Me Keieu Lapalap Rehmwail
Sapwellimen Koht kating me keieu laud kin kohieng irail kan me kin papah oh sohte kasik katingparail.
Riei ohloko oh kempoakepei kan, I kaping kalahnganki ei kak iang kumwail nan tiepene kamarain lap en prihsduhd wet. Presiden Monson, kalahngan en omwi padahk oh kapai. Se pahn ansou koaros loalehdi nan aht mohngiong omwi mahsan en kaweid, peneu oh ngenin kan. Se poakehng oh utung komwi, oh se pahn ansou koaros kapakap kin komwi aht Presiden kempoake, sapwellimen Kauo soukohp.
Kerenieng sounpar rieisek samwalahro, Tehnpas Sarawi nan Madrid Spein kasarawiala oh wialahr tehnpas sarawi en Kauno. Ngehi oh Harriet tamatamante mwahu pwehki ansouo I wiewia ahi pwukoa nan Ehria Presidensi en Europe. Kiht oh aramas tohto kei kedirepwkihla aht pilahne, koasoane oh kaunopada irehkan me pid kasarawiho.
Ni rahn en kasarawiho eh pahn lelehr, I diarada me I saikinte ale luhk pwe ien iang kasarawio. Met sohte kasikpe. Pwe ni ei wia Ehria Presiden, I ahneki pwukoa laud ni kokoudahn tehnpas sarawio oh I pehm me mie ahi pwais nan doadoahk wet.
I peidek rehn ahi pwoudo ma e seu kilangehr ehu luhk. Liho sapeng me soah.
Mwurin rahn kei ahi kanengamah tikitikla. I medemedewe ma luhko sou salongala—mwein pwupwidihla pahn aht sehr laud ko. De mihla nan pwungen kihd kan oh lekidekla. Mie nein mehn mpatko neirail kaht lipirap men, oh I kin kilang kahto oh lemelemehngki ma kaidehn ih me ale luhko.
Ni imwio I seirenla oh kamehlele me: Sohte lukepei.
Ahpw ia mwomwen mwekido eh kak wiawi? Mie mehkot suwed I wiahda? Mie me medewe me se sohte kak kohla pwe se me nohn doh? Re manokeiehlahr?
Kedekede, I diarada me soangen madamadau me I ahnekio pahn kahrehieng ie soangen mour me I sohte men ahneki.
Ngehi oh Harriet katamanehng pein kiht me se sohte kesempwal sang kasarawialahn tehnpas sarawio. Ihs. me konehng de sohte konehng en lukehng. Oh kaidehn aht madamadau de aht pepehm me dene mie aht pwais.
Ihme kesempwal kasarawialahn tehnpas sarawio, tehnpas en Koht Lapalahpie. E wia rahn kaperen ehu ong tohn Mwomwohdiso kan nan Spein.
Ma I lukehngehr kasarawio, I pahn pereniki kohla. Ahpw ma I sohte lukehng, ahi peren sohte pahn tikitikla mehlel. Ngehi oh Harriet pahn iang kempoakepat ohl oh lih akan pereperen sang wasa doh. Se pahn kapinga Koht pwehki kapai kaselel wet sang ni imwato Frankfurt duwehtete ma se iang mih Madrid.
Poanerkis de pwuriemwot.
Nan pwungen meh Ehkriemen me Sises ketin malipe oh idihadahr, mie perien ehu, Seims oh Sohn. Kumwail tamatamante ahdkamwan me E ketikihieng ira?
Poanerkis de pwuriemwot.1
Aramas sohte kin alehdi ahdkamwan ni sohte kahrepe. Ahpw paisuwed pwe pwuhk sarawi sohte kawehwehda mwahu kahrepen ahdkamwan wet. Ahpw kitail kak kilang ekis duwen wiewia en Seims oh Sohn. Iei perian wet te me medewehda ira en ekerdihdo kisiniei sang nanleng pohn ehu kahnihmw nan Sameria pwehki ara sohte lukehng en pidelong nan kahnihmwo.2
Soused kei Seims oh Sohn—mwein sohte nohn marain—ahpw I lamalam ira inenen wehwehki mwahu duwen apwali ara mour. Mehlel, ira wia ohl pwerisek kei.
Ehu pako, ni en Sounkomouro ketin kaukaunop en wia Sapwellime keimwsekalahn sahi ong Serusalem, Seims oh Sohn ahpw pato pahn Kupwure oh sekere—sakarada me ele pahrekieng ara ahdkamwano.
Ira patohwan “Mie mehkot me se men komwi en kupwurehkin kiht,”
I lamalam Sises ketin kiparmat oh keinemwe, “Dahme kumwa anahne?”
“Komwi en kupwurei kiht nan lingaling en omwi wehi ni omwi pahn nanmwarkihla, oh mweidohng pwe se en kak mwohd mpomwi ni palimaunomwi, a emen ni palimeing.”
Met Sounkomouro eri luke ira en medewe mahs ni mehlel mour en dahme ira wie pekipeki oh mahsanih, “Mwohd ni palimauni oh palimeingi, e sohte mweimweiong ie I en pilada; pwe Koht me pahn ketikihong irail kan me e ketin onopadahngehr.”3
Pwe ni mehlel, aramas sohte kak kampein pwe ren ale kapai nan wehin nanleng. Aramas sohte pil kak kapisir arail ahl ong popohl poatopoat.
Ni en Wahnparon ehk teiko arail rongada pekipek me Poanerkis de pwuriemwot kan wia, re sohte pereniki mehlel. Sises mwahngi me Sapwellime ansou mwotomwotalahr oh kupwur pahtoula ni Eh mahsanih uhpene me mie nan pwungen irail kan me pahn peusehla Sapwellime doadoahko.
E mahseniheng meh Ehkriemeno duwen manaman oh mwomwen eh kin wekidala irail me kin rapahki oh ale. E mahsanih, “me lapalap akan en sampah kin kolokol kehlail manaman en kaunda me rotorot akan.”
I kak kilang uwen en Sounkomouro limpoak ni E mahmahsanih pohn mesen irail tohnpadahk pwoson ko. I kak rong Kepitie ni E ngidingidki, “Eri, kaidehkin ih pahn duwen met rehmwail. Mehmen rehmwail me men lapalapala, e uhdahn pahn wiahla papahmwail: A mehmen me men soumas, e pahn wiahla ladun koaruhsie.”4
Nan wehin Koht, me lapalap oh kaun kan kin apwalih mehteikan—duwehte en Koht apwalih irail—oh irail eri kin pengila oh papah irail. Met wehwehki en pereniki iang irail me kin peren, iang irail me pahtou mwahiei, souwesei irail me ahneki kahpwal, oh poakehng mehn mpatail kan duwehte en Krais ketin poakehng kitail. Sounkomouro poakehng seri en Koht koruhsie sohte lipilipil arail pai, pohn kilirail, arail lokaia, arail keirda de irail mehn ia. Oh kitail anahne alasang!
Sapwellimen Koht kating keieu laud kin kohieng irail kan me kin papah ni arail sohte kasik katingparail. Kin kohieng irail me kin wie papah sohte sansal, meleilei oh raprapahki elen arail kak sewese mehteikan; irail me kin papah mehteikan pwehki arail poakehng Koht oh Sapwellime kan.5
Dehr Wahkihla
Mwurinte ahi malipilip ong emen Kaun Lapalap, I ahneki ansou mwahu en iang Presiden James E. Faust nan koasoan sapahl en ehu stake. Ni aht wie tangatang kohdihla wasa kaselel nan palikapi en Utah, Presiden Faust isaniki ansou mwahuo oh sapankihda irehn kaweid ehu. Kaweid wet I sohte kak manokehla. E mahsanih, “Tohn Mwomwohdiso kan kin kaping kalahngan ong Kaun Lapalap akan. Irail pahn koasoiahkin kumwail koasoi mwahu.” Ih eri tokedi ansou kis oh nda, “Dieter, ke en kaping kalahnganki ansou koaros ahpw kaleke ke wahkihla.”
Kaweid kesempwal wet me pid papah nan Mwomwohdisot dokedoke koaros me kolokol prihsduhd nan pwihn koaros nan Mwomwohdiso wet. E doke kitail koaros nan Mwomwohdiso wet.
Ansou koaros me Presiden J. Rueben Clark kin kaweid irail kan me ale malipilip nan Mwomwohdiso wet e kin ndahieng irail en dehr manokehla kosonned kaweneuo.
Aramaso kin uhd kalelapak, “Ia kosonned kaweneu en?”
E kin nda, “Kedehr nohn kedirepwki dahme aramas medewe kin uhk.”
Met, kin kahrehda aramas kin idek: “Ia kosonned limau teikan?”
Ni eh kin marep, Presiden Clark kin nda, “Ihte kosonned en mwo.”6
Pwehn wia soun kaweid mwahu kei nan Mwomwohdiso wet, kitail anahne koledi kaweid wet: soun kaweid nan Mwomwohdiso wet sohte anahne ruwese te mehteikan ahpw ren kin men ale kaweid sang Koht ni arail kin sewese mehteikan.
Malipilip kan iei Ansou Mwahu en Papah
Ni atail wia Souleng kei en Koht Lapalahpie, kitail anahne tamataman nan mehkoaros me semwehmwe oh me anahne kan, me soumwahu oh me lokolok kan, pwe irail me sohte wia met kaidehn nei tohnpadahk kei.”7 Ansou mwahu en kohseli wia me mwahu oh papah inenen laud. Kitail kak diar irail nan atail kousapw kan, ward kan oh prans kan oh ni mehlel nan imwatail kan.
Tohn Mwomwohdiso koaros pil kin ahneki ansou mwahu kan en papah. Kitail kin kahdaniki ansou mwahu pwukat “malipilip”—lepin pwuloi ehu me kin kataman ong kitail ihs me malipe kitail en papah. Ma kitail kin wiahki atail malipilip kan ansou mwahu kei en papah Koht oh mehteikan ni pwoson oh karakarahk, mwekid en papah koaros uhlang mour en tohnpadahk. Ni wiepe wet, Koht sohte ketin kauwadahte Sapwellime Mwomwohdiso ahpw kin ketin kauwada Sapwellime tohn papah kan. Mwomwohdisou kokouda pwehn sewesei kitail wiahla tohnpadahk mehlel oh pwoson kei en Krais, seri en Koht mwahu kei. Met kin wiawi kaidehn ni atail kin iang mihting kan oh rong padahk kan, ahpw sang ni atail kin karakarahkidi oh papah mehteikan. Iei mwomwen atail kak “lapalapala” nan wehin Koht.
Kitail kin ale malipilip kan ni popohl, karakarahk oh kalahngan. Ni atail kin kakommoldihsang malipilip pwukat, kitail pil kin pwungkihla wekidekla wet ni popohl, karakarahk oh kalahngan.
Nan silangin Koht sohte ehu malipilip nan wehio me kesempwal sang mehteio. Atail papah—ma laud de tikitik—kin kakehlailiala palingenatail, langahda wenihmw kan en nanleng, oh kamwerehdi kapai kan en Koht kaidehnte ong irail me kitail kin papah ahpw pil ong kitail. Ni atail kin sewese mehteikan, kitail kak ese mehlel ni karakarahk me Koht kin ketin pohnese, kupwurki oh itariki atail papah. E kin ketin kiparmatiki ni atail kin wiahki mepwukat atail mohngiong unsek, ni mwekid en limpoak, ahpw mehlel ni wiewia me sohte me kin tehk.8
Ansou koaros me kitail kin papah mehtei kan, kitail kin karaniala atail en wiahla tohnpadahk mwahu oh mehlel en Ih me ketikihda Sapwellime unsek pwehki kitail.
Sang Kakaun wiahla Tohn Doadoahk
Ni ketemen ke 150 en paionihr kan arail lel nan Wahu en Salt Lake, Brother Myron Richins me wia stake presiden en Henefer, Utah. Ehu sipai en paionihr kan arail lel oh daulih ah kahnihmwo pahn wiawi nan ketemeno.
Presiden Richins kedirepwkihla mehlel pilahn en ketemeno, oh e kin iang mihting tohto rehn Kaun Lapalap akan oh mehteikan pwehn koasoanehdi pirokrahm kan en ketemeno. E inenin ngirala.
Mwohn ketemeno eh pahn wiawi, en Presiden Richins ah stake o koasoan sapahl, oh e kakommoaldi sang presiden. Ni ehu Rahn Sarawi mwuri e ieiang mihting en prihsduhd nan ah wardo ni ansou me soun kaweid kan peki ihs me kak iang sawas ni ketemeno. Presiden Richins, iangahki ekei irail, kauwada peh oh e alehdi kaweid en pwuhrieng nan likoun doadoahk oh wahdo were sdohsa pikup pwoat oh ehu sapwel.
Eri ni menseng en ni rahn en ketemeno, Presden Richins ahpw patohla pwehn wia doadoahk en tohmetei.
Wihkte depe mwowe, e wia emen soun kaweid kehlail ni pilahne oh apwali doadoahk lap wet. Ahpw ni rahn en ketemeno, ah pwukoa iei en kin alu mwurin oahs ko nan kaparo oh kamwakele sang kidarail kan.
Presiden Richins pereniki wia met ni so peikasal.
E wehwehki me ehu soangen papah sohte lapasang mehteio.
E wehwehki oh doadoahngki mahsen en Sounkomouro: “Eri me keieu lapalap rehmwail, ih me pahn wia amwail sounpapah.”9
Momourki Mour en Tohnpadahk ni Pwung
Ekei ansou, duwehte Poanerkis pwuriemwot, kitail kin anahne pwukoahn me lapalap akan. Kitail kin men sansal. Kitail kin men kaweid oh wiahda mehkot me aramas pahn tamataman.
Sohte mehkot sapwung ni atail men papah Kauno, ahpw ma kitail kin men lapalapala nan Mwomwohdiso pwehn wia kamwahupatail—pwehn alehki kaping oh ndand sang aramas—kitail alehier kating patail. Ni atail kin “wahkihla” kaping sang mehteikan, kapingo me pahn wia kating patail.
Mehnia malipilip me keieu kesempwal nan Mwomwohdiso? Malipilip me komw kolokol met. Sohte lipilipil uwen eh tikitik de sansal, malipilip me komw kolokol met me pahn elehieng komwi en kak kaidehn pwekada te mehtaikan ahpw pwe komwi en kak wiahla ohlen Koht me komw kapikipikda en wiahla.
Kempoakepai oh riei ohl akan nan prihsduhd, wia uwen amwail kak koaros en pweida!
Paul padahkiheng mehn Pilipai kan, “Pwe kumwil en dehr medemedewehte pein kumwail, a kumwail koaros anahne, ni karakarahk, wiahki mehteikan me re kesempwal sang kumwail.”10
Papah ni Wahu
Raparapahki wahu oh ndand nan Mwomwohdiso ahpw kaidehn papah ni mehlel oh karakarahk ong mehteikan duwehte kaweliali me Esau wiaho.11 Kitail kak ale kapai pohn sampah, ahpw e kak kahrehda atail sohte alehdi kalahngan sang nanleng.
Kitail anahne alasang karasaras en Sounkomoro, me aktikitik oh karakarahk, sohte rapahki kaping sang aramas ahpw wiahte Kupwuren Semeo.12
Kitail papah mehteikan ni karakarahk—pwerisek, kalahngan oh wahu. Mendahte ma atail mwekid en papah kan mwomwen mwahl, tikitik, de sohte katepe, irail me kin papah ni kadek oh limpoak ong mehteikan pahn ehu rahn esehla katepen arail papah sang ni kapai oh kalahngan poatopoat en Koht Lapalahpie.13
Riei ohlo oko, kempoakepei kan, kitail en douloali, wehwehki, oh momourki padahk kesempwal wet duwen kaweidi Mwomwohdiso oh epwelpen prihsduhd. “Eri ih me keieu lapalap rehmwail, ih me pahn wia amwail sounpapah.” Met iei ahi kapakap oh kapai ni mware sarawi atail Kaun Lapalahpie, atai Soundor, ni mwaren Sises Krais, amen.