būrom̧ōj im en̄taan, kar katakin kōj kōn waanjon̄ak eo An bwe “yokwe ej meanwōr, im e jouj; … yokwe ejjab juunm̧aad; … yokwe ejjab make kōmmejāje, e jab juwa, e jab kōm̧m̧an men ko jekkar, e jab kappukot men ko an, re jab kaillu e, [im] e jab ļōmņak nana.”¹⁹

Bar juon men eaorōk n̄an kwaļo̧ke, im juon me ej tōlļo̧k ad rikaļooraņ im elmen ad kwaļo̧k aenōm̧m̧an eo an Rilo̧mo̧o̧r, ej wāween eo ilo ad kōm̧m̧an n̄an doon. Ilo iien jerbal in kwaļo̧k eo An ioon laļin, pedped in katak ko an Rilo̧mo̧o̧r— ejjab wōt, ak eo eļaptata— kōn wānōk eo an iakwe, iakwe em̧ool, kijenmej, ettā, im tiriam̧o—mour in m̧wiļ ko n̄an ro rej kōņaan erom̧ epakeļo̧k E im bōk aenōm̧m̧an eo An. Kain m̧wiļ kein rej menin letok jān Anij, im ilo ad kajjieon̄ in mour kaki, jenaaj jino lo oktak im m̧ōjņo ko an ro riturid kōn eļap iakwe, loļo̧kjeņ, kautiej, im jouj. Juon iaan kōkaļļe ko rem̧ool ilo ad epakeļo̧k Rilo̧mo̧o̧r im erom̧ eļapļo̧k āinwōt E ej ilo iakwe, kijenmej, im wāween jouj eo me jej kōm̧m̧an em̧m̧an n̄an armej ro ad, jekdo̧o̧n jekjek rot.

Emakijkij ad lo armej ro rej bōk kuņaer ilo nana im aaet kakkure naan ko kōn paoktokiid, m̧ōjņo̧ ko, im ļōmņak ko an ro jet, ekkā n̄e kain paoktok ko im ļōmņak ko rej oktak ak ukōt kilen aer jerbal im ļōmņak. Ekka ar lo an armej leto letak naan rot kein n̄an ro jet, ro rej āliji ta eo raar ron̄ ijello̧kin aeer lukkuun jela ta eo ar lukkuun walok ilo iien eo buuk kein raar walok. Jerata eo in ke, social media rej errā ilo kain m̧wiļ rot in ilo aer ba rej kwalok m̧ool ko im jim̧we ko. N̄e ejjeļo̧k jon̄an, kōnono ko ilo digital ekkā an tōlļo̧k armej ro n̄an kakkure doon im dike doon, kwaļo̧k men ko rejekkar, kōmetak doon, im kajedeed riab ko.

Nipai ekar kanaan bwe ilo raan ko āliktata, armej renaaj dike doon im pukwoj armej n̄an illu kōn ta eo em̧m̧an.²⁰ Jeje ko Rekwojarjar ej katakin bwe “jabdewōt men ej karuwainene im karreel n̄an kōm̧m̧an em̧m̧an, im n̄an iakwe Anij, im n̄an jerbal n̄an E, ej kōketak in Anij.”²¹ Ilo turājet eo juon, “im men eo enana ej itok jān devil; bwe devil ej rikōjdat n̄an Anij, im ej jum̧ae E iien otemjej, im karuwainene im karreel n̄an jero̧wiwi, im n̄an kōm̧m̧an men eo enana iien otemjej.”²²

Ļōmņake katakin kanaan in, ejjab menin ilbōk bwe juon iaan aujiid ko an rikapo eo ej pikwoj n̄an kōm̧m̧an illu im kōjdāt ilo būrowōn ajri ro nejin Anij. Ej m̧ōņōņō n̄e ej lo an armej ro ba ņae, kajjirere, im kakkure doon. M̧wiļ in emaron̄ kakkure piktokin juon armej, etan, im bok lōket eo an, eļaptata n̄e armej ebōd aeer ekajete. Eaorōk n̄an kile n̄e jej kōtļo̧k kain m̧wiļ rot in pād ilo mour ko ad, jej kōm̧m̧an jikin ilo buruōr n̄an an rikōjdāt eo kadōk ine ejjab em̧m̧an ilubwiljiid, wōtļo̧k ilo aujiid ko an rōkauwōtata.

N̄e jej jab kakōm̧anm̧an kōn ļōmņak ko ad, naan ko, im makūtkūt ko, jemaron̄ oktak im pād ilo loklok in kabo ko an rikōjrat, kakure jemjera ko ad ippān armej ro ipelaakid im ro jej iakwe er.

Ro jeiū im jatū, āinwōt armej ro an Anij im rikwaļo̧k ro an aenōm̧m̧an eo an, jej jab maron̄e n̄an kōtļo̧k kabo kein an eo enana n̄an bōk jikin ilo būruer. Jej jab aikuj boki eddo kein renana ro rej kakkure en̄jake ko, jemjera ko, im em̧ool mour ko ad. Gospel in ej jutak kōn ennaan ko rem̧m̧an an lan̄lōn̄ eļap.

Aaet, ejjeļo̧k iaad ewāppen, im em̧ool ewōr iien ko jej po n̄an kain m̧wiļ rot in. Ilo iakwe eo An ewāppen im jeļāļo̧kjeņ eo An edipio, aolep iien Rilo̧mo̧o̧r eo ej kajjieon̄ kakkōļ kōj kōn kain jorrāān kein. E eaar katakin kōj, “Bwe kōn ekajet eo kom̧ij ekajet, naaj ekajet kom̧; im kōn jon̄ok eo kom̧ij jon̄jon̄, enaaj bar jon̄e kom̧.”²³

Ro jeiū im jatū, ilo ad kajjieon̄ in kōļapļo̧k m̧wiļ ko āinwōt an Rilo̧mo̧o̧r, jemaron̄ erom̧ rijerbal ro An ilo aenōm̧m̧an ilo laļin ekkar n̄an jon̄ak eo me E Make ekar ejake. Ij kajjitōk ippāmi n̄an ļōmņaki wāween ko jemaron̄ ukōt kōj make n̄an lōn̄aj im jipan̄ armej, armej ro remeļeļe im būruwōn jeorlo̧k bōd, armej ro rej pukot em̧m̧an eo ippān ro jet, iien otemjej keememej bwe “eļan̄n̄e ewōr jabdewōt men wānōk, karbōb, ak em̧m̧an ekkōnono kake ak nebare, kōmij kappukoti men kein.”²⁴

Ij kallim̧uri kom̧ bwe ilo ad kappukoti im kōļapļo̧k m̧wiļ kein, enaaj ļapļo̧k im ļapļo̧k ad jouj im loļo̧kjeņ n̄an aikuj ko an armej ro ad²⁵ im naaj en̄jake m̧ōņōņō, aenōm̧m̧an, n̄an eddōkļo̧k jetōb.²⁶ Ilo ejjeļo̧k pere, Irooj enaaj kile kijejeto ko ad im letok n̄an kōj menin letok ko jej aikuji n̄an bōk eļapļo̧k jouj im kijenmej n̄an oktak ko an ro jet, m̧ōjņo̧ ko, im jab wānōk ko. Ilo m̧ool, jenaaj em̧m̧anļo̧k n̄an jab kōmetak ak kakkure ro rej kōmetak kōj. Ad kōņaan n̄an jeorlo̧k bōd, āinwōt an kar Rilo̧mo̧o̧r kōm̧m̧ane, ro rej kōm̧m̧an nana ņae kōj ak kōnono nana ņae kōj em̧ool enaaj ļapļo̧k im naaj m̧ōttan m̧wiļ ko ad.

Kōm̧m̧an bwe rainin, ilo Palm Sunday in, jen kajedeed to in iakwe eo ippād im bōlōk in ni in iakwe em̧ool, etetal ilo bun̄ten neen Kiin̄ in Aenōm̧m̧an eo ilo ad keppopo n̄an keememej, Jabōt in ej itok, kōn kabwilōn̄lōn̄ in lōb eo ejjeļo̧k kobban. Āinwōt būratōr im sister ro ilo Kraist, jen lan̄lōn̄ n̄an kwaļo̧k, “Hosana n̄an nejid David: E m̧ōņōņō Eo ej itok ilo etan Irooj; Hosana ilo utiejtata.”²⁷

Ij kam̧ool bwe Jisōs Kraist ej mour im bwe An iakwe ewāppen, ej waļo̧k ilo en̄taan in pinmuur eo An, ej erļo̧ke n̄an aolep ro rej kōņaan etetal Ippān im m̧ōņōņō ilo aenōm̧m̧an eo an ilo laļin im ilo laļ eo ej itok. Ij ba men kein ilo āt eo ekwojarjar etan Rilo̧mo̧o̧r im Ripinmuur, Jisōs Kraist, amen.