U luhn Elders
In oasr u se na luhn Melchizedek Pristut ke ward se oracni mwet sruok pristut in oruh ohiyac nuh kwewa ke orekma nuh ke molwelah uh.
Tiac paht tukun Alu uh tuh akwucki ke we sahflah se inge ah, Leum El tuh fahk ke sie fwackyuck, lah ke pruhe in luhlahlfongi lasr kuht ac eis masap Lal kuht in muh kuh in etuh lah kuht ac us fuhkah alu Lal ac eis ma nuhkwewa ye Muhtahl na.1 Ip yohk se inge ukweyuck ke Alu uh—ac olwelah sacn ahkfuhlwactyeyuck sin Leum—pacl sac me. Ohiyac nuh ke u luhn pristut ac kuhlwacnsap uh tuh fwack pengana pacl,muhtwacwacack yohrohl Joseph Smith ke pacl emet ma ohfohs ke pristut ac u uh tuh oreklac ke lwen lasr uh ah. Ohiyac na wowo tuh ahkkahlwemyeyuck ac orekmakihnyuck ke pacl lal Prestuhn Brigham Young, John Taylor, ac Spencer W. Kimball, oasr pac sahyac, in orekmakihnyuck ke U luhn Singucul Luo, Itngucul, prist fuhlwact, ac kuhtuh pac ohfohs ac u ke kwewana Melchizedek ac Aaronic Pristut.2 Ingena, fahk se kena kihtin pacl somlah ah, Prestuhn Russell M. Nelson el fahkwack ke sie ikihlyuck na yohk srihpac.
Fin nga kuh in kalweni kuhtuh fahk lal ah: “Ofong kuht fahkwack ke sie nahweyuck sasuc na yohk srihpac ke u lasr ke Melchizedek Pristut uh in oruh orekma luhn Leum in wo liki met ah. Ke kais sie ward, prist fuhlwact ac elder uh ingena fah toeni nuhke u sefanna luhn elders … [ac] u luhn [prist fuhlwact ke stek] uh ac oasr na ke kunohkohn ke pristut ma srackoasr selos pacl sacn an.”
Prestuhn Nelson el fahk pac:
“Ikihlyuck inge tuh liyeyuck ke mahlwem pucspucs. Kuht tuh puhla sie enenuh yohk in ahkwoye karihngihnyacn mempucr lasr uh. … In oruh ma sacn in wo, kuht enenuh in ahkkweyelah u ke pristut uh in sang kolyuck yohk nuh ke luti luhn luhngse ac taptap ma Leum El kena nuh sin Mwet Luhlahlfongi Lal.
“Ikihlyuck inge ma moklweyuck sin Leum, Ke kuht oruh uh kuht ac oraclah wo likina ke kuht tuh tuhfahna oruh met ah.”3
Sapkihnyuck sin Prestuhnsi se Met, Elder Ronald A. Rasband ac nga in sang pac kuhtuh ahkuhtweyac ma kuht etuh muh ac topuk siyuck ma kuh in oasr suwos uh.
U luhn Elders ac Prist Fuhlwact
Ma se met, in kalweni, meac ikihlyuck ke u luhn prist fuhlwact ac u luhn elders ke ward uh? Ke ward uh, mempucr ke u luhn elder ac u luhn prist fuhlwact uh ac ingena toeni nuhke u se luhn Melchizedek Pristut in prestuhnsi se na luhn u sacn. U se inge, puhseni pihsaclos ac ma sefannalac, ac fah pahngpahng muh “u luhn elder.” U luhn prist fuhlwact uh wacngihnlac. U luhn elder pa nohfohnna elder an ac mukul ma fal tari in elder lac ke ward uh wi pac prist fuhlwact ma tiac oasr ke kuhlwacnsap pacl sacn ke pisaprik, ke prestuhnsi luhn stek ke kaunsel fuhlwact, kuh elos ma ekihn patriarch tiac kahfofo uh. U luhn prist fuhlwact ke stek uh pa prist fuhlwact ma kuhlwacnsap ke prestuhnsi luhn stek, ke pisaprik, ke kaunsucl fuhlwact, ac elos ma ekihn patriarch kahfofo uh.
Prestuhnsi ke U luhn Elders
Prestuhnsi ke U luhn Elders uh ac tahkihnyucklac fuhkah? Prestuhnsi luhn stek ac eslah mwet kol ke u luhn prist fuhlwact ke pacl sacn ac prestuhnsi ke u luhn elders ac pahngon sie prestuhn ac mwet in kahsruh sasuc nuhke u luhn elders ke kais sie ward. Prestuhnsi sasuc ke u luhn elders uh kuh in lwelah elders ac prist fuhlwact, ke kain in matwac ac oasr etuh la, tuhkweni kuhlwacnsap ke prestuhnsi sefanna luhn u se. Elder se kuh prist fuhlwact se kuh in kuhlwacnsap ekihn prestuhn se luhn u sacn kuh ekihn mwet in kahsruh se ke prestuhnsi sacn. Ma se inge in tiac muh prist fuhlwact uh eslah kolyuck ke u luhn elders uh. Kuht ke liye elders ac prist fuhlwact uh in tuhkweni orekma ke oacna sie kuhpahsr ke prestuhnsi luhn u ac ke kuhlwacnsap luhn u. Eklac luhn u inge enenuh in orekmakihnyuck in sa fin kuh.
Ohfohs ke Pristut ke U luhn Elders
Kuh ikihlyuck ke ma oraclah u uh ekuhllah ohfohs ke pristut ma sruokyuck sin mempucr ke u uh? Moh, oruh se inge tena eslah kuhtwena ohfohs ke pristut suc ma oacna sie mwet ke u tuh akmuhsralah nuh kac pacl tari ac. Oacna kom etuh an, mukul se kuh in akmuhsralah nuhke kain in ohfohs ke lusen moul lal, ac tena wacngihnlac kuh tuloki kuhtwena ma kom akmuhsralah nuh kac ke kom eis ma sasuc se uh. Ke kuhtuh ohiyac mwet sruok pristut se kuh in kuhlwacnsuhpuh puhs liki ohfohs se ke pacl se, oacna ke prist fuhlwact se kuhlwacnsap pac ekihn patriarch se kuh ekihn pisap se, el oacpacna tiac orekma ke ohfohs luhn pristut lal an kwewa pacl sefanna. Oacna Pisap ac Itngucul uh, elos tena oruh kuhlwacnsap ke ohfohs ingacn ke elos tui liki kuh srack ekihn uh. Ohinge, kuhtwena ohfohs ke pristut kuh ohfohs ma mwet se sruok uh, ke el mempucr se ke u luhn elder uh, el kuhlwacnsap ekihn elder se.
Ke yac ekahsr somlah ah, Prestuhn Boyd K. Baker el akihlen lah “pristut uh yohk likina ohfohs nuhkwewa kac uh. … pristut uh tiacna kihtakatwelihk. Elder se el sruok luhpan pristut oacpacna Mwet Sap se. (Liye D&C 20:38.) Ke sie mukul [ituckyang pristut nuh sel], el eis nohfohn. Ohinge, oasr suhnuhn ohfohs ke pristut—kihtakatwelihk luhn wal ac kunohkohn.… kuhtuh pacl uh ohfohs se kuh in sramsramkihnyuck oacna in fuhlwact liki kuh srihk liki ohfohs se sahyac an. Likina in oasr ohfohs ‘fuhlwact’ kuh ‘srihk’ ke Melchizedek Pristut, ohfohs ke Melchizedek Pristut ahol kain in ohiyac luhn kuhlwacnsap.4 Mukul wiyuck, nga finsrak na pwacye muh kuht in tiac sulpac sramsram ke sie ohfohs muh yohk liki kuh fuhlwact liki sie pac ohfohs ke Melchizedek Pristut.
Elders uh ac srackna prist fuhlwact akmuhsraiyucklac pacl elos pahng nuhke sie prestuhnsi luhn stek, kaunsucl fuhlwact, kuh pisaprik—kuh ke kuhtuh pacl wina sulwaclah lal prestuhn luhn stek ke pruhe in nuhnkuh ac pihrihkyuck uh. Ke lusen pacl in kuhlwacnsap lalos ke prestuhnsi luhn stek, kaunsucl fuhlwact, kuh pisaprik uh tari, prist fuhlwact uh ac sulpacna weacng u luhn elders ke ward sacn.
Kolyuck luhn Prestuhn ke U luhn Elders
Suc kol orekma luhn prestuhn ke u luhn elders uh? Prestuhn luhn stek el karihngihn Melchizedek Pristut ke stek lal uh. Ke ma inge, prestuhn ke u luhn elders el karihngihnyuck sin prestuhn luhn stek, suc sang ahkpah ac kolyuck sin prestuhnsi luhn stek ac sin kaunsucl fuhlwact uh. Pisap, suc pa prist fuhlwact ma karihngihn ward uh, oacyacpac miting pacl nuhkwewa yurin prestuhn ke u luhn elders. Pisap el pwacpa yohrohl ac sang kolyuck fal ke woiyacn kuhlwacnsap ac ahkinsewowoyeyacn mempucr ke ward, orekma in fal nuhke u srihsrihk nuhkwewa ke ward uh.5
Srihpac luhn Eklac Inge
Meac srihpac luhn ikihlyuck ke u luhn Melchizedek Pristut uh? In oasr u se na luhn Melchizedek Pristut ke ward se oracni mwet sruok pristut in oraclah ohiyac nuhkwewa ke orekma nuh ke molwelah, weacng tempuhl ac orekma ke ma mahtuh luhn sucu ma met kuhtuh karihngihnyuck sin u luhn prist fuhlwact. Ac lwelah mempucr ke u ke matwac nuhkwewa ac mwet wi an in eis kahsruh sin mwet fokoko ac pah in oruh luhn kais sie ac elos ke kain in ohiyac luhn moul. Oacyacpac use pacl wowo nuh sin mwet sruok pristut suhmaht in kahsruh mwet sahyac, weacng mukul kuh in ekihn elder, mempucr sasuc, mwet wo matwac, ac elos ma fohlohk wi mukwikwi luhn Alu. Nga tiac kuh in ahkkahlwemye in fal luhpan rahrah luhk in nuhnkuh ke yohkwelihk ke kunohkohn ma u luhn elders ac eis pacl fahsruh uh.Lahlmwetmwet, pah in oruh, kuh in nuhnak, ac kuh ma ac konweyuckyak ke kalmeyacn u ke muhtwacwacack sasuc se inge ac akwuck sasuc ke kuhlwacnsap luhn pristut ke Alu uh nohfohn.
Yac longoul somlah ah ke toeni luhlahp uh, nga tahfuh soko sramsram tuh sruhmuhnyuck sel Elder Vaughn J. Featherstone ke Itngucul suc nga luhlahlfongi muh fal in kalweniyuck inge.
Ke 1918 Tamuhlwel George Goates el mwet imac se suc yok sugar beets fin acn Lehi, Utah. Winter uh sa sikyak ke yac sac ahkkwekweyaclah inkaiyacn fukun beets infohk in imac ah. Sel George ac mukul fuhsr nahtuhl, kosracni uh suhmuhi ac upac. Ke pacl sacn, mas se fahsrelihk ac mwet uh weack. Ma na upac se eslah moul luhn tuhlihk mukul se nahtuhl George Charles ac tolu sin tuhlihk srihsrihk nahtuhl Charles ah—muhtwacn luo ac mukul se. Kena lusen lwen ohnkohsr, George Goates ke ahsor oraclah kal tolu nuh Ogden, Utah, use mahno nuh lohm ah in puckpucki. Ke sahflahiyacn pacl na koluk sacn, George ac Francis ahkoelah wackuhn nahtuhlos ac fohlohk nuhke imac in beet ac.
“‘[Ke elos kahsruhsr] eltahl aikihl nuh sin kuhtuh wackuhn nwacnwaclah ke beets som nuh ke factory ac utuck sin mwet imac atuhlani ac. Ke elos ahliki uh, kais sie mwet us uh ac pwacngak ke paholos: ‘Hi ya, Pahpah George,’‘Sislah koluk, George,’ Koluk na pwacye, George,’‘Puhkantwen na pwacye kawuck lom, George,’
“Ke wackuhn sahflah soko ah Jasper Rolfe mwesrmwesr muhta. El oruh pwacngak engan se ac wowolac: ‘Pa ngwe nohfohn, Pahpah George.’
“[Tamuhlwel Goates] foracng nuh sel Francis ac fahk: ‘Nga finsrak ma lasr nohfohn.’
“Ke eltahl sun motonoac ke imac ah, Francis el ahtulac liki wackuhn in beet luhlahp soko ah ac ikacslah kalkal sac ke [pahpah tuhmwacl] yucyang nuh ke imac ah. [George] el tui, tulokihnyac ohsr ah, … ac liye imac ah. … Wacngihn sugar beet ke imac na fohn sac. Na el akihlwacnwack kalmac sel Jasper Rolfe ke el wowoyak fahk: ‘Pa ngwe nohfohn, Pahpah George!’
“[George] srolah liki wackuhn ah, lahfuhsack ke pahol kihtin fohkfohk kahsruhp, fohkfohk suklac el luhngse yohk, na … acn lucng ke soko beet, na el liye ke kihtin pacl akucl ke orekma lal, oacna lan tiac luhlahlfongi muhtahl.
“Na [el] muhta fin yol in acn lucng ke beet uh—mukul se inge suc use nuh lohm ah ahkosr sin mwet el luhngse in puckpucki ke lwen na ohnkohsr, oraclah pohk in mas, puck luhf, ac finne kahsruh nuknuk in puckpuck an—mwet usrnguck se inge tiac wetok, tiac pac wact nuhtok, tiac pac ahlohloh ke mukwikwi kweok inge—muhta ke yol in acn lucng ke beet ac tuhng oacna kihtin tuhlihk.
“Na el tuyak, elah muhtahl, … ngwetwack nuh inkuhsrao, ac fahk: ‘Kuloh, Pahpah, ke elders ke ward lasr uh..’”6
Ahok, kuloh nuh sin God ke mwet ke pristut ac ke kuhlwacnsap elos ac inge use in tahpuhk kais sie ac sucu ac in akiyac Zion.
Prestuhnsi Se Met, U luhn Mwet Sap Singucul Luo, ac Prestuhnsi luhn Itngucul tuh nuhnkuh ke ikihlyuck inge ke sie puhlan pacl. Ke pruhe yohk, lohacng in lutlut ke pwelucng luhn ma sihmlac ke u luhn pristut, ac ahkkweyelah lah pa inge luhngse luhn Leum, kuht fahsr nuh met ke insese ke ma se ma pwacye step se pac nuh mwet in ikacslah fohlohkyak se inge. Kolyuck luhn Leum kahlwem, ac nga engan kac, ke nga fahkwack mwe loh Kacl. Pristut Lal, ac akmuhsralah lom nuhke pristut sacn, ke inen Jisus Kraist, amen.