Kuhlwacnsap ke Kuh ac Wal luhn God

Tamuhlwel sacohk wiyuck, nga sang kuloh nuh suwos ke oaru lowos nuh sin Leum ac orekma muhtahl Lal. Ahkenganyeyuc nuh pwacye in oasr yuruwos. In ekihn Prestuhnsi se Met, kuht fahk kuloh nuh suwos ke pruhe lowos an ac orekma lowos in ahkkweyekuht. Kuht sruikihn moul lowos ac kuhlwacnsap lowos nuh sin Leum. Oaru lowos nuh ke ma kunowos ac kuhlwacnsap wowo lowos yohk srihpac ke kunohkohn lowos oacna ke kunohkohn lasr. Nuh ke moul fohn se ke kuhlwacnsap ke Alu se inge, nga etwaclah muh tiacna yohk srihpac acn ma kuht kuhlwacnsap nuh we. Ma yohk srihpac nuh sin Leum pa ohiyacn kuhlwacnsap lasr.

Nga tahfwelah kuloh na yohk luhk sel Prestuhn Thomas S. Monson, suc tuh oraclah srihkasrak wo se nuh sihk ke ahluhkwelah yac 50. Ac nuh sin mwet kahsruh lal ah, Prestuhn Henry B. Eyring ac Prestuhn Dieter F. Uchtdorf, nga tahfwelah kaksyak yohk. Nga kaksyakuhnuhlos ke kuhlwacnsap lalos nuh sin Leum ac nuh sin mwet pahluh Lal. Kwewana sin mwet kuhlwacnsap oaru inge eis kunohkohn sasuc. Elos kampare kuhlwacnsap ke kuh ac insacnacng. Nga ahkfuhlwactyaclos ac luhngse elos kwewana.

Mwe insewowo na yohk se in kuhlwacnsap ke Alu pwacye ac moul luhn Leum ke wal ac kuh Lal. Fohlohkihnyuckyak ke pristut luhn God, weacng ki luhn pristut uh, ikacslah nuh sin Mwet Luhlahlfongi nuhkwewa mwe insewowo luhn nguhn yohk e met. Kuht liye mwe insewowo ingacn som nuh muhtwacn, mukul, ac tuhlihk fin facluh nohfohn.

Kuht nuh liye muhtwacn luhlahlfongi suc kahlwem ke kuh ma wi kunohkohn lalos ac mwe sang muhtahl, kuh endowment, ac akwuck luhn tempuhl sahyac. Muhtwacn inge etuh in pahng fuhkah sin kuh luhn inkuhsrao in karihngihn ac ahkweye mukul tuhmwaclos, tuhlihk nahtuhlos, ac mwet sahyac elos luhngse. Elos muhtwacn fokoko ke nguhn suc kol, luti, ac kuhlwacnsap ke puhlaik ke kunohkohn lalos ke kuh ac wal luhn God!¹ Nga tarilacna nuh pwacye selos!

Oacpacna, kuht nuh liye mukul luhlahlfongi suc moul suwohs nuh ke mwe insewowo lalos oacna mwet suc sruok pristut. Elos kol ac kuhlwacnsap ke kihsac ke ohiyacn Leum ke luhngse, kuhlwacng, ac muhtweng. Elos ahkinsewowoye, kol, karihngihn, ac ahkweye mwet sahyac ke kuh luhn pristut ma elos sruok. Elos use mwe insewowo nuh sin mwet elos kuhlwacnsap ke elos karihngihn macruht ac sucu sifacna lalos. Elos lahfwekihn ma koluk ac oacna elder fokoko luhn Israel.² Nga tarilacna nuh pwacye selos!

Na, nga kuh in fahk sie mwe elyah? Pa inge: Puhslaclac sin tamuhlwel ac tahmtahel wiyacsr uh tiacna kahlwem nuh pwacye ke mwe luti luhn kuh ac wal luhn pristut. Elos moul oacna elos ke suk luhngse ac mwe sruhf sifacna lalos liki na in orekmakihn kuh luhn God in ahkinsewowoye tuhlihk Nahtuhl.

Nga sahngweng muh puhslaclac sin tamuhlwel ac tahmtahel lasr tiacna kahlwem ke mwe insewowo ma kuh in ma lalos.³ Kuhtuh sin tamuhlwel wiyacsr, ke srihkasrak, moul oacna elos tiacna kahlwem kalmacn pristut ac lah kuh in kahsruh elos fuhkah. Lwelah ngan usot kuhtuh srihkasrak nuh suwos.

Tiac paht tohkoh, nga wi toeni luhn sackracmacn sac ma ahwowo sasuc se ac ituckyang nuh sel ine se ac mwe insewowo luhn pahpah se. Pahpah fuhsr se ah el sruok ahwowo sacohk se ke pahol, ac usot nuh sel ine se, ac na oruh pruhe wowo se. Tuh el tiacna sang nuh sin tuhlihk sacn sie mwe insewowo. Ahwowo muhtwacn sacohk sacn tuh eis ine se tuh tiac mwe insewowo se! Elder wo sacn tiacna etuh ma siena liki sie pruhe ac sie mwe insewowo luhn pristut. Ke kuh ac wal luhn pristut lal, el kuh in ahkinsewowoye ahwowo se nahtuhl, tuh el tiacna. Mwe ahsor tuhel tiacna oruh!

Lwelah ngan fahk kuhtuh pac srihkasrak. Kuht etuh tamuhlwel suc ahkinsewowo tamuhlwel ke kunohkohn lalos oacna mwet luti ac mwet kol luhn Primary, Muhtwacn Fuhsr, kuh Rilif Sosaitituh tiacna ahkinsewowoyelos ke kuh in ahkfalye kunohkohn lalos. Eltahl na fahk kaiyuck kuh mwe luti. Kuht liye ke pahpah suwohs se suc tiacna sang mwe insewowo luhn pristut nuh sin muhtwacn kiyacl ac tuhlihk nahtuhl ke elos enenuh. Kuh luhn pristut fohlohkyak nuh facluh, tuh puhslaclac sin tamuhlwel ac tahmtahel uh som nuh ke ma upac koluk luhn moul se inge ac tiacna eis mwe insewowo luhn pristut na pwacye se. Suhpwacr nuh pwacye ma se inge! Sie ma suhpwacr kuht kuh in eislah.

Tamuhlwel, kuht sruok pristut muhtahl luhn God! Oasr yohrohsr wal Lal in ahkinsewowoye mwet Lal. Nuhnkuh na ke olwelah wowo se Leum el use nuh sesr ke El fahk lah kuhtwena mwet kuht ahkinsewowoye El ac ahkinsewowoye.”⁴ Mwe insewowo lasr in orekma ke inen Leum Jisus Kraist in ahkinsewowoye tuhlihk nuhtin God oacna kena Lal nuh selos. Prestuhn luhn stek ac pisap, nuhnak muhnahs oruh tuh mempucr nuhkwewa ke u in pristut ye kolyuck lowos kahlwem fuhkah in sang sie mwe insewowo luhn pristut—weacng suwohs sifacna ac ahkoo luhn nguhn ma enenweyuck in pahngon kuh luhn God.⁵

Nuh sin tamuhlwel nuhkwewa suc sruok pristut, nga suli kowos in kwacfe mempucr in liyacacng olwelah lalos, lalo ac pruhe, luti ma suhmuhslah, alu ke lohm tempuhl, ac kuhlwacnsap ke luhlahlfongi oacna mukul ac muhtwacn luhn God. Kuht kuh in kahsruh mwet nuhkwewa in liye ke luhlahlfongi lah ahkostwen ac suwohswohs fah kahsrelos puhla fototo nuh sin Jisus Kraist, lwelah elos in engankihn Nguhn Muhtahl in oasr yohrohlos ac puhla engan ke moul uh!

Ma yohk srihpac se luhn Alu pwacye ac moul luhn Leum fah Srihpac ac fah oasr orekma plwacniyuck, kolyuck se in kuhlwacnsap tuhlihk nuhtin God kwewa ac sucu lalos.⁶ Ke srihpen pa inge Alu Lal, kuht oacna mwet kuhlwacnsap lal fah kuhlwacnsap nuh sin kais sie, oacna El tuh oruh.⁷ Kuht fah kuhlwacnsap ke Inel, ke kuh ac wal Lal, ac ke luhngse kuhlwacng Lal.

Ma se sikyak nuh sihk yac 60 tari ac fin ac Boston luti yuc kuhiyacn kuhlwacnsap nuh sin kais sie. Ke pacl sacn nga sie resident surgeon kuh mwet luti ke laslas ke Massachusetts General Hospital—orekma lwen nuhkwewa, apkuhran fong nuhkwewa, ac apkuhran Sactte, Sacnri nuhkwewa. Srihklac pacl luhk yurun muhtwacn kiyuck, tuhlihk ahkosr nahtuhsr, ac mukwikwi luhn Alu uh. Tuhsruhk, prestuhn luhn pracns se lasr el pahngon yuc in muhtwacta nuh ke lohm sim Wilber ac Leonora Cox ke finsrak muh Tamuhlwel Cox kuh in sulpac fohlohk nuh ke Alu uh. El ac Leonora el siliyucklac tari ke lohm tempuhl.⁸ Tuh, Wilber el tiacna wi alu ke yac pucspucs.

Kawuck se luhk ac nga som nuh ke lohm selos. Ke kuht utyak nuh we, Tahmtahel Cox el pain kuht ke kuhlwacng,⁹ tuh Tamuhlwel Cox sa na som nuh ke infuhkihl se sahyac ac kaliyac sruhnguhl.

Nga som nuh ke sruhnguhl kauli se ac tongtonglac. Tukun pacl srihsrihk se, nga lohng “utyak.” Nga ikacslah sruhnguhl sac in konwaclwack Tamuhlwel Cox muhta sisken ke kuhfa luhn retio nahtuhl. El muhtwacwacack in sismohk. Kahlwem, muhtwacta se luhk tiacna arlac luhngseyuck.

Nga ngwet ke infuhkihl se ke lut ac fahk, “Tamuhlwel Cox, nga tuh luhngse in luti ke kain in orekma luhn retio. Sahp kom kuh in lutiyuc kac? Sislah koluk nga tiacna kuh in muhta paht ofong, tuh sahp nga kuh in fohlohk ke pacl fahsruh se?”

El ahlohloh ke pacl se, na el fahk muh ahok. Pa ingacn muhtwacwacack luhn kawuck na wowo se. Nga tuh fohlohk ac el lutiyuc. Nga muhtwacwacack in luhngse ac kaksakuhnuhl. Nuh ke muhtwacta tohk, woiyacn mukul se inge ahkkahlwemyeyuck. Kuht kawuck fokoko, ac muhtwacn kiyacsr pac. Na, tukun puhlan pacl, sucu luhk mukwilac nuh ke siena acn. Mwet kol ke acn sacn kampare in karihngihn sucu luhn Cox.¹⁰

Apkuhran yac alkosr tukun muhtwacta sacn, Stek luhn Boston oreklac.¹¹ Kowos kuh in nuhnkuh lah suc prestuhn luhn stek se met la? Ahok! Tamuhlwel Wilbur Cox! Ke yac tohkoh, el kuhlwacnsap pac oacna sie prestuhn luhn mission se ac prestuhn luhn tempuhl se.

Yac tohkoh, oacna sie mempucr ke U luhn Mwet Sap Singucul Luo, pahngonyuck nga in oraclah stek sasuc fin acn Sanpete County, Utah. Ke lohlngohk lasr, nga lut ac engan in sulpac ohsun nuh sin kawuck sacohk luhk Tamuhlwel Cox! Nga moklweyuck sin Nguhn Muhtahl in pahnglol oacna patriarch luhn stek sasuc se. Tukun nga akmuhsraellah, kuht sruok sie sin sie ac tuhng. Mwet ma wi kuht nuhnkuh lah efuh mukul mahtuh luo tuhng. Tuh kuht etuh. Ac Tahmtahel Cox el etuh. Sronin muhtahsr pa sronin muhtahsr luhn engan! Kuht tuh mihslac esam fuhfahsryucsr lasr luhn luhngse ac auliyak ma muhtwacwacack yac 30 tari ac, sie fong ke lohm selos.

Sramsram soko inge sonna tari. Sucu luhn Tamuhlwel ac Tahmtahel Cox puhseni weacng tuhlihk 3, na tuhlihk 20 nuhtin tuhlihk nahtuhlos, ac tuhlihk 54 nuhtin tuhlihk nuhtin tuhlihk nahtuhlos. Na wi pac missionary foko, mwet tausin ke tempuhl, ac mwet foko ma eis mwe insewowo luhn patriarch lalos sin pahol Wilber Cox. Ma wo El ac Leonora tuh oruh fah ahkwot in kahsruh fihl puhkantwen fin facluh.

Ma sikyak nuh sin Wilbur ac Leonora Cox sikyak wik nuhkwewa—nga finsrak, lwen nuhkwewa—ke Alu se inge. Mwet kuhlwacnsap oaru luhn Leum Jisus Kraist oruh orekma Lal, ke kuh ac wal Lal.

Tamuhlwel, oasr sruhnguhl kuht kuh in ikacslah, mwe insewowo luhn pristut kuht kuh in sang, at ma kuht kuh in onwelah, ma toasr kuht kuh in sruhkwack, luhlahlfongi kuht kuh in ahkkweye, moul kuht kuh in molwelah, ac engan ma kuht kuh in us nuh ke lohm sin Mwet Luhlahlfongi ke Lwen Sahflah—ma nuhkwewa ke srihpen kuht sruok pristut luhn God. Kuht pa mukul ma “pahngyak ac ahkoeyucklac e ke na pwelucng luhn facluh in fal nuh ke etuh na met luhn God, ke srihpen luhlahlfongi yohk [lasr],” in oruh orekma se inge.¹²

Ofong nga suli kowos in pwacye tuyak yuruk oacna un tamuhlwel wolacna se. Ke nga fahk inen u luhn pristut lowos, nuhnak muhnahs tuyak ac kampare in tu. Tikin an, nuhnak muhnahs tuyak! Titsucr, tuyak! Prist! Pisap! Elder! Prist Fuhlwact! Patriarch! Mwet Itngucul! Mwet Sap!

Na, tamuhlwel, kuh kowos kuh in tu na ac wi choir se lasr in onkihn fuhs tolu luhn “Rise Up, O Men of God”?¹³ Ke kowos on, nuhnkuh ke kunohkohn lowos oacna un mwet mweun luhn God in ahkolah facluh nuh ke Tuhkuh Ahkluo luhn Leum. Pa inge sap lasr. Pa inge mwe insewowo lasr. Nga fahkwack ma inge ke inen Jisus Kraist, amen.