Sekerehki Koht ni Sohte Peikasal

Kaselehlie riei ohl oh lih akan, I men tapiekihda ahi sawas en rahnwet ahi kadehde me I ese me President Thomas S Monson iei soukohp en Koht ohng kitail nan mwehiet. Sapwellime sounsawas akan nan Presidensi Keieu oh Wahnparon Ehk-riemen kan pil, ni mehlel, wia soukohp kei, seers, oh sounkaudiahl kei. Irail wia weliepen Kaun Sises Krais oh ahniki pwuhng en kalohki Sapwellim erepit oh kupwur ni duwen eh kasansal ong irail. I kadehdehki me mie onepek mwahu sang ni idawehn arail kaweid. Kauno ketin kangkangonge irail ren kawehwehda mwahu kakehlailiala atail pwoson Sahm Nanleng oh Sapwellim Iehroso, Sises Krais, oh Sapwellim Tomwo pwe kitail en dehr per ni atail kin loieng soahng apwal akan en atail ansouet.

Nan Pwuhk en Mormon kitail kin wadek duwen emen ohl me adaniki Ammon me pekedersang sahpw Zarahemla ong sahpw Lehi-Nephi pwe en tehkada duwen rie ohl oko. Nan sahpw Lehi-Nephi e tuhong Nahnmwarki Limhi oh sapwellime ko, me senselehr rehn mehn Lamanite ko. Nahnmwarki Limhi inenen eimahkihda soahng kan me Ammon ehukiheng ih me pid nah aramas oko nan Zarahemla. Ah mohngiong direkihla koapwoaroapwoar oh peren, oh ih ahpw kihpene sapwellime aramas akan ong nan tehnpas sarawio oh mahsanih:

^“Eri, kumwail sarada, oh perenda, oh koapwoaroapwoarki Koht. …

“... Ma kumwail sohpeilahng Kauno ni mohngiongimwail unsek, … oh papa ih ni lamalam kehlail koaros, ma kumwail wia met, e pahn ketin, ni duwen pein sapwellim kupwur rosoulap oh kerekeremwehl, kapitkumwail sang nan kahpwal.”¹

En Ammon koasoai kan inenen sair en sapwellimen Nahnmwarki Limhi aramas akan pwoson kahrehda re inoukihong Koht me re pahn papah Ih oh peikieng Sapwellim kosoned akan, mendahte irair en kahpwal akan me re ahniki. Pwehki arail pwoson, irail kak wiahda koasoandi ehu oh saledek sang nan pehn mehn Lamanite kan. ²

Rieiko, menlao medewe kesempwalpen luhk me Nahnmwarki Limhi ketikiheng sapwellime aramas akan oh duwen eh pid kitail. E mahsanih: “Kumwail sarada, oh perenda, oh koapwoaroapwoarki Koht.”¹² Sang ni mahsen pwukat, Limhi ahpw luke sapwellime aramas akan en medewe ansou me kohkohdo ni pwoson pwehn welianiki arail masepwehk kan nsenamwahu en koapwoaroapwoar me kin miehda sang ni ahniki pwoson; oh dehpa periki kiheng arail likilik rehn Koht mendahte soangen kahpwal akan.

Mour wet wia ansoun kasongosong me kitail pahn kasalehda ma kitail pahn wia mehkoaros me Kauno atail Koht pahn ketin mahsanihong kitail. ³Met pahn anahne pwoson Krais ni sohpeikasal pil duwehte ansoun apwal laud. E pahn anahne kitail en nantihla mwowe ni pwoson kehlail Krais, kaweid sang rehn Ngehno, oh pwoson me Koht pahn ketin sewesehda atail anahn akan.⁴

Nan keimwseklahn Sapwellime doadoahk, mwohnte eh ketin selidiero, Sounkomouro mahsaniheng Sapwellime tohnpadahk ko: “Nan sampah kumwail pahn ahniki kahpwal; ahpw kumwail nsenamwahu; I powehdier sampah.”⁵

Iangie douloale mahs--Sises Krais, Sapwellimen Sahmo Iehros, sapwellimaniki mour mwakelekel oh ketin powehdi kasongosong kan koaros, medek kan, kalelapak kan, oh kahpwal akan en sampah. E ketin kakerehdi nta nan Ketsemeni; E sapwellimanikihda medek kansensuwed me apwal kawehwehda. E sapwellimankihda atail medek oh soumwahu koaros. E ketin onopadahr sewesehki--sewesehki emen emen kitail--katoutou koaros. Nan erein sapwellime ieias, lokolok, pwoula, oh Kalohpwuala, E ketin kasohrehla apwal koaros pwe kitail en kin pereperen oh kin diar meleilei pohn sampah wet. Kamwahu kan en Sapwellime tomw en tohnmeteio doke koaruhsie me kin alehda Ih oh tohnmeteikihla pein irail oh pil peuslahng koaruhsie me kin alehda Sapwellime lohpwuo oh idawehn Ih nin duen Sapwellime tohnpadahk mehlel kei. ⁶ Kahrehda, ma kitail kin doadoahngki pwoson Sises Krais oh Sapwellime Tomwo, kitail pahn kehlailda, atail katoutou kan pahn sohrala, oh pwehki Ih kitail pahn powehdi sampah.

Riei ohl oh lih akan, ni atail pahn douloale kehlail oh koapwoaroapwoar me kitail kak alehdihsang rehn Sounkomouro, mie kahrepen kitail en saradahla, pereperen, oh nantihla mwowe ni pwoson oh sohte peikasal. “Aramas me kin peikasal sohte kin koasoanehdi ah lamalam ni mehkoaros.”⁷

Nahnmwarki Limhi pil kaweidki, “Sohpeilahng Kauno ni mohngiong unsek, …papah ih ni madamadau unsek, ma kumwail wia met, e pahn ketin, ni duwen pein kupwure oh roson, kapitkumwailsang nan kahpwal.” ⁸

Rong pein Sapwellimen Sounkomouro mahsen kan ni eh kin ketin peki rehtail:

“Dehr mweidohng mohngiongimwail kan en lelohng kahpwal: kumwail kamehlele Koht, oh pil kamehlele ie. …

“Ma kumwail poakohng ie, a kumwail kapwaiada ahi kosonned akan. …

“Mehmen me kin rong de kapwaiada ahi kosonned akan, iei ih me kin poakohng ie: oh mehmen me kin poakohng ie semei pahn ketin loalloale, oh I pil pahn poakohng, oh kasalehieng ih pein ngehi. ⁹

Koht kin ketin kapaikitailda sang ni atail pwoson. ¹⁰ Pwoson iei ahl en mour patehng kahrepe sarawi oh ahl soutik. Pwoson wia koasoandi tengeteng me kin kairada ngoang. E wia mehkot kesempwal me sansal nan atail wiewia mwahu oh pepehm en inengieng wia soahng koaros me Koht oh Sises Krais kin ketin mahsaniheng kitail. E kin wiahieng kitail en kin kelepwidi ni kapakap pwehn peki rehn Kauno kaweid oh kesihnenda oh mwekid ni koapwoaroapwoar pwe en alehdi soahng kan me pwungieng Kupwure.

Sounpar kei samwalahro ni ei wiewia pwukoahn misin presiden, I alehdi pakair ehu nan telepwohn sang rehn en emen neitail misineri kempoake kan nohno oh pahpa me kairehkinie duwen mehlahn rie serepein. I tamataman, uwen kempoakehn ansouo, ngehi oh misinerio koasoaiapene duwen sapwellimen Koht koasoandi kaselel en komour ong Sapwellime seri kan oh duwen kamarain wet eh pahn kaloalamwahuih ih.

Tehn e pwuriamwei oh nsensuwedla sang ni kahpwalo, misineri menet—sang ni pilenmese kan oh ah pwoson Koht e ahpw perenkihda mour en rie serepeino. E kasalehda likilik kehlail nan mahk meleilei kan en Kauno Ah koasoandi, e ndahngie me e pahn wiewiahte ah misino ni pwoson koaros oh ngoang pwe en kak warohng inou kan me Koht sapwellimaniki ong ih oh ah peneinei. Nan ansoun anahn wet, misinerio wekidala ah mohngiongo ong Koht, kiheng ah likilik koaros ong Ih, oh kakapwa ah inoun papah Kauno ki pwoson oh ni ngoang koaros.

Rieiko, ma kitail sohte ahniki likilik kehlail rehn Koht oh ineng en papah Ih ni loaloapwoat, soahng kamedek kan en mour wet kak elehieng kitail en pehm me likamwete kitail toutoukilahr atail kin patapatehng; oh kitail kak sohla ahneki ineng en momourki rongamwahuo ni unsek. Ma sohte pwoson, kitail pahn kakete peselsang kak en perepereniki koasoandi kan en atail Koht me pid soahng kan me pahn pwarada mwuhr nan atail mour. ¹¹

Nan ansoun kahpwal pwukat, imwintihtio--me kin ansou koaros tetehk irail kan me kak mengein lohdieng ah kasongosong kan--kin songosong doadoahngki atail koasoandi oh madamadau oh uhd uhkiheng kitail. E kin songosong pitiekinkitail me sohte katepen momourki koasoandi mehlel oh pwung kan en rongamwahuo. Menlao tamataman me koasoandi en tepelo “sohte kak ale kisakis kan me kin pwilisang rehn Ngehno: pwe re sohte wia mehkot reh.”¹²Tamataman me Sedan “wia imwintihti [en] Koht, oh [e] kin pepeieng ansou koaros, oh kin lukuluke oh pahpahne [kitail] ong dihp, oh kitail en kin wiewia soahng kan me samin.”¹³Kitail sohte anahne mweidehng en kaleweikitaildi; pwe ma kitail wia, kitail kin luwetala ni pwoson oh peselsang atail kak en alehdi sapwellimen Koht kapai kan.

Ma kitail pahn kin tengedi oh sohte ahneki peikasal nan atail pwoson, Kauno pahn kalaudehla atail kak en powehdi kapwal kan en sampah. Kitail pahn kakala powehdi madamadau samin kan oh kitail pahn alehdi kak en powehdi, soahng kan koaros me udahn kin apwal. Met iei me karehda sapwelimen King Limhi aramas akan arail kak pitsang arail kahpwal kan rehn mehn Lamanite kan.

Rieiko, I lukeikumwail en kiheng amwail likilik koaros Reh oh padahk kan en Sapwellime soukohp akan. I lukeikumwail en kakapwa amwail inou kan rehn Koht, papah Ih ni mohngiongimwail unsek, mendahte soahng sapairair ngeder kan en mour. I wiahki kadehde me sang ni manaman en amwail pwoson kehlail Krais, kumwail pahn saledek sang lokolok en dihp, soh-koapwoaroapwoar, sohte kamehlele, sohte popohl, Lokolok; oh kumwail pahn alehdi kapai kan koaruhsie me inoupe mie sang rehn Samatail Nanleng.

I wiahki ahi kadehde me Koht mehlel. E ketin ieias. E ketin poakohng kitail. E kin ketin karonge atail kapakap akan nan atail ansoun peren kan oh nan atail ansou en peikasal, nsensuwed, oh pwunod. I kadehdehki me Sises Krais iei Sounkomour en sapah. Ihme wia Soundoar.

I kairala ahi sakarada en rahnwet ni iren mahsen kan en melkahka sarawi “Not Now but in the ComingYears,” me sansal nan Pwuhk en Melkahkahn Portugual:

I kosoia mepwukat ni mwar sarawi en Sises Krais, amen.