Veivakasama ni Koniferedi Raraba

Ni vo tiko e 15 na siga me tekivu na koniferedi raraba, keitou sa dau vakaliliga vakavuvale na ivakatakarakara ni kena vakaraitaki ni sa na vakarau tekivu na “Kilakila mada mai se o Cei ena Lakomai kina Vakayakavi?” Keitou sa qai kuria na kedra itaba na parofita, daurairai kei na dauvakatakila mai na veikoniferedi sa oti me vaka e volai tu ena kena mekasini ni Lotu.

Au a vakavakarau ena noqu vakasaqara se o cei na parofita me keitou na kidavaka ena bogi o ya. Ena so na gauna au dau kunea e so na ka ena neitou loma ni vale ka na via matataka toka na veika au sa kila ka qai biuta koto e dua na peleti. Ena gauna ni vakayakavi, niu dau talanoataka na italanoa ni veika au sa biuta koto ena peleti, era tou qai dau vakilakila e vale se o cei ka tukuni tiko. Ena so tale na gauna, au dau talanoataka e dua se rua na italanoa e tukuna na parofita ena koniferedi ka se qai oti koto ga yani ki liu.

Au kurabui ena veika eratou nanuma tu na luvequ baleta na parofita kei na iapositolo, kau kila ni veika rawarawa vakaoqo ena tara cake na noqu lomana kei na ka au kila me baleti ira na turaga kilai levu oqo.

Ena nodrau a sikova na neitou koniferedi ni iteki o Elder Neil L. Andersen mai na Kuoramu ni iApositolo Le Tinikarua kei na watina o Kathy, e a qai talanoataka vei keimami o Sisita Andersen e dua na italanoa. Kaya o koya, ni ratou a dau tu mai Varanise, e a dau lavetaka o koya na vosa mai na koniferedi me baleti ira na luvena—wili kina o ira era se gone sara. E a kidroa ni raica ni sa tu sara ga e macawa isau ni iyaya ni lavelavetaki vaka oya. Sa qai lako mai vua na vakasama: “Na cava na kena isau vakailavo vei iko na nodra vosa na parofita?”

E tarai au sara ga na italanoa o ya, kau sa qai vakadeitaka mera na yadua kece sara na lewe ni noqu matavuvale na ilavelave ni vosa mai na koniferedi. Erau a maqusa sara ga kina na luvequ goneyalewa. Keitou vakayagataka ena gauna ni lotu vakamatavuvale kei na wiliki ni ivolanikalou. Au taletaka niu raica e dua na luvequ yalewa me wilika tiko na vosa ka makataka tiko ena peni-duiroka. Dua tale na luvequ se qai papitaiso walega oqo, e a kerei au me keirau wilika taurua ga na vosa.

Me tiki ni noqu lesoni ena iSoqosoqo ni Veivukei au a bolei ira na marama mera wilika na vosa mai na koniferedi ka se qai oti walega oqo, ka so era wilika na vosa qai so tale era sarava ena initaneti. Era a vakaraitaka e so tale na marama na nodra sa vakavakarau vinaka tale tu me baleta na koniferedi tarava.