Ena Lesu Li Mai o Matthew?

A tiko ena neitou tabanalevu e dua na ilawalawa kaukauwa ni cauravou, ia na luvei keirau o Matthew a vagolei koya kivua e dua na tawalewenilotu ka sa duavata kei na nona gagadre ni motoka kei na veika vakamisini. Ka ni rarawa, ni cauravou oqo a lako mai ena dua na matavuvale ka sega ni vakabibitaka na lotu. E vakatara na nona itubutubu na gunu kei na vakatavako ena nodratou itikotiko ka sega ni vakabauta na bibi ni tiko savasava.

A rawata o Matthew na ivakatutu cecere ni Sikauti, ia a sega ni vakaitavi okoya ena soqoni ni soli cocovi baleta ni sa tarova na bulataki ni ivakarau tudei ni Sikauti. Au a soqona kece na nona icocovi ni Sikauti ka cakava e dua na kato ni ivakaraitaki. Au sa qai biuta tani, ena vakanuinui ni dua na siga ena yaga sara kina vua. Ena gauna esa yabaki 16 kina, sa vakatavako, gunu ka vakayagataki wainimate gaga voli o Matthew. A biu vuli mai okoya ka laki tiko vata kei na nona itokani yalewa. Keirau a sega ni raici koya me vica vata na yabaki.

Keirau sa mai lomaleqa. Keirau sega ni kila ke na rawa ni lesu tale mai ki na nona matavuvale kei na vakabauta, ia sa lomai keirau me sa vakamuri na ivakaraitaki nei Alama ena sasagataki ni luvena gonecodroi. E tomana tikoga o Alama me lomani luvena ka masulaka ena vakabauta ni na rawa “me vakatakilai vei koya na ka dina” (Mosaia 27:14).

Keirau a masumasu voli me na mai veitarovi na Turaga ena bula nei Matthew, ka keirau taura na veimadigi kece me vakaraitaka na loloma levu e tu vei keirau me baleti koya ena vosa kei na ivalavala. Ni sa dau lako mai i vale okoya, keirau sega ni dau tukuna e dua na ka me rawa ni vakatoka okoya me veivakacacani se vakalelewa. Keirau vakaraitaka tu ga na neirau reki ni raici koya.

Dua na siga a lako mai vale o Matthew ka tukuna ni vinakata me veivosaki. E tukuna okoya ni a sotava e dua na yalewa ena dua na soqo ni marau ka a vakatataro voli me baleta na Lotu. Ni bera na nona tukuna vua ni sa sega ni kila rawa na isaunitaro, sa tekivu babasika mai gusuna na vosa eso. E raici koya ni sauma tiko na veitaro i yalewa ena kena totolo ga ni nona vakatataro. A tukuna o Matthew ni sega ni nanuma ke a vulica na veika e a vosataka, ia e kila okoya ni dina na nona vosa. E vakananuma okoya na vuna e bula tiko kina ena ituvaki oya ni se vakabauta voli ga na kosipeli.

Ni oti e tolu na siga ni dikevi bula, esa nanuma okoya me vakanadakuya na bula e a tiko kina. E a lako mai vale okoya me taro veivuke ni tekivu vou tale.

E qirita e dua na tavalena o Matthew ena dua tale na tikina ka a lakosivita na dredre vataga oya ka kerea ke rawa ni tiko vata kei koya. A vakadonuya o tavalena, ka mani tekivu lako vata kei koya o Matthew ki na soqoni ni Lotu ka veisotari vata kei na bisopi me rawa ni vukei ena ituvatuva ni veivutuni. E a vakila na loloma kei na veitokoni ka yaco me bulabula ena Lotu.

Ena toso ni gauna, e a sotava okoya e dua na goneyalewa totoka ka buladodonu. Rau a veimusumusuki ka mani vakamau sara ena valetabu.

Ni sa sucu na imatai ni luvedrau, au a veisiko vei iratou ka kauta voli mai na kato ivakaraitaki au a cakava ni nona icocovi ni Sikauti. E a malaude okoya ka valiliga vakadokadoka ena dua na vanua dokai ena nona itikotiko.

A sega ni rairai kivua na luvei keirau e dua na agilosi, me vaka a yaco vei Alama Gone. Ia na lesu tale nei Matthew ki na dina esa ka ni veivakurabuitaki vaka oya.