Fakpacp ac Inse Puhsisacl

Ke Wuleang Matu ah, kuht lotwelah ke sie mukul fuhsr kahruhp suc siyuck sin Jisus, “Mwet Luti, orekma wo fuka se nga enenu in oru tuh nga fah ku in eis moul ma pahtpat?”² Mwet Lahngo El kwacfel elan liyacacng masap uh met. Mwet Luti El tohykh sang nuh sin mukul fuhsr sac siepac enenuh fal nuh ke enenuh ac ohiac lal.

“Ac Jisus el fahk nuh sel, Kom fin ke kom in suwosna, kom som kukakunla ma lom nukewa ac sang molo an nu sin mwet srukasrup, na ac fah oasr mwe kasrup lom inkusrao; na kom fahsruh fahsr tukuk.

“Ke mwet fusr sac lohng ma inge, el som ac arulana toasrla kac, mweyen el sie mwet na kasrup.³

Kapsruh top luhn mwet fuhsr kahsruhp sac nuh ke ma Amulek el puhla, ma ahkuhtweyucki ke Puk luhn Mormon. Amulek el sie mwet alken ac kapkapwack ke sucu ac mwet kawuck pucspucs la.⁴El ahkuhtwelyac sifacna oacna sie mukul suc pahngonyuck pacl puhs tuhsruhk tiacna ke lohng; sie mukul suc etuh ke ma luhn God tuhsruhk tiac ke etuh.⁵ Amulek el mwet na wowo se, tuhsruk el lohsrlah ke ma luhn facluh oacna mukul fuhsr kahsruhp se ahkuhtweyucki ke Wuleang Matu ah.

Finne el ahktoasrye insiacl met, Amulek el ahkos puhsrwen sie lupufacn, eisacl mwet pahluh Alma nuh in lohm sel, ac sang mwe kahsruh nuh sel. El mokleyuck in nguhn ke pacl in muhtwacta lal Alma ac pahngonyuck in fahkwaclihk wosasuc uh. Amulek el pihlacsrwaclah kol, selfuh, ac ma sacohk nuhkwewa lal … nuh ke kahs luhn God, [el] sruhngwacyuck selos suc tuh sie pacl ah kawuck lal ac oacyacpacpac sin pahpah tuhmwacl ac mwet lal.”⁶

Mac kom nuhnkuh tuh sielacna ke kain in top luhn mukul fuhsr kahsruhp sac ac Amulek?

Ke puhlan pacl sensen ke mweun ahkuhtweyucki ke Puk luhn Mormon ah, sie ayaol ke lwacta sikyak inmahsrlol Moroni, kacptin luhn mwet mweun Nephites, ac Pahoran, sifen mwet nuhnuhnkuh ac kafuhnah luhn acn sac. Moroni, suc mwet mweun la kweoklac ke srihpen kahsruh suhfal sin kafuhrmacn, sihmlac nuh sel Pahoran “ke ohiacn kaiyuck”⁷ac ahkkolukyacl ac mwet kol wiyacl ke nuhnak suhfal, alsruhngwesr, srahngwesroa, ac finne in suhlallacl.⁸

Fihsrwacsr Pahoran lacnn koasel Moroni ac ahkkoluk suhfal lal, tuhsruhk el tiacna. El topuk ke luhngse ac ahkuhtweyac sie fohlohksahk lain kafuhrmacn ke ma Moroni el tiac etuh kac. Ac na Pahoran el fahk:

“Liye, nga fahk nuh sum, Moroni, lah nga tiacna engan ke mwe ongaiyac yohk lom, ahok, ma inge ahkahsorye nguhnihk. …

“Ke lwacta se lom ah kom kaiyuc, tuhsruhk macnsis; nga tiacna foloyak, tuhsruhk nga engan ke wolacna luhn insiom.”⁹

Kom nuhnkuh tuh meac topukyacn mongfihsrwacsr lal Pahoran nuh ke ahkkoluk lal Moroni ah?

Ke toeni luhlahp ke mahlwem ohnkohsr somlah ah, Prestuhn Russell M. Nelson el ahkuhtweyac top lal nuh ke solsol lal Prestuhn Thomas S. Monson ah in lutlut, motko, ac kapsra ma pwacye lun Puk luhn Mormon uh. El fahk, “Nga srihke in ukwe kahs in kahsruh lal uh. Inmahsrlon ma sahyac uh, nga oraclah sie tahk ke ma ke Puk luhn Mormon, meac ahkkweye kac, meac ahkpwacye kac, meac akfalye, meac ahkkohnye, ac meac ahkkahlwemye. Liye Puk luhn Mormon ke atac sacn el sie ohiac na suhmaht ac mokleyuck! Nga kwacfe kais sie suwos in oruh.”¹⁰

Prestuhn Henry B. Eyring el oacyacpac ahkyohkye yohk srihpaciyen nguhsr lal Prestuhn Monson ke moul lal. El fahk lah:

“Nga riti Puk lun Mormon lwen nuh kwewa puhs liki yac 50. Ke ma inge, fihsrwacsr ngan nuhnkuh lah kahs lal Prestuhn Monson ma nuh sin mwet sahyac sahyuck. Tuhsruhk, oacna kowos nuh kwewa, nga puhla ahkkweyeyuck luhn mwet pahluh ac olwelah lal suliyuc in orwaclah sie kuh wo liki. …

“Ma sikyak engan nuh sihk, ac nuh sin inkaiyowos, pa ma mwet pahluh el olwelah ah.”¹¹

Meac kom nuhnkuh muh ahkuhtweyac top sa ac pwacye nuh ke solsol lal Prestuhn Monson sin mwet kol luo luhn Alu uh inge?

Nga tiac fahk muh top fokoko ke nguhn lal Amulek, Pahoran, Prestuhn Nelson ac Prestuhn Eyring uh sikyak muhkwena ke ohiac wo luhn Kraist. Pwacyena, ohiac ac puhlakihnyuck kuhpahsr puhkantwen inge kol nuh ke kapkapwack ke nguhn ahkkahlwemyeyuck ke moul lun mwet kuhlwacnssap fuhlwact ahkosr inge. Tuhsruhk Mwet Lahngo ac mwet pahluh Lal ahkyohkye ohiac yohk srihpac ma kuht nohfohn enenuh in kahlwem na pwacye kac ac kwacfeacng in ahkyohkye ke moul lalos.

Nuhnak muhnahs akihlen ohiac luhn Leum orekmakihnyuck in ahkuhtwelyac Sifacna ke ma suhmuhslah ten inge: “Eis srenenu luk nu fowos ac lutlut sik, tuh nga fakpap ac inse pusisel: ac kowos fah konauk mongla.”¹²

Kuht enenuh in lotwelah lah Mwet Lahngo El sulaclah in ahkyohkye fakpacp ke ohiac ac ma wo nuh kwewa ma El kuh in sulaclah.

Kain atac sepacna inge sikyak ke sie fwackyuck eisyuck sel Mwet Pahluh Joseph Smith ke 1829 ah. Leum El fahkwack lah kuht enenuh in lotwelah Sel, ac lohng kahs Lal, ac fahsr in fakpacp ke Nguhn Lal, ac na kuht fah eis mihs Sel me.”¹³

Fakpacp pa sie ki ke ohiac luhn Mwet Molwelah ac oreklac ke top suwohswohs, kena in fuhlweacng, ac fokoko in sifacna tulokihn. ohiac inge kahsrwe kuht in kahlwem na pwacye ke kais sie orwaclah lal Amulek, Pahoran, Prestuhn Nelson, ac Prestuhn Eyring ah.

Mwe srihke, Prestuhn Nelson ac Prestuhn Eyring top arlac suwohs ac sa nuh ke ahkkweye lal Prestuhn Monson in riti ac lutlutkihn Puk luhn Mormon. Tuh finne kwewana mukul luo an kuhlwacnsap ke acn yohk srihpac ac akihlenyuck ke Alu uh ac lutlutkihn ma suhmuhslah uh ke yac nuh ke yac, elos ahkkahlwemye ke top lalos ke tiac ahlohloh kuh lah elos tiac enenuh.

Amulek el kena in fuhlweacng nuh ke kena luhn God, eis sie pahng in fahkwack ke wosasuc uh, ac fihliyac ma ohlah lal ac mwet aetuhi nuh kwewa lal. Ac Pahoran el ahkinsewowoyeyuck ke etuh ac kuh fokoko in sifacna in orekma likina in mukwikwi oacna el ahkuhtweyac nuh sel Moroni ma upac tuhkuh ke lainyen kafucrmacn ma oreklac ah.

ohiac luhn Kraist ke in fakpacp kwacna tiac kahlwem ke facluh se mihsenge uh. Fakpacp el kuh, tiac muhnahs, fokoko, kuh in mukwikwi; puhlaik, tiac sahngweng; am, mana fal; puhsisacl, tiac insefuhlwact; ac kuhwacng, tiac inse srihsrihk. Sie mwet puhsisacl el tiac sa in muhlat, insefuhlwact, kuh fohlkahs ac pihsrpihsr in ahkkahlwemye orwaclah wo luhn mwet sahyac uh.

Tuhsruhk puhsisacl el ahkuhtweyac luhlahlfongi ke God ac enenuh pacl nuh kwewa nuh ke kolyuck ac ahkkweye Lal, sie ohiac usrnguck ke fakpacp pa sie kuh in eis ke ma luhn nguhn in luti kwewana sin Nguhn Muhtahl ac sin mwet ma oacna in koflah, kuh nihkihn, kuh srihklac lutlut la, suc tiac sruok kunohkohn yohk srihpac, kuh ma oacna in wacngihn na suhna la in kahsruh. Esam ke Naaman, kacptin luhn mwet mweun luhn tohkohsrah fin acn Syria, kuhtanglah insefuhlwact lal ac puhsisacl 8in eis kahsruh luhn mwet kuhlwacnsap lal in ahksol Elisha mwet pahluh ac yihlac ke infacl Jordan pacl itkohsr.¹⁴Fakpacp pa ma in karihngihn liki mwe lohsr insefuhlwact ma kwacna sikyak ke eye, kuh, kahsruhp, ac kaksahk.

Fakpacp pa sie atac oreklac ke kena, oruh suwohswohs ke sulaclah inmahsrlon ma pwacye ac stuhuh, ac kwacfeacng pacl nuh kwewa in sruokyac nwacsnwacslah luhn ma koluk lasr.¹⁵ Ma inge oacyacpacpac sie mwe sang ke nguhn ma fal nuh sesr in suk.¹⁶ Kuht enenuh in esam, ohinge, srihpac ma suc pa sie mwe insewowo utuckuh in ahkwoye ac kuhlwacnsapuh tuhlihk nuhtin God.¹⁷

Ke kuht tuhkuh ac ukwe Mwet Lahngo uh, kuht ahkyohkye ac kais kuhtuh kuh in eklac oacna El. Kuht fokokoi ke nguhn ma luti in kuh in sifacna kutong ac tuna kuh ac mukwikwi efahl. Pwacyena, fakpacp pa ma kuht enenuh in eklac mwet tuhma lutlut lun Mwet Kol ac in tiac ma kuht oruh na.

“Moses el lutiyuk ke kain in etauk nukewa lun mwet Egypt, ac el sie mwet arulana pah in kas ac ku ke orekma.”¹⁸ Tuhsruhk, el “mwet na fakpap se, yohk liki kutena mwet fin falu.”¹⁹ Etwacack ac kuh lal kuh in oruh elin yohk nuhnkal. Sahyacna, ohiac ac mwe sang ke nguhn ke fakpacp ma el ahkinsewowoyeyuck kac ahksrihkyelah insefuhlwact ke moul lal ac ahkyohkye kuh lal Moses in ahkfahsrye srihpac luhn God.

Srihkasrak usrnguck fuhlwact ac yohk srihpac emet ke fakpacp uh kuh in sukokyak ke moul luhn Mwet Lahngo Sifacna.

Mwet Molwelah Wowo sac, suc puhtati nuh ye ma nuh kwewa”²⁰ ac kweok, kihnet, ac misac “in aknasnasye kut liki ma sesuwos nukewa lasr,”²¹oul nien mwet tumal lutlut ke luhngse.²²Kain fakpacp inge pa ma akihlenyuck emet luhn Leum oacna sie mwet kuhlwacnsap ac mwet kol.

Jisus El fah mwe srihkasrak yohk ke top suwohswohs ac kena in sang oacna El kweokkihn ngan upac fin acn Gethsemane ah.

“Ke el sun acn we el fahk nu selos, [mwet tuhma lutlut Lal], Pre tuh kowos in tia putatyang nu in mwe sruhf.

“Ac el … sikukmutuntei ac prue,

“El fahk, Papa, fin ou lungse lom, eisla cup in keok se inge likiyu. Tusruktu, in tia ou lungse luk, a lela ma lungse lom in orek.”²³

Fakpacp luhn Mwet Lahngo ke ma pahtpaht enenweyuck inge ac puhla kweok ahkkahlwemyeyuck nuh sesr kais sie yohk srihpaciyen in sang lahlmwetmwet luhn God met liki lahlmwetmwet lasr sifacna.

Kalweni in wulweacng luhn Leum ac fokoko in sifacna muhtweng el usrnguck kwewana ac mwe luti nuh sesr nohfohn. Ke sie un solse ke mwet karihngihn tempuhl ac solse fin acn Rome tui fin acn Gethsemane in sruokilyac Jisus ah, Peter el ollah katlas nahtuhl uh ac suhpuhklah insroac lacyot luhn mwet kuhlwacnsap tol se.²⁴Mwet Lahngo el kahlyac insrwacn mwet kuhlwacnsap sac ac onwellah.²⁵Nuhnak muhnahs esam lah El saplaklac ac ahkinsewowoyelah mwet se ma srihke in sruokilyac ah orekmakihn kuh in kuhsrao sepacna ma kuh in kahsrwellah in tiac sruhuh kuh srihpsrihpyak ah.

Nuhnkuh pac ke ma sikyak ke Mwet Kol el ahkkolukyeyuck ac nuhnuhnkweyuck met luhkwel Paeluht in srihpsrihpyak.²⁶Jisus el fahkwack ke pacl tuhkahkyak el ah “Ya kom nunku mu nga tia ku in pang nu sin Papa tumuk, na in kitin pacl ah na El ac supwama pus liki legion singoul luo ke lipufan lal?”²⁷Tuhsruhk, Mwet Nuhnuhnkuh Ma Pahtpaht luhn kwewana mwet moul ac mwet misac”²⁸ sahyacn ma enenuh in sikyak tuh nuhnuhnkweyuck sin sie mwet tuhfahna srihsrngiyucki luhn ohfohs in masap uh. “Tusruktu Jesus el tiana fahkla siefanna kas, su arulana mwe lut nu sel Governor.”²⁹ Fakpacp luhn Mwet Lahngo sikyak ke top in luti Lal, kuh in sruok, ac sulaclah in tiac orekmakihn kuh fokoko lal in kahsrwelwacng.

Mormon el luti lah kuh ac mwe sang nuh kwewa ke nguhn uh tuhkuh ke pwelucng in fakpacp luhn mwet se.

“Ohinge, fin oasr luhlahlfongi luhn sie mwet enenuh se na in oasr finsrak lal; tuh fin wacngihn luhlahlfongi tiac kuh in oasr finsrak.

“Ac sifilpac, liye nga fahk nuh suwos lah kuh in luhlahlfongi ac finsrak yohrohl, sahyacn na el fakpacp, ac inse puhsisacl.

“Fin ohinge, luhlahlfongi ac finsrak lal an wacngihn srihpac, tuh wacngihn kuhtwena ma inge wo ye muhtuhn God, sahyacn na fakpacp ac inse puhsisacl; ac fin sie mwet el fakpacp ac inse puhsisacl, ac fahkwack ke kuh luhn Nguhn Muhtahl lah Jisus pa Kraist, enenuh na in oasr luhngse muhtahl yohrohl; tuh fin wacngihn luhngse muhtahl yohhrohl na el tiac oacwac; ohinge enenuh na in oasr luhngse muhtahl yohrohl.”³⁰

Mwet Lahngo el fahk, “Insewowo elos su fakpap, Tuh faclu fah ma lalos.”³¹Fakpacp el sie ip yohk srihpac ke ohiac fuhlwactlacna ac kuh in eisyuck ac ahkyohkyeyuck ke moul lasr ke srihpen Iwaclah luhn Mwet Lahngo.

Nga fahkwack luhlahlfongi lah Jisus Kraist pa Mwet Molwelah sifil moulyak ac moul lasr. Ac nga olwelah lah El fah kol, karihngihn ac ahkkweye kuht ke kuht fahsr in fakpacp ke Nguhn Lal. Nga fahkwack mwe loh pwacye luhk ke ma pwacye inge ac olwelah ke ine muhtahl luhn Leum Jisus Kraist, amen.