Muria na Mawe ni Yavana

iVakatakilakila

Christ walking with sheep in the background.

E vakauqeti keda na ivolanikalou meda vakataki Jisu Karisito ka meda “ia na ivalavala sa vaka na nona ivalavala” (1 Joni 2:6). E dau dredre toka meda taura na imatai ni ikalawa—vakabibi ni ko sega ni kila mo tekivu vakacava.

Ko na rawa ni vukei ena Vunautaka na Noqu Kosipeli: iDusidusi ki na Veiqaravi ni Daukaulotu. O na rairai nanuma beka ni dua walega na ivoladusidusi me baleti ira na daukaulotu tudei, ia sa dua dina na iyaya ni cakacaka cecere ena rawa ni vukei iko mo tekivutaka na nomu inaki mo vakataka na iVakabula. E tuvanaki tu na wase 6 me vukei iko mo kila vakavinaka ka vakayacora na ciwa na ivakarau Vakarisito.

Oqo e so na vakatutu ni kena rawa ni vakayagataki na Vunautaka na Noqu Kosipeli vakakina na ivolanikalou ni ko vakasaqara mo tauyavutaka na ivakarau Vakarisito:

• Ni ko sa tekivu, gole ki na iTaviqaravi ni iVakarau ena itinitini ni wase 6 ni Vunautaka na Noqu Kosipeli (draunipepa 141). Ena rawa ni vukei iko na itaviqaravi oqo mo vakadeitaka kina na nomu ivakarau cava o sa qaqaco tiko kina vakayalo kei na kena mo na cakacakataka.

• Ni ko sa cakava oti na itaviqaravi oqo, digitaka ena masumasu e dua na ivakarau mo na raica vakatabakidua. Sa rawa mo wilika na iwasewase ena wase 6 me baleta na ivakarau oqo.

• Tuvanaka na inakinaki digitaki, ka rawarawa ka na vukei iko mo tauyavutaka na ivakarau oqo. Vakarautaka e dua na gauna yalataki mo cakacakataka kina na nomu inaki oqo. Oti mo qai dikeva na veika o sa rawata. Me kena ivakaraitaki, kevaka o saga tiko mo dauloloma vakalevu cake, sa rawa mo nakinaki mo cavuta na vosa dodonu baleti tacimu se ganemu vakatolu ena dua na macawa. Ni mai cava na macawa, o na vakadikeva na nomu rawata na inakinaki o ya ka vakavinakataka eso na ka me na vukei iko mo na vinaka cake sara.

• E vakarautaka na Vunautaka na Noqu Kosipeli na ivolanikalou me vulici vata kei na ivakarau yadua. Sa rawa mo vulica ena masumasu na ivolanikalou sa volai tu ka vola na vakasama e lako mai vei iko ni ko wilika.

• Kerea me vukei iko na Tamada Vakalomalagi mo tauyavutaka e dua na ivakarau Vakarisito. Kerekere vakamatata mo vukei me vakaoqo, “Yalovinaka ni solia mai vei au na kaukauwa meu valuta rawa kina na noqu yalocudrucudru ni ratou taura na noqu iyaya na taciqu.” Na kena matata ga na nomu masu, na kena rawarawa vei iko mo kila ni sa sauma mai na Turaga.

Sa dua na ilakolako vakaituvatuva ka sasaga ni noda bula taucoko meda yaco meda vakataka na noda iVakabula, o Jisu Karisito. Eso na gauna ena rairai dredre sara ni vakatauvatani kei na fisiki ni gauna oqo. Ia kakua ni lomaleqa. Sa yalataka vei keda na Turaga: “Ia ko koya sa kunea na rarama ka tudei tikoga vua na Kalou, ena vakararamataki vakalevu; io ena tubu cake tikoga na nona rarama me yacova na siga lagilagi ko ya” (V&V 50:24). Ni da ciqoma, vulica, ka vakayagataka na rarama kei na dina ka tomana meda muria tiko na Kalou ena veisiga, eda sa rawa ni vakadeitaka ni da sa rawa ni vakataka na noda iVakabula, o Jisu Karisito.