Kraist Leum El Moulyak Mihsenge

Tamuhlwel ac tahmtahel sacohk luhk, ke tuhlihk nahtuhsr ah fuhsr, nga fahk nuh selos sramsram luhn tuhlihk ac on nuh selos, on oacna “Kraist Leum El Moulyak Mihsenge.”¹ Kuhtuh pacl nga ahkpwacr ac ahollah kahs nuh kac uh: Pa inge pacl in mutullac—hallelujah. Tuhlihk nahtuhsr kwacna sa mutullac; tuh elos etuh lah nga fin pahngon muh elos mutullac, ngwac tui on.

Kahs—kuh kahs luhk—tiac kuh in ahkuhtweyac wo puhla luhk ke Prestuhn Russell M. Nelson el tuh sruokyac pouk ke luhngse, Susan sacohk kiyuck siskuck, ac tahfwelah pahng muhtahl se inge sin Leum ma ahkpuhsisacye ac oruh nga tuhng pacl puhkantwen ke lwen inge.

Ke Sahpuht in Istuh se inge, nga ke engan onkihn, “Alleluia.” On luhn Mwet Lahngo moulyak lasr luhn luhngse in molwelah² ahkfuhlwactye akwuck tuhkweni (ma kapsre kuht nuh sin God ac sie sin sie) ac Iwaclah luhn Jisus Kraist (ma kahsruh kuht in tilac mwet ma luhngse ma luhn facluh ac lohacng nuh ke kolyuck luhn Nguhn Muhtahl³).

Tuhkweni, olwelah lasr ac Iwaclah luhn Mwet Lahng lasr ahkkweye ac ahkfuhlwactye. Tuhkweni, olwelah lasr kahsruh kuht in sruokyac ma wo ac fuhlwelah ma koluk. Tuhkeni, olwelah lasr ahkwoye, karihngihn, ahkmuhtahlye, molikuhtlac.

Mwet Pahluh Joseph Smith el fahk lah sahp luhman sie mwe luti fokoko ma kuh sramsram kac—kuh se ma kuh in suhmuhslah kuh siliyac fin facluh ac siliyac inkuhsrao. Tuhsruhk, ke puhluhn pacl nuhkwewa fin facluh, ke kuhtwena pacl ma Leum El sang pristut nuh sin sie mukul ke fwackyuck pwacye, kuh u in mukul se, kuh se inge tuh utuckyang.⁴

Ac oacyacpac mihsenge. Olwelah ac akwuck muhtahl, wacngihn ke acn sahyac, eisyuck ke lohm muhtahl 159 luhn Leum ke muhtuhn facl 43. Mwe insewowo uliyucklac tuhkuh sin ki luhn pristut, mwe luti, ac wal fohlohkihnyucklac, wiwina luhlahlfongi lasr, mwe insewowo lasr, ac olwelah luhn Nguhn Muhtahl Lal, nuh sesr ke fihl se inge, ke pacl inge ac nwe tohk ma pahtpaht.

Tamuhlwel ac tahmtahel ke muhtuhn facl, mwet, ac kahs nuhkwewa, ke Alu lasr ma som nuh ke facluh nohfohn, kuloh nuh suwohs kwewa ke kowos moulkihn luhlahlfongi, finsrak, ac luhngse ke ma nuhkwewa kowos oruh. Kuloh nuh suwohs ke kowos tuhkweni nwekyucklac ke wosasuc fohlohkihnyuckyak ac luhlahlfongi.

Tamuhlwel ac tahmtahel sacohk, kuht mas se fana sie sin sie. Kuht kuh in “ma sefannalac ke luhngse,”⁵ ke ma nuhkwewa ac ke acn nuhkwewa.⁶ Oacna Leum Jisus El suli kais sie sesr, kuhtwena kuht oasr, kuhtwena oruh lasr, nuhnak muhnahs “tuhkuh ac liye.” ⁷

Lwen se inge ke inse puhsisacl nga olwelah kuhiyacn nguhnihk nohfohn,⁸ kuhtwena ohiac ma ac kuh in tuhkuh, nuh sin Mwet Lahngo luhk, nuh sin Susan wowo kiyuck ac sucu lasr, ac nuh sin Tamuhlwel wiyuck, ac nuh suwohs kais sie, tamuhlwel ac tahmtahel wowo luhk.

Ma nwacsnwacs ac ma pahtpaht nuhkwewa pa infulwen ma pwacye luhn God Pahpah luhngse Tuhmasr ac Wen Nahtuhl, Jisus Kraist, ac ke Iwaclah Lal, ahkpwacyeiyucklac sin Nguhn Muhtahl.⁹ Sacnri Istuh pa inge. Nga ahklohye ac fahkwack ke suwohs ke Kraist suc moul—El suc misac, puckpucki, ac moulyak ke lwen ahktolu, ac sowack nuh inkuhsrao.”¹⁰ El pa Alpha ac Omega¹¹—oasr yohrohsr ke muhtwacwacackiyac, El oasr yohrohsr nuh ke sahflah.

Nga fahkwack ke mwet pahluh ke lwen-sahflah inge, fahsr liki Mwet Pahluh Joseph Smith nuh ke Prestuhn Russell M. Nelson, suc kuht engan in ahkkweye. Ac oacna Tuhlihk srihsrihk onkihn, “Ukwe mwet pahluh; el etuh inkacnek pwacye sac.”¹² I fahkwack lah, oacna ma suhmuhslah palye, weacng Puk luhn Mormon, nga fahkwack muh tohkohsrahi luhn Leum sifilpac akwucki fin facluh, in ahkolah nuh ke Tuhkuh Ahkluo luhn Messiah.”¹³ Ke ine muhtahl luhn Jisus Kraist, amen.