Ena Moniti, na ika 15 ni Epereli, 2013, era a soqoni vata yani e sivia na 300 na lewe ni Lotu ena Delana mai Zaisan mai Ulaanbataar, e Mongolia, mera marautaka kina na yabaki 20 ni Lotu ena matanitu o ya. Era a lagasere kina e dua na matasere lewe 50, ka ra vakarorogo na ivavakoso ki na dua na vosa katoni nei Elder Neal A. Maxwell (1926–2004) ena nona a vakatabuya na vanua o Mongolia me vunautaki kina na kosipeli ena 1993.

E raica o Elder Tai Kwok Yuen, e dua na lewe taumada ni Mataveiliutaki ni iWasewase o Esia ka a tomani Elder Maxwell ki Mongolia ena 1993, ni sa “cakacaka vagumatua sara tiko na liga ni Turaga ena Nona tabaniwere oqo.”

A vakarautaki na itaviqaravi eso me vakatakilakilataki kina na soqo ni marau oqo ena loma taucoko ni macawa. Era a lako vata mai e 200 na daukaulotu oti ena dua na soqo ni duavata ni kaulotu. Era sa kaulotu oti e sivia na 1,000 na lewe i Mongolia—o ya mai na 1 ena veiyatini na lewenilotu e Mongolia. A vakayacori wavoki na soqo ni papitaiso e Mongolia ena yakavi ni Vakaraubuka; ka ra papitaiso kina e 24 na tamata ena siga o ya. A vosa o Mary N. Cook, ka se qai vakacegui walega oqo mai na mataveiliutaki raraba ni Goneyalewa, ena dua na nodra lotu na Goneyalewa, vata kei na dua na siga dolavi raraba ni tuva kawa ka vakaraitaki kina e dua na vidio e vakasalataka tiko na cakacaka vou ni Family Tree. A vakaraitaki talega ena soqo cecere na veika vakavanua ni nodra ivakarau ni bula totoka e Mongolia kei na nodra taledi e vuqa na lewe ni Lotu.

Ena 1 ni Me 2013, era a vakaitavi na lewe ni Lotu e Haiti, ena dua na veivakatorocaketaki ni tei kau ena vanua raraba. E dua na iwiliwili levu ni itei era a teivaki ena imatai ni siga ni veivakatorocaketaki oqo, ka na tarava mai e vuqa tale. Ni sa na mai cava na veivakatorocaketaki oqo, era sa na tubu tiko kina e rauta e 400,000 na vunikau e Haiti, oka kina na moli karokaro, moli gunuvi, niu, weleti, kei na oki.

E a volia na Lotu na itei ni kau oqo me tiki tiko ni kena tokoni tiko o Haiti ni kena vueti mai na vakacaca ni uneune. A veivakarautaki talega na veivakatorocaketaki oqo mera qarava na lewenilotu e dua na cakacaka mera marautaka kina na ika 30 ni yabaki ni Lotu ena matanitu yanuyanu oqo. Ena tolusagavulu na yabaki sa oti, a sikova yani o Peresitedi Thomas S. Monson ni se lewe tiko ni Kuoramu ni iApositolo Le Tinikarua, na vanua o Haiti ka vakatabuya me kaburaki kina na kosipeli vakalesuimai.

Ena gauna o ya a tiko kina mai Haiti o Elder Neil L. Andersen ena Kuoramu ni iApositolo Le Tinikarua ena kena marautaki na yabaki ni ivakananumi ka laki dabe vakatulewa ena kena cereki e dua na vatu ni ivakananumi e vakatakilakilataka na kena a tekivu na Lotu mai Haiti.

Ena Me ni 2013, a lolomataka kina na Lotu, mai na nona tabana ni veiqaravi raraba ni Dauloloma ni Yalododonu Edaidai, e sivia na dua na milioni na paodi bibi na kakana ki na Feeding America, na isoqosoqo levu duadua sega ni saumi baleti ira na via kana e Amerika. Na iloloma oqo era oka kina na kakana tawa i tini me vakataka na vuata, kakana draudrau, kei na bini, mera votai ki na matavuvale era vakaleqai tu na veimataitikotiko kei na veivale ni veivueti e Amerika taucoko.

E kaya o Bob Aiken, na peresitedi ka ivakalesilesi liu ni Feeding America, ni kakana sa lolomataki oqo era na vakarautaki kina e 625,000 na peleti kakana.