Na Cava e Kauti Iko mai ki Rexburg?

Ni oti e vica sagavulu na yabaki noqu vakaitikotiko voli ena veivanua era lailai kina na lewe ni Lotu, keirau qai toki kei na watiqu ki na dua na itikotiko mai Rexburg, Idaho e Amerika, ka rua walega na matavuvale erau sega ni lewenilotu. E ka ni kalougata vei keitou me keitou vakaitikotiko voleka ki na dua vei rau.

A kotiva tiko nodratou lomanibai o tamadratou ena matai ni gauna keitou curu yani kina ki na neitou itikotiko. Keirau lako takoso yani kei na watiqu me keitou veikilai. Niu dodoka yani na ligaqu, au taroga sara, “Ia na cava sa dou sa toki mai kina vakamatavuvale ki Rexburg?”

E sauma o koya, “na noqu cakacaka—ka keitou vakasaqara vakatabakidua e dua na tauni e gadrevi me vakaveikilaitaki vei Karisito.”

Au vakila ni vaka me sova e mataqu e dua na vokete wai batabata, ia au mani matadredredre ga. Au sa mani nanuma ena gauna oya veitalia na veika e tukuna se cakava na neitou itokani e yasanivale, keitou na yaco me itokani vinaka duadua eratou se qai bau sotava na matavuvale oqo. Keitou na tovolea me keitou dau yalovinaka, loloma ena sala daumaka kecega me vaka na iVakabula ena veigauna keitou veitaratara kina kei ratou.

Ena loma ni walu na yabaki ka tarava keitou dau qarava vata na matavuvale e rua e vuqa sara na itaviqaravi. E dau sureti ka tiko na tinadratou ena itaviqaravi ni iSoqosoqo ni Veivukei. A sureti au kei ira tale e vuqa na itokani Yalododonu Edaidai ki na dua na soqo me baleti ira na marama lotu Vakarisito ka cicivaka na nona lotu. Keirau a sureti kei watiqu ki na nodratou danisi kei na rogo tabapiano nei luvedrau. E dau okati na nodratou matavuvale ki na vakatakakana kei na veisoqo ni marau vakaitikotiko. Ka keirau dau qiriti mai vei iratou na luvedrau qase cake ni ratou vinakata me ratou vodo ki vale mai vanua ni cakacaka ka sega ni rawa ni tarai rau na nodratou itubutubu.

Erau lomaleqa na itubutubu de ratou na taleitaki ira vakalevu cake tale na Yalododonu Edaidai o ira na luvedrau, rau mani sega ni vakatarai rau na luvedrau tagane me rau curu ki na parokaramu ni Sikauti. Ia e dau laurai na neitou vale me vanua taqomaki vinaka, ka dau vakatarai vei iratou na luvedrau me ratou mai qito kina ni ratou gade mai na makubui keirau.

Ena veigauna kece erau dau tovolea kina na neitou itokani e yasana kadua me ratou “vakacala eso na neitou ivakarau,” keitou dau vakananuma vei iratou ni keitou rokova vakalevu sara na nodratou vakabauta kei na ivakarau ni nodratou bula kei na veisusu vei ira na luvedrau. Keirau dau qai tukuna ni keirau namaka na vakarokoroko vata oya ki na neitou vakabauta, ka ni yavutaki talega ena nona ivakavuvuli na iVakabula.

Ni tovolea o tinadratou me vakatitobutaka na neitou duidui, me kua ni kosovi rawa ena nona tukuna ni o ira na Yalododonu Edaidai era vakabauta e “duatani na Jisu,” au vakananuma vua ni keirau vakabauta vata na Nona vakalou ka Luvena lomani na Kalou. Oti keirau sa mai marautaka vata e dua na isema ni veiwekani vinaka ka kamikamica.

Eratou a toki yani na nodratou matavuvale ka ratou sega ni curu ki na Lotu. Ia kevaka e rawa ni ratou tukuna, “Keitou a bula maliwai ira na Momani; era tamata dau vakarokoroko ka yalodina,” au vakabauta ni keitou a qaqa ena neitou sasaga me keitou itokani vinaka kei na neitou vukei iratou me ratou raici ira vakararama na Yalododonu Edaidai.