Siepacna Lwen

Kuhtuh yac somlah, kawuck se luhk oswelah ahwowo kahto se inel pa Brigham. Tukun isuslac lal, etweyuck muh oasr mas lal Brigham pahngpahng Hunter syndrome, ma kalmac muh Brigham elac moul ke moul fototo. Sie lwen ke Brigham ac sucu lal muhtwacta ke acn luhn tempuhl, Brigham el fahk kahs inge, pacl luo, “Siepacna lwen.” Lwen se tohk ah, Brigham el misac.

Nga tuh muhtwacta kuclyuck se lal Brigham pacl ekahsr ah, ac kais sie pacl, nga motko ke kahs “siepacna lwen.” Nga nuhnkuh lah meac kalmac, meac ac sikyak ke moul luhk nga fin etuh lah lwen sefanna luhlah ngan moul. Ngwac luhngse fuhkah muhtwacn kiyuck, tuhlihk nuhtihk, ac mwet sahyac? Fuhkah luhpan muhtweng ac kuhlwacng luhk? Ngwac karihngihn monuk fuhkah? Fuhkah oaru luhk in pruhe ac riti ma suhmuhslah? Nga muh ke sie ohiyac kuht ac puhlakihn ke sie pacl acsmak in “lwen sefanna luhlah” —acsmaklac in etuh muh kuht in karihngihn wo pacl lasr.

Ke Wuhlweacng Mahtuh kuht riti sramsram lal Hezekiah, tohkohsrah luhn Juda. Mwet pahluh Isaiah el fahkwack nuh sel Hezekiah lah moul lal Hezekiah apkuhran tari. Ke el luhng kahs luhn mwet pahluh, Hezekiah el muhtwacwacack in pruhe, nguhsr, ac tuhng mwemwelihllac. Ke pacl sacn, God  El sang yac 15 nuh ke moul lal Hezekiah. (Liye Isaiah 38:1–5.)

Fin fwackyuck nuh sesr muh pacl na fototo kuht in moul, sahp kuht pacna ac nguhsr ke lwen in moul ke srihpen ma kuht tiacna oruh kuh ma kuht ac eklac.

Oacna sie pacl an, Leum, ke lahlmwetmwet Lal, sulaclah in use nuh sesr kais sie, ma se ma kuht kuh in luhlahlfongi kac: oasr nuh sesr sie “mihsenge” in moulkihn, ac yohk srihpac in wo ohiyac lwen se lasr uh pa kena se in kihsackuhnlah.

Leum el fahk muh pacl lasr ingena pahngpahng today nwe ke na tuhkuh luhn Wen nuhtin Mwet, ac fah sie lwen in kihsackuhnlah (liye D&C 64:23; ituckyang wo nuh ke).

Kahs se kihsac ke kahs English tuhkuh ke kahs Latin se sacer, ma kalmac “muhtahl,” facere, ma kalmac “in oraclah,” ma tuhkweni kalmac in ahkmuhtahlye, in ahkfuhlwactye.

“Kihsac uh use mwe insewowo luhn inkuhsrao” (“Praise to the Man,” Hymns, no. 27).

Kihsac ac sang nuh sin lwen lasr kalmac ac mwe insewowo ke ohiyac fuhkah?

Ma se met, kihsac sifacna ahkweye kuht ac sang kalmac nuh ke ma kuht kihsackuhnlah.

Kuhtuh yac tari ac ke Sacnri in lalo ah, ninac mahtuh se tuhkuh nuh met ah ac fahkwack luhlahlfongi lal. El muhta ke siti se pahngpahng Iquitos, ma oasr ke Amazon fin acn Peru. El fahk nuh sesr lah e ke pacl luhn pacptais lal me, oasr kena lal in eis akwuck ke tempuhl acn Lima, Peru. El oaru in sang sie tahfuh singucul lal ac sefiyac mani na srihk lal ke yac pucspucs.

Engan lal in som nuh ke lohm tempuhl ac eis akwuck muhtahl we ahkkahlwemyeyuck ke kahs inge: “Mihsenge nga kuh in fahk muh nga puhla ahkolah in som nuh ke mwe lohsrlohsr ah. Nga pa engan emet fin facluh; nga sefiyac mani uh, ke luhpan pacl na loeloes, in muhtwacta lohm tempuhl, ac tukun lwen 7 ke infacl ac ao 18 ke bas ah, nga tari oasr ke lohm sin Leum. Ke nga som liki acn muhtahl sacn, nga fahk nuh sihk sifacna, tukun ma nuhkwewa ma nga kihsackuhnlah in som nuh ke lohm tempuhl, nga fah tiacna srihkkihn akwuck nuhkwewa nga oraclah; ac fah eis pacl luhk. Olwelah na yohk srihpac pa inge!”

Nga etwaclah ke ninac wowo se inge lah kihsac sifacna pa sie kuh sacohk nuh pwacye ma kol nuhnak ac sulaclah lasr. Kihsac sifacna kol mukwikwi lasr, olwelah lasr, ac sang kalmac nuh ke ma muhtahl.

Ahkluo, ke kuht kihsackuhnlah ke mwet sahyac, ac mwet sahyac kihsackuhnlah sesr, mwe insewowo tuhkuh nuh sin kwewana.

Ke nga lutlut in sie dentist, ohiyacn mani uh ke acn sesr ah ahksuhpwacrye nuh pwacye. Srihkkihnyucklac luhn sacohkiyacn mani uh srihklac kuhtuh ke kais sie lwen.

Nga esam yac se ke nga apkuhran in muhtwacwacack lutlut in laslas luhn dentist. Nga enenuh in moli mwe laslas ma enenweyuck met liki nga muhtwacwacack in lutlut. Pahpah ninac luhk tuh sefiyac mani nuh kac. Tuh sie fong sie ma ahklutye sikyak. Kuht som in moli mwe laslas ah, na kuht etwacack muh luhpan mani  in moli mwe laslas ah ingena fal in moli ipin mwe laslas srihsrihk se na—ac wacngihn sahyac. Kuht fohlohk nuh lohm ah tiacna moli kuhtwena ma ac ahsor insiyacsr in nuhnkuh muh wacngihn srihpen lutlut luhk. Tuhsruhk, ninac kiyuck fahk nuh sihk, “Taylor, tuhkuh nuh yuruk; lwelah kuht in som.”

Na kuht tuh som nuh ke siti ah ke acn ma oasr acn pucspucs in moli ac kuhka ma sacohk. Ke kuht tuhkuh nuh ke sie stohah, ninac kiyuck el eislah liki puhs se lal ah mwe nahweyuck kohl sacohk se ma sihmlac nuh kac, “Nuh sin muhtwacn sacohk nuhtihk sin pahpah tomom.” Pa mwe nahweyuck se ma pahpah mahtuh nuhtihk el sang nuh sel ke lwen luhlahp lal. Na, ke nga liye, el kuhkwackuhnlah.

Ke el eis mani, el fahk nuh sihk, “Fin oasr ma se ma nga etuh kac, kom ac sie dentist. Som ac moli mwe laslas nuhkwewa ma kom enenuh.” Na, kom kuh in nuhnkuh lah nga kain in mwet lutlut fuhkah ke pacl sacn me? Nga ke in mwet lutlut wo emet ac sa ahksahfyelah lutlut luhk ke srihpen nga etuh yohk kalmeiyacn kihsac lal el oraclah keik.

Nga etwaclah muh kihsac ma mwet ma kuht luhngse oruh kacsr kuh in ahksasucye kuht oacna kof ohyucu ke acn fol. Kain kihsac inge use mihslac ac kuh.

Ahktolu, kuhtwena kihsac kuh oruh srihklac kapsreyucklac nuh ke kihsac luhn Wen nuhtin God.

Kuh fuhkah luhpan sacohkiyacn finne mwe nahweyuck kohl sacohk se fin kapsreyuck nuh ke kihsac luhn Wen nuhtin God. Kuht kuh in ahkfuhlwactye fuhkah kihsac ma pahtpaht se ingacn? Kais sie lwen kuht kuh in esam lah oasr siepacna lwen kuht in moul ac luhlahlfongi. Amulek el tuh luti: “Ahok, nga kena tuh kowos in tuhkuh ac tiac sifilpac ahkkwekweye insiowos; tuh liye, pa inge pacl ac lwen in molwelah lowos; ac ke ma inge, kowos fin auliyak ac tiac ahkkwekweye insiowos, kihtinmisenge fah plwacn wolacna luhn molwelah fah utuhkoht nuh suwos.” (Alma 34:31). Kuh ke kahs sahyac, kuht fin fuhlwelah nuh sin Leum kihsac luhn inse muhsahl ac toasr in nguhn, sa na mwe insewowo luhn plwacn in molwelah fah tuhkuh nuh ke moul lasr.

Plwacn in molwelah kuh in sikyak ke srihpen kihsac luhn Jesus Christ. El sifacna ahkuhtweyac lah kihsac Lal oruh El, finne God, fuhlwact emet, in rarrar ke srihpen kweok, srah lal in tuhkuh liki pat srihksrihk nuhkwewa lal, ac kweok ke kwewana mahno Lal ac nguhn Lal, ac siyuck tuh El tiac eis kuhp mwen sac, ac ahksrihkyeyucklac (liye (D&C 19:18).

Ac ke srihpen kihsac se inge, tukun kuht ukwe ohiyacn auliyak pwacye, kuht in muh kuh in puhla toasriyacn tahfonglac ac ma koluk lasr sruhkyuckyak. Ke pwacyeiyac, mwacta, mwekihn, kweok, ahsor, ac srihkkihnyuck sesr sifacna aholyucklac nuh nuhnak nwacsnwacs, engan, pwacr, ac finsrak.

Oacyacpac, ke kuht ahkfuhlwactye ac sruikihn kihsac Lal, kuht kuh in eis kena na yohk se in ahkwoye kuht sifacna oacna tuhlihk nuhtin God, kahingkuhnlah ma koluk, ac karihngihn olwelah lasr wo likina met ah.

Na, oacna Enos ke el eis nuhnak muhnahs ke ma koluk lal, kuht kuh in puhla kena se in kihsackihn kuht lac sifacna ac suk woiyacn tamuhlwel ac tahmtahel wiyacsr (liye Enos 1:9). Ac kuht ac fah kena yohk ke “siepacna lwen” in ukwe mwe solsol ma Prestuhn Howard W. Hunter el acse nuh sesr ke el fahk: “Ahkmisyelah fohs. Sulpac sokwack kawuck mahtuh se. Tohllah suhlahlahlfongi ac ahollah ke luhlahlfongi. … Sramsram ke kuhlwacng. Ahkweye mwet fuhsr. Ahkkahlwemye akawucki lom ke kahs ac mukwikwi. Karihngihn olwelah se. Sislah nuhnak koluk. Sang nuhnak muhnahs nuh sin mwet lokoalok se lom. Fahk sislah koluk. Srihke in kahlwem. Nuhnkuh ke ma kom enenuh sin mwet sahyac. Karihngihn met ke mwet sahyac. Mukwikwi ke kuhlwacng. Mukwikwi ke luhngse. Isrwacsr. Fahk kuloh lom. Pain mwet sac. Ahkenganye insiacn tuhlihk se. … Fahkwack luhngse lom ac sulpacna fahk. (Teachings of Presidents of the Church: Howard W. Hunter [2015], 32; tuhkuh sin “What We Think Christmas Is,” McCall’s, Dec. 1959, 82–83).

Lwelah kuht in oraclah lwen lasr ke kain mukwikwi ingacn ac kuh ma kihsac lasr sifacna ac kihsac ma kuht oraclah kuh eis sin mwet sahyac use nuh sesr. Ac ke ohiyac sacohk se, lwelah kuh in engankihn mihslac ac engan ma kihsac luhn Wen Kuloh Sefanna use nuh sesr; ahok, mihslac sac ma ahkuhtweyucki kuh ke riti lah Adam el puhtatlac tuh mwet uh in kuh in moul, ac mwet uh in moul—kom moul—tuh kom in kuh in engan (liye 2 Nephi 2:25). Engan se ingacn pa engan pwacye ma kihsackuhnlah ac Iwaclah luhn Mwet Lahngo Jisus Kraist kuh in use.

Pa pruhe luhk tuh kuht in ukwe El, lah kuht luhlahlfongi El, lah kuh luhngse El, ac lah kuht puhla luhngse ma ahkkahlwemyeyuck sin kihsac Lal pacl nuhkwewa kuht kuh in moul siepac lwen. Ke inen Jisus Kraist, amen.