Pahson kan en Pwoson

Met wia ehu kapokon lap kaselel. Kitail alehier kasukuhl mwahu. Ma mie ehu kahrepe kesempwal en kapokon lap, iei en kakairada pwoson rehn Koht Sahm oh atail Sounkomouro, iei Kauno Sises Krais.

Ahi tungoal sakarada pahn doke pahson kan en pwoson.

Pein atail pahson kan, me duwehte doadoahk kesempwal kan, kin kalap kokouda wawai ehu dake, ehu irair, ehu kahpwal, ehu menin kau, oh ehu pweida ni ehu ansou. Ehu irair kaperen en paliwer iei en kisin serihmen ah tepin alu. E wia mehkot kaselel. Mesen seri kesempwalo—direkihla ngoang, peren, pwuriamwei, oh pweida—wia mehkot me inenen kaperen.

Nan aht peneinei, mie ehu kemwekid sansal me duwehte met. Ni en nait pwutak keieu tikitik ah mwein sounpar pahiu e pidelongodo nan ihmwo, mesen peren, oh pakairkihong peneineio me: “I kak wia mehkoaros met. I kak pire I kak dake oh I kak seper.” Se wehwehki me e ndindahiengkiht me e kak pirehdi ah suht ko, e kak dake pwaisikel laudo, oh e kak seperihpene ah sehto. Kiht koaros kouruhr ahpw se tamanda me ong ih mepwukat wia pweida laud kei. E medemedewe me ni mehlel e wialahr aramas laud men.

Keirdahn paliwar, mwahliel oh palingehn koaros ahneki soahng ehute. Keirdahn paliwar me mengei en kilang. Kitail kin tepkihda aluhn kisin seri oh kin keirda ni rahn akan, sounpar akan, wie lalaudla oh kekeirda pwehn alehdi inondehn paliwaratail. Keirdah kan kin wekpeseng rehn aramas koaros.

Ni atail kin kilang ehu pirokrahm en kamwadong de kemweit mwahu, kitail kin kalap nda me aramaso inenen pweida, met mehlel. Ahpw pirokrahmo wiawi sang ni kaunop oh kaiahn me wiawihki sounpar kei. Emen soun nting kaselel, Malcolm Gladwell, kahdaneki mwekid wet kosonned en awa [nen] 10,000. Sounroprop kan diaradahr me soun mwadong, koul, aramas loalekeng, semen en doadoahk pisetik, tohkte oh loaier kan anahne ale uwen kaiahn wet. Emen sounroprop semeno nda “ me aramas emen anahne en ale kaiahn ki awa nen pwehn kak esehla mehlel mehkoaros nan ah pali en doadoahk pwehn kak wiahla semen men nan sampa. —nan soahng sohte lipilipil.” ¹

Aramas tohto wehwehkiher me pwehn alehdi uwen kak koaros en paliwar oh mwahliel soangen kaunop oh kaiahn pwukat anahne en wiawi.

Paisuwed, pwe nan sampa iou me dindirekihla suwed, aramas solahr kesempwaliki keirdahn pali ngehn me anahnepe mie pwehn kak duwehla Krais oh kauwada pahson kan me kin kahluwahdo pwoson poatopoat. Kitail kin nsenohki ansou kan me kitail kin wehwehki laud ngehno. Ansou kesempwal pwukat me kitail kin ese me Ngehn Sarawio kin ketikihda kadehdehn marain sarawi tohrohr ong atail mohngiong oh lamalam kan. Kitail kin pereniki mepwukat; re sohte pahn sohrala. Ahpw en ahneki pwoson poatopot oh ieiang Ngehno ansou koaros, sohte mehkot palilahsang atail pein poadidi ong rongamwahuo me kin rasehng kaiahn pwehn kakairada paliwar oh atail madamadau. Kitail anahne koadoahke irair pwukat me ekei ansou kin duwehte en seri men kin tepda alu. Kitail wia met ni atail wia inou sarawi en ieiang mihting en kamadipw sarawi, wadek pwuhk sarawi, kapakap, oh kapwaiahda atail malipilip kan. Nan ehu pakair en kasapahl kalahngan me pid ohl emen me melahr, kasalehda me ohlo me naineki seri [ehk silimen] 13 kin “poadidi ong kapakap oh wadek pwuhk sarawi me kahrehda nah serihko ahneki pahson tengeteng oh pwoson Kauno Sises Krais.” ²

Ehu irair me I loieng ni ei sounpar [eisek limau] 15 wialahr ehu ahi pahson. Ahi nohno pwosono nantieng sewese ie kauwada pahson kan en ahi pwoson. I iangehr mihting en kamadipw sarawi, Praimeri, Mwahnakapw oh seminari. I wadekehr Pwuken Mormon oh pil kin kelehpw kapakap. Ni ansouo mie mehkot laud wiawi nan aht peneinei ni en riei pwutak laudo ah medemedewe en ale malipilip en misineri. Ahi pahpa mwahuo, me solahr kalap iang sarawi, mwahuki pwutako en kanekehla mahs ah sukuhl oh sohte wia ah misin. Met wiahla ehu irehn uhpene.

Nan ehu koasokoasoipene kaselel me riei pwutak, me laudkihsang ie sounpar limau iang oh kaweid, se koasonehdi me e pahn pilada ma e pahn wia ah misin nin duwen ire silu pwukat: (1) Sises Krais me sarawi? (2) Pwuken Mormon me mehlel? (3) Joseph Smith iei soukohp me kapwurehdo Rongamwahuo?

Ni ahi kapakap ngidingid nihpwongo, Ngehno kamehleleiongie pasapeng pwung ong peidek siluhko koaros. I pil wehwehkihla me kerenieng koasondi koaros me I pahn wiahda erein ahi mour pahn pahsan pasapengpen peidek siluko. I diarada ni mehlel me pwoson Sises Krais inenen kesempwal. Ni ei kin medewe dahme wiawihero, I ese me, pwehki ahi nohnou, pahson kan miehier rehi pwe ien kak ale kamanaman en ngehno ni soutiko. Riei pwutako, me miehier ah kadehde, pilada en wia ah misin oh ni imwio alehdi en aht pahpao kamanaman.

Kaweid sang ngehno kin alahldi ansou me anahnepe mie nin duwen ansou oh Kupwuren Kauno. ³ Pwuken Mormon: Pilehu Kadehde en Sises Krais wia mehn karasaras unsek ehu. Me keren I kilang keieun Pwuken Mormon me wiawihda. Joseph Smith kanekehla kawehweo ni ansou me e sounpar [rieisek silu] 23. Kitail ese wiepe oh dipwisou kan me e doadoahngki nan kawehweho. Nan keieun ntingdahn pwuhko nan [kid welipwiki silihsek] 1830, Joseph kapatahieng iren kapehse mwoatomwot ehu me kasalehda ni sansal me kawehweho wiawi “sang ni kisakis oh manaman en Koht.”⁴ Ia duwen dipwisou kan me sewese kawehweho—Urim oh Thummin, takai kesempwal ko? Re me kesempwal , de re duwehla daiahn kaiahn ong dak pwaisikel me Joseph solahr anahne pwehki e kak doadoahngki ah pwoson pwehn ale kaudiahl? ⁵

Ni atail kin kapwkapwurehieng kaiahn oh doadoahk ngidingid pwehn kakairada paliwar oh mwahliel, iei soahng wet te me palingehn anahne. Tamataman Soukohp Joseph ale soangen pakair ohte sang Moroni pak pahieu ni eh onohnop en ale pleitko. I kamelehle me mie kamwahu sang ngehno me kitail saikinte wehwehkila ni atail kin ieiang mihting en kamadipw sarawi nan wihk koaros. Douloali irehn pwuhk sarawi kan ansou koaros—ahpw kaidehn wadek te ekei ansou—kak kalaudehla atail wehwe pwehn weliakapw atail mour oh kakairada atail pwoson.

Pwoson wia ehu kosonned manaman. I pahn kawehwe: Ni ei wia misineri pwulepwul men, misin presiden kaselel men⁶ ahpw wia kawehwe mwuledek ehu me pid ehu iren pwuhk sarawi nanLuhk 8 me pid lih emen me sosoumwahukiher mehn warmwowi erein sounpar [eisek riau] 12 oh doadoahngkilahr mehkoaros pwehn pwain tohkte me kak kamwauwiala ah soumwahuo. I kin perepereniki iren pwuhk sarawi pwukat lel rahn wet.

Kumwail pahn tamataman me liho pwoson me ma e kak doahke pwungipen sapwellimen Sounkomouro likouo, e pahn uhdahn mwahula. Ni en liho wia mwo, ah soumwahuo mwadangete sohrasang. Sounkomouro, me ieiang Sapwellime tohnpadahk ko, ahpw mahsani, “Ihs me doahke ieo?”

Piter sapeng me irail koaros patpene wie alialu kohla, eri mie me sasair Ih.

“A Sises ketin sapeng, mahsanih, ‘Mie me doahke ie, pwe I kehndahr manaman ehu eh kohsang rehi.”

Tepin koasoi ong mwahu kak wehwehki “manaman.” Nan lokaiahn Spein oh Pwohtiki, e kin wehwehki “manaman.” Ahpw sohte katepe, pwe Sounkomouro sohte mahsani liho. E sohte mahsani en liho anahn. Ahpw uwen en liho pwoson me kamwakidada manaman en kakehlail en Ieros en Koht ni ansou me liho dohke pwungipen sapwellime likouo.

Sises eri mahsanihong liho, “Serepein, ahmw pwosonen me kakehleiukadahr. Kohkohwei ni popohl.” ⁷

I medemedewehier mwekid wet ki erein ei wiahla aramas laud men. I diarada me atail kapakap kan oh pekipek kan ong Sahm Nanleng limpoak men ni mwaren Sises Krais kak wahdo kapai nan atail mour kan sipelehla dahme kitail wehwehki. Atail mohngiong kan konehng inangi mehlel pahson kan en pwoson, oh soangen pwoson me lihmenet kasalehdahr.

Ahpw, tepin pahson kan en pwoson, mendahte ma ngehno katengedier, sohte wehwehki me kitail sohte pahn sohpai kasongsong kan. Alehda rongamwahuo sohte wehwehki me atail kahpwal kan mwahulahr.

Poadopaod en tepin Mwomwohdiso wet oh kaudial me ntingdi nan Doctrine and Covenantss kolokol karasaras unsek kan duwen kauwada pahson en pwoson oh apwalih pekipek kan oh kahpwal kan me aramas koaros kin sohsohpai.

Kokoudahn Tehnpas Sarawi en Kirtland wia pahson en Mwomwohdiso wet pwon. Me iangedo doadoahko iei mweredien ngehno, padahk kaudiahl kan, oh kapwurpwurdohn kih kesempwall kan ong ni pepeuslang kokoudahn Mwomwodiso wet. Duwehte Wahnparon en kawahko ni rahn en Pedekos, towe tohto kei kehn kemwekid kapwuriamwei en ngehno ni kapidelong en Tehnpas Sarawi en Kirtland. ⁸Ahpw, nin duwen atail mour, met sohte wehwehki me irail sohte pahn sohpai kasongsong oh kahpwal ni arail wie doudoula. Irail towehko sohte wehwehki me irail pahn sohpai ehu kahpwal en mwohni nan US—Kahpwal en 1837—me pahn kamwakid oh song arail mour kan. ⁹

Ehu karasaras en kasongsongko me pid kahpwal en mwohni lelong Elder Parley  P. Pratt, emen sounkaweid lap nan Kapwurpwurdohu. E iang wia emen tohn Pwihn en Wahnparon Ehk-riemeno. Ni tepin pahr en [kid welipwiki silihsek isuh]1837, ah pwoud, Thankful, mehla mwurin ah neitikiedi neira tepin seri. Parley oh Thankful wie pwopwoudkiher kerenieng sounpar [eisek] 10 oh en liho mehla inenen kaweikekiala ohlo.

Mwurin sounpwong kei, Elder Pratt lelong nan ehu ansou me wia ansou keieu kahpwal ong Mwomwohdiso. Nan werengen kahpwal me wehin US tungoaleniki, kahpwal en pai en wehi—iangahki netinet en sahpw oh kahpwal kan en mwohni nan kempa ehu me Joseph Smith oh ekei tohn Mwomwohdiso kauwada—kapikadahr pingiping oh uhpene nan Kirtland. Soukaweid en Mwomwohdiso kan sohte kin kalap wiahda koasondi mwahu nan arail mour kan. Parley ahneki kahpwal sang ni eh luhsang nah mwohni laud oh ni ansou kis sohla patehng Soukohp Josept. ¹⁰ E ntingihada kisin likoun kadipadip oh kapahrengki ah uhweng Joseph Smith sang nan mwoahl. Ni ansou ohte, Parley koasoia me e kamkamehlelehte Pwuken Mormon oh Doctrine and Covenants.¹¹

Elder Pratt luhsangehr ah pwoud, sapwe, oh ni imweo. Parley mwesellahng Missouri ni eh sohte ndahieng Joseph. Ni eh wie kohkohla, e tuhong ienge Wahnparon Thomas B. Marsh oh Wahnparon David Patten pohn ahlo ni ara pwurpwurala Kirtland. Ira kehn me mie anahnepen kamwahu en wiawi nan Pwihn en Wahnparonko oh ira kamantikiedi Parley en iang ira pwurala. Parley diarada me sohte mehmen alehdi kahpwal laud duwehte Joseph Smith oh ah peneinei.

Parley rapahkida Soukohpo, sengiseng oh wehkada sapwungkan me e wiadahr. Nan irair en sounpwong kei mwurin mehlahn ah pwoud, Thankful, Parley rotalahr oh milahr pahn katoutou en masak oh pwunod.¹² Joseph, ni ah wehwehki kahpwal en songosong en pitsang nan uhpene oh kasongsong, mahkehng Parley, kapakapki ih oh kapaiada ih.¹³ Parley oh irail kan me kolokol arail pwoson ale kapai sang ni kahpwal kan en Kirtland. Irail marainla oh wiahla aramas waun oh pwung. E wiahla kisehn pahson kan en arail pwoson.

Kitail sohte konehng wiahki me pwehki kasongsong Kauno sohte ketin kupwure kitail de koledihsang kitail Sapwellime kapai kan. Uhpene nan mehkoaros wia kisehn kisiniei me sounkaineno pahn kaunop kitailkihda pwehn ale dewatail celestial poatopoto.¹⁴ Ni en Soukohp Joseph ah ketiket nan Kalipwuhs en Liberty, mahsen kan en Kauno ong ih kawehwe soang koaros me pid kasongsong kan—iangahki kahpwal kan, oh karaun mwahl kan—oh kaimwsengkihla:

“Ma nan ehl pil pahn sarapeseng laud pwehn ale iuk, nei pwutak, wehwehki me mepwukat koaros pahn kakoahiekihiukla, oh e pahn mwahu ehng uhk.

“Nein Aramas ketin karakarahkdier pahn mehkoaros. Ke lapalap sang ih? ¹⁵

Nan kehkehlik wet ong Joseph Smith, Kauno pil kadehdeieng me ah tungoal rahn akan sansalehr oh sohte pahn malaulaula. Kauno eri kaimwsekala, “Ke dehr masak dahme aramas kak wia, pwe Koht pahn ieiang uhk kohkohlahte.” ¹⁶

Iad me kapai pen pwoson kin kohdo? Dahme pwoson kin wiahda? Sohte idi:

Kitail kin ale mahk pen dipatail sang ni pwoson Krais.¹⁷

Koaros me ahneki pwoson kin ehuieng Ngehn Sarawio.¹⁸

Kitail kin komourla pwehki atail pwoson mwaren Krais. ¹⁹

Kitail kin ale kehl nin duwen atail pwoson Krais.²⁰

Sohte me kin ale komour sang Kauno pwe irail me kamwakelekelkidahr ntahn Krais pwehki arail pwoson.²¹

Kapakap kan kin pasapengla nin duwen pwoson.²²

Ma sohte en aramas pwoson, Koht sohte kak wia manaman nan pwungarail.²³

Ni imwio, atail pwoson Sises Krais me wia pahson kesempwal en atail komourla soutuk oh kesepwilda. Ihme Helaman padahkiheng nah pwutangko, “Tamataman pwe iei pohn takai en atail Soundoro, iei Krais, Ieros en Koht, me kumwail anahne kauwada amwail pahson … , me wia pahson tengeteng, pahson ehu me ma aramas kokouda powe sohte kak ohla.”²⁴

I kapingkalahnganki kokoudahn pahson kan en pwoson me pwilsangehr nan kapokon wet. Iei ahi pekipek kitail en patohwenda tohnmetei kan oh ahneki karakarahk me konehng pwehn kakehlaka pahson kan en atail pwoson Kauno Sises Krais. I wia ahi kadehde mehlel ong Ih ni mwaren Sises Krais, amen.