Manaman en Pwuhk en Mormon

Riei ohl oh lihoko, I kasamwoh kumwail ni popohl sang ni atail pwurehng ehr tuhpene nan kapokon lap en Mwomwohdisohn Sises Krais en Souleng en Imwin Rahn Akan. Mwohn ei pahn tapiada ahi padahk en rahnwet, I men pakairki tehnpas sarawi limau me pahn kokouda nan wasa pwukat: Brasília, Brazil; greater Manila, Philippines, area; Nairobi, Kenya; Pocatello, Idaho, USA; oh Saratoga Springs, Utah, USA.

Nimenseng wet I men kosoia duwen manaman en Pwuhke en Mormon oh anahn kesemwpwal me kitail tohn Mwomwohdisoht en onopki,medmedewe, oh doadoahngki padahk kan nan atail mour. Kesemwpwal en ahneki kehlail oh pwungen kadehde pen Pwuhk en Mormon sohte anahne en daulihala.

Kitail kousoan nan mwehi me kahpwal oh suwed inenen laud. Dahme pahn kak doarei kitail sang nan dihp oh soahng suwed me kipelahr sampah rahnwet? I kalohngki me kadehde ki kehlail duwen atail Sounkomour, Sises Krais, oh Sapwellime rohngamwahuo pahn sewese kitail oh kahluwa kitail la wasa mwahu. Ma ke sohte wie wadwadek Pwuhken Mormon rahn koaros, menlau wadek.Ma ke pahn wadek,kapakap ki oh ahneki ineng mehlel en ese mehlelo, Ngehn Sarawio pahn kasalehionguhk mehlelo.Ma e mehlel—ah I kadehde kihwei ni mehlel me ei—Joseph Smith wia soukohp emen me kilangedi Kauno Koht oh Sapwelime Iehroso, Sises Krais.

Pwehki Pwuhken Mormon ah mehlel,Mwomwohdiso en Sises Krais en Souleng en Imwin Rahn Akan wia an Kauno Mwomwohdiso pohn sampah, oh manaman sarawi en prihstud en Kauno kapwurupwurdohr pwehki kalahngan oh kapai ong Sapwellime serihkan.

Ma ke sohte ahneki kadehde kehlail en soahng pwukat, nantieng rapahki pwe ken alehdi ehu rehra.E kesemwpwal ong uhk ken ahneki pein ahmw kadehde nan ansou apwal kan, pwehki ahn ekei kadehde sohte pahn kak waiukala wasa doh. Ihte,ansou me e alahldier,kadehde iou anahne en kolkol di oh kohpeseng oh pil kehlail sang ni omw pahn kin peikieng Sapwellimen Kauno kosonned akan ansou koaros oh kapakap rahn koaros,iangahki onopki pwuhk sarawi.

Ong kumwail iengei kan koaros me ieiang wiewia doadoahk en Kauno, I pekihda emen emen kitail en onopki ni kapakap oh loalloale Pwuhken Mormon rahn koaros. Ni atail pahn wia, kitail pahn mih nan irair iou me kitail pahn kak rongada mwenginingin en Ngehno ,soikala kasongosong,oh kihsang kitail peikasal oh masopwehk, oh alehdi sawas sang nanleng nan atail mour. I kadehdehki sang nan ahi mohngiong, ni mwaren Sises Krais, amen.