Akwuck in Molwelah uh Fah Use Nuh Sesr Kahlwem Wolacna
In oruh akwuck inge ac ahkfuhlwactye olwelah inge ac usot nuh sum kahlwem wolacna ac karihngihnyuck ke facluh lohsrlah se inge.
Tamuhlwel ac tahmtahel, nga wi kom engan ke wosasuc, kuh ke mwe luti luhn Kraist.
Kawuck se tuh siyuck sel Elder Neil L. Andersen, ma ke Mwet Itngucul ke pacl sac, lah fuhkah puhla se in tuyak sramsram ye muhtuhn mwet 21,000 ke acn in Conference Center uh. Elder Andersen el topuk, “Tiac mwet 21,000 sac pa oruh kom in tuhfal ah; tuhsruhk Tahmtahel 15 muhta tukum ah.” Nga isracsr kac, tuhsruhk nga puhla ingena. Nga luhngse ac ahkkweye mukul 15 inge ekihn mwet pahluh, mwet liyactwen, ac mwet fahkwack.
Leum El fahk nuh sel Abraham lah ke fihtacn tuhlihk nahtuhl ac ke pristut, sucu nuhkwewa fin facluh ac ahkinsewowoyeyuck ke mwe insewowo ke wosasuc, uh finne nuh ke moul se tohkoh (Abraham 2:11; liye pac fuhs 2–10).
Olwelah ke mwe insewowo ke wosasuc inge ac ke pristut uh fohlohkihnyuckyak nuh fin facluh, ac na, ke 1842, Mwet Pahluh Joseph Smith el karihngihn mwe sang muhtahl nuh sin kuhtuhna mukul ac muhtwacn uh. Mercy Fielding Thompson el sie seltahl. Mwet Pahluh el fahk nuh sel, “[Mwe sang muhtahl] se inge fah eiskomlac liki lohsr uh nuh ke kahlwem na wowo se.”1
Mihsenge nga ke lohacng nuh ke akwuck in molwelah uh, ma ac use nuh sihk ac kom kahlwem wolacna se.
Akwuck ac Olwelah
Ke True to the Faith kuht riti: “Akwuck uh sie mukwikwi muhtahl, ahkfuhlwacteyuck ahkfahsryeyuck ke kuh luhn pristut. Akwuck uh arulacna yohk srihpac nuh ke engan ma pahtpaht lasr uh … pahngonyuck akwuck in molwelah. Elos pa pacptais, ahkkweyeyucklac, pahngonyuck nuh ke Melchizedek Pristut (nuh sin mukul), mwe sang muhtahl tempuhl, ac siliyucki ke macruht.”2
Elder David A. Bednar el luti, “Akwuck ke molwelah ac engan luhlahp uh karihngihnyuck ke Alu fohlohkihnyuckyak luhn Leum … kuh ma mwe insewowo luhn inkuhsrao kuh in tuhkuh nuh ke moul lasr kais sie.”3
Oacna sie kohtoh ke siskac luo, akwuck in molwelah nuhkwewa uh karihngihnyuck ke olwelah nuh sin God. God El olwelah mwe insewowo nuh sesr kuht fin ahkos olwelah ingacn ke suwohs.
Mwet pahluh Amulek el tahfuh, “Pa inge … pacl sac … in ahkolah in ohsun yurin God” (Alma 34:32). Kuht ac ahkolah fuhkah? Ke nwacsnwacs in eis akwuck uh. Kuht enenuh pac in, oacna kahs lal Prestuhn Nelson el fahk, “fahsr na ke inkacnek kom olwelah kac an.” Prestuhn Russell M. Nelson el sifilpac fahk, “Olwelah lom in ukwe Mwet Lahngo ke kom oruh olwelah lom ac ke kom sruokyacna olwelah lom an ac ikucslah sruhnguhl nuh ke mwe insewowo ke ma luhn nguhn nuhkwewa ac kuh pac nuh sin mukul, muhtwacn, ac tuhlihk yen nuhkwewa.”4
John ac Bonnie Newman, oacna kuhtuh suwohs, pa mwet suc Prestuhn Nelson el fahk muh ac eis insewowo uh. Sie sacnri ah, tukun eltahl wi alu wi tuhlihk fuhsr tolu nahtuhltahl ah, Bonnie el fahk nuh sel John, suc soenna mempucr luhn Alu uh, “Nga tiac kuh in sifacna oruh ma se inge. Kom enenuh in sulaclah lah kom ac tuhkuh wi kuht nuh ke alu kuht wi uh kuh kom sokwack sie alu ma kuht nohfohn kuh in wi, tuhsruhk tuhlihk inge in etuh pac lah pahpah tuhmwacltahl uh luhngse God pac.” Ke sacnri se na tohkoh ac ke sacnri nuhkwewa, John el tiac wi alu muhkwena; el kuhlwacnsap pac, sritacl ke piano ah ke kain in ward puhs, branch puhkantwen, ac Primary ke yac puhs. Nga tuh ohsun nuh sel John ke Eprel 2015, ac ke toeni ohsun sac, kuht sramsramkihn ma se ma e sang ahkkahlwemye luhngse lal nuh sel Bonnie pa in usacl nuh in tempuhl, tuhsruhk ma ingacn tiac kuh in sikyak el fin tiac pacptaislac.
Tukun wi Alu luhn Jisus Kraist luhn Mwet Luhlahlfongi ke Lwen-Sahflah ke lusen yac 39, John el pacptaislac ke 2015. Tukun yac se tohkoh, John ac Bonnie siliyucki ke Memphis Tennessee Tempuhl, yac 20 tukun el eis mwe sang luhn nguhn lal sifacna ah. Tuhlihk mukul yac 47 se nahtuhltahl, Robert, el fahk ke pahpah tuhmwacl, “Pahpah el arulacna sahromrom ke el eis pristut ah.” Bonnie el fahk pac, “John el arulacna puhla engan ac mwet engan se, tuhsruhk eis akwuck sac ac karihngihn olwelah lal uh ahkyohkye kuhlwacng lal.”
Iwaclah luhn Kraist ac Srihkasrak Lal
Yac puhs tari ah, Prestuhn Boyd K. Packer el sensenkihn fahk, “Orekma wo sahyacn akwuck ke wosasuc uh kuh in tiac molwelah kuh ahkenganye mwet uh.”5 Ahok, kuht tiac enenuh muhkwena akwuck ac olwelah in som nuh yurin Pahpah tuhmwacsr, tuhsruhk kuht enenuh pac Wen Nahtuhl, Jisus Kraist, ac Iwaclah Lal.
Tohkohsrah Benjamin el luti lah ke inen Kraist muhkwena molwelah ac tuhkuh nuh sin tuhlihk nuhtin mwet (liye Mosiah 3:17, liye pac Ip Yohk ke Luhlahlfongi 1:3).
Ke Iwaclah Lal, Jisus Kraist El molikuhtlac liki mwactan Puhtatlac lal Adam ac oruh tuh kuhnuh sesr inauliyak ac enganwack. Ke Moul Lal, El orwaclah sie srihkasrak nuh sesr in eis akwuck in molwelah uh, suc pa kuh ke in oacna God ahkkahlwemyeyuck (D&C 84:20).
Tukun Mwet Lahngo El eis akwuck ke pacptais in “ahkkweyelah ma suwohswohs nuhkwewa” (liye 2 Nephi 31:5–6), Setuhn el srihkacl. Oacna, mwe sruhf nuh sesr uh tiac tui tukun kuht pacptaislac kuh siliyucki, tuhsruhk in eis akwuck muhtahl ac ahkfuhlwactye olwelah kac uh nwek-kuhtlac ke kahlwem wolacna se ac use nuh sesr kuh in lain ac kuhtanglah mwe sruhf uh.
Mwe Sensenkihn
Isaiah el palye lah ke lwen sahflah, “mwet uh aktaekyala faclu … ke elos … siakos wuleang se” (Isaiah 24:5; liye pac D&C 1:15).
Mwe sensen kuhpahsr, ituckyang nuh sel Pahluh Joseph Smith, pa kuhtuh selos fototo nuh sin [Leum] ke ngoasrolos, … [ac] elos luti ke mwe luti ke masap luhn mwet uh, oreklac ke luhman God, tuhsruhk elos lahfwekihn kuh ma oasr kac uh (Joseph Smith—History 1:19).
Paul el sifilpac sensenkihn lah puhs mwet ac “oru alu lalos mwe na luma, a [wangin] ku elos eis kac. Kom in srikomla liki mwet su ouinge.” (2 Timothy 3: 5). Nga kalweni, sri komlac liki mwet ohinge.
Mwe sruhf ac mwe srihke ke moul se inge oacna “wolf lemnak uh” (Matthew 7:15). Mwet liyacacng sip pwacye se pa ac ahkolah, karihngihn, ac sensenkihn sip ac un kosro ke pacl se wolf inge apkuhranme (liye John 10:11–12). Ke mwet kahsruh liyacacng sip se suk in ukwe moul suwohswohs luhn Mwet Liyacacng Sip Wowo sac, yac kuht tiac mwet liyacacng nguhnasr sifacna ac mwet sahyac uh pac? Ke kahsruh luhn mwet pahluh, mwet liyactwen, ac mwet fahkwackelihk, suc kuht tuhfahna ahkkweyelah, ac ke kuh ac mwe sang luhn Nguhn Muhtahl, kuht kuh in liye kosro wolf uh tuhkuh kuht fin liye wo ac ahkolah. Kuh, ke kuht mwet liyacacng mahnosr sifacna uh ac mwet sahyac pac kuhtuhna pacl uh, ongaiyac uh kuh in sikyak. Ma tiac ahkoeyuck uh kol nuh ke ongaiyac. Nga suli kais sie sesr in mwet liyacacng pwacye.
Ma Kom Etuh ac Puhlakihn
Sackracmacn el sie akwuck ma kahsrwekuht in muhtana ke inkacnek uh, ac nwacsnwacs in ipeis el sie mwe ahkpwacyei lah kuht sruokyacna olwelah ma wi akwuck nuhkwewa sahyac uh. Ke yac ekahsr somlah ah, ke muhtwacn kiyuck, Anita, ac nga tuh kuhlwacnsap Arkansas Little Rock Mission ah, nga som in luti wi missionaries fuhsr luo. Ke mwe luti lasr ah, tamuhlwel wowo se kuht luti ah fahk, “Nga tuh wi alu lomtacl an: efuh komtacl kang puhret ac nihm ke kof ke Sacnri nuhkwewa? Ke alu lasr ah, kuht oruh pacl luo ke yac se, ke Istuh ac Kristmas, ac arulacna yohk kalmac.”
Kuht akacsruhi nuh sel ma sapkihnyuck nuh sesr in “tuh toeni nuh sie pacl pucspucs in ipeis ke puhret ac wine” (Moroni 6:6; liye pac D&C 20:75). Kuht riti yohk Matthew 26 ac 3 Nephi 18. El topuk lah el tiac na liye yohk srihpaciyac uh.
Na kuht tuh akacsruhi ma kapsrweyuck inge: “Motko muh kom wi sie ongaiyac na upac se ke stosah soko. Kom kihnet ac kom nuhkankomlac. Sie mwet yucme, liye lah kom oan sruhilac, ac pahngon emergency nempuh, 911. Kom utucklac ac tuh esmaklac.”
Kuht siyuck sin tamuhlwel se inge, “Ke kom ac kuh in akihlen ma raunikomlac uh, kihsensiyuck fuhkah ac oasr sum uh?”
El fahk, “Nga ke etuh lah fuhkah tuh nga in oasr insac ac suc konweyucyak ah. Nga ke sang kuloh nuh sin mwet sacn lwen nuhkwewa mweyen el molwelah moul luhk.”
Kuht akacsruhi nuh sin tamuhlwel wowo se inge ohiyac ma Leum E molwelah moul lasr ac ohiyac ma kuht enenuh in sang kuloh nuh Sel lwen nuhkwewa, lwen nuhkwewa, lwen nuhkwewa!
Kuht tuh siyuck, “In etuh lah El acse moul Lal nuh sum ac kuht, fuhkah fususiyacn mongo bread ac nihm ke kof suc luhmweyuck muh mahnol ac srah Kacl uh?”
El fahk, “Nga kahlwem, nga kahlwem. Tuhsruhk ma se luhlah. Alu lomtacl uh tiacna pwacr oacna alu lasr uh.”
Ke ma sacn kuht tohpkohl, “Meac kom ac oruh fin mwet Lahngo Jisus Kraist El utyak ke sruhnguhl lom uh?”
El fahk, “Pacl sac na, nga e puhtati nuh ke intwek.”
Kuht siyuck, “Yac tiac pa ngacn ma kom ac puhla ke kom ac fahsryak nuh ke lohm in alu luhn Mwet Luhlahlfongi ke Lwen-sahflah uh—in epahsr nuh sin Leum?”
El fahk, “Nga kahlwem, nga kahlwem, nga kahlwem!”
El tuh tuhkuh nuh ke alu ah ke Sacnri in Istuh sac ac el nuh fohlohk na.
Nga suli kais sie sesr in siyuck sesr sifacna, “Meac akwuck, weacng kuhfa luhn Leum, ma nga enenuh in eis, ac meac olwelah ma nga enenuh in oraclah, sruokyac, ac ahkfuhlwactye?” Nga fahk na pwacye lah in oruh akwuck ac ahkfuhlwactye olwelah uh fah usot nuh sum kahlwem wolacna ac karihngihnyuck ke facluh lohsrlah se inge. Ke inen Jisus Kraist, amen.