Mwet Pahluh Kahskahs ke Kuh luhn Nguhn Muhtahl
In oasr mwet pahluh el sie akucl ke luhngse luhn God nuh sin tuhlihk Nahtuhl. Elos oruh etweyuck olwelah ac luhngse pwacye luhn God ac ke Jisus Kraist.
Tamuhlwel ac Tahmtahel sacohk wiyuck, kuhtwena acn kowos oasr we, nga kena in akacsruhi tarilacna fokoko luhk ke foht in ahkkweye lom ekweyah. Tuh nga puhla tiac kahskahs wo ac tiacna suhlahklahk oacna Moses, Nga ahkwoyeyuc sifacna ke kahs luhn Leum nuh sel:
“Su orala oalin mwet uh? Su oru mwet se in koflahna kaskas ku sulohngkas? Su orala mwet se in liyaten ku in kuh? Nga, Leum God.
“Fahsrot! Nga ac kasrekom in sramsram, ac nga ac fah fahk nu sum ma kom in fahk.” (Exodus 4:11–12; liye pac fuhs 10).
Nga oruh in puhla wo ke luhngse ac karihngihnyuck sin muhtwacn sacohk kiyuck. El pa mwe srihkasrak ke ma wo, luhngse, ac fahsr tukun suwos nuh sin Leum ac nuh sihk ac sucu luhk. Nga luhngse el ke insiyuck kwewa, ac nga tarilacna ke srihkasrak wo lal kacsr kwewa.
Tamuhlwel ac tahmtahel, nga kena fahkwelihk nuh suwos lah Prestuhn Russell M. Nelson el pa mwet pahluh luhn God fin facluh. Nga soenna liye mwet kuhlwacng kuh luhngse luhkwel na. Finne nga puhla suhfal ke pahng muhtahl se inge, kahs lal ac ngwetngwet kuhlwacng ke muhtahl ke el sang kunohkohn se inge oruh nga in puhla Mwet Lahngo El sruokyucwi ke luhngse. Kuloh nuh sum, Prestuhn Nelson. Nga ahkkweye kom ac nga luhngse kom.
Yac tiac sie mwe insewowo in oasr mwet pahluh, mwet palyei, ac mwet fahkwack fin facluh ke lwen inge suc kuht moulkihn, suc suk in etuh ke luhngse luhn Leum ac ukwe kac? Sie ma wo in etuh lah kuht tiac muhkwena fin facl se inge, finne ke mwe srihke kuht puhlakihn ke moul. In oasr mwet pahluh el sie akucl ke luhngse luhn God nuh sin tuhlihk Nahtuhl. Elos oruh etweyuck olwelah ac luhngse pwacye luhn God ac ke Jisus Kraist nuh sin mwet Lalos. Nga lotwelah ke ohiyac ingacn ke mwe srihkasrak luhk.
Yac 18 tari ah, muhtwacn kiyuck ac nga eis pahng ke telephone sel Prestuhn James E. Faust, Mwet in Kahsruh Ahkluo ke Prestuhnsi se Met. El pahng kuht in kuhlwacnsap ke prestuhn luhn misin ac companion fin acn Portugal. El fahk nuh sesr lah wik ohnkohsr muhkwena met liki kuht muhtwacack misin se. Finne kuht puhla suhfal ac tiac kuh, kuht insese pweng se. Mwe enenuh yohk srihpac emet lasr ke pacl ah pa in eis visa enenuh in kuhlwacnsap ke muhtuhnfacl sacn, ke puhlakihn met, kuht etuh lah ohiyac se in eis visa se enenuh mahlwem ohnkohsr nuh ke alkosr in sikyak.
Na Prestuhn Faust el siyuck sesr fin oasr luhlahlfongi lasr lah Leum El ac oraclah sie usrnguck ac lah kuht konwacack top nuh ke upac se luhn visa an. Top lasr pa ahok, luhlahp se, ac kuht muhtwacack na sa in oraclah ma enenuh ke. Kuht ahkolah pwacpa enenuh nuh ke visa, ac eislah tuhlihk tolu fuhsr nahtuhsr, ac som nuh ke lohm consulate suhlahklahk ke kuhiyacsr. Muhtwacn kuhlwacng se muhtwacta yohrohsr we. Ke el liyacack pwacpa lasr ac suk in kahlwem mukwikwi lasr fin acn Portugal, el forlah nuh yohrohsr ac siyucklah, “Pwacyena kowos fah kahsruh mwet ke muhtuhnfacl luhk?” Kuht topuk ke kuh ahok ac ahkkahlwemye lah kuht fah oruh oacna Jisus Kraist ac fahkwelihk Kacl ac misin muhtahl Lal fin facluh. Kuht fohlohk wik ahkosr tok, eisyuck visa lasr, ac som nuh ke misin lasr wik ohnkohsr tok, oacna mwet pahluh luhn Leum el siyuck sesr in oruh.
Tamuhlwel ac tahmtahel, ke insiyuck nohfohn, nga fahkwelihk lah mwet pahluh sramsram ke kuh luhn Nguhn Muhtahl. Elos fahkwelihk ke Kraist ac misin muhtahl Lal fin facluh. Elos ahkkahlwemye nuhnak ac insiyacn Leum ac pa pahngyak in luhman Lal ac luti kuht ma kuht enenuh in oruh in fohlohk moul yurin God ac Wen Nahtuhl, Jisus Kraist. Kuht insewowo ke kuht orekmakihnyuck luhlahlfongi lasr ac ukwe mwe luti lal. Ke ukwaclos, moul lasr fah enganwack ac fihsracsrlah, ma upac lasr ac fihsrwacsr in sruhkwack, ac kuht oraclah armor muhtahl ma raunikuhtlac ma karihngihn kuht liki mwe lain luhn mwet lokoalok luhn lwen lasr.
Ke lwen Istuh se inge nga fahkwelihk muhtahl lah Jisus Kraist El moulyak, El moul, ac El kol Alu Lal fin facluh ke mwet pahluh, mwet liye, ac mwet fahkwack Lal. Nga fahkwelihk lah El pa Mwet Lahngo ac Mwet Molwelah luhn facluh ac lah Sel kuht kuh in moklweyucklac ac ahkfuhlwactye nuh yurin God sacohk lasr. Nga luhngse El; Nga kena in Ukwacl ac oruh ma luhngse Lal ac eklac oacna El. Ke puhsisacl nga fahk ma inge ke inen muhtahl Leum Jisus Kraist, amen.