Karihngihn oacna ke Mwet Lahngo El Oruh

Mwe ahkinsewowo na wolacna se in moulkihn eis tuhtahflah ke fwackyuck sin God uh! Ke kuht rahrahlac ac sruokyacna “fohlohkyak luhn ma nuhkwewa,”¹ suc ac fah tuhkuh ke ma sikyak palyeyuck ke pacl lasr, kuht ahkolah nuh ke Tuhkuh Ahkluo luhn Mwet Lahngo.²

Ac wacngihn inkacnek wo sahyac in ahkolah in ohsun nuh Sel likina in kwacfweacng in oacna El ke in luhngse luti sie sin sie! Oacna ke Jisus Kraist el luti mwet fahsr Tohkohl ke muhtwacwackiyacn fihl se inge, “Fin kowos luhngse Nga, kowos fah kuhlwacnsuhpweyuc.³ Kahsruh lasr nuh sin mwet sahyac uh pa ahkuhtweyac ohiyacn mwet fahsr Tohkohl ac kaksyak lasr ac luhngse lasr nuh sin God ac Wen Nahtuhl, Jisus Kraist.

Kuhtuh pacl uh kuht nuhnkuh kuht in oruh kuhtuh ma usrnguck kuh pwengpweng in “oacklah” muh pa in kuhlwacnsapuh mwet tuhlan lasr. Ahok ohiyac srihsrihk in kahsruh kuh in oasr eklac yohk nuh sin mwet sahyac—oacyacpac nuh sesr sifacna. Meac Mwet Lahngo lasr El oruh? Ke mwe sang wolacna ke Iwaclah ac Sifil Moulyak Lal—suc kuht ahkfuhlwactye ke Sacnri in Istuh na kahto se inge—“wacngihn sie sahyac oasr eklac yohk la nuh sin nuhkwewa suc muhta ac suc fah muhta fin facluh se.”⁴ Tuh el oacyacpac isracsr kac, sramsramkihn, fahsrkihn, luhngkihn, ahkkweye, luti, kihte, ac nuhnak muhnahs nuh se. El kuhlwacnsapuh sucu ac kawuck, mwet tuhlan ac mwet El tiac etuh ke atac se fanna, ac El suli mwet akohnohki ac mwet sacohklacna in wi tuhkweni ke mwe sang wolacna ke wosasuc Lal. Ohiyac “fihsrwacsr” ke kuhlwacnsap ac luhngse ingacn sang srihkasrak se nuh ke mwe lutlut lasr mihsenge uh.

Ke oasr pacl wo lom in ahollah Mwet Lahngo ke orekma in karihngihn kom, siyuck sum sifacna, “Nga ac akacsruhi kahlwem luhn wosasuc uh fuhkah nuh sin mwet se kuh sucu se? Meac Nguhn pihrihkyuc ngwacn oruh?

Luti uh kuh in oreklac ke kain in kais sie ohiyac wowo. Na ac fuhkah atac uh?

Srihkasrak ke karihngihn uh oacpacna ke prestuhnsi ke u luhn elders ac Rilif Sosaiti uh pruhe in sramsramkihn ma kunac. Liki na in mwet kol se sang ipin pwepuh se na, oacna in muh kahs in kahsruh orek kacn mwet se kuh sucu se ke pacl se kunohkohn se ituckyang uh mwe luti tamuhlwel ac tahmtahel. Oacna ke fahsr se orek, tuhkweni ke fong in sritacl se, oruh karihngihn, kuh finne tuhkweni orekma. Oacna ke in muhtwacta yurin mwet kuh sramsram nuh sin mwet ke tacluhfon ah kuh ke internet ah. Oacna ke in suhpwaclah kart in puhtte se kuh kahluhkluhk eke sritacl soccer se. Oacna ke akacsruhi ke sie ma suhmuhslah kuh pohloh kahs se ke sie sramsram ke kanfracns ah ma yohk kalmeyac nuh sin mwet se ingacn. Oacna ke sramsramkihnyacn soko kihsensiyuck ac akacsruhi testimony in sang kahlwem ac mihslac. Oacna ke mwet se pahng nuh ke moul luhn mwet se ac elyah sel. Oacna ke interview in luti se suc mwe enenuh ac kuhiyac in sramsramkihnyuck fihsrwacsr ac fal. Oacna ke ward council oreklac in topuk elyah yohk.

Kain in karihngihn se inge ahkkweye sie tahmtahel suc som loes liki lohm sel ke mukul tuhmwacl ah muhtwacwacack in srolah liki lutlut lal. Ke wacngihn tacluhfon orekma ac kihtin ahwowo in liye, el puhla tiacna akwucki ke acn sasuc se, puhlakihn tuhlac ac muhkwelacna. Ke wacngihn ahkkahlwemye, sie tahmtahel ke Rilif Sosaiti tuhkuh tongtong ke sruhnguhl ah usack kihtin fahluhk se luhn ahwowo sac, esacltahlwacng nuh lun stosah ukwacl ah, ac usacltahl suk sie stoh in kuhka ah. Tarilaciyacn muhtwacn sac fahk, “El pa kahsrweyuc ke puhlan pacl in elyah se luhk!”

Karihngihn pwacye ahkuhtweyucki sin sie muhtwacn mahtuh fin acn Africa suc sapkihnyuck in suk sie tahmtahel suc tiac wi Alu ke lusen pacl na loes se. Ke el som nuh ke lohm sin muhtwacn sac, el liyacack lah uniyuck el ac pihsrapasrlah ma lal uh, srihklac ma el kang, ac wacngihn nuknuk fal lacn nukum nuh ke miting ke Alu in Sacnri. Muhtwacn se ma pakpucki in karuhnganuhl ah us sie insroac in lohng, fukunsahk ke imac lal, ma suhmuhslah in riti, ac akawucki. Tahmtahel se ma “tuhlac” ah fohlohklac nuh ke alu ah pacl fototo tohkohyang ac ingena el sruok kunohkohn se ke srihpen el etuh lah luhngseyuck el ac yohk srihpacl.

Oracni kwewa kampare luhn Rilif Sosaiti wi akwuck sasuc ke u luhn elders uh fah use ma sefanna ma kuh in oswelah ma usrnguck sikyak. Luti uh sie orekma akwucki in ahkfalyelah ma kunacn pristut in muhtwacta ke lohm sin kais sie mempucr ac in karihngihn alu uh pacl nuhkwewa, ac weluhlos ac ahkkweyaclos,⁵oacyacpac in ahksahfyelah srihpac luhn Rilif Sosaiti in kahsruh sie sin sie ahkolah nuh ke mwe sang luhn moul ma pahtpaht.⁶Tuhkweni orekma ye kohkoh luhn pisap, prestuhnsi ke u luhn elders ac Rilif Sosaiti kuh in ahkkweyeyuck oacna ke elos suk inkacnek in liyacacng ac karihngihn kais sie mwet ac sucu.

Lwelah ngwacn usot sie mwe srihkasrak. Ninac se sukokyak muh el cancer. Ke pacl sa el onweyuck, ac pacl sac na, muhtwacn ke Rilif Sosaiti ah som in orekma, plwacn lac kac lah mongo fuhkah elos ac kahsruh kac, mwe wiwac nuh lohm ono ah nuh ke lwen in ono, ac kahsruh pac sahyac. Eltahl muhtwacta yohrohl tahkuhnlah na, sang pacl in ahkpwacryacl. Ke pacl sacn na, Melchizedek Pristut tuyang in mukwilac pac. Eltahl tahfwelah orekma toasr in ahkwoyelah mwe oan ac nien fahsr in fihsrwacsr ke karihngihnyacn muhtwacn mas sac. Mukul fuhsr uh sang kuhiyaclos in eis kunaclos ke orekma yohk srihpac se inge. Ac muhtwacn fuhsr ah weacng pac: eltahl engan in oraclah pacl lalos in us kosro soko fahsr ke kais sie lwen. Ke pacl uh som, ward sac tahfwelah in oruh karihngihn lalos, sang ac nahwuh fin oasr enenweyac. Kahlwem lah orekma ke luhngse pa inge, kais sie mempucr kihsackuhnuhllah, tuhkweni ahkkahlwemye elyah la ke kais sie ohiyac ma ahkinsewowoye tiac muhtwacn kweok sac muhkwena tuhsruhk kais sie mempucr ke sucu lal ah.

Tukun puhlaikiyacn orekma sac, muhtwacn sac tuhfah misac ke cancer ac likiyucki elan monglac. Kuh ward sac mongi ac nuhnkuh muh orekma wo eltahl oraclah ah sahflah? Moh, tuhlihk muhtwacn fuhsr ah kwacfweacng in us kosro soko ah fahsr lwen nuhkwewa, u luhn pristut tahfwelah in luti nuh sin pahpah sac ac sucu lal, ac Rilif Sosaiti tahfwelah in suk luhngse in soklah mwe ahkkweye ac enenuh. Tamuhlwel ac tahmtahel, pa inge luti uh—pa inge luhngse oacna ke Mwet Lahngo El oruh!

Sie pac mwe ahkinsewowo ke mwe fahkwack in ahkkweye inge pa ma kunacn tuhlihk muhtwacn fuhsr matwac yac 14 nuh ke 18 in karihngihn ekihn mwet kahsruh nuh sin muhtwacn ke Rilif Sosaiti, oacna ke tuhlihk mukul fuhsr ke matwaclos karihngihn ekihn mwet in kahsruh nuh sin mukul ma sruok Melchizedek Pristut. Mwet fuhsr uh kuh in akacsruhi mwe sang usrnguck lalos ac kapwack ke nguhn oacna ke elos karihngihn siskacn mwet mahtuh ke orekma luhn moul ma pahtpaht. Eisyuck mwet fuhsr in karihngihn orekma ma kuh in ahkkapye solsol luhn Rilif Sosaiti ac u luhn elders ke karihngihnyacn mwet sahyac pa ac ahkyohkye pihsen mempucr suc wi kahsruh.

Ke nga nuhnkuh ke tuhlihk muhtwacn askuhlacna nga etuh, nga engankihn muhtwacn ke Rilif Sosaiti ma oasr pacl la in ahkinsewowoyeyuck ke ohiyacn muhtwacn uh, talan la, kuh puhlakihnyacn nguhn la in karihngihn siskacn kais sie kuh in tuhkweni karihngihn sie sin sie. Nga oacyacpac lut ke oasr pacl luhn tuhlihk muhtwacn fuhsr in muh fah lutiyuck ac ahkkweyeyuck sin muhtwacn mahtuh ke Rilif Sosaiti. Pacl wowo se in karihngihn muhsahi tohkohsrahi luhn God inge fah ahkwoye yohk tuhlihk muhtwacn uh, kahsrwelos in ahkolah wo in ahkfalye ma kunaclos ekihn mwet kol ke Alu ac ke mura lalos ac wi kuhpahsryang nuh sin sucu lalos. Oacna ke Tahmtahel Bonnie L. Oscarson el akacsruhi ekweah, tuhlihk muhtwacn fuhsr “luhngse in wi kuhlwacnsap. Elos enenuh in etuh lah yohk srihpaclos ac enenweyuck elos nuh ke orekma luhn molwelah.”⁷

Pwacyeiyac uh, muhtwacn fuhsr ah oraclah karihngihn lalos tari nuh sin mwet sahyac, tiac ma kuneyucki kuh ahkkahlwemyeyuck. Sie sucu nga etuh som sun mael siofok ma nuh ke acn sasuc se suc eltahl tiac etuh mwet kac. Ke wik se na emet ah, tuhlihk muhtwacn yac 14 se ke ward sasuc se laltahl ah tulac ke motonoac lalos us puhlwet in kukis se, painuhlos nuh ke pohloh acn sac. Ninac kiyacl ah tulac isracsrwelihk tohkohl ekihn mwet se ma usacl uh, ahkkweye kena luhn tuhlihk muhtwacn se nahtuhl ah in karihngihn.

Ninac se sahyac elyahkihn sie lwen ah ke wacngihnlac luhn tuhlihk muhtwacn yac 16 se nahtuhl ke ao el kwacna oasr lun lohm seltahl. Ke tuhlihk muhtwacn sac fahna sun lohm selos, ninac kiyacl ah ahkfohsyelwack ke kuhtuh kihsensiyuck ke acn el muhta we tuhkuh. Tuhlihk yac 16 sac apkuhran in wacngihnlac puhlaik lal in topuk fahk lah el iwen uslah ros se nuh sin katinmas se muhta siskaclos. El akihlen lah katinmas sac ngwetngwet in muhkahimtacl ac pihrihkyuck puhla lal in ke muhtwacta yohrohl. Ke lwelah luhn ninac kiyacl sahflahiyac ah, tuhlihk muhtwacn fuhsr sac tahfwelah in muhtwacta yurin muhtwacn mahtuh sac. Eltahl ekihn kawuck wowo se, ac akohnohki wowo lalos tuhtahflah nuh ke yac.

Kais sie sin muhtwacn fuhsr inge, ac puhkantwen sahyac oacna elos, akihlen enenuh ac orekma nuh kac. Oasr kena luhn tuhlihk muhtwacn fuhsr uh in karihngihn ac akacsruhi ma kuh in som nuh ke karihngihn wi muhtwacn mahtuh.

Macnsiskihn yac lasr uh, ke kuht nuhnkuh lah kuht ac oruh karihngihn lasr uh in wo fuhkah, kuht siyuck, ”Meac muhtwacn se [kuh mukul] se enenuh?” Kapsrwacni kihsensiyuck soko inge wi kena yohk la in karihngihn, kuht tuhfah kolyuck sin Nguhn in oruh ma ac sruhk ac ahkkweye mwet se. Nga lohng tari sramsram puhs nga tiac kuh in wacklah luhn tamuhlwel ac tahmtahel suc ahkinsewowoyeyuck ke ohiyac fihsrwacsr ke welah ac pwacngwack eke alu uh, kihsen puhsra ac nuhnak ke email, ohsun la sifacna ke pacl upac, solsol in wi mukwikwi luhn u se, kuh oruh kahsruh ke ohiyac tiac fihsrwacsr. Ninac pahpah lolacp, mempucr sasuc, mempucr muhnahslah, katinmas ac tuhmuhnmas, kuh mwet fuhsr ma elyah enenuh pacl yohk in liyeyuck ac yohk srihpac in kahsrweyuck sin tamuhlwel ac tahmtahel. Akacsruhi inmahsrlon prestuhnsi ke u luhn elders ac Rilif Sosaiti lwelah pacl fal in oreklac ma kunac.

Sahflahiyacn ma nuhkwewa fwacklac ac oreklac, karihngihn pwacye pa ahksahfyeyucklac kais sie ke luhngse oacna ke moklweyuck. Luhpan ac molin ac nuhnkweyacn karihngihn pwacye pa lah pwacye ekuhllah moul! Ke insiyacsr ikacklah ac ahkolah in luhngse ac weacng, ahkkweye ac ahkwoye, kuh ke karihngihn lasr fah tiac lainyuck. Ke luhngse oacna ke moklweyuck uh, ma usrnguck uh fah sikyak, ac kuht fah konwacack inkacnek in use tahmtahel ac tamuhlwel “tuhlac” wiyacsr nuh ke sruokyacn kahlwem nuhkwewa ke wosasuc luhn Jisus Kraist.

Mwet Lahngo pa mwe srihkasrak se lasr ke ma nuhkwewa—tiac ke ma kuht enenuh in oruh muhkwena tuhsruhk efuh kuht enenuh in oruh.⁸  “Moul Lal fin facluh mwe solsol se nuh sesr—in oraclah finsrak lasr uh in yohkwelihk, in muhlkuhnlah elyah lasr sifacna ac in solwacma mwet sahyac.”⁹Ke kuht sruikihn pacl lasr in sang kuhiyacsr in kahsruh muhtwacn ac mukul wiyacsr, ahkinsewowoyeyuck kuht tuh in eklac yohkwelihk nguhn lasr, yohkwelihk lihkihn puhsra ke luhngse luhn God, ac kuh in kahlwem ke plwacn Lal in kahsruh kais sie in fohlohk nuh Yohrohl. Kuht ac ahkolah yohk in akihlen mwe ahkinsewowo Lal ac rahrahlah in tahfwelah mwe sang ingacn nuh sin mwet sahyac. Insiyacsr fah tuhkweni on ke puhsrwacsr:

Lwelah kuht in ahkkahlwemye kaksyak ac luhngse luhn God ke in karihngihn ke luhngse nuh sin tahmtahel ac tamuhlwel ma pahtpaht wiyacsr.¹¹ Ma ac sikyak uh pa puhla orekweni oacna mwet fin acn Macrike mahtuh engankihn ke yac 100 tukun Mwet Lahngo El sikyang fin acn lalos.

“Ac tukun ma inge wacngihn fohs … ke srihpen luhngse luhn God ma oasr ke insiacn mwet uh.

“… Wacngihn sok, tuh akuhkuhin, … ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God.”¹²

Nga engan in fahkwack liye luhk sifacna lah fwackyuck ekyek inge akihlenyuck sin God ac lah, ke kuht sruokyacna ke kena luhn insiyacsr, kuht fah muh ahkolah wo in ohsun nuh sin Wen Nahtuhl, Jisus Kraist, ke tuhkuh Lal. Kuht ac fototoyang in ekihn mwet luhn Zion ac fah puhla ahluhkwelah engan wi elos suc kahsruh ke inkacnek ke ohiyacn mwet fahsr Tohkohl. Nga kena ac mongfihsrwacsr in pruhe tuh kuht in oruh oacna ke inen Jisus Kraist, amen.