Kaunopada Ahlo

Ni ahi sounpar [silihsek] 30, I tepda wie doadoahk ong wasahn netkihla kepwe iou nan France. Ehu rahno presiden en kompani o, ohl mwahu men me iang ehu pelien lamalam, eker ie lahng nan ah oapiso. Ah peidek-o kapwuriamweiehda: “I rong me ke wia prihs men nan amw mwomwohdisohu. Mehlel iou mwo?”

I sapeng, “Ei, e pwung. I kolokol prihstud.”

E mwomwen pwuriamwei ki ahi pasapeng o, Ih idek, “Ah ke iang kasukuhlki duwen mour en Koht?”

“Ei,” I sapengki, ni ahi sounpar [eisek pahiou] 14 lel [eisek waluh]18, I kin onop iang seminary kerenieng rahn koaros! E kereniong pwopwsang nan ah sehro.

Dahme koapwuriamwei, mwurin wihk kei e pilehu eker ie lahng nan ah ohpis o pwe e men kieng Ie en kaun la oh apwalih ehu pali nan kompani o. I lusikihda oh ngehi eri kasalehioang ahi pepehm, me I nohk pwulepwul oh sohte ahi koaiok en apwalih songen doadaohk kesemwpwal-o. Ahpw e sirei te, oh nda, “Men mwein mehlel, ahpw sohte katepe. I ese mehlel me ke ahneki, oh I ese dahme ke koledihsangehr nan ahmw mwomwohdisohn. I anahne iuk.”

Pwung dahme E ndahki me I koledihsangehr nan Mwomwohdisohu. Pahr kei mwuri udahn me apwal oh I sehse ma I kin kak pweikihda ma I sohte kin iang wie sasawas seli nan mwomwohdisohu sangete ni ahi wia mwahnakapw pwulepwul men.

I ale kapai sang ni ahi kekeirda nan kisin prans tikitik iou. Pwehki se malaulau, pwihn pwulepwul kan kin iang lukuwerdahn iang apwalih seli kemwekid kan nan pranso o. I kin kediropw oh kin perenki ah kin mie anahnepei-o. Rahn sarawih kan, I kin pwukoaki tehpel en kamadipw sarawio, iang apwalih prihstuhd kan, oh songen pali en pwukoa teikan. Ekei pak nan wihko I kin iang ahi pahpa de irail me laud oh kolokol prihstud kan ni aht kin pwarek seli ihmw kan oh padahk ong ihr tohn mwomwohdisoht, sewese me soumwahu oh anahne sawas kan, mehkoaros mwomwen soanamwahu.

Sawas me I kin wia seli nan dih en pahr me I pwulepwulko, sewese ie kalaudehla ahi kadehde oh katengehdiong ahi mour nan rongamwahuo. I kin ieiang aramas mwahu oh me ahneki limpoak ni arail kin nantieng doadoahngki prihstud me mih rehrail ko oh kapaiada mour en mehteikan. I kin men duwehla irail. Ni ahi kin ieiang irail pali laud en ansou ni ahi sohte kin kasawihda, me I kaskasukuhlki ien wiahla kaun emen nan Mwomwohdiso oh pil nan sampah.

Diren neitail mwahnakapw pwulepwul ieiang towe de wie rongorong kaudek en pwohnget me kolokol prihstud en Aron. Ni ahi kileng dihwei nan pokon wet, I kilang tohto kumwail mwomwohd limwahn ohl mah kan, mwein amwail pahpa, de pahpa kahlap, riomwail pwutak laud, irail kaun en prihstud kan—koaros me kolokol priesthood en melkisedek. Irail poakpoke kumwail, oh ni mehlelo, irail kohdo wasah pwohnget pwe irail men patehng kumwai.

Pokon lap wet kapwarehda rehtail madamadau kaselel en uhtuht pene oh ehupene en perien ehu me kin wiawi nan pwungen prihstud en Kauno. Mendahte ara pwukoa de manaman kei me wekpeseng, priesthood en Aron oh priesthood en melkisedik wia kapar iou nan doadoahk en komour wet, me sohte kak tohrohr peseng. Ira kin kohkohwei ni ara wia ehu oh anahn pen ehu ong emen inenen laud.

Karasaras mwahu en doadoahk pene kesempwal me mie nan pwungen prihstud riau wet, diereksang ni songen mwohmw me Sises oh Sohn Sounpepdais sapwellimaneki. Na song medewe ia pahn mwomwen Sohn Sounpepdais ma sohte Sises? E pahn ia mwomwen Sapwelime Sounkomouro pwukoa kesemwpwal o eh pahn pweida, ma sohte kaunopdahn doadoahk me Sohn wiahier o?

Sohn Sounpedais ale pwukoa me iang keiou kesemwpwal nan mour wet: “en kaunopada ahl en Kauno,”¹en pepdaisih Ih ki pihl, oh kaunopada mwahu pwe aramas en kak alehda “Ih. Ohl sarawi men,” ],”² Ihme kasarawihlahr ale manaman en prihstud tiktik, me ese mwahu uwen kesemwpwal oh uwen laud en ah pwukoa oh manaman.

Aramas kin pokpokon ki irail en rong oh iang pepdaisla rehn Sohn. E wia aramas waun oh kesemwpwal en Koht. Ahpw ni ansou me Sises ketla, Sohn karakarahkla oh kosoia me E lapalapasang Ih, “Ngehi I kin pepdais ki pihl: a mie emen me ketiket nanpwungamwail...iei Ih me pahn ketdo mwuri me lapalap sang ie, oh I sohte warohng I en lapwahda selin sapwellme suht.”³

Ong ni Sapwellime pwukoa, Sises Krais, Sapwelimen Kauno Iehros, me kolokol prihsduhd laudo, ni karakarahk pohnese dahr manaman me Sohn pwukoaki-o. Ong ih, Sounkomouro masanih, “pwe sohte aramas emen nin sampah mie me lapalapasang SohnSounpepdais.”⁴

Medewe dahme pahn kakete wiawi ma neitail prihstud kan ni arail pahn doadoahngki manaman en prihstud me re kolokol kan pahn kamwakid ni duwen soang me pweidahr oh wiawier rehn Krais oh Sohn Sounpepdais. Riei me pwulepwul me kolokol prihstud en Aron kan, duwehte Sohn, amwail pwukoa iei kumwail en “kaunopada ahlo”⁵ong doadoahk kesempwal en Melkesidek Prihstud. Kumwail wia met ni soang tohto kei. Kumwail pwukoaki apwalih tiahk sarawi en pepdais oh kamadipw sarawi. Kumwail iang sawas kaunop aramas kan sang ni amwail padahkiong irail duwen rongamwahuo, ni “amwail pwarek an tohn mwomwohdiso wasahn kousoan kan,”⁶ ni amwail kin “apwahpwalih wasahn kaudek kan.”⁷ Kumwail sewese me paisuwed akan oh me anahne sawas akan sang ni amwail kin kihpene meirong en kaisihsol kan, oh iang apwalih imwen kaudek kan oh ahn mwomwohdiso kepwe kan koaros. Anahnepen amwail pwukoa, me inenen laud, oh sarawi.

Riei me kahlap akan, ma kumwail wia pahpa kei, pisop kei, soun kaweid Pwutak Pwulepwul kei, de me kolokol te Priesthood en Melkesidek kei, kumwail kak idawehnla an Sounkomouro karasaras ni amwail pahn sohpeieng riomwail me kolokol prihstud tikitik kan oh lukei irail en iang kumwail doadoahk. Ni mehlel, luhk wet kohsang rehn Pein Kauno. E masahni, “….Eri, kumwail ale irail me kasarawihlahr oh kolokol prihstud tikitik kan, kadar irail la irail en tihieng wei mwomwail oh kaunopada ihs me kumwail pahn tuhwong kan, oh kaunopada ahlo, oh welian kumwail wiada songen pwukoa kan me kumwail solahr pahn kak wia.”⁸

Ni amwail pahn luke riomwail pwutak pwulopwul kan en “kaunopada ahlo,”  kumwail sewese irail en kak kilangada oh kesemwpwaliki manaman me re kolokol kan. Ni amwail pahn wia met, kumwail sewese kaunopada ahlo ong pein irail ni arail kaunop ong rahn me irail pahn ale oh doadaohngki prihstud laudo.

Mweidong ie ien ehukiong kumwail soai pen Alex, kisin prihs pwulepwul men me kin nennen, kadek lamalam, oh marain. Ehu rahnsarawio pisop diarada Alex ah kelekelehpw nan ehu perehko oh mih nan ah pahtou. Mwahnakapw o apw padahkiong uwen insensuwed laud me e ahneki pwehki ah pahpahu ah sohte kin iangih kohdo sarawi, pwehki ah sohte iang wia tohn mwomwohdisohu. Pilen mesekeredi oh e nda, me mwein e pahn mwahu ma esolah pwuredo sarawi.

Ni ah kesemwpwlakihdahr mwahnakapwo, pisopo mwadangete kihpene ward council ko pwe irail en sewesehda Alex. Ah koasondi me mengei: en kolokolete Alex pwe en kin kokohdoh te oh sewese kaiahn kihda kadehde loal en rongamwaho, irail anahne “kapelpene Alex ki aramas mwahu me pahn kin kihong en pwukoaki mehkot.”

Prihstud ko oh tohn mwomwohdisohu mwadangete ehuong Alex oh kasalehiong arail limpoak oh utuht. Kaun en pwihnen high prihs ko, ohl emen me inenen ahneki pwoson oh limpoak, pilipildahr en wia ienge me pahn kin iangih seli pwarek aramas oh padahk ong irail. Pisopo oh nah sounsawas riemeno kihdo rehrail oh karanihla oh wiakihla ih emen iengerail.

Pisopo ahpw koasoia: “Kitail koledier Alex oh kiong ah kediropw. E iang ehr wia soun kapar ni kopwopwoud kan, soun pakahr nimehla, iang ie kasarawih mehla, pepdaisihla ekei tohn mwomwohdiso me kapwedo kan, kasarawiala pwutak pwulepwul kan ong priesthood en Aron, kaskuhlih pwihn pwulepwul kan, iang misineri kan padahk seli, ritingada ihmw sarawie ong kapokon kan, katengehdi ihmwo nan likopon pwong mwurin kapokon kan. Iang sawas nan doadoahk en project. Iang ie pwarek me kahlap akan nan imwenwini, iang kihda kaweid nan ansoun sarawien kamadipwsarawi kan.Wahla kamadipw sarawi rehn me soumwahu kan nan imwenwini de imwerailakan, oh wia lahr emen nan pwungen me malaulaukei me ngei, pisop men inenen koapwoaropwoarki.”

Ekis ekis, Alex wekilahr. Ah pwoson Kauno keirdahr. E ahnekila eimah oh koapwoaroapwor nan manaman en prihstud me e kolokol e. Pisop o eri kamehlelehier me: “Alex wiaier oh udahn ansou koaros pahn wia ehu kapai ong ie ni ahi wia pisop men. Ehu kalahngan me I ahneki ni ahi patehng ih. I kamehlele laud me sohte emen mwahnakapw me pahn kohla wia ah misin me inenen kaunop sang sawas en prihstud me e ahnekier.”⁹

Riei Pisop ko, kumwail kamanamanlahr oh kasarawihlahr en wia pisop en amwail ward kan, kumwail ahneki pwukoa kesemwpwal en papah oh wia presiden en Priesthood en Aron oh prihs kan. I wehwehki toutou me kumwail wouwa kan, ahpw kumwail anahne wiada amwail pwukoa kan ong pwutak pwulepwul kan ni ah wia ehu pwukoa keieou kesemwpwal. Kumwail sohte kak kesehla de kapwukoaki emen tohrohr en wia doadoahk wet.

I luke kumwail en kilang emen irail pwutak pwulepwul me kolokol priesthood en Aron kan nan amwail ward kan. Sohte emen rehrail pahn katohrohrla de me sohte katepe. Mie emen pwutak pwulepwul me kumwail oh ekei prihstud kan anahne sewese? Luke oh kaiedo limwahmwail en iang papah, Pak tohto kitail kin men kaperenihda neitail pwutak pwulepwul kan oh kiong irail en wia te soun poudial ni arail pwoson oh kesemwpaliki rongamwahu wet ah pahn keiou mwaula ni arail pahn kalaudehla prihstud me irail ahneki kan. Ni arail pahn kin iang ansou koaros sewese doadaohk en Kauno, irail pahn karanihla nanleng oh irail pahn kehnda kesemwpal me mih rehrail kan.

Prihstud en Aron kaidehn te pwehki sounpar me wihwia, padahk te de kemwekid kan, de pil irair en ansou en pwukoa ong pwutak pwulepwul nan mwomwohdiso. E wia kalahngan oh manaman en iang towe doadoahk en komourla souleng —pwutak pwulepwul ka koaros, me kolokol kan oh irail me re kin papah kan. Kitail pwilkihdi Prihstud en Aron kan nan udahn dowerail kan, wasa kesempwal ehu, wasahn papah, kaunopada, oh kapwaiada ong pwutak pwulepwul koaros nan mwomwohdiso.

Riei ohloko, me wie kolokol Prihstud en Melkesidek kan, I luke kumwail en kakehlaka utuht en prihstud en Kauno riau wet. Kalaudehla pwukoahn Prihstud en Aron kan pwe ren kak kaunopada ahlakan mwohmwail. Padahkiong irail ni koapworopwoar, I anahne kumwail. Ong kumwail me pwulepwul kolokol Prihstud en Aron kan. I kapakap ki ni amwail pahn sewese riomwail ohl me mahsang kumwail kan, kumwail pahn rongada ngilen Kauno, mahmahsaniong kumwail: “Kumwail kapaiadahr, kumwail pahn wia soang kei me koapwuriamwei. Kilang kumwail kohdo duwehte Sohn, en kaunopada ahlo mwohi.”¹⁰ Ni mwaren Sises Krais, amen.