“Kohdo iahng ie”

Riei ohl akan me kolokol prihsduhd, kahrepen ai mih mwomwail rahnwet iei ien pwurehng kapwurehdo inengo rehmwail oh kakehlakaikumwailda nan amwail pwukoahn prihsduhd. Met me kak duwehte kahrepe ehu me I medewe Sounkomouro ahniki ni ansou me e tuwehng pwutak pwulopwul kepwehpwe me idek reh, “Dahme pahn mwau me I pahn wia, pwe ien kak iang ahneki mour soutuk?” (Matthew 19:16) Mwein kumwail iang kohdo ni kapokon wet, duwehte pwutak pwulopwul wet ah pwarala rehn Sounkomouro, wie medemedewe ma amwail pwukoahn papah alahldahr. Oh pil ni ansouote, kumwail pahn kak pil kehn me eme pil tohto—e pil kak tohtohsang! I kapakap pwe ien kak koasoiahwei limpoak en Kauno me kamanalahr amwail pwukoah doadoahk me pweidahr akan, ni ansouohte peki ni ngoang dahme kumwail pahn wia, sang ni Sapwellime sawas, alehdi oh kolokol Sapwelime prihsduhd sarawio

Pwutak pwulopwul kepwepwehu alehdi kaweid en netikihla ah pai koarosoh idawehnla Sounkomouro; kekeirdahn amwail mour pahn sohte nohn anahne en duwe met, ahpwe pahn kin anahne en mie wen tohnmetei iou. Pwehn sansal, I koapwoaroapwoarki me dahme I ehkiohng kumwail sohte pahn karehda ahmwail pahn “kohkohwei nan insensuwed” duwete pwutak kepwehpwehu(Tehk Matthew 19:20–22.) Ahpw I kamehlel me kumwail pahn “kohkowei ni ahmwail peren” (D&C 84:105) pwehki amwail pahn men keirda oh kin medewe me kumwail kak.

Oh e pil wia pepehm sohte itar ekei pak ni ansou me kitail kin medewe dahme Kauno kapwukoah kin kitail en wia. Ni mehlel, ma kumwail pahn indahng ie me kumwail unsek nan amwail pwukoahn prihsduhd kan, I pahn medewe me kumwailsohte nohn wewehki amwail pwukoah kan. Ahpw, ma kumwail pahn indahng ie me kumwail pehm me kumwail sohlahr kak pwehki pwukoahu me nohn apwal sang dahme kumwail wewehki, eri udahn I men sewese kin kumwail en wewehkila ia mwomwen Kauno ah kin ketin katehlapahla oh kakehlailiala irail kan me kin kolokol Sapwellime prihsduhd en wia soahng kan me irail pahn sohte kak wia kelepw.

Met wia mehkot mehlel ehu ohng ie oh pil kumwail nan amwail pwukoah kan. Sohte emen kitail kak wia doadoahk en prihsduhd, oh wia mwahu, sang niatail pahn pein doadoahngkihte atail pein loaloakoahng oh koahiek. Pwehki met kaiden pein atail doadoahk—iei sapwelimen Koht. Eri ihte ahl me kitail pahn kak pweikihda iei idawehn Ih, iei ma kumwail apwetehn wiala deacon men me alehdier manaman sarawi en nehk kamadihpw sarawi; de wia soun padahk en pwarek wasahn kouson akan me Kauno ketin piladahr pwehn paokoahng oh padahk ong penenei kan me kumwail sohte wewehkin irail oh irail kanme sohte men alehda amwail limpoak de padahk kan; de pahpa men me ese me eh pahn kaunda ah wasahn kouson ni pwung, ahpw ke sohte nohn wewehki ia mwomwen ahmw pahn wia, oh e mwomwen me sohlar ansou, pwehki seri kau wie kekeirda mwadang oh sampah wie aklapalapalar oh peirin laudlaudlahr.

Eri ma kumwail kehn me kumwail sohlar kak, ese me e wia mehkot mwahu ehu. E kasalehda me kumwail kak kehn likilik laud me Koht ketkiohng kumwail. E wewehki me kumwail ekiste ahniki kisin madamadau en dahme udahn pwukoahn prihsduhd.

Aramas malaulau nan sampah me wewehki soahng wet. Pil irail kan me kin kak koasoiawei kaweweh pwukat pil kin kak sohte wewehki ni mehlel. Mie iren pwuhk sarawi kei me sang ni manaman en Ngehno me kin ieiang irail, kin kak kaloalehle atail wewehki duwen sarawihn prihsduhd. Iet akan ekei ire:

“Manaman oh mweimwei en … Melkesedek Prihsduhd, iei ien kolokol kih kan en kapai sarawi kan en mwomwodiso—

“Pwe kitail en kak aneki ansou mwahu en alehdi kapai kan en nahnlehng, pwe wasa ile en kak ritidahng kitail, pwe kitail en kak iahng pahtehng mihting lap en nanlehng oh mwomwohdiso en Meseniho, oh iang ehuwong oh kehn linagnen Koht, oh Sihses sapwelime ieros.

“Manaman oh mweimwei en … prihsduhd en Aaron, iei en kolokol kih kan en ehuwong tohnlehng kan” (D&C 107:18–20).

“Nan tiahk sarawi kan [en Prisduhd], manaman en Koht kin pwarada loale. …

“pwe ma sohte sohng wet sohte me kak kilahng sihlangin Koht, Samatail, oh mourmour.” (D&C 84:20, 22).

“Prisduhd Laudo [e] kohdo mwurin Sapwelimen Koht Ieroso, Me tepikida sangete poahsoanen sampah wet, de me re kin inda, pwehki ah saik tepin rahn akan de imwin pahr akan, oh kokounop ohnger mour soutik, sang ni erpit en ah ketin wewehki meh koaros” (Alma 13:7).

“koaros me pahn kasarawihla ninduen koasoandi wet oh aledi pwukoa kan udahn pahn aledi manaman, sang ni pwoson, kak kawehla nahna kan, kak pwalahng peseng sehd, kamadahda pihl akan, wekida arail wasa re kuskuslahng ie;

“Kak kalewehdi sounpei en sahpw akan, kak katohrepeseng sahpw akan en sampah, kak kawehla meh karos, kak kesinen mwohn silahngin Koht; kak wia sohng koaros me e kupwurki, sang ni ah pahn ketin mahsanih, kak powedi sohng tiktitik oh manaman kan; oh pwehki met iei kupwuren Iehros en koht me sang mwohn sampah wet ah wiawihda.” (Joseph Smith Translation, Genesis 14:30–31 [in the Bible appendix]).

Ehu wiepe me kitail kin kak sapengki sohnge manaman kehlail me sahng ni prisduhd wet iei en inda me soahng wet sohte kohdohng ie. Ehu wipen pasapehng me kitail kin wia iei rapahki nan atail mohnigong kan soahngen peidek pwukat: mie ier pak me I kehn nanlehng an ritidahng ie? Mie me kak doadoahngki lepin lokaia “doadoahk ohng tohnlehng kan” ni asnou me I kin wia ahi pwukoahn prisduhd kan? I kin doadoahngki “manaman en Koht” ohng aramas kan me I kin sewese? Mie pak me I kin kawehla nahna kan, kalowehdi sounpei kan, de powehdi kasongosong en aramas kan, powedi manaman en sampah kan pwe Ien kak kapwaida kuwpuren Koht?

Soangen madamadau pwukat koaros kin kiheng kitail pepehm me kitail anahne kalaudehla atail pahpah Koht. I kasik me e pil kin kiheng uhk pepehm en men kaludehla ahmw ineng en men wia sapwelimen Koht doadoahng kan.Pwe sohngen pepehm pwukat me pahn tepin kiehng uhk ken kak wiahla soangen ohl me kin wia pwukoahn prisduhd ni pwung.

Keriau ahl wiawi ni ansou me Koht tepida mahsenieng Enoch. Kitail kin ese me Enoch wia soukohp wadawad men pwehki ah ketin wiada wein Koht nan ansou en rotoroto. Ahpw mwohn ah wiala soukohp wadawad men, Enoch kin wiaki me me ih “aramas sese padahk,” oh me arams kan koaros kin kailongki Ih. (Moses 6:31). Rong dahme koht ketin mahsenihong Enoch. Mahsen pwukat pil ohng kumwail koaros me pilipildahr pwe en sewese mehtei kan sahng ni amwail kolokol prisduhd:

“Kouno koht ahpw ketin mahseniong Enoch: Kohla oh wia dahme I pahn padahkiehng uhk, sohte me pahn kak kauhiukedi. Kalokehng aramas kan, pwe I pahn sewese komwi, oh I pahn kieng uhk ineng, pwehki ngehi me kakaun mehkaros, oh pwe I pahn wia dahme pahn mwahuehng ie. …

“Ese me Ngeni mihmi rehmw, ihme kareda koasoai koaros me ke pahn wia kin kohsang rehi, oh nahna kan pahn dairokdihsahng uhk, oh pihl kan pahn sohla kusla wasa re kin kusla ie; ohke pahn kin kolokol ie, I pahn mihmi rehmw, eri kohdo iangie”. (Moses 6:32, 34).

Riei ohloko, keidien prisduhd wia sapwelimen Koht luhk en idawehn ih. Oh ia wehwehn kitail en idawehn ih? E wewehki me kitail anahne wia dahme e kin wia, kitail en pahpah mehtei kan duwete ah kin papah kitail. E ketin mendakihla ah men insenamwahu pwe en sewese koaros me anahne sawas, eri Ihme kitail pahn wia. E kin ketin pohnese irail me sohlar me kin tehk kan, eri kitail anahne wia soahnget. E kin wia ah kadehde ni limpoak ki spwelime padahk me pwung me kin ketin alehdi sahng seme nanleng, itarete ma sohte me men rohng, oh kitail pil wia duwete. E ketin mahseniohng koaros “kohdo rehi” (Matthew 11:28), ah kitail pahn idahng koaros, “kohdo reh.” Pwehki atail kolokol prisduhd, kitail wia weliepe. Kitail mwekidki ih ahpw kaidehn kitail. Kitail kin koasooi ki ah mahsen kan, Aramas akan me kitail kin papah kin esehla me pid ih pwehki sahng ni atail sawas akan.

Mwadang en atail pahn alehda sapwelime luhk “kohdo iahng ie,” mwomwen atail kin doadoahngki atail prisduhd pahn wekila. E kin lapala oh waunla, pwehki kitail ese me kitail sohte kin kelehpw. Soangen pepehm wet udahn laudansou me Presedent Thomas S. Monson pwiliki peh kan pohn moangei ie sounpar duwahu(9) samwalahro oh kiehng ie kapai ien tapida ahi pwukoa me I mihmi loale rahnuet. Nan Sapwelime kapai, E kosoia sapwelimen soukomouro mahsen: “koaros me pahn aleiukada, pil alehda, pwe ngehn me ke welwelian. I pahn mihmi palimoahunimw en oh pali meing, oh neghno pahn pahn mihmi loalemw, oh tohnglehng kan pahn kapikapel uhk, pwehn pwok komwi da” (D&C 84:88).

Pak tohtoh I kin kalap kehliki inouo, oh I kin kilahng pak tohto e pweida nan erein pahr 72 me I wia soun sawas me kolokol prisduhd. E wiawi ni ansou me I wia Aaronic prisduhd men oh kapwukoa koiehng ie en nehk kamadihpw sarawi. I masak pwe I de wiada sapwung, I kohieila likin aht wasan sarwio mwohn sarawio ah pahn tep oh kapakap pwe Koh ten sewese ie. Pasapehng koiehng ie. I kehn me Koht ieiahng ie. I kiehn sapwelime kapworopwor me e ketkiehng ie, oh I pil kehn kapworopwor me I alehdi pwe iehn wia sapwelime doadoahk.

E pil pwurehng wiawi ni ansou me I wia pisop. Mie delepwohn ehu kohdo sang emen lih me wiahda sapwung laud ehu oh aledier kahpwal tohto. Ni ansou me I kohla tuwehng, I kehn me I eseier pasapehng en ah kapwalo,Iahpw ansouote I pil kehn me I sohte konehng kieng pasapengo—anahne pwe en pein rapahkida pasapehngo, Dahme I indahng me “I kamehlel me koht pahn seweseiuk diar ahmw pasapehng ma ke pahn kapakap oh peki reh.” Mwurihsahng E idahng ie me E peki Reh oh E ketkiohng pasapehng.

Pilehu pako, ehu delepohn pil kodongie, met sahng rehn police men, ni ansou me I wia Pishop en ahi wardo, E indahng ie me ohl sakau men loisang banko. Oh ni ansou me ohl sakau menet kilahngada soun silasil pahn kasikier ah e inda “kede kesik! Ngehi Mormon men!”

Ohl sakauo ahpw kedierekda me wia emen tohn ahi wardo, oh ahpwtehn pepdaisla. Ni ansou me I wia awiawi pwe ien koasoaieng nan ahi ohpiso, I koasoanehdi me I pahn indahng mehkot kei me pahn karehda ah insensuwekihla pwe ah kawehla ah inou oh eden mwomwohdiso. Ahpw ni ansou me I mwomwohd kilkileng lahng, I rongada ngihl ehu me likamwete arams men me pil loklokiadado inda “I pahn mweidohng uhk kehn kilahng ih duwete ahi kin kilahng ih.” Oh eri, ni ansou kis, mwomwe ahpw wekila reh. I sohla kilahng pwutak sakanakan ahpw pwutak mwakelekel, marain oh seri pilipilda men sang rehn Koht. I mwadangete kehnda sapwelimen Koht limpoak ong ih. Oh ngihl wet wekidala aht koasoakoasoai pene. E pl wekid iehla.

I kohledi mehkot kesemwpwal kei sang ni soahng pwukat koaros ni ahi kin ieiang wia sapwelimen Koht doadoahng kan. I men ehukiheng kumwial soahng siluh. Keieu iei me Koht kin alehda oh kin sewese itarete ma ke wia dihken kapw. Ke anahne en wewehki me sohte pak ehu me E kin medwe me ke nohn tikitik de sohte itar pwe En tehk uhk oh doaodahk kan me ke wia ni mware.

Keriau en me I koledi iei sapwelimen Koht doadoahk kaidehn ohngete kamwahulahn kapwal kan, Iei ih mehn kaiahnehda aramas. Eri ansou me ke kin wiewia sapwelime doadoak en prisduhd, ekei pak ke kak diarada me wiepe me kin mwomwen mwahu kan koht sohte kin kupwurki, pwehki e sohte kin kak kakairada aramas. Ma ke pahn rong, E pahn padahkiheng uhk ahlo. Tamataman me sapwelimen Koht doadoahk oh marian kaidehn ohngete mehkot mwahute; Ahpw en “wahdo mour paotoapoat oh mour soutik ohng kitail” (Moses 1:39). Met iei, kahrepen Ah ketkiheng kitail mweimwei en prisduhd pwehn kak powehdi aramas me duwete komwi oh ngehi oh lukehieng kitail en iang wia sapwelime is doadoahk. Atail pweida kan iei sapwelime doadoahk!

Kesiluh me I koledi: Ideidahwehn Soukomouro nan atail pwukoahn prisduhd kan pahn wekidala mwomwen atail kin kasawih metei kan. E pahn padahkiheng kitail en kin kasawih irail ni mwomwen ah kin wia, me wewehki sohte kilahng mas liki ahpw kilahng dahme mihmi nan mongiongi rail kan. (kilahng1 Samuel 16:7). Met duwete Sises ah kasawiada Simon e sohte kasawih me Ih soun laid men ahpw e wia Peter, me pahn wiala koun kehlail men en mwomwodiso (kilahngLuke 5:1–11). Ih pil mwomwen ah kasawih Zacchaeus kaiden e wia soun kol tax sakanakan men me metei kan kin inda ahpw e kasawih nin duwehn ohl mehlel,pwuhng en Abraham(kilahngLuke 19:1–9). Ma ke pahn patpatheng soukomoro werei , ke pahn ese kasawiada me koaros wia sapwelimen Koht seri, sohte lipilip dahme re wiahier. Oh ma ke pahn wenlahte nan ahmw idedahwehn sounkomouro, Ke pahn pil aledi ehu kisakisme e sapwelimaniki—ie kisakis en kak kilahng aramas en koluhla.

Riei ohl me kolokol Prisduhd ko, pak tohto, kitail kin duwete wanparon riemen me alialu kohla nan ahl en Emmaus tepin rahn sarawien istero. Me wia menseng en iasadahu, ahpw ira sohte nohn kamehele me mi iasada de ia wewehn iasada. Ira “kamehlel me Sihses mehn Nazareth pahn kamourala Isreal,” ahpw ira “sohte kamehlel” dahme pwuhk sarawi kan kosoia me pid iasadahu. “Sises pein keieng mpara, oh iang irada. Ahpw mesera kan me rotortot oh ira sohte kak ese ihs Ih” .” (kilahng Luke 24:13–32.)

I kadehdehki me ma kitail pahn kin wiewia atail pwukoahn prisduhd kan, Sises Krais pahn ketin ieiang kitail,pwehki met wia sapwelime ahl. Sapwelime marain kin tieng mwohtail, oh sapwelime tohnleng kan kin kapikapel kitail. Mwein kitail kin anahne ese ia udahn wehwehn prisduhd de ia mwomwen atail pahn doadoahngki duwete ih. Ahpw ma kitail pahn kin tamanda ansou kan me kitail kin kehn nan atail mohniong kan “mwekmwekid” (Luke 24:32), kitail pahn kakala kilangada mwahu, oh kital pahn kak kilang spawelime sawas kan nan atail mour oh ni ansou me kitail kin sawas. I men kadehdeki me ihte me kitail pahn esehkihla ma kitail pahn doadoahk ong Ih oh sewese nan sapwelime doadoahk en komour ong sapwelime seri kan. “Pwe iaduwen en aramas emen eh pahn ese soumas emen me e sohte kin papah, oh me e kin wia aramas kapw men ohng ih, oh me kin dohsang ih nan madmadau oh ineng nan eh mohngiong?” (Mosiah 5:13). Sises Krais me wia atail koun. Sapwelime mwomwodiso met. Sapwelime Prisduhd me kitail kolokol. I men kitail en kak pilada idawehn Ih oh medewe mwomwen ah kin taman ieiahng kitail.

I kiheng kumwial ahi kadehdeh me I ese me Sises iei Krais, atail koun iasadahu. I kadedehki me prisduhd me e likiehng kitail en kolokol wia mwemwei en kalohk ki oh wia mwekid sarawi kan ni mware. Kitail wia sapwelimen Koht limpoak seri, me kin sapeng atail kapakap kan oh kadaredo Ngehn Sarawi pwe en kakehlaih kitail nan atail pwukoahn prisduhd kan. Joseph Smith kilangada Koht oh sapwelime Iehroso. E alehda kih kan en prisduhd me kodohr oh lel Presedent Thomas S. Monson, Me kin doadoahngki rahn pwukat. Ni mwaren Sises Krais, amen.