Powehdi Sampah
Kaidehn kitail pahn powehdi sampah mwurin kisin ahnsou kis nan mouratail, ahpw sang ni atail wiewia kan erein atail mour me pahn karehiong mour soutuk.
Pahr tohto samwalahro, Preseden David O. McKay koasoia duwen irair ehu me wiawihong ih ni ahnsou me iang dake pwoat kohkohlahng Samoa. Mwurin eh meirla, e “kilangada kasansal kaselel ehu. E nda, “I kilangada kanihmw lingan pwetepwet ehu dohsang ie. … mie tuhke kan me wah iou … oh rohs kan masmasal wasa koaros… mie pokon kalaimwon ehu kohkohdo ni kanihmwo. Emen emen likou pwetepwet reirei… I mwadangete kilang mwahu … , arail kaun, oh I kak kilangete ni keilen mese… I ahpw kasawiada me ih ahi Sounkomour! Pohn silangi lingaling... oh sapwellime popohl … me sarawi!”
Preseden McKay usehla, “Kanihmwo …me sapwellime… Kanihmw Poatopoat; oh aramas ko me idihdawehn ih kin momourki popohl oh peren poatopoat.”
Preseden McKay mengimengloalki, “[Ihs irail? Ihs aramas pwukat?]”
E ahpw kawehwe dahme wiawi mwuhr:
“E duwehte Sounkomouro karonge audepen ai madamadau, e sapeng ie ni e idihong lepin mahsen kei me pwarada pohnangin aramas ko, ni temwen wenihmw… me mesen nting ko kohl … :
“‘Iei irail me Powehdi Sampah—
“Me mehlel en Ipwsapahl!’”1
Erein sounpahr tohto, I tamataman te lepin mahsen pwukat: “Iei irail me powehdi sampah.”
Kapahi kan me Kauno ketin inoukihong irail akan me powehdi sampah me kapwuriamwei mehlel. Irail me pahn “likou pwetepwet… oh mwararail kan pahn ntingdi nan pwuhken me momour kan.” Kauno “pahn kadehdehda ni pokon sansal mwohn silangin Seme oh sapwellime tohnleng kan.”2 Emen emen pahn “iang tepin iasadao,”3 alehdi mour soutuk, ,4 oh “sohte pahn pedoisang”5 sang mwohn silangin Koht kohkohlahte.
Aramas kak powehdi sampah oh alehdi kapahi pwukat? Ehi, e kak wiawi.
Limpoak ong Sounkomouro
Irail pwuko me pahn powehdi sampah pahn ahniki limpoak unsek ong Kauno atail Sounkomouro, Sises Krais.
Sapwellime ipwidio, eh mour unseko, Sapwellime Tohmwo nan Kedsemeni oh Kolkada, kahrehda kitail koaros pahn Iasada. Oh ni ahnsou me kitail pahn koluhla mehlel, Ih kelepw me kak kamwakele kitail sang dipatail, oh en kin kahrehiong atail kak pwurala mwohn silangin Koht. “Kitail kin ahneki limpoak pwehki Koht eh tepin limpoak ong kitail.”6
Sises mahsanih, “Kumwail koapworopwor, pwehki I kalowehdier sampah.”7
Mwuhr e pil mahsanih, “I kupwurki me kumwail pahn powehdi sampah.” 8
Kaidehn kitail pahn powehdi sampah mwurin kisin ahnsou kis nan mouratail, ahpw sang ni atail wiewia kan erein atail mour me pahn karehiong mour soutuk.
E kak tepda ni ahnsou me emen seri esehla kapakap oh koulki, “I nannantiheng en duwehla Sises.”9 E kin uselahte ni ahnsou me aramas kin onopiki mour en atail Sounkomouro nan Kadehde Kapw oh e kin mengimengloalki manaman en Sapwellime Tohmwo nan Pwuhk en Mormon.
Kapakap, koluhla, idawehn Sounkomouro, oh alehda Sapwellime kalahngan pahn kiheng kitail en wewehkihla kahrepen atail kohkihdo sampah oh dahme kitail en wiahla.
Alma kawehwehda nin duwen met: “Nan arail mohngiong kan wiliakapwala mehlel, oh irail karakarahkala oh re likihala Koht ieias mehlel …oh irail kin loalopwoatete lel imwi.” 10
Irail akan me powehdi sampah kin ese me re pahn pakadeikda rehn Samarail me ketiket Nanleng. Wiliakapw mehlel oh koluhkihla dihp kin kahrehiong atail saladekala, duwehte atail “weitahtahkilahr dipatail kan … ahpw kitail pwetepwetala [duwehte] sinoh.”11
Pakadeikda rehn Koht
Aramas en Sampah kin toutouki ar pahn pakadeikda rehn Koht—duwehte seri me kin wie party rehn kempoakepah kan nan ihmwe ni ahnsou me eh nohno pahpa sohte mie, pereperen, oh sohte medemedewe dahme pahn wiawi ni ahnsou me ah nohno pahpa pahn pwur.
Sampah wet kin mwahuki kitail en lohdi pahn ahnepen aramas kaidehn kalowehdi ahnepen aramas.
Kalowehdi Sampah sohte wewehki mahwen en Sampah ahpw pein ahmw luwet akan me ke pepeieng, oh songosong kan me ke apwaliki.
Powehdi sampah wehwehki kesempwaliki kosonned me keieu lapalap: “ke uhdahn pahn poakohng Kaun-o, amwail Koht, nan kapehdomw unsek, ngenomw unsek, omw lamalam koaros unsek, oh omw kehl unsek.” 12
Soun nting wadawad men C. S. Lewis kawehwehda: “Krais mahsanih ‘Kihdo Mehkoaros. I sohte nohn kupwurki amwail ahnsou oh sohte nohn kupwurki noumwail sent oh amwail doadoahk: Pwe kumwail me I kupwurki.’” 13
Kitail kin powehdi sampah sang ni atail kin kolokol atail inou kan rehn Koht—atail inou sarawi kan en papidais oh nan tehnpas sarawi oh atail inou en mehleliong atail werek poatopoat kan. Atail powehdi sampah kin kahluweikitail ni karakarahk ong ni tehpel en kamadihpw sarawi wihk koaros, pekpek mahngki dipatail kan oh poadidi ong “tamataman ih oh kapwaiada sapwellime kosonned kan,” pwe “sapwellime Ngehno en kak ketiket rehtail ahnsou koaros.” 14
Uwen atail kesempwaliki Rahn en Sapad sohte pahn sohrala ni ahnsou me wenihmw en ihmw sarawi kan ritidi mwuratail, ahpw e ritingadahng kitail rahn kaselel en kommoal sang doadoahk en rahn teikan, wie onop, kapakap, oh tehk mwahu peneinei oh meteikan. Kitail en dehr kapingki sarawi nekier oh tenge ni tv mwohn mwadong pahn tep, ahpw kitail en nsenohki atail Sounkomouro oh Sapwellime rahn sarawi.
Sampah wet dirkilahr ngihlen kasongosong. 15
Powehdi Sampah iei likih ngihlohte me kin kapehm, koaloalamwahu, kamarain, oh kahrehiong popohl “kaidehn nin duwen me samapah kin wia.”16
Kadek
Powehdi sampah wehwehki kitail en sohpehiong aramas teikan, ni atail tamataman keriaun kosonned17: “me keieu lapalap rehmwail, ih me pahn wia amwail sounpapah.” 18 Peren en atail werek kan me kesempwal sang pein atail nsenamwahu. Sewesewese neitail serikan en poakohng Koht oh kapwaiada Sapwellime kosonned akan me ehu pwukoa kesempwal. Kitail kin ehukihong aramas atail pai sang ni meirong en eisek kis ehu, meirong teikan, oh kisakise me kin anahn kan. Ni atail kin rapahki oh ale kaweid sang rehn Koht, Kauno kin kahluweikitaillahng irail me kitail kak sewese.
Aramas en sampah kin ahniki lamalam liaktohrohr, suwesuweiki ndnda: “Kilangdo rehi ahi mwahusang mehn mpehi kan! Kilahng ahi dipwisou kan! Tehk uwen ahi kesempwal!”
Sampah wet kin kehlingeringer, sohte insenoh oh apwal, pereniki rong lokaian kaping en Sampah, ahpw ma ke powehdi sampah e kin kahrehiong omw karakarahkala, men sewese meteikan, kanengemah oh limpoak ong aramas me weksang uhk.
Poadoandoar me kohsang Soukohp akan
Powehdi sampah wehwehki uhdahn e pahn mie ekei atail lamalam kan me sampah pahn kepitki. Sounkomouro mahsanih:
“Ma Sampah kin kailongkin kumwail, kumwail en tamtaman me e kailongkinie mwohn ah kailongkin kumwail.
“Ma kumwail kisehn Sampah wet, eri, sampah wet pahn poakohng kumwail.” 19
Ni mensengo Preseden Russell M. Nelson dene, “Tohnpadahk mehlel en Sises Krais kin sansal mwohn aramas, sohte masak lokaia, oh kin weksang aramas en sampah.” 20
Tounpadahk en Krais men sohte kin nsensuwedki ma e kihda mehkot pohn facebook me pid ah pwoson apw sohte me tehk de ekei te me kasalehda me re pwungki.
Ni atail pahn powehdi sampah atail pahn ehupene rehn Koht me kesempwal sang atail pahn ehupene rehn aramas online.
Kauno kin doare kitail ni atail pahn peikiong kaweid sang Sapwellime soukohp oh wahnpoaron ieias kan.
Preseden Thomas S. Monson mahsanih: “Sampah wet kak …apwal… [ni atail kin kohla ni tehnpas sarawi], … kitail pahn kakehng wisik toutou kan oh powehdi kasongosong koaros … kitail pahn kehlailda.” 21
Sampah wet dirkilahr kasongosong, kapwunod, oh likamw, oh e kin songisong en pitihdi me loalopwoat kan en wiahki me soahng koaros me wiawihong irail ni palingen, me likamw tohr oh tiahk en pweipwei.
Nan atail pahn powehdi sampah kitail anahne tamataman ahnsou pwukan me kitail kehn Sapwellimen Sounkouro limpoak oh kamarain, mendahte kitail lamalam tikitiklahr. Elder Neal A. Maxwell kawehwe, dene: “I ese me I meid pai, oh I ese me Koht mwahngih me I meid pai.”22Mendahte ekei pak kitail medemedewe me Koht likidmelieikitailla, ahpw kitail dehr monokehla Koht.
Powehdi sampah sohte wehwehki kitail sohte pahn patehng aramas, rukuruk sang sapahrek oh kahpwal kan en mour wet. Ahpw, e kin kalaudehla atail wehwehn pwoson, kakaranih kitail ong Sounkomouro oh Sapwellime inou kan.
Kitail sohte kak unsekla nan mour wet, ahpw ni atail kin powehdi sampah kitail kin koapworopworki te me ehu rahn kitail “pahn uh mwohn [atail Soundoar]; oh patowahn silangi ni peren,”23 oh rong eh ketin mahsanih: “Kumwail keido oh towehda wehio me onopadahngkumwailehr sang nin tepin kawa.” 24
Karasaras en Elder Bruce D. Porter
Desempe 28 nan pahr nekeiero, kempoakepatailo oh Kaun Lapalap, Elder Bruce D. Porter kapilsalehdalahr. E sounpahr 64.
Ahi tepin tuhwong Bruce ni ahnsou me se skuhlpene BYU. E inenen loaloakong oh marain. Mwurin eh alehdi nah degree ni pelien mwekid en Russia sang Harvard University, Bruce ahpw ndandkihla eh loaloakong oh audepen eh nting kan oh e pahn mengei ong en weid nan ahl sapwung ni palingen, ahpw kaping oh kepwepwe en sampah, sohte karotongehla. 25 E kin mehleliong eh Sounkomouro, Sises Krais, ong eh werek poatopoat, Susan; neira seri kan oh wahn neira seri kan.
Bruce ipwidi soumwahu en mwidihlik. Toahkte kin koadoahke, apw ah mwidihlik ko wie luwluwehtala.
Mwurinte ah malipilipda ong nan Kaun Lapalap nan pahr 1995, se papahpene rehn aht peneinei kan nan wein Sehmen wasa me e pwukoahki Russia oh pali mesen Europe.
Ong Elder Porter, eh mour inenen wekala nan 1997 ni ahnsou me eh soumwahu en mwidihlik doarla. Peneinei en Portero pwurala Kanihmw en Salt Lake.
Erein eh papahki kereniong sounpahr 22 nan Pwihn en Isiakan, pak tohto Bruce kapedelong nan imwin wini, iangahki koadoahk pak 10. Pak riau toahkte kan ndahiong Susan me Bruce sohte pahn koanoahdi nimenseng, ahpw e momour te.
Erein sounpahr 12 samwa nan eh pwukoa en emen Kauno Lapalap e kin iang dialysis pwehn kamwakele ntao. Palilaud en ahnsowo, ni e kin kohla ni imwen wini pwehn kamwakele ntaho e kin kohla pak limau wihk koaros ni soutik mihmiki awa pahieu pwehn e en kak kapwaiada eh pwukoa ni rahn oh towehda confence kan me e pwukoaki Rahn Kaunop oh Rahn Sarawi. Ni ahnsou me e wie luluwehtala mwurin eh alehdier kapai en priesthood kei, Bruce pingkihda, ahpw e eseier ihs me e kin liki. 26
Nan pahr 2010, Bruce alehdi mwidihlik ehu me wiliansang rehn nah pwutak David. Ahnsowo paliwere nsenamwahuki. E kapwuriamwei, e kehlailda, kedekedeo ih oh Susan pwurala Russia nan Area Presedensi.
Desempe 26 en pahr samwalahro, mwurin eh pepeieng paiking nan imwin wini nan kanihmw en Salt Lake, e peki rehn toahkte ko en pedoi sang ah pee. Bruce ndahiong Susan, “me e eseier sang rehn Ngehno me solahr mehkot me toahkte ko kak wia pwehn dehr mehla. E eseier … me e pahn pwurala rehn Koht Sahmo. E audaudkidahr popohl.” 27
Desempe 28, Bruce pwurala nihmweo. Eh peneinei kan kapilpene, oh mwurin awa mwotomwot kei, e ahpw pwurala nan deweo nanleng ni popohl.
Pahr kei samwalahrko, Bruce Porter ntingiada kosoi pwukat ong nah serihko:
“Kadehde me I ahniki duwen mehlel oh limpoak en Sises Krais wia mehn kaweid en ahi mour. …ih me kin kadehde mehlel en Ngehno me e ketin ieias, iei Ih me ahi Soundoar oh Kempoakepahi ahnsou koaros me I anahne.”28
“Me kitail pahn nantihong….en esehla Sounkomouro, oh ahnki pwoson sang Ih en powehdi kahpwal kan oh songosong kan en sampah.”29
“Kitail en kin loalopwoat oh mehlelieng, oh likih Kauno.” 30
Bruce Douglas Porter powehdier sampah.
Kitail en nantihengete atail doadoahk en powehdi sampah, kaidehkin kitail pahn akupwungki atail sapwung laud kan ahpw kitail en kin kanengemahiong kisin sapwung tikitik kan, oh poadidi ong kakeirda palingnen oh sewese meteikan. Ni amwail pahn likiala atail Sounkomouro, I inoukiong kumwail kapahi en popohl nan mour wet oh koapworopwor duwen mour soutuk, ni mwaren Sises Krais, ahmen.