Luhngse Suwohs: Akucl Pwacye luhn Mwet Tuhma Lutlut Pwacye nuhkwewa luhn Jisus Kraist
Wosasuc luhn Jisus Kraist pa oan infuwacn luhngse luhn Pahpah ac Mwet Lahngo nuh sesr ac luhngse lasr nuh Selos ac nuh sin sie sin sie.
Kuht luhngse ac ahsrwelah Prestuhn Thomas S. Monson, ac kuht luhngse ac ahkkweyaclah Prestuhn Russell M. Nelson. Prestuhn Nelson el arulacna sacohk nuh sihk.
Ke nga pahpah fuhsr se ah, tuhlihk mukul srihsrihk se nahtuhsr, suc yac limekohsr, fohlohk nuh lohm ah liki lutlut ac sie lwen ac siyuck sin ninac kiyacl, “Orekma fuhkah pahpah el oruh?” Na el fahk lah mwet sasuc ke kuhlahs lal ah muhtwacwacack in amaci ke orekma luhn pahpah tuhmwaclos. Sie fahk muh pahpah tuhmwacl ah el mwet kol se ke city police, na sie sahyac engan in fahk lah pahpah tuhmwacl ah pa mwet kol fuhlwact se ke sie orekma luhlahp.
Na ke siyuckyuck sel ke pahpah tuhmwacl, wen nuhtihk el puhsisacl in fahk, “Pahpah tuhmuhk el orekma ke ohfohs in kampiutucr se.” Na, akihlen lah top lal tiacna ahkpwacrye yohk kawuck srihsrihk sasuc lal ah, el sang weacng, “ Ac oacyacpac, pahpah tuhmuhk ah pa mwet kol fuhlwact ke kuhsrao.”
Nga muh pa ingacns ahflahiyacn sramsram sac.
Nga fahk nuh sin muhtwacn kiyuck, “Pacl in lotwel kuhtuh ip yohk ke plwacn luhn molwelah ac suc mwet kol na pwacye uh.”
Tuh ke kuht lotwelah tuhlihk nahtuhsr plwacn luhn molwelah, luhngse lalos nuh sin Pahpah Lucng ac nuh sin Mwet Lahngo kapwack ke elos etwaclah lah pa plwacn ke luhngse uh. Wosasuc luhn Jisus Kraist El pa an infulwacn luhngse luhn Pahpah ac Mwet Lahngo nuh sesr ac luhngse lasr nuh Selos ac nuh sin kais sie sahyac.
Elder Jeffrey R. Holland el fahk: “Masap yohk se emet ma kuhpahsr ke ma pahtpaht nuhkwewa pa luhngse God ke kuhiyac, nuhnak ac nguhna, ac fokoko lasr kwewa—pa ingacn ma sap yohk se emet. Tuh ma pwacye yohk se emet nuh tok ma pahtpaht nuhkwewa pa God El luhngse kuht ke kuhiyac, nuhnak, nguhna, ac kuh Lal kwewa. Luhngse se ingacn pa ip yohk nuh tok ma pahtpaht uh, ac El fah ip yohk ke moul lasr lwen nuh kwewa.”1
Ekihn ip yohk se ke moul lasr lwen nuhkwewa, luhngse suwohs pa sie ma enenuh nuh sin mwet tuhma lutlut pwacye nuhkwewa luhn Jisus Kraist uh.
Mwet pahluh Mormon el luti, “Ohinge, mwet lili sacohk luhk, pruhe nuh sin Pahpah ke kuhiyacn insiowos nohfohn, tuh kowos in kuh in seseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist.”2
Luhngse pwacye pa akucl pwacye luhn mwet tuhma lutlut pwacye nuhkwewa luhn Jisus Kraist.
Mwet tuhma lutlut pwacye luhngse in kuhlwacnsap. Elos etuh lah kahsruh pa sie liye wo ke luhngse ac sie olwelah elos orwaclah ke pacpataislac.3 Sahyacn pahng in kuhlwacnsap lalos ke Alu kuh orekma lalos ke kamuniti, elos puhla kapwack ke kena luhn luhngse ac kuhlwacnsuhpuh Leum ac kais sie sahyac.
Mwet tuhma lutlut pwacye uh luhngse in nuhnak muhnahs. Elos etuh lah Iwaclah luhn Mwet Lahngo nwacnwack kwewa ma koluk ac tahfonglac luhn kais sie sesr. Elos etuh lah luhpah ma El moli pa “molo ac weacng nuh kac.” Nguhnin tax, molo, luhpah, ac mwe ahktoasrye mwe taptap nuh ke ma koluk, tahfonglac, kuh orekma koluk nuhkwewa oasr kac. Mwet tuhma lutlut pwacye el sa in nuhnak muhnahs ac sa in siyuck ke nuhnakmuhnahs.
Tamuhlwel ac tahmtahel sacohk wiyuck, fin kom tikuclkucl in suk kuh in nuhnak muhnahs, nimet nuhnkuh ma mwet sahyac elos oruh nuh sum, tuh nuhnkuh ke ma Mwet Lahngo El oruh nuh sum, ac kom fah konwacack mihs ke mwe insewowo luhn molwelah ke Iwaclah Lal.
Mwet tuhma lutlut pwacye luhngse sang moul lalos nuh sin Leum ke mihs ke insiyaclos. Elos puhsisacl ac ahkostwen mweyen elos luhngse El. Oasr luhlahlfongi lalos in oaru in eis luhngse Lal, tiac ke ma El oruh muhkwena tuhsruhk lah fuhkah ac ngac El oruh uh. Mwet tuhma lutlut pwacye se etuh lah mwe insewowo pwacye el tiac pacl nuhkwewa ma elos luhngse tuh ma Leum El luhngse nuh selos.
Mwet tuhma lutlut pwacye se luhngse Leum yohk liki na facluh ac fokoko ac tu na kuh ke luhlahlfongi lalos. Elos fokoko ac tu na kuh ke facluh ekyek ac fohs se inge. Mwet tuhma lutlut pwacye se luhngse lohng puhsren Nguhn ac mwet pahluh ac tiac na fohs ke puhsra luhn facluh. Mwet tuhma lutlut pwacye se luhngse muhta yen muhtahl ac luhngse in oruh muhtahl acn elos muhta kac. Acn nuh kwewa elos som nuh we, elos us luhngse luhn Leum ac mihs nuh insiyacn mwet sahyac. Mwet tuhma lutlut pwacye se luhngse in “tu ke acn muhtahl,”4 ac luhngse in oruh acn elos tu we in muhtahl. Ke elos luhngse ac sruokyac olwelah lalos, insiyaclos ahksasucyeyuck ac ohiyaclos sifacna eklac.
Luhngse suwos pa akucl pwacye luhn mwet tuhma lutlut nuh kwewa luhn Jisus Kraist
Nga lotwelah ke luhngse muhtahl sin ninac kiyuck. El tuh tiacna mempucr ke Alu uh.
Sie lwen ah, yac puhs somlah, nga muhtwacta yurin ninac kiyuck, suc mas cancer. Nga etuh lah lac misac, tuh nga nuhnak lah el kweok. Nga tiac fahk kuhtwena ma, tuh akihlenyuck wo, el fahk, “Nga liye lah kom nuhnak.”
Na ke mwe lut luhk, el siyuck sihk ke sie puhsra muhnahs, “Kom kuh in lutiyuc lah nga ac pruhe fuhkah? Nga ke pruhe keim. Nga etuh kom muhtwacwacack fahk ke, ‘Pahpah Sacohk Tuhmasr Inkuhsrao,’ tuh mac nga enenuh in fahk?”
Ke nga sikuck muhtuhnte sisken mwe an lal ac el pruhe keik, nga puhla luhngse se nga soenna puhlakihn. Fihsrwacsr, pwacye, luhngse suwos. Tuhsruhk el tiacna etuh ke plwacn in molwelah, ke insiyacl oasr plwacn lal sifacna ke luhngse, plwacn se ke luhngse luhn ninac se nuh sin tuhlihk mukul nahtuhl. El ngalyak yohk, ac srihke in konwacack kuh nuhkwewa in pruhe. Nga tuh lohngwack puhsra srihsrihk, tuhsruhk nga puhla na pwacye luhngse lal.
Nga esam nuhnkuh. “Kuh sie mwet ma kweok yohk ac kuh in pruhe ke sie mwet sahyac fuhkah? El pa enenuh uh.”
Na top sac tuhkuh kahlwem ke nuhnak luhk: luhngse suwos. El luhgnse nga yohk nuh ke el muhlkuhnuhllah sifacna. Ke pacl upac yohk lal, el luhngse nga yohk luhkwel sifacna.
Ingena, tamuhlwel ac tahmtahel sacohk wiyuck, yac tiac pa inge ma Mwet Lahngo El oruh? Ahok, ke liye yohk ac nuh tok ma pahtpaht. Tuh ke kweok yohk Lal, ke imac Gethsemane in fong sac, El pa suc enenuh kahsruh, kweok ke sie atac ma kuht tiac kuh in nuhnkuh kuh etuh. Ma yohksrihpac pa, El Muhlkuhnuhllah sifacna ac pruhe kacsr ne ke El molwelah ke luhpah fohn se. El kuh in oruh fuhkah kac? Srihpen luhngse suwos Lal nuh sin Pahpah, suc Suhpwacl ma, ac nuh sesr. El luhngse Pahpah ac kuht yohk Luhkwel.
El moli ke kuhtuh ma El soenna orwaclah. El moli ma koluk ma El tiac oruh. Efuh? Luhngse Suwos. Moli luhpah fohnlah, El oasr ke acn se ma use nuh sesr mwe insewowo ke ma El molwelah kac, fin kuht fah auliyak. Efuh El use ma se inge? Sulpacna, ac pacl nuhkwewa luhngse suwos.
Luhngse suwos pa akucl pwacye luhn mwet tuhma lutlut pwacye nuhkwewa luhn Jisus Kraist.
Prestuhn Thomas S. Monson el fahk: “Nga finsrak kuht fah muhtwacwacack ingena. Ke lwen pwacye se, in salkweack luhngse lasr nuh sin tuhlihk nuhtin God, finne elos mempucr ke sucu lasr, kawuck lasr, mwet asruoki se, kuh mwet tiac etweyuck se. Ke kuht tuyak ke kais sie lututacng, kuht enenuh in sulaclah in topuk ke luhngse ac kuhlwacng ke oacna sie ma sikyak.”5
Tamuhlwel ac tahmtahel, wosasuc luhn Jisus Kraist pa sie wosasuc luhn luhngse. Sie masap yohk pa ma ke luhngse. Nuh sihk, inkaiyacn srihpen wosasuc ma ke luhngse. Luhngse luhn Pahpah, suc kihsackuhnlah Wen Nahtuhl kacsr nohfohn. Luhngse luhn Mwet Lahngo, suc kihsaclah nuh sesr kwewa. Luhngse luhn sie ninac kuh sie pahpah suc fah sang oacna sie ma nuh sin tuhlihk nuhtin muhtwacn kuh mukul sacn. Luhngse lalos suc puhsisacl in kuhlwacnsap ac tiac kahlwem nuh sin inkaiyacsr tuh etweyuck sin Leum. Luhngse lalos suc nuhnak muhnahs ke ma nuh kwewa ac pacl nuh kwewa. Luhngse luhn mwet suc sang yohk liki ma elos eis.
Nga luhngse Pahpah tuhmuhk Inkuhsrao. Nga luhngse Mwet Lahngo luhk. Nga luhngse wosasuc uh. Nga luhngse Alu uh. Nga luhngse sucu luhk. Nga luhngse moul wolacna se inge. Nuh sihk, luhngse suwos pa srihpen am nuhkwewa.
Nga finsrak lwen in acsmakihn se ke Srihpsrihpyak luhn Mwet Lahngo fah sie lwen in ahksasucye nguhn nuh sin kais sie sesr. Nga finsrak lwen in muhtwacwacack ke sesseslah ke luhngse se pa inge, ip yohk ke moul lasr lwen nuh kwewa.
Nga finsrak insiyacsr fah sesseslah ke luhngse suwohs luhn Kraist, akucl pwacye luhn mwet tuhma lutlut nuhkwewa luhn Jisus Kraist. Pa mwe pruhe luhk ke inen Jisus Kraist, amacn.