Liki Kauno oh Dehr Pengila
Kitail kak kainene atail mour kan ong Sounkomouro ni atail esehla Ih, oh E pahn ketin kahluwai kitail.
Ni ei wie seiseilok nan Eisia, kempoakepei lih emen ahpw kohdo rehi. Liho pwoleiehdi oh peidek rehi, “Ke inenen kamehlele me rongamwahu wet mehlel? Kempoakepei, I ese me e mehlel. I liki Kauno.
Nan Lepin Padahk Audapan kan 3:5–6, kitail kin wadek kaweid wet:
“Liki Kauno ni mohngiongomw unsek. Dehr koapworopworiki mehkan me ke pein lemeleme me ke ese.
“Tamanda Kauno ni omw wiewia kan koaros, oh E pahn ketin kasalehiong uhk ahl me pwung.”
Pwuhk Sarawi ketikihda iren peneu riau, iren kapar ehu, oh inou kaperen ehu. Peneu riauo iei: “Liki Kauno ni mohngiongomw unsek” oh “tamanda Kauno ni omw wiewia kan koaros.” Iren kapar o iei: “Dehr koapworopworiki mehkan me ke pein lemeleme me ke ese.” Oh inou kaperen o iei: “E pahn ketin kasalehiong uhk ahl me pwung.”
Kitail pahn koasoaia mahs iren kapar o. Kitail anahne medewe mwoamwen kapar wet. Kapar wet wiawi nan lepin lokaia pwukat “lean not”—“dehr koapworopworiki mehkan me ke pein lemeleme me ke ese.” Lepin lokaialeannan lokaiahn Wai wehwehki idengek. Ni atail kin idengekla ni mehkoat kitail kin pengila palio de paliet, kitail solahr inenda, kitail pireklahr, oh kitail kak pwupwidi. Ni en palingenatail kin idengekla de pengila pohn dahme kitail pein ese, kitail kin pengila sang Sounkomouro. Ma kitail pengila, kitail solahr inenda; kitail pireklahr; kitail solahr ehuieng Krais.
Riei lihoko, kumwail tamataman, nan mour mwohn mourwet kitail kin sewese Sounkomouro. Kitail kin liki Ih. Kitail kin kasalehiong atail utung, pwungki oh pereniki pilahn en popohl me Samatail Nanleng ketin kapikadahr. Kitail sohte kin pengila. Kitail kin akedeiki atail kadehde kan oh “patehng sounpei kan en Koht oh sounpei kan kin kana.”1 Mahwin wet nan pwungen mwahu oh suwed keseudohngehr pohn sampa. Pwehn kapwurehieng, iei atail pwukoa sarawi kitail en wia soun kadehde oh liki Kauno.
Emen emen kitail anahne peidek: Ia mwoamwen ei pahn inihnen oh sohte pengila ong dahme I pein ese? Ia mwoamwen ei pahn kasawiada oh idawehn kepitien Sounkomouro ni ngilen sampa kan eh nohn kehlail? Ia mwoamwen ei pahn kakairada ahi liki Sounkomouro?
I men patohwenda ire silu me pahn kalaudehla atail ese oh liki Sounkomouro. Kumwail pahn diar me ire pwukat sohte kapw, ahpw ahneki pahson kehlail. Ire pwukat kin pato nan koul en Praimeri, pil pato nan iren kasukuhl kan en Peinakapw kan, oh wia pasapeng pen peidek tohto nan Pwihn en Sawas en Lih. Ire pwukat wia irehn kakainene—kaidehn pengila.
Keieu, kitail kak esehla Kauno oh likiala Ih ni atail kin “perenki sapwellimen Krais mahsen kan; pwe kilang sapwellimen Krais mahsen akan pahn kasalehda mehkoaros me kumwail en kin wia.”2
Sounpwong kei samwalahr, se wie onohnopki pwuhk sarawi. Nein nei pwutak nah kisin pwutak wie mwomwohd pohn kepehi kat ni aht wie wadawad. I wia nohno kahlap men me perepereniki en nei pwutako oh ah peneinei arail mwemweitdo.
Ni eh nek aht onopo, I wilikpene nei pwuhko. Nein nei kisin pwutako ese me ansoun meir keredndohr . Ih eri kilengdado rehi nan mese mas poh mei kehmpoake oh nda: “Pil ekei pwuhk sarawi, Nana.”
Nei pwutako, me wia pahpa mwahu men, kapar kin ie, “Ino, kede dukiong. E wie songosong en dehr mwadang kohla meir.”
Ahpw, ni en nei kisin pwutako peki pil eki iren pwuhk sarawi , se wadek pil ekei! Iren pwuhk sarawi ko pil kamarain kitda, kakehlaili pali ngenit kan, sapengala aht peidek kan, kalaudehla aht liki Kauno oh sewese kainene aht mour kan ong Ih. “Tamataman pwe kumwail en pwerisek rapahki , pwe kumwail en nsenamwahula.”3
Keriau, kitail kak esehla Kauno oh likiala Ih sang ni kapakap. Ia uwen kapai ni atail kin kak kapakap ong atail Koht! “Kapakap ong Sahmo sang ni kehl en amwail mohngiong kan koaros.”4
Mie ahi mehn ketemen en kapakap kaselel ehu me I kesempwaliki. Ni ehu ahi ansoun kommol en sukuhl sang college, I alehda doadoahk ehu nan Texas. I anahne diraipki mwail epwiki kei sang Utah lel Texas nan werei sidohsa mering me I kahdaneki Vern. I audehkihla Vern ahi dipwisou tohto oh I onopadahngehr seiloak kapwo nan ahi mour.
Ni ei pahn mweselo, I pwoalehdi ahi nohnou oh liho nda, “Kita kapakap mwohn ahmw mwesel.”
Se kelepwikdi oh ahi nohnou tepda kapakap. Liho peki Sahm Nanleng en sinsile ie. Liho kapakapki werei sidohsau me sohte mehn kalemwur loale, oh peki sidohsau en kak kapwaiahda ahi anahnko. Liho peki tonleng kan en ieiangie nan erein ansoun kommol o. Liho wie kapakap, kapakap oh kapakap.
Meleilei me I alehdi sang ni kapakapo kiheng ie eima en liki Kauno oh sohte pengila pohn dahme I pein ese. Kauno ketin kahluwai ie nan elei oh nan koasoandi tohto me I wiahda nan ansoun kommol o.
Ni atail wiahkihla ahnepatail sekere Sahm Nanleng nan kapakap, kitail pahn wehwehkihla Sounkomouro. Kitail pahn likiala Ih. Atail anahn kan pahn duwehla Sapwellime. Kitail pahn kak alehieng kitail oh mehteikan kapai kan me Sahm Nanleng kin kak kektikihda ma kitail kin peki ni pwoson.5
Kesiluh, kitail kak esehla Kauno oh likiala Ih ni atail kin papah mehtei kan. I ehukihda soai pwoatet ni ahi alehier mweimwei sang Amy Wright, me wehwehkihla kesempwal en papah ni ansou me e ahneki soumwahu keper oh kamasepwehk ehu. Amy ntingi me:
“Ni Oaktohpe 29, 2015, I diarada me I ahneki soumwahu kanser. Pwehki ahi soumwahu en kansero, ahi mour pahn inenin mwoatomwoat. I ese me I pahn anahne onopada pwe ien peieng soumwahu wet ki ahi mour unsek. I koasoanehdi me I pahn wia uwen ahi kak koaros kaidehn pwehki ngehi ahpw pwehki ahi peneinei. Nan Tihsempe, I tepda ale chemo. I wehwehki me mie kasuwed pen wini kan me kin kak kamwaula kanser, ahpw I sehse me aramas emen kin kak momourte detehn ah soumwahuo inenin doar mehlel.
“Ehu pako, I kalohkihda me chemotherapy kin kasohwe pwung en aramas.I ndahieng ahi pwoudo me eriher. I solahr pahn pwurala ni imwen wini. Pwehki ih ohl marain men, kempoakepei o kanengamahla rong oh ahpw nda.‘Eri kita anahne rapahkihda emen aramas me kita kak sewese.’”
Dah? Ohlo sohte ese me ah pwoudo ahneki kanser oh solahr kak pwurehng ale ehu irair me kamwahliel de pil ehu ansou en medek kaweikek?
Amy doula oh kawehwe me: “Uwen en ahi soumwahuo eh ukuhkla e lel ansou ehu me I ahneki rahnte ehu de riau nan ehu sounpwong me I kin kak wia dahme aramas momour kin wia; esingek. Ih nan soangen rahn pwuko me aht peneinei kin rapahkihda aramas me se kak sewese.”
Ni ehu rahn ko me en Amy peneineio kihseli koruk en chemo kei me audaudkihda soahngkei me kin kansenamwahui, kapereni oh sewese aramas me ahneki soumwahu en kanser. Ni en Amy sohte kin kak meir e kin medewehda soahng kei me kak kaperenda aramas. Ekei soahng pwukat me laud a me tohto me tikitik rasehng kisin doropwehn rahnmwahu oh koasoai me kin kaperenda aramas. Nihpwong kan me ah weireko kin ukila kahrehda e sohte kak meir, liho kin rapahki nan kampiuder soangen tiahk sarawi dahnge kan me saikinte wiawihong ah peneinei me melahr kan. Mehd kapwuriamwei, pwe ah weirek oh medek kin tikitikla oh e kin kak powehdi.
“Papah,” Amy kadehde me “Papah komouriehla. Iei wasa me I diar ahi kehl en mwekmwekid seli oh popohl me I diar sang ni ei soangosoang en katikala en men mpei kan arail lokolok. I kin onohnopehng oh ahneki peren ni ahi kin kasik aht doadoahk en papah kan. Lel rahn wet e wia mehkoat kasapwurupwur ehu. Pwe kumwail pahn medewe me aramas emen me mwerasangehr piten moange, oh pepeiki ah mour konehngete en medemedewehte pein ih. Ahpw ni ei kin medewe ie, dahme I mihmi loale, ahi lokolok oh weirek, sampa wet wiahla wasa rotorot oh kamwaros ehu. Ni ei kin uhd medewe mehteikan, e kin miehda marain, koapworopwor, roson, eima oh popohl. I ese me mwekid wet kak wiawi pwehki sang ni utuht, kakehlail oh manaman en Tomw en Sises Krais.”
Amy likiala Kauno ni eh wehwehkihla Ih. Ma liho mwur ekis pengila pohn dahme e pein wehwehki, e pahn kak sapwungki madamadau me dene e pahn papah. Papah kahrehda e kak powehdi ah weirek oh kahpwal kan oh kin momourki iren pwuhk sarawi wet. “Ni ansou me kumwail kin wie papah kempoakpamwail akan, kumwail kin wie papahte Koht.”6
Sises Krais ketin powehdier sampa. Oh pwehki Ih, pwehki Sapwellime Tomw poatopoato kitail koaros ahneki kahrepen atial pahn liki, ni atail wehwehki me mehkoaros pahn mwahula.
Riei lihoko, emen emen kitail kak liki Kauno ohsohte. pengila. Kitail kak kainene atail mour ong Sounkomouro ni atail pahn esehla Ih, oh E pahn kainene atail ahl akan.
Kitail mihmi pohn sampa pwe kitail en kasalehda soangen likilik ohte Reh me mweidehng kitail en utungada Sises Krais ni E mahsani, “Iet ngehi, Maing, komw ketin poaroneiehla.”7
Riei lihoko, Presiden Thomas S. Monson kadehde me “kitail sohte kak wadek uwen tohtohn atail kapai kan me miehier inoupe. Menda ma depwek kan toaledi, oh atail kahpwal kan kipeikitaildi, atail wehwehki rongamwahuo oh atail limpoakong Samatail Nanleng oh atail Sounkomouro pahn kamwait oh utung kitail … ni atail momourki mour pwung … Sohte mehkoat nan sampa kak kaleweikitaildi.”8
I kapatehiong ahn soukohpo ahi kadehde me. Ma kitail liki Samatail Nanleng oh atail Sounkomouro oh sohte pengila pohn dahme kitail pein ese. Ira pahn ketin kainene atail ahl akan oh kapahdo limen komour ong kitail. Ni mwaren Sises Krais, amen.
Tehk pwe ni Epreil 1, 2017, Sister Cordon kesepwildihsang Sounsawas Kerieu nan Presidensi Lap en Praimeri oh kesepwilda en wiahla Sounsawas Keieu.