Sises Ahpw ketin Kamoalehdi ni Limpoak

Sounpar ekei samwalahro ngehi oh ahi pwoud, Jacqui, alehdi pwukoahn kaunda Misin en Washington Spokane. Se lella nan wasahn misin ni aht ahneki masopwehk oh peren pwehki pwukoahn doadoahk ohng misineri kaselel tohto. Misineri koa kohsang nan soangen irairen mour tohto oh mwadangete duwehla pein nait pwutak oh serepein ko.

Pali tohtohn irail arail doadoahk mwahu, ah malaulau me ahneki kahpwal pwehki lauden kasikpen arail pwukoah. I tamataman emen misineri indahieng ie, “Presiden, I sohte perenki aramas.” Pil tohto irail indahngie me irail sohte ahneki ineng en idawehn arail kosonned apwal koa. I pwunodkihda oh medewe dahme se kak wia pwehn wekidala mohngiongen irail misineri malaulau koa me saikinte esehla popohlen peik.

Ehu rahno ni ahi dake sdohsa tangatang nan wasa kaselel ehu me mwaht en wihd mih pohn kisin nahna kei limwahn idin Washington oh Idaho, I wie rongorong rekohd ehu en Kadehde Kapw. Ni ahi rongorong soaipen pwutak pwulopwul kepwehpwe men me kohla rehn Sounkomouro pwehn idek dahme e kak wia pwe en ahneki mour soutuk, I alehdi kaudiahl kehlail ehu me sohte kasikpe me met wia ahi mehn ketemen sarawi ehu.

Mwurin ahi rongehr Sises ah wadekada kosonned koa oh pwutak pwulopwulo sapengehr me e kapwaiadahr koaros sang ni ah seri, I rongmwahu Sounkomouro ah kapwung ni meleilei: “Mehteieu me luhwe: …netikihla mehkoaros me ke ahneki, oh …. kohdo, … iangiehla.” ¹ Ahpw me kopwuriamwei, I rongada lepin lokaia wenou mwohn irehu me I mwomwen saik pak ehu rongada de wadekada. Likamwete irail kapatapatehng nan iren pwuhk sarawi koa. I ahnekihda madamadau laud ohng mehn kamarain ehu me wiawiaher.

Ia lepin lokaia wenou me wia soangen kehlailo? Rong pwe ken kilang ma ke kak kasawihada lepin lokaia pwukat, me sohte kin dierek nan ehu Rongamwahu tohrohr ahpw dierekte nan Rongamwahu en Mahk kelehpw:

“Mwahnakapw men pa tangatang … oh patohwanohng, Maing Sounpadahk mwahu, dahme I uhdahn pahn wia pwe I en kak alehdi mour soutuk?

“Oh Sises ketin mahsanihong, …

“Ke ese kosonned akan, Dehr kemehla aramas, Dehr kamwahl, Dehr pirap, Dehr likamw, Dehr pitih aramas, Kahkahki semomw oh inomw.

“A mwahnakapwo sapeng  … , Maing, sang ni ei tikitik I kapwaiadahr mepwukat koaros.

“Sises ahpw ketin kamoalehdi ni limpoak, oh mahsanihong, Mehteieu me luhwe: kohwei, netikihla mehkoaros ke ahneki, ke ahpw kihong pweine ko me paisuwedlahr akan, oh omw pai ahpw pahn laud mehlel nanleng: ke ahpw kohdo, oh iangiehla.”²

“Sises ahpw ketin kamoalehdi ih ni limpoak.”

Ni ahi rongada lepin lokaia pwukat, madamadau sansal ehu kipehdi nan ahi lamalam en atail Kaun ah uhdi oh kamoalehdi pwutak pwulopwul menet. Kamoalehdi——me duwehte kilkilang nan mas loale oh lel nan ngeni, pil kilangada kamwahupehkan oh soahng kan e kak wiahla, pil kilangada ah anahn keiou laud.

Eri lepin lokaia mengei koa, Sises poakehng ih. E pehmada limpoak laud ehu oh kadek ohng pwutak pwulopwul mwahu menet, oh pwehki limpoak wet, oh sang ni limpoak wet, Sises peki soahng tohto sang ih. I song medewe dahme pwutak menet kakete pehmada pwehki soangen limpoak laud wet ni ansou me pekipek me kohieng en wia mehkot me udahn apwal me duwehte netkihla soahng koaros me ah oh kisakiskihla mwohnio ohng me semwehmwe kan.

Nan ansouo, I ese me kaidehn mohngiong en ekei misineri koa te me anahne wekila. Ahi mohngiong pil anahne iang. Ahi peideko solahr “Ia mwomwen president en misin men me sehse dahme e pahn wia sewese emen misineri me ahneki kahpwal pwe en mwahula?” Ahpw, peideko iei “Ia mwomwen ahi kak audaudkihda limpoak en Krais, pwe emen misineri en kak kehn Sapwellimen Koht limpoak ohng ih sang rehi oh inengieng wekila?” Ia mwomwen ahi kak kakomoalehdi ih ni mwohmw me Kauno kilang pwutak pwulopwul kepwehpweo, kilkilang irail ohng udahn his irail oh isime irail kak wiahla, sang kilkilangete irail pwehki dahme irail wihwia de sohte wihwia? Ia mwomwen ahi kak duwehla Sounkomouro?

“Sises ahpw ketin kamoalehdi ni limpoak.”

Sang ansouo kohla, ni ahi kin mwohdehng emen misineri kan me ahneki kahpwal en peik, nan ahi mohngiong met I kin kilangada emen serepein de pwutak me pwulopwul pwoson men me nantiheng pwe e inengieng wia ah misin. Eri I kakehr lokaia ni ahi ahnekiher pepehm en pahpa oh nohno men:³ “Elder de Sister, ma I sohte poakehng uhk, I sohte pahn katapanki dahme wiawi nan omw misin. Ahpw I poakehng uhk, oh pwehki ahi poakehng uhk, I kesempwalki isime ke pahn wiahla. Eri I luke iuk en wekidala soahng kan me apwal ohng uhk oh wiahla emen aramas me Kauno kupwurki ken wiahla.”

Ansou koaros I kolahn tuhweng misineri kan, I kin tepte kapakapki kisakis en limpoak unsek oh me I kak kilang emen emen misineri duwehte Kauno ah kin kilang serepein de pwutak emen.

Mwohn mihting en misineri kan, ansou ngehi oh Sister Palmer kin rahnmwahuih emen emen misineri kan, I kin uhdi oh kadehde nan masarail koa, kakamoalehdi irail—tuhpene ehu ni sohte lokaia—oh eri ni sohte sapwung, I direkilahr pepehm en limpoak laud ohng Sapwellimen Koht seri kesempwal pwukat.

I esehlahr soahng tohto me kak wekidala mour sang irair wet me I ahnekidahr ohng Mahk iralaud 10[eisek]. Iet mehn kaskuhl pahieu me I kamehlele kak sewese emen emen:

1. Ni atail esehla kilang ekei duwehte Kauno ah kin kilang irail sang dahme kitail kilangki pein masatail kat, atail limpoak ohng irail pahn keirda oh pil duwehte atail ineng en sewese irail. Kitail pahn kilangada soahng kan irail kak wiahla me pein irail sohte kak kilang. Sang ni limpoak en Sises kitail pahn sohte masak lokaia ni loalap, pwe “limpoak unsek kin powehdi masopwehk.”⁴ Oh kitail sohte pahn undi, tamataman irail koa me keioun apwalen poakehng iei me keioun anahne limpoak.

2. Sohte kaskuhl de kamarain mehlel kak pweida nan ansoun lingeringer de insensued, oh mohngiong kan pahn sohte wekila ma sohte limpoak. Ma kitail wia atail pwukoahn pahpa nohno, sounpadahk, de kaun, kaskuhl mehlel pahn pweidahte wasa ieu me pepehm en likilik kaidehn keriahla mie. Nan imwatail kan ansou koaros anahne wia wasa me neitail serihkan pahn pehm insenamwahu—kaidehn wasa keper.

3. Limpoak sohte konehng kohsang ansou me seri men, kempoakepah, de tohn peneinei sohte kapwaiada dahme kitail kasik. Kitail sohte wehwehki dahme wiawiheng pwutak pwulopwulo mwurin ah pahtoula oh kohkohla, ahpw I koapwoaroapwoarki me Sises poakehngete ni unsek menda ah pilada ahl mengeio. Mwein ah pahn laudla, ni ah pahn diarada me ah kepwe kan sohte katepe, e tamandahr oh kapwaiadahr en ah Kaun ah kamoalehdi ih, poakehng ih, oh luke en idawehnla Ih.

4. Pwehki Ah limpoak ohng kitail, Kauno kasik laud sang kitail. Ma kitail kin karakarahk, kitail pahn kasamwo Sapwellimen Kauno luhken koluhla, tohnmetei, oh en papah pwehn wia kasalepen Sapwellime limpoak unsek ohng kitail. Keieu kesempwal,luhk ehu en koluhla pil wia luhk ehu en alehda kisakis kaselel en mahk oh meleilei. Eri, “kumwail dehr … kopwung kan en Kauno, dehr nan kapehd tikitingkihla Sapwellime kopwung: Pwe Kauno kin ketin kapwungala me e kin ketin loalloale.”⁵

Riei ohl oh lih kesempwal akan, ehu ansou ke pehm e kohieng uhk en wia mehkot apwal—kesehla ehu mehkot sakanakan me ke pereniki de mehkot me ke sohte kak kauhdi, soikala peren en sampah, tohnmeteikihla mehkot ke perenki wia pwehki e wia rahn en Sapat, mahkehng mehmen me wie sapwung ohng uhk—medewehda Kauno ahkakomoaleiukedi, poakehng uhk, oh luklukeiuk en kesehla oh idawehnla Ih. Oh kaping kiheng Ih duwen ah limpoak ohng uhk pwe en luke iuk en wia soahng tohto.

I kadehdehki atail Sounkomour, Sises Krais, oh kilkileng lahng rahn me E pahn koledi emen emen kitail, kakamoalei kitail oh pwoalehkin kitaildi Sapwellime limpoak unsek. Ni mwaren Sises Krais, ahmen.