“Na cava meu tukuna vei ira na sega ni lewenilotu era dau taroga se cava era sega ni bulataka tiko kina na noda ivakatagedegede eso na lewe ni Lotu?”

Sa na dua na ka talei kevaka mera bulataka vakataucoko na kosipeli na lewe ni Lotu yadua. Era na sega walega ni marautaka e vuqa na veivakalougatataki ki na nodra bula ia era na yaco talega mera ivakaraitaki cecere kivei ira era tiko voliti ira. Ia eda sa tamata walega, ka da sega ni yacova na ivakatagedegede eso. Na vuna levu duadua ni so era bulataka vakataucoko na kosipeli ni vakatauvatani kei ira eso o ya ni duidui na keda ituvaki ni saumaki mai kei na qaqaco ni noda ivakadinadina. E duidui na veivakatovolei eda sotava ka duidui na ivurevure kei na tamata era vukei keda.

O ira era sega ni lewenilotu era na rairai sega ni kila na vosa eso me vakataka na “saumaki mai” kei na “ivakadinadina,” ia era kila vakavinaka ni na digitaka ga na tamata yadua na sala mena bula kina. Sa rawa mo vakamacalataka ni sa lewa na Tamada Vakalomalagi me na yaco vakakina. Sa solia vei keda o Koya na galala me rawa ni da tubu vakayalo ni da digitaka na dodonu. Ia sa kila talega na Tamada Vakalomalagi ni tamata yadudua—vakavo ga o Jisu Karisito—ena caka cala, ka sa vakarautaka kina vei keda e dua na iVakabula. Ena vuku ni Veisorovaki, sa rawa meda veivutuni, ka vosoti, vuli mai na noda caka cala, ka tomana yani ki liu na noda bula.

Sa rawa talega mo vakamacalataka eda sega ni vakalewai ira era sega ni muria na ivakatagedegede ni Lotu. Ia, eda sasagataka meda vukei ira, kilai ira vakavinaka, ka vosoti ira tiko yani. Me vaka ni da sega ni tokona na ivalavala ca, eda sega ni cudruvi koya sa ivalavala ca (raica na Joni 8:11). Sa rawa vakaidina na veivutuni, vei keda kece sara.

Vakasaqaqara ena iVolanikalou

Na isau ni taro e kune ga ena ivolanikalou. Na gauna era sega kina ni maroroya na tamata na ivakaro, meda kakua sara ni vakalewai ira (raica na Maciu 7:1). E tukuni ena Roma 3:23 “Ni sa ivalavala ca ko ira kecega na tamata, ka ra sa sega ni yacova na ka e vakarokorokotaki kina na Kalou.” Ia, sa dina sara ni sa dodonu vei ira na lewe ni Lotu mera saga mera talairawarawa.

Madison M., yabaki 13, Texas, Amerika.

Vakavulica na veika me baleta na Veisorovaki

Ni ra cavuta na tamata na veika vakaoqori, ka sega ni vaqara na nona cala e dua na lewenilotu e sega ni muria na ivakaro, au dau vakayagataka meu vakavulica kina na veika e baleta na Veisorovaki. Au dau tukuna vei ira ni dina ga ni da Momani ia e sega ni kena ibalebale ni da sa uasivi duadua ka sa tu vei keda na Veisorovaki meda rawa ni veivutunitaka na noda ivalavala ca ka vakavinakataka na cala oqori. Oqo e dau tadolava na katuba eso ni vuqa tale na vakatataro.

Jayde H., yabaki 16, Oregon, Amerika

Era Vakavulica na iLiuliu ni Lotu Meda Caka Vinaka

Me vakataki ira na tamata kecega, era na dau sotava na lewe ni Lotu na ibolebole kei na veitemaki. Oi keda kece e tu na noda malumalumu, ia e sega ni kena ibalebale ni sega ni dina na Lotu oqo. Oqo na Lotu i Jisu Karisito, ka sa vukei ira tiko na tamata mera kila na kosipeli dina ka ciqoma na bula vakalagilagi. O koya sa itovo vakayago sa talaidredre ki na ivakaro (raica na Mosaia 3:19), ka sa sega ni cala kina na Lotu. Na Lotu e vakavulica vei keda meda cakacaka dodonu. Ia sa tu vei keda kece na digidigi.

Lavinia S., yabaki 19, Bulacan, Filipaini

Na iVakatagedegede sa iKoya Meda Marau Kina

Au kila vakavinaka na taro oqo baleta niu kila eso era a vakayacora na digidigi eso a kauti ira tani kina mai na kosipeli. Sa solia vei keda na Turaga na ivakaro meda bula marau kina ka “mera tucake tale mai na mate na tamata kecega ka rawata na bula tawamudu” (Mosese 1:39). E gadreva na Turaga meda lesu yani Vua; ia, e gadreva o Koya me sa noda ga na digidigi. Oqo na vuna eso era sega kina ni bulataka na noda ivakatagedegede. Sa vukei au sara ga na ivakatagedegede oqo baleta niu kila sa solia mai vei au oqo na Tamada Vakalomalagi meu lesu rawa kina Vua ka bula marau. Era sa ivakadinadina ni Nona lomani au.

Morgane D., yabaki 18, Languedoc-Roussillon, Varanise

Mo iVakaraitaki

Sa ka bibi na Lotu oqo ni na vukei keda meda vakayacora na ivakaro nei Tamada Vakalomalagi ka bula vata tale kei Koya. Ia e dina ga ni dua sa mai lewena na Lotu oqo e sega ni kena ibalebale ni na dau tamata vinaka tu ga o koya. Ni raica mada na noda vuravura nikua, vutucoqa ena ivalavala butobuto kei na veicacati, e dina ga ni vakatawani tu o vuravura mai vei ira era sa digitaka mera muri Jisu Karisito ena bula taumada. Na noqu nanuma ni ka vinaka duadua eda rawa ni cakava o ya meda ivakaraitaki vinaka vei ira na noda itokani.

Kaden S., yabaki 15, Utah, Amerika

Bulataka na Noda iVakatagedegede

Me vakataki ira ga na veimataisoqosoqo tale eso se matalotu, sai ira oqo era gugumtua cake sara se sega soti ni gugumatua. Sa dodonu ga meda bulataka tiko na noda ivakatagedegede ena kena vinaka eda rawata rawa ka nuitaka ka masulaka ni ra na vakayacora vakakina.

Maren S., yabaki 16, Arizona, Amerika

Masulaki Ira ka Sikovi Ira

O ira na lewenilotu era sega ni bulataka tiko na noda ivakatagedegede ena rairai sega ni vakaiusututaki tiko na nodra ivakadinadina vei Jisu Karisito. E dodonu meda masulaki ira, mera vakasaqara na veidusimaki ni Yalotabu ka rawa mera rawata e dua na nodra ivakadinadina vakai ira. E dodonu meda sikovi ira sa vakaoqo ka vukei ira mera lako vei Karisito.

Andrea C., yabaki 13, Lima, Peru